Maga devoto Catolico kanda Mamang y Papang. Pero cuando ya aprende sila na Biblia que Jehova el nombre del Dios, ya queda sila maga activo Testigo de Jehova. Nuay mas ya hace si Papang maga imagen de Jesus. Sino, ya usa le con el de suyu abilidad como un carpintero para hace Kingdom Hall con el primer piso del diamon casa. Amo quel el primer Kingdom Hall na San Juan del Monte, un barangay na Manila, el centro ciudad del Pilipinas.

Ya nace yo del 1952. Mientras ta engranda yo, ya enseña conmigo el de mio mayores acerca con Jehova, igual na cosa sila ya hace na de mio cuatro mayor hermano y tres mayor hermana. Ya anima conmigo si Papang que le un capitulo de Biblia cada dia y ya usa le con el maga publicacion diaton para man Bible study conmigo. Tiene maga tiempo, ta invita el de mio mayores con el cuanto maga traveling overseer y maga hermano que estaba na branch que esta na diamon casa. El maga experiencia que ya relata este maga hermano ya motiva kanamon como un familia que hace prioridad con el ministerio na diamon vida.

Manada yo cosa ya aprende na ejemplo del de mio mayores quien ya esta gayot fiel con Jehova. Despues muri si Mamang por causa na enfermedad, yan pioneer kame junto de Papang del 1971. Pero del 1973, ya muri si Papang y 20 año pa lang yo aquel tiempo. Ya queda yo triste y ya sinti yo solo cay nuay mas ya el de mio mayores. Pero por causa na “asegurao” esperanza que ta dale el Biblia, ya puede yo esta fuerte na emocional y espiritual. (Heb. 6:19) Nuay dura despues muri si Papang, ya acepta yo con el assignment que sirvi como un special pioneer na Coron, un isla na provincia de Palawan.

Cuando ya llega yo na Coron, 21 año yo aquel tiempo. Cay ya engranda yo na ciudad, nuay yo expecta que tiene gale ansina lugar donde dificil el corriente, el agua y nuay tanto vehiculo. Maskin pa tiene alla cuanto maga hermano y hermana, nuay yo uban pioneer. Poreso tiene vez, solo-solo yo ta  predica. Na primer mes de mio alla, yan miss gayot yo con el de mio familia y maga amigo. Tiene maga noche, mientras tan tanga yo na maga estrellas na cielo, ta puede yo llura. Dol quierre yo deja ya lang con el de mio assignment y bolbe.

Durante na ese maga tiempo que ta sinti yo solo, ta reza yo con Jehova con todo corazon. Despues, ta pensa yo con el maga cosas que ya puede yo le na Biblia y na diaton maga publicacion que ta puede anima conmigo. Uno na maga texto que pirmi yo ta pensa amo el Salmo 19:14. Y ya realiza yo que si medita yo con el maga cosas que ta hace alegre con Jehova, igual na de suyu maga trabajo y calidad, hay queda le “el de mio Piedra y Rescatador.” Ya puede tambien ayuda conmigo el un articulo na Watchtower que tiene titulo “You Are Never Alone.” a Manada beses yo con ese ya le. Durante na ese maga tiempo que solo yo, dol aquel junto yo con Jehova y ta puede yo reza, estudia y medita.

Nuay dura despues yo llega na Coron, ya queda yo un anciano. Ciendo iyo lang el anciano, iyo el ta conduci cada semana con el Theocratic Ministry School, Service Meeting, Congregation Book Study y el Estudiada del El Torre de Guardia. Ta dale tambien yo discurso publico cada semana. Por causa con ese, nuay mas yo tiempo para sinti triste!

Ya tiene buen resulta el de mio ministerio na Coron. Gane, el cuanto del de mio maga Bible study ya bautiza na uliji. Pero, ya enfrenta tambien yo maga dificultad. Tiene vez, media dia yo ta camina para anda na teritorio y no sabe yo si onde yo esta pagka-denoche si llega yo alla. Incluido tambien na teritorio del congregacion el manada maga diutay-diutay isla. Para guinda alla, ta munta yo baroto. Maka-miedo quel cay fuerte el marijada y no sabe yo nada! Na todo ese dificultad, ya protege y ya sustene conmigo si Jehova. Ya realiza yo que ta prepara gale conmigo si Jehova para na maga mas grande dificultad na de mio sunod assignment.

Del 1978, yan assign conmigo na Papua New Guinea que puede mira arriba umpoco del Australia. Manada monte na Papua New Guinea. Ya espanta yo cay maskin maga tres millon lang el populacion, tiene alla mas de 800 lengguaje. Bueno ya lang, mayoria del maga gente sabe converza Melanesian Pidgin que mas conoce como Tok Pisin.

