1. Desde antes pa, cosa conforme hace el maga siervo de Jehova?

 VALOROSO ba contigo el de tuyu relacion con Jehova? Asigurao se! Y gendeh tu solo. Desde antes, manada ya el ya sinti igual ansina. (Sal. 104:33, 34) Manada kanila el ya hace maga sacrificio para adora con Jehova. Ese el cosa ya hace el maga Nazareo na Israel de antes. Quien sila y cosa kita puede aprende na diila ejemplo?

2. (a) Quien el maga Nazareo? (Numero 6:1, 2) (b) Porque el cuanto Israelita ya iscuji queda Nazareo?

² El palabra “Nazareo” amo estaba na un Hebreo termino que quierre decir un persona que iscujido, separtao o dedicao para na un especial servicio. Este palabra ta refiri con el maga Israelita quien ya hace cuanto personal sacrificio para puede sirvi con Jehova na especial manera. Bajo na Ley que ya dale con el maga Israelita, el un hombre o un mujer puede hace un especial promesa con Jehova y iscuji queda un Nazareo por cuanto tiempo. a (Le con el Numero 6:1, 2.) Si hace le con ese sagrao promesa, debe le hace maga cosas que el otro maga Israelita gendeh necesita hace. Si ansina, porque man iscuji el un Israelita que queda Nazareo? Posible, ese Israelita ya sinti gayot grande amor para con Jehova y quierre dale mira el de suyu apresacion na maga bendicion que ya ricibi le.—Deut. 6:5; 16:17.

3. Na cosa manera semejante el maga siervo del Dios ahora na maga Nazareo?

 ³ Cuando “el Ley de Cristo” ya cambia con el Ley de Moises, ya termina tambien el arreglamiento de pagka-Nazareo. (Gal. 6:2; Roma 10:4) Pero igual na maga Nazareo, el maga siervo de Jehova ahora ta continua sirvi con ele con todo corazon, alma, pensamiento y fuerza. (Mar. 12:30) Ya promete kita que sirvi con Jehova cuando ya dedica kita con el diaton vida con ele. Para cumpli con ese promesa, debe kita hace el voluntad de Jehova y hace maga sacrificio. Si examina kita si paquemodo el maga Nazareo ya cumpli con el diila promesa, puede kita aprende maga importante leccion si paquemodo tambien kita puede cumpli con el diaton promesa. b (Mat. 16:24) Considera kita cuanto ejemplo.

CONFORME HACE MAGA SACRIFICIO

4. Asegun na Numero 6:3, 4, cosa sacrificio ya hace el maga Nazareo?

⁴ Le con el Numero 6:3, 4. El maga Nazareo gendeh debe toma maskin cosa alcoholico tomada y gendeh come maga comida igual na uvas y pasas. El otro maga gente ta puede toma y come con este maga comida ciendo nuay man cosa malo con ese. Gane, el Biblia ya habla que el “vino que ta hace alegre con el corazon del gente” un regalo estaba con Dios. (Sal. 104:14, 15) Pero el maga Nazareo conforme evita con ese maga comida maskin pa puede era se hace alegre kanila. c

5. Cosa maga sacrificio ya hace kanda Madián y Marcela y porque?

⁵ Igual con el maga Nazareo, ta hace tambien kita maga sacrificio para mas puede adora con Jehova. Considera con el ejemplo de Madián y Marcela. d Tiene comfortable vida este man maridable. Tiene bonito trabajo si Madián poreso ta puede sila queda na un bonito apartment. Pero, quierre sila hace mas na diila servicio con Jehova. Para sucede se, ya hace sila cuanto cambio na diila vida. “Ya menora kame con el diamon maga gasto,” ya habla sila. “Ya cambia kame na un mas diutay apartment y ya vende con el diamon coche.” Gendeh necesita hace kanda Madián y Marcela con este maga sacrificio pero ya hace  siempre sila con ese cay quierre sila hace mas na diila ministerio. Alegre sila y contento na diila maga decision.

6. Porque el maga Cristiano ahora ta hace maga sacrificio? (Mira tambien con el letrato.)

⁶ El maga Cristiano ahora alegre hace maga sacrificio para puede dale mas grande tiempo na maga teocratico actividad. (1 Cor. 9:3-6) Gendeh kanaton ta obliga si Jehova que hace con ese maga sacrificio; ni malo ese maga cosas. Por ejemplo, el cuanto ya decidi que gendeh tene bien bale casa, trabajo o cuida pet. Manada tambien el ya iscuji que gendeh anay casa o tene maga anak. El otro ya decidi que sirvi onde tiene mas grande necesidad, maskin pa queda sila lejos na diila maga familia y amigo. Manada kanaton el conforme hace con este maga sacrificio cay quierre kita dale con Jehova el diaton de con todo bueno. Puede tu asigura que ta aprecia gayot si Jehova con el maskin cosa sacrificio que ya iscuji tu hace, grande man o diutay, para puede sirvi con ele.—Heb. 6:10.

