Ta hace claro el Biblia que ta puede predicta si Jehova con el futuro. (Isa. 45:21) Pero, gendeh este ta menciona con el todo detalle acerca si paquemodo y si cuando se ele ta hace o maskin si paquemodo de manada le quierre sabe acerca na futuro. Poreso, no sabe kita el todo acerca na abilidad de Jehova que predicta con el futuro. Pero tiene cuanto cosas que sabe kita.

Puede si Jehova hace maskin cosa que quierre le pero tiene vez, ta iscuji le que gendeh hace con ese. Por causa na de suyu incomparable sabeduria, puede le sabe con el maskin cosa le quierre. (Roma 11:33) Pero ciendo perfecto le ta puede controla con el de suyu mismo cuerpo, puede tambien le iscuji que gendeh sabe si cosa sucede.—Compara na Isaias 42:14.

Ta causa si Jehova para cumpli el de suyu voluntad. Cosa el coneccion de este na de suyu abilidad que predicta con el futuro? El Isaias 46:10 ta habla: “Desde na principio ta habla ya yo si cosa el resulta y desde antes pa, el maga cosas que nuay pa hace. Ta habla yo, ‘Hay cumpli el de mio decision y hace yo si cosa yo quierre.’”

Entonces, el un razon si porque si Jehova ta puede predicta con el futuro amo cay tiene le el poder para causa que sucede el maga cosas. Gendeh si Jehova necesita mira adelantao para sabe si cosa sucede na futuro—que dol ya sucede ya el todo maga suceso y tan repaso ya lang le con ese. Sino, puede decidi si Jehova que hay sucede el un cosa na especifico tiempo y causa con ese para sucede si llega ya ese tiempo.—Ex. 9:5, 6; Mat. 24:36; Act. 17:31.

Por causa con ese, ta usa el Biblia con el maga termino igual na “ya prepara” y “ya forma” para refiri si cosa ta hace si Jehova acerca na cuanto suceso na futuro. (2 Rey 19:25; ftn.) Este maga termino amo estaba na un palabra na original lengguaje que tiene coneccion na palabra que quierre decir “ollador.” (Jer. 18:4) Igual si paquemodo el un experto ollador puede moldia con el lodo pandayan para queda un bonito florero o vase, puede si Jehova moldia o controla con el maga cosas para cumpli el de suyu voluntad.—Ef. 1:11.

Ta permiti si Jehova con el maga gente que hace con el diila mismo decision. Gendeh le ta decidi si cosa sucede na vida del cada persona ni ta causa con el maga buen gente que hace un cosa que hay resulta na diila destruccion. Ta permiti le kanila que iscuji si cosa clase de vida sila quierre pero ta anima le kanila que iscuji si cosa el justo.

Considera con este dos ejemplo. El primer ejemplo tiene que hace na maga gente de Nineve. Ya predicta si Jehova que hay destroza con este ciudad por causa na diila maldad. Pero cuando ya arripinti el maga gente, “nuay mas [si Jehova] porsigui dale el castigo que ya habla le kanila.” (Jon. 3:1-10) Ya cambia el pensamiento de Jehova acerca na cosa le ya predicta cuando ya decidi cambia el maga de Nineve despues sila oi el aviso de Jehova.

El segundo ejemplo amo el profecia acerca na un persona que si Ciro quien hay libra con el maga Judio na pagka-cautivo y manda construi otravez con el templo de Jehova. (Isa. 44:26–45:4) Si Rey Ciro de Persia el ya cumpli con ese profecia. (Esd. 1:1-4) Pero, si Ciro gendeh ta adora con el verdadero Dios. Ya usa si Jehova con ele para cumpli con el profecia pero ya permiti Le con Ciro que decidi si con quien le hay adora.—Prov. 21:1.

Siempre, cuanto lang ese na maga cosas que ta considera si Jehova si ta predicta le acerca na futuro. Deverasan, gendeh kita completamente puede entende si paquemodo ta pensa y ta actua si Jehova. (Isa. 55:8, 9) Pero, el cosa ya revela si Jehova ta hace fuerte con el diaton confianza que hace le pirmi si cosa el justo—incluido ya si ta predicta le acerca na futuro.