Del una, yan assign conmigo na un English congregation na Port Moresby. Pero nuay dura, ya cambia yo na un congregacion que Tok Pisin el lengguaje y ya estudia yo con ese lengguaje na un clase. Ta usa yo na predicacion con el cosa yo ta aprende. Por causa con ese, pronto yo ya aprende con ese lengguaje. Despues lang del cuanto tiempo, ya puede ya yo dale discurso publico na Tok Pisin. Pero ya espanta yo cay maskin nuay pa un año desde ya llega yo na Papua New Guinea, yan assign conmigo para sirvi como circuit overseer na maga congregacion que Tok Pisin el lengguaje.

Lejos-lejos el maga congregacion poreso necesita yo organiza manada asemblea de circuito y pirmi viaja. Del una, ya sinti yo solo cay nuevo para conmigo el lugar, el lengguaje y el cultura. Mas pa, si ta anda yo na maga congregacion, no puede yo viaja por medio de vehiculo por causa cay manada monte y nuay calzada onde para pasa. Poreso,  halos todo semana yo ta munta eroplano. Tiene vez, solo lang yo pasajero na un diutay y daan eroplano. Ya tiene gayot yo miedo, igual lang aquel cuando ta munta yo baroto!

Poco lang el tiene telefono aquel tiempo. Poreso, ta imbia yo carta para informa con el maga congregacion si cuando yo visita. Pero mas mucho, una pa yo ta llega que con el maga carta. Poreso, ta anda pa yo pregunta con el maga gente para incuntra con el maga hermano y hermana. Maskin pa ansina, si ta puede yo man junto kanila, ta puede yo mira que alegre sila que talla yo. Ta hace se acorda conmigo si porque yo ta hace este maga sacrificio. Ya puede gayot yo experiencia el suporta de Jehova na manada manera y ya queda mas fuerte el de mio relacion con ele.

Na primer visitada de mio na un isla que ta llama Bougainville, tiene un man maridable quien ya atraca conmigo. Tan smile sila y ya pregunta: “Ta acorda tu kanamon?” Ya acorda yo, ya puede yo predica kanila cuando primer vez yo ya llega na Port Moresby y ya puede kame man Bible study. Despues, ya pidi yo con el un hermano alla que continua con el diila estudiada. Ahora, bautizao ya sila! Uno se na manada bendicion que ya ricibi yo durante el de mio tres año na Papua New Guinea.

Antes yo sale na Coron del 1978, ya conoce yo con el un bonita hermana que si Adel. Ta sirvi le como un regular pioneer mientras ta hace engranda con el de suyu dos anak, si Samuel y Shirley. Puera con ese, ta cuida tambien le con el de suyu de edad nana. Del Mayo 1981, ya bira yo na Pilipinas y ya casa kame de Adel. Despues, ya sirvi kame como maga regular pioneer mientras ta cuida con el diamon familia.

Maskin pa tiene ya yo familia, ya tiene yo otravez el privilegio para sirvi como un special pioneer del 1983 y yan assign conmigo na isla de Linapacan na Palawan. Ya cambia kame todo del de mio familia para na aquel lugar donde nuay maga Testigo de Jehova. Despues del maga un año, ya muri el nana de Adel. Pero, ya esta kame ocupao na ministerio. Ya ayuda se kanamon na diamon tristeza. Manada kame ya puede conduci maga progresivo Bible study na Linapacan. Nuay dura, necesita ya kame un diutay Kingdom Hall. Poreso, ya construi kame. Despues lang del tres año desde ya llega kame na Linapacan, 110 ya el ta atende na Comemoracion y manada kanila el ya progresa para na bautismo.

Del 1986, yan assign conmigo na Culion, un isla donde ta esta el maga leproso. Despues del cuanto año, yan assign tambien con Adel como un special pioneer. Del una, tiene kame miedo predica con el maga leproso cay dol otro el diila ichura por causa con ese enfermedad. Pero, ya asigura kanamon el maga publisher alla que gendeh mas tanto maka-tapon el diila enfermedad cay ya cura ya kanila. Gane, el cuanto kanila ta atende na maga miting na casa del un hermana. Nuay dura, ya puede kame man adjust y ya puede kame mira que bien bonito man share con el esperanza na Biblia con este maga gente quien ya sinti que nuay queber kanila el Dios y el maga gente. Alegre gayot sila  sabe que llega el tiempo, hay tene sila perfecto salud.—Luc. 5:12, 13.

Paquemodo ya puede man adjust el diamon maga anak na Culion? Ya invita kame de Adel dos joven hermana de Coron que sigui kanamon para tiene uban el diamon maga anak. Productivo el ministerio de Samuel, Shirley y de este dos hermana. Sila el tan Bible study con el maga anak mientras kame de Adel el quien tan Bible study con el maga mayores. Tiene tiempo, 11 familia ya kame tan Bible study. Nuay dura, bien manada ya progresivo Bible study poreso ya puede kame forma un nuevo congregacion!