CONFORME QUEDA DIFERENTE

7. Porque posible dificil para na un Nazareo que cumpli con el de suyu promesa? (Numero 6:5) (Mira tambien con el letrato.)

⁷ Le con el Numero 6:5. Ya promete el maga Nazareo que gendeh sila curta diila pelo. Un manera se para dale mira que completamente sila ta somete con Jehova. Si el un Israelita por largo tiempo ya Nazareo, asigurao que largo el de suyu pelo y claro se puede nota el otro. Si aquellos alrededor con ele ta suporta con el de suyu decision que queda un Nazareo, posible mas facil para con ele que cumpli el de suyu promesa. Pero maka-triste, tiene maga tiempo de antes que el maga Israelita nuay aprecia o suporta con el maga Nazareo. Durante el tiempo de profeta Amos, el maga apostata Israelita “ya continua . . . dale vino con el maga Nazareo para toma,” posible para causa kanila que gendeh cumpli con el diila promesa que gendeh toma vino. (Amos 2:12) Posible tiene maga tiempo que necesita gayot grande coraje el un Nazareo para cumpli con el de suyu promesa y queda diferente con otro.

8. Paquemodo contigo ya anima el experiencia de Benjamin?

⁸ Na ayuda de Jehova, puede tambien kita tene coraje y queda diferente maskin pa huyain kita. Considera con el ejemplo de Benjamin, un diez año bata Testigo de Norway. Por causa na guerra na Ukraine, ya hace un program el diila escuela para dale mira el diila suporta. Ya habla con el maga bata que canta un cancion mientras mudao igual na color del bandera de Ukraine. Para evita participa con este nacionalistico ocasion, ya para si Benjamin  poco lejos na lugar onde con ese ya hace. Pero, ya mira con ele el un maestra y ya grita: “Vene qui man junto kanamon. Ta espera kame contigo!” Con coraje si Benjamin ya atraca con el maestra y ya habla: “Neutral yo y gendeh yo ta participa na maga actividad de politica. Gane, manada maga Testigo de Jehova el na preso ahora cay nuay sila participa na guerra.” Ya entende el maestra y nuay mas con ele forza participa. Pero el de suyu maga classmate ya pregunta con ele si porque le gendeh tan junto kanila. Ya nervia gayot si Benjamin y quierre ya era le llura pero con coraje le ya habla na entero clase el cosa le ya habla con el maestra. Despues de ese, ya cunta si Benjamin con el de suyu mayores que ya sinti le el ayuda de Jehova cuando ya defende le con el de suyu fe.

9. Na cosa manera kita puede hace alegre con el corazon de Jehova?

⁹ Cay ta hace kita con el voluntad de Jehova, bien diferente kita na otro maga gente. Necesita kita coraje na trabajo o na escuela para manda conoce que maga Testigo de Jehova kita. Mientras mas ta queda malo el custumbre del maga gente na este mundo, posible que mas man dificil kita sigui con el maga principio na Biblia y predica con otro. (2 Tim. 1:8; 3:13) Pero acorda que ta ‘hace kita alegre con el corazon’ de Jehova si con coraje kita ta esta diferente con aquellos quien gendeh ta sirvi con ele.—Prov. 27:11; Mal. 3:18.

CONTINUA HACE UNA CON JEHOVA

10. Na cosa manera un probanza para na maga Nazareo el cosa ya menciona na Numero 6:6, 7?

¹⁰ Le con el Numero 6:6, 7. El maga Nazareo gendeh puede anda cerca na maga muerto. Na diila tiempo, si tiene quien ya muri, necesita el maga gente atraca con el muerto. (Juan 19:39, 40; Act. 9:36-40) Poreso, bien dificil para na un Nazareo si ya muri el un miembro del de suyu familia. Maskin pa na bien dificil situacion el familia y dolorido, el maga Nazareo ta dale mira grande fe cay ta cumpli sila con el diila promesa. Asigurao que ya ayuda si Jehova con este maga fiel siervo para enfrenta con el diila maga dificultad.

11. Cosa debe determinao hace el un Cristiano si ta hace maga decision que envuelto el familia? (Mira tambien con el letrato.)

¹¹ Como maga Cristiano, importante kanaton el diaton dedicacion con Jehova. Como resulta, ta afecta se con el diaton maga decision acerca na diaton familia. Ta hace kita esfuerzo para dale el necesidad del diaton  familia. Pero, pirmi kita ta hace una con el voluntad de Jehova en vez na cosa sila quierre. (Mat. 10:35-37; 1 Tim. 5:8) Tiene vez, para puede hace alegre con Jehova, posible necesita kita hace maga decision que gendeh uyun el diaton familia.

12. Cuando ya enfrenta problema si Alexandru na de suyu familia, cosa le ya hace y cosa le nuay hace?

¹² Considera con el experiencia de Alexandru y del de suyu mujer, si Dorina. Despues sila man Bible study por un año, ya decidi si Dorina que gendeh mas continua y quierre le que descanza tambien si Alexandru. Calmao con ele ya habla si Alexandru que continua le man Bible study pero nuay quel gusta si Dorina y ya hace le manera para descanza el de suyu marido. Ya habla si Alexandru que ya pricura le entende con el cosa ta sinti el de suyu mujer pero gendeh quel facil para con ele. Tiene maga tiempo que cuando ya insulta y ya ultraja con ele si Dorina, dol quierre ya lang le descanza man Bible study. Pero ya continua siempre si Alexandru que hace una con Jehova y mientras ta hace se, ta continua le dale mira amor y respeto con el de suyu mujer. Por causa na de suyu buen ejemplo, ya motiva quel con Dorina para man Bible study otravez y ya bautiza le na uliji.—Mira con el video Alexandru y Dorina Văcar: “El Amor Paciencioso y Bueno” na serie “El Verdad Puede Cambia con el Vida” na jw.org.

13. Paquemodo kita dale mira el diaton amor con Jehova y na diaton familia?

¹³ Con Jehova ya origina el arreglamiento de familia y quierre le que tene kita un alegre familia. (Ef. 3:14, 15) Si quierre kita queda deverasan alegre, necesita kita hace con el maga cosas na manera de Jehova. Puede tu asigura que ta aprecia gayot si Jehova con el maga sacrificio que ta hace tu para adora con ele mientras ta cuida tu con el de tuyu familia y ta trata kanila con amor y respeto.—Roma 12:10.

ANIMA CON OTRO QUE IMITA CON EL MAGA NAZAREO

14. Con quien kita debe especialmente pricura anima?

¹⁴ El todo quien ta adora con Jehova ahora necesita queda preparao hace maga sacrificio por causa na diila amor para con ele. Tiene vez, gendeh se facil hace. Paquemodo kita puede ayuda con uno y otro que hace maga sacrificio para con Jehova? Por medio na diaton maga palabra que ta dale animo. (Job 16:5) Tiene ba na de ustedes congregacion el ta pricura hace simple con el diila vida para mas puede participa na maga teocratico actividad? Tiene ba tu conoce maga jovenes  quien con coraje ta esta diferente con otro na escuela maskin pa tan dificil sila hace con ese? Tiene ba maga Bible study y maga hermano y hermana quien tan dificil esta fiel por causa na oposicion na diila familia? Ojala hace kita el todo para anima con el diaton maga hermano y hermana, y dale mira que ta aprecia kita con el diila coraje y maga sacrificio.—Filem. 4, 5, 7.

15. Paquemodo el cuanto ya suporta con aquellos quien ta sirvi full-time na ministerio?

¹⁵ Tiene vez, posible puede kita dale practical ayuda con el diaton maga hermano y hermana quien ta sirvi full-time na ministerio. (Prov. 19:17; Heb. 13:16) Ese el cosa ya hace el un de edad hermana quien ta queda na Sri Lanka. Ya subi el de suyu pension y quierre le ayuda con el dos joven hermana que continua na diila pioneering maskin pa tan dificil sila na financial. Poreso, ya decidi le que dale un especifico cantidad de sen cada mes para ayuda na diila gasto na usada del telefono. Bonito gayot el cosa ya hace este hermana!

16. Cosa kita puede aprende na maga Nazareo de antes?

¹⁶ Asigurao que manada gayot kita cosa ya aprende na buen ejemplo que ya dale mira el maga Nazareo de antes. Pero, el promesa del maga Nazareo tiene tambien cosa ta enseña acerca con el diaton Tata na cielo, si Jehova. Sabe le que bien quierre kita hace alegre con ele y conforme kita hace maga sacrificio para puede cumpli con el diaton dedicacion. Ta dale le kanaton privilegio que dale mira con el diaton amor para con ele. (Prov. 23:15, 16; Mar. 10:28-30; 1 Juan 4:19) El arreglamiento de pagka-Nazareo ta dale mira que ta nota y ta aprecia si Jehova con el maga sacrificio que ta hace kita para sirvi con ele. Ojala queda kita determinao que continua sirvi con Jehova y dale con ele el diaton de con todo bueno.