TIENE vez, el maga escritor del Biblia ta repiti con el cuanto expresion. Considera con el tres cosas que posible ya causa kanila para hace se:

El tiempo cuando con ese ya escribi. Na Israel de antes, el mayoria del maga gente nuay personal copia del Ley. Mas mucho, ta puede lang sila oi con el Ley si ta le con este mientras tan junto-junto el nacion na tabernaculo. (Deut. 31:10-12) Asigurao, manada cosas el ta destorba kanila mientras parao sila ta oi por manada hora junto na manada gente. (Neh. 8:2, 3, 7) Na ese maga ocasion, mas facil para na maga gente que acorda con el maga texto y aplica con ese si ta repiti con el maga importante palabra. Asigurao que ya ayuda este kanila para acorda con el maga detalle del maga ley que ya dale kanila si Jehova.—Lev. 18:4-22; Deut. 5:1.

El estilo de escribida. Maga 10 por ciento del Biblia amo maga cancion—incluido el libro de Salmo, Cancion de Solomon y Lamentacion. Tiene maga cancion donde ta repiti con el cuanto maga palabra. Ta hace este claro si cosa el tema del cancion y ta ayuda con aquellos quien ta oi para acorda con el maga palabra. Por ejemplo, nota con el maga palabra na Salmo 115:9-11: “O Israel, confia con Jehova—Ele el ta ayuda kanila y el diila defensa. O familia de Aaron, confia con Jehova—Ele el ta ayuda kanila y el diila defensa. Ustedes quien ta tiene miedo con Jehova, confia con Jehova—Ele el ta ayuda kanila y el diila defensa.” Gendeh ba este maga palabra que ya repiti puede gayot ayuda para penetra el maga palabra na corazon y pensamiento de aquellos quien ta canta?

Para hace claro maga importante punto. Tiene vez, ta repiti el maga escritor del Biblia con el cuanto maga importante palabra. Por ejemplo, cuando ya dale instruccion si Jehova con el maga Israelita que no come sangre, manada beses ya repiti si Moises con el razon si porque se sila debe hace. Quierre hace claro el Dios que el vida talli na sangre, quierre decir el sangre ta representa con el vida. (Lev. 17:11, 14) Na uliji, cuando ya habla el maga apostoles y maga anciano na Jerusalem si cosa debe evita el maga Cristiano para puede hace alegre con Dios, ya menciona sila otravez que debe evita con el sangre.—Act. 15:20, 29.

Maskin pa el Biblia ta repiti con el cuanto maga palabra, no quierre si Jehova que pirmi ya lang kita repiti con el maga palabra alli na Biblia. Por ejemplo, si Jesus ya habla: “Si ta reza ustedes, no repiti que repiti.” (Mat. 6:7, El Nuevo Testamento) Despues, ya menciona le cuanto cosas que puede kita inclui na rezo que harmonia na voluntad del Dios. (Mat. 6:9-13) Poreso maskin gendeh kita ta repiti maga igual palabra na diaton maga rezo, puede kita reza acerca na un cosa o topico por manada beses.—Mat. 7:7-11.

Tiene maga buen razon si porque el Biblia ta repiti con el cuanto expresion. Uno este na maga manera del diaton Grande Instructor para beneficia kita na cosa le ta enseña kanaton.—Isa. 48:17, 18.