Del una, iyo lang el anciano alla. Poreso, ya pidi conmigo el branch office que conduci miting cada semana para na ocho publisher na Culion y despues, na otro nueve publisher na Marily, un barrio que tres hora de lejos si man viaje de baroto. Despues man miting na ese barrio, ta camina kame man familia por manada hora y ta pasa na maga monte para conduci maga Bible study na un barrio que ta llama Halsey.

Bien manada gente el ya guinda na verdad na Marily y na Halsey. Poreso, ya construi kame maga Kingdom Hall na ese dos lugar. Igual na Linapacan, mayoria del quien ya trabaja amo el maga hermano y maga interesao de alla y sila tambien el ya dale con el mayoria del maga materiales para na construida. El Kingdom Hall na Marily puede cabe 200 gente y facil lang con este man adjust para queda grande. Poreso, ya puede kame hace maga asemblea alla.

Del 1993 cuando grande ya el diamon maga anak, yan assign kanamon de Adel na circuit work na Pilipinas. Despues, del 2000, ya atende yo na Ministerial Training School para man train conmigo que queda un instructor na ese escuela. Ya sinti yo que gendeh yo cualificao para queda un instructor. Pero, pirmi conmigo ta anima si Adel. Ya hace le acorda conmigo que ayuda conmigo si Jehova para puede yo cumpli con este nuevo assignment. (Fil. 4:13) Ya puede le quel habla cay ele tambien ta puede cumpli con el de suyu assignment maskin pa tiene le problema na salud.

 Del 2006 mientras un instructor yo, ya puede kame sabe que tiene Parkinson’s disease si Adel. Espantao gayot kame! Cuando ya habla yo que baka puede kame descanza na diamon assignment para puede yo cuida con ele, ya habla si Adel, “Busca ya lang kita doctor quien puede mira conmigo y sabe yo hay ayuda kanaton si Jehova para continua na diaton assignment.” Ya continua si Adel na de suyu assignment por seis año y nuay gayot le reclama. Cuando no puede ya le camina, ta usa le wheelchair para puede siempre anda predica. Cuando tan dificil ya le man cuento, tan comento le siempre na miting maskin uno o dos palabra lang. Manada maga hermano y hermana el ta imbia mensaje con Adel y ta habla que ta aprecia gayot sila con el de suyu bonito ejemplo. Ya continua se sila hace hasta ya muri le del 2013. Mas de 30 año kame junto del de mio leal y amable mujer. Poreso cuando ya muri le, ya queda yo bien triste y ya sinti yo otravez solo.

Sabe yo, quierre si Adel que continua yo na de mio assignment poreso ya hace yo quel. Ya esta yo ocupao y ya ayuda se conmigo para gendeh yo tanto sinti triste. Del 2014 hasta 2017, yan assign conmigo para visita na maga congregacion que ta converza Tagalog na maga nacion donde ya prohibi con el diaton trabajo. Despues quel, ya visita yo con el maga congregacion que Tagalog el lengguaje na Taiwan, United States y Canada. Del 2019, ya enseña yo na maga English clase de School for Kingdom Evangelizers na India y Thailand. Yan enjoy gayot yo na todo aquel maga assignment. Alegre gayot yo si ocupao yo na servicio con Jehova.

Na cada assignment, ta queda yo close na maga hermano y hermana. Poreso si ta ricibi yo nuevo assignment, gendeh facil para deja kanila. Pero, ya aprende yo que completamente confia con Jehova. Cay pirmi yo ta experiencia el de suyu suporta, ya ayuda se conmigo para queda preparao acepta con el maskin cosa cambio na de mio vida. Ahora, ta sirvi yo como un special pioneer na Pilipinas. Alegre gayot yo na de mio nuevo congregacion. Ta suporta sila y ta cuida conmigo como diila familia. Alegre tambien yo mira que si Samuel y Shirley ta imita con el ejemplo del diila nana.—3 Juan 4.

Deverasan, ya experiencia yo manada dificultad na de mio vida, incluido ya aquel tiempo cuando ya sufri y ya muri el de mio mujer por causa na grabe enfermedad. Ya enfrenta tambien yo manada cambio donde necesita yo man adjust. Pero ya puede yo mira que si Jehova “gendeh . . . lejos canaton.” (Act. 17:27) “Gendeh corto” el de suyu mano poreso puede gayot le suporta y hace fuerte con el de suyu maga siervo maskin talli sila na bien lejos lugar. (Isa. 59:1) Si Jehova el de mio Piedra y ya esta gayot le junto conmigo na de mio entero vida. Ta rindi gayot yo gracias con ele. Nunca yo ya queda solo.