YA PUEDE ba tu nota que manada del maga gente na mundo el ta pensa que debe kanila trata na especial manera o debe sigui con el cosa sila quierre cay tiene sila derecho? Y maskin ansina ya kanila ta trata, mas pa con ese el cosa sila quierre. Por causa se cay manada gente na ultimo maga dia el arogante y no sabe aprecia con el maga cosas que ta hace para kanila.—2 Tim. 3:2.

Pero desde antes pa, tiene ya ansina clase de custumbre el cuanto gente. Por ejemplo, quierre si Adan y Eva que sila mismo decidi si cosa el bueno o malo para kanila y ya tiene se mal resulta. El otro ejemplo amo si Ozias, un rey de Juda. Para con ele, tiene le el derecho para presenta incenso na templo maskin pa gendeh le quel debe para hace. (2 Cron. 26:18, 19) Ansina tambien el maga Fariseo y Saduceo. Ta pensa sila que debe kanila dale especial tratamiento el Dios cay maga descendiente sila de Abraham.—Mat. 3:9.

Manada tambien del maga gente ahora el arogante y ta pensa lang con el diila mismo cuerpo y posible kita copia con el diila custumbre. (Gal. 5:26) Baka pensa kita que debe kita ricibi con el un privilegio o debe kanaton trata na especial manera. Paquemodo kita evita que pensa ansina? Una, debe kita sabe si cosa el mirada de Jehova acerca con ese. Tiene dos principio na Biblia que puede ayuda kanaton.

Si Jehova el ta decidi si cosa kita debe ricibi. Considera con el cuanto ejemplo.

•   Adentro na familia, quierre si Jehova que sinti el marido con el respeto del de suyu mujer y sinti el mujer el amor del de suyu marido. (Ef. 5:33) Y quierre le que el romantico amor entre lang na man maridable. (1 Cor. 7:3) Debe obedece el maga anak con el diila mayores y debe sinti el maga anak que ta ama y ta suporta kanila el diila mayores.—2 Cor. 12:14; Ef. 6:2.

• Na congregacion, debe puede sinti el maga anciano que ta respeta kanila. (1 Tes. 5:12) Pero nuay sila derecho para domina con el diila maga hermano y hermana.—1 Ped. 5:2, 3.

• Ya dale el Dios derecho con el maga gobierno del gente para colecta impuesto y que respeta kanila el maga gente onde sila ta rula.—Roma 13:1, 6, 7.

Ta dale kanaton si Jehova mas pa na cosa kita conviene ricibi. Justo lang era que muri kita por causa na pecado que ya hereda kita. (Roma 6:23) Pero cay ta ama gayot kanaton si Jehova, ta dale le kanaton manada bendicion. (Sal. 103:10, 11) Ta hace le se gendeh cay conviene kita ricibi maga bendicion o privilegio sino cay bien bueno gayot le.—Roma 12:6-8; Ef. 2:8.

No pensa igual na maga gente na mundo. Baka gendeh kita ta puede nota que ta pensa ya gale kita que conviene kita ricibi mas pa que con otro. Ya dale mira si Jesus por medio na un ilustracion que facil lang para na un persona que pensa igual ansina. Na ilustracion, tiene maga trabajador ya trabaja entero dia y tiene tambien por un hora lang. Igual kanila todo ya paga un denario. Pero el primer grupo quien temprano ya principia trabaja ta pensa que debe sila ricibi mas grande sueldo. (Mat. 20:1-16) Na ese ilustracion, ya hace claro si Jesus que el de suyu maga siguidores debe queda contento na cosa el Dios ta dale kanila.

Aprecia con el cosa tu ta ricibi y queda contento. (1 Tes. 5:18) Imita con el buen ejemplo de apostol Pablo. Nuay le pidi con el maga hermano de Corinto que suporta con ele na material maskin pa tiene era le el derecho para hace se. (1 Cor. 9:11-14) Debe kita aprecia con el maskin cosa que ta dale kanaton y no forza o expecta con otro que dale cosas kanaton.

 Queda humilde. Si ta pensa el un persona que mas alto le que con otro, posible le principia pensa que debe le ricibi mas pa na cosa le tiene. El humildad puede ayuda kanaton para evita pensa ansina.

Un buen ejemplo si profeta Daniel quien ya dale mira humildad. Por causa na de suyu familia, ichura, saber y maga abilidad, puede era le pensa que justo lang que ricibi le maga privilegio y especial tratamiento. (Dan. 1:3, 4, 19, 20) Pero, ya esta humilde si Daniel y por causa con ese, ya gusta con ele si Jehova.—Dan. 2:30; 10:11, 12.

Ojala hace kita el todo para evita con el arogante custumbre que comon na mundo ahora. Y continua kita aprecia con el maskin cosa bendicion que ta dale kanaton si Jehova por causa na de suyu incomparable pagka-bueno.