ARTICULO 8
CANCION 130 Be Forgiving
Si Paquemodo Imita con el Perdon de Jehova
“Igual como ya perdona el Señor con ustedes, ansina tamen perdona ustedes.”—COL. 3:13.
SI COSA PUEDE APRENDE
Este articulo hay discuti si cosa kita puede hace para perdona con el un persona quien ya hace sinti duele kanaton.
1-2. (a) Na cosa situacion posible man dificil kita perdona con el un persona? (b) Paquemodo ya dale mira si Denise con el de suyu perdon?
DIFICIL ba para contigo que perdona con otro? Manada kanaton el ta sinti ansina especialmente si tiene cosa ya habla o ya hace el un persona que ya sinti gayot kita duele. Pero, puede kita quita con el diaton rabia y perdona. Por ejemplo, considera con el experiencia del un hermana que si Denise, a quien ya perdona maskin pa bien dificil con ese hace. Del 2017, si Denise y el de suyu familia ya visita na world headquarters del maga Testigo de Jehova. Cuando pabolbida sila, tiene coche el ya hace bangga na diila coche. Nuay dayun dispierta si Denise despues del accidente. Na uliji, ya sabe le que grabe el condicion del de suyu maga anak y ya muri el de suyu marido que si Brian. Si ta acorda le con aquel suceso, si Denise ya habla: “Bien triste gayot yo y no sabe yo si cosa hace.” Despues, ya sabe le que accidente lang gayot el cosa ya sucede y gendeh iresponsable el driver. Ya reza le con Jehova que dale con ele paz na pensamiento.
2 Ya arresta con el driver. Si decidi el corte que culpable le na cosa ya sucede, man preso le. Pero el corte ya habla que el sentencia del driver ta depende si cosa el testimonia de Denise. Si Denise ya habla: “Ya sinti yo que dol tiene quien ya abri con el de mio irida y ya vacia sal con ese cay necesita yo relata con el de con todo umalin experiencia na de mio vida.” Despues del cuanto semana, ya anda si Denise na corte para dale el de suyu testimonia adelante del gente quien ya causa grabe dolor na de suyu familia. Cosa le ya habla? Ya pidi si Denise con el juez que dale mira lastima con el gente. b Despues quel, ya llura el juez. Ele ya habla: “Na 25 año de mio como un juez, ahora lang yo ya oi igual ansina. Nuay ni un familia del victima el ya pidi conmigo que dale mira lastima con el acusao. Ahora lang yo ya oi ansina expresion de amor y perdon.”
3. Cosa ya motiva con Denise para perdona?
3 Cosa ya ayuda con Denise para perdona? Ya medita le si paquemodo ta perdona si Jehova. (Miq. 7:18) Si ta aprecia kita el perdon de Jehova, hay motiva este kanaton que perdona tambien con otro.
4. Cosa quierre si Jehova que hace kita? (Efeso 4:32)
4 Quierre si Jehova que perdona kita con otro igual si paquemodo le ta perdona kanaton. (Le con el Efeso 4:32.) Ta expecta le que perdona kita con aquellos quien ya hace sinti duele kanaton. (Sal. 86:5; Luc. 17:4) Na este articulo, hay considera kita tres cosas que puede ayuda kanaton para queda preparao perdona.
NO IGNORA CON EL DE TUYU SENTIDO
5. Asegun na Proverbio 12:18, cosa kita posible sinti si tiene quien ya hace sinti duele kanaton?
5 Posible sinti gayot kita duele si tiene cosa ya habla o ya hace el un persona kanaton, especialmente si amigo le diaton o miembro del diaton familia. (Sal. 55:12-14) Tiene vez, sinti kita que dol ya lancia kanaton. (Le con el Proverbio 12:18.) Baka ta pricura kita esconde o ignora con ese sentido. Pero si hace kita se, dol aquel ya lancia kanaton pero ya deja lang kita con el cuchillo na irida. Na igual manera, gendeh perde el dolor que ta sinti kita si ignora lang kita con ese.
6. Cosa kita posible sinti si tiene quien ya hace sinti duele kanaton?
6 Si tiene quien ya hace sinti duele kanaton, posible na primero hay rabia kita. El Biblia ya habla que posible ese el cosa kita sinti. Pero, ya dale este aviso kanaton que no esta rabiao. (Sal. 4:4; Ef. 4:26) Porque? Cay puede este causa kanaton para hace un cosa que gendeh bueno el resulta. (Sant. 1:20) Acorda, normal lang que rabia kita pero puede kita iscuji que gendeh esta rabiao.
Normal lang que rabia kita pero puede kita iscuji que gendeh esta rabiao
7. Cosa pa kita posible sinti si tiene quien ya hace sinti duele kanaton?
7 Si nuay kanaton trata enbuenamente, posible tiene pa kita otro cosa sinti. Por ejemplo, el un hermana que si Ann ya habla: “Cuando bata yo, ya deja de mio tata con el de mio nana y ya casa con el de mio yaya. Ya sinti yo que dol ya abandona conmigo. Cuando ya tiene sila maga anak, ya sinti yo que gendeh ya conmigo necesita. Poreso mientras ta engranda yo, ya sinti yo que nuay conmigo quien ta ama.” El un hermana que si Georgette ya habla si cosa le ya sinti cuando ya comete adulterio el de suyu marido: “Man amigo kame desde bata y junto kame yan pioneer! Poreso, bien dolorido gayot de mio corazon.” El un hermana que si Naomi ya habla: “Nuay gayot yo expecta que hace sinti duele conmigo el de mio marido. Poreso cuando ya habla le que ta mira le pornografia y ya esconde se conmigo, ya sinti yo que ya hace le conmigo loco y ya traiciona conmigo.”
8. (a) Cosa el cuanto razon si porque debe kita perdona con otro? (b) Cosa el maga beneficio si ta perdona kita? (Mira con el cajon “ Si Ya Sinti Gayot Kita Duele na Cosa Ya Hace el Otro?”)
8 Gendeh kita puede controla si cosa habla o hace el otro kanaton pero puede kita controla con el diaton reaccion. Y mas mucho, el de con todo bueno que hace kita amo que perdona. Porque? Cay ta ama gayot kita con Jehova y quierre le que perdona kita con otro. Si esta kita rabiao y gendeh perdona, posible puede kita hace un cosa que gendeh bueno y tiene este mal efecto na diaton salud. (Prov. 14:17, 29, 30) Nota con el ejemplo del un hermana que si Christine. Ele ya habla: “Si tiene yo con quien tan sentimiento, gendeh mas yo tanto ta re. Ta afecta tambien este si cosa yo ta come. Gendeh yo tanto ta puede durmi y mas dificil para conmigo que controla con el de mio emocion. Poreso, ta afecta este con el de mio matrimonio y de mio relacion con otro.”
9. Porque kita debe quita con el diaton rabia?
9 Maskin pa nuay pidi despensa el persona quien ya hace sinti duele kanaton, tiene kita cosa puede hace para gendeh tanto sinti duele na cosa le ya hace. Si Georgette que ya menciona enante ya habla: “Maskin pa ya pasa cuanto tiempo, ya puede yo siempre quita con el de mio rabia na de mio marido de antes. Como resulta, ya tiene gayot yo paz na pensamiento.” Si quita kita con el diaton agrabio, gendeh kita ta permiti con el diaton negativo sentido que afecta con el diaton tratamiento con otro. Mas pa, un regalo tambien se que ta dale kita na diaton mismo cuerpo. Porque? Cay puede kita continua na diaton vida y queda alegre otravez. (Prov. 11:17) Pero cosa tu hace si gendeh pa tu siempre preparao perdona?
QUITA CON EL DE TUYU NEGATIVO SENTIDO
10. Porque ta necesita tiempo para puede perdona? (Mira tambien con el maga letrato.)
10 Cosa tu puede hace para gendeh mas tu sinti duele na cosa ya hace contigo? Puede ayuda contigo si deja tu pasa cuanto tiempo. Despues ricibi curada, el un persona quien ya desgracia necesita tiempo para completamente queda bueno. Na igual manera, posible necesita kita deja pasa cuanto tiempo antes kita puede perdona con el un persona.—Ecl. 3:3; 1 Ped. 1:22.
Igual si paquemodo necesita tiempo el un persona quien ya desgracia para queda bueno, ansina tambien si ya sinti kita duele (Mira con el parapo 10)
11. Paquemodo el rