Queda Alegre Mientras Ta Espera con Paciencia con Jehova
TA ESPERA ba tu con el tiempo que hay quita ya si Jehova con el todo maldad y hace ya nuevo con el todo cosas? (Rev. 21:1-5) Asigurao se! Pero, gendeh pirmi facil que continua espera con paciencia con Jehova, especialmente si ta enfrenta kita maga dificultad. Si nuay cumpli el cosa kita ta expecta, puede se hace luya con el diaton corazon.—Prov. 13:12.
Pero, quierre si Jehova que espera kita con paciencia que actua le na de suyu justo tiempo. Porque le quierre que hace kita se? Cosa puede ayuda kanaton para queda alegre mientras ta espera?
PORQUE QUIERRE SI JEHOVA QUE ESPERA KITA?
El Biblia ta habla: “Si Jehova con paciencia ta espera para dale mira favor con ustedes y hay levanta le para dale mira lastima con ustedes. Cay si Jehova amo un Dios de justicia. Alegre el todo quien ta continua espera con ele.” (Isa. 30:18) Ya escribi si Isaias con este maga palabra para na maga Judio que duro cabeza. (Isa. 30:1) Pero, este maga palabra ya dale esperanza con el maga fiel Judio. Y ta dale tambien este esperanza para na maga fiel siervo de Jehova ahora.
Entonces, debe kita espera con paciencia cay amo se el cosa tambien ta hace si Jehova. Tiene ya le el iscujido tiempo si cuando destroza con este daan sistema y ta espera le que llega ese dia y hora. (Mat. 24:36) Na ese tiempo, claro kita puede mira que falso el acusacion de Satanas con Jehova y con aquellos quien ta sigui con Ele. Hay destroza Le kanila pero hay “dale [Le] mira lastima” kanaton.
Mientras tanto, posible gendeh quita si Jehova con el diaton maga problema pero ta asigura le kanaton que puede kita queda alegre mientras ta espera. Como cosa ya habla si Isaias, puede kita queda alegre mientras ta espera con el un cosa que quierre gayot kita que sucede. (Isa. 30:18) a Paquemodo? Tiene cuatro cosas que puede ayuda kanaton.
SI PAQUEMODO QUEDA ALEGRE MIENTRAS TA ESPERA
Man focus na cosas positivo. Durante el entero vida de Rey David, ya puede le mira si paquemodo de grabe el maldad. (Sal. 37:35) Maskin pa ansina, ya escribi le: “Esta silencio adelante de Jehova y espera con ele con paciencia. No queda consumido con el gente quien ta puede hace con el de suyu maga mal plano.” (Sal. 37:7) Amo se el cosa ya hace si David. Yan focus le na promesa que hay salva con ele si Jehova. Y ya nota tambien le si paquemodo si Jehova ta bendici con ele. (Sal. 40:5) Si man focus tambien kita na maga positivo cosas en vez na maga negativo cosas que ta sucede alrededor kanaton, mas facil para kanaton que espera con Jehova.
Pirmi alaba con Jehova. El escritor del Salmo 71 que posible amo si David ya habla con Jehova: “Hay continua yo espera; hay omenta pa yo el de mio alabanza contigo.” (Sal. 71:14) Paquemodo le ya alaba con Jehova? Ya habla le con otro acerca con Jehova y ya canta maga cancion de alabanza para con Ele. (Sal. 71:16, 23) Igual con David, puede kita queda alegre mientras ta espera con Jehova. Ta alaba kita con ele na diaton ministerio, na cosa kita ta habla cada dia y na diaton maga cancion de adoranza. Si canta tu un Kingdom song, pruba man focus na bonito mensaje de este.
Permiti con el maga hermano y hermana que anima contigo. Cuando ya enfrenta si David maga dificultad, ya habla le con Jehova: “Adelante de aquellos quien leal contigo, hay esperanza yo na de tuyu nombre.” (Sal. 52:9) Puede tambien anima kanaton el maga hermano y hermana, gendeh lang durante na maga miting y ministerio sino maskin durante na maga recreacion.—Roma 1:11, 12.
Hace fuerte con el de tuyu esperanza. El Salmo 62:5 ya habla: “Silencio yo ta espera con Dios cay estaba con ele el de mio esperanza.” Bien importante que hace fuerte con el diaton esperanza especialmente si nuay llega el fin na tiempo que ta expecta kita con ese. Debe kita queda convincido que hay sucede el cosa ya promete si Jehova maskin pakilaya de tarda pa kita debe espera. Puede kita hace fuerte con el diaton esperanza si estudia kita con el Palabra del Dios—el maga profecia, el pagka-harmonia de este y con el maga detalle que ya revela si Jehova acerca con ele. (Sal. 1:2, 3) Mas pa, necesita kita continua “reza por medio del poder del Espiritu Santo” o sagrao espiritu para mentena el diaton buen relacion con Jehova mientras ta espera que cumpli el de suyu promesa de vida hasta para cuando.—Jud. 20, 21, El Nuevo Testamento.
Igual con Rey David, confia que ta vicia si Jehova con aquellos quien ta espera con Ele y ta dale Le mira el de suyu amor leal kanila. (Sal. 33:18, 22) Puede tu espera con paciencia con Jehova si man focus tu na maga positivo cosas na de tuyu vida, si alaba tu con ele, si permiti tu con el maga hermano y hermana que anima contigo y si continua tu hace fuerte con el de tuyu esperanza.
a El original palabra que yan translate “ta continua espera” quierre decir tambien “ta esperanza que sucede el un cosa.” Ta dale este mira que normal lang para kanaton que tene el deseo para termina el diaton sufrimiento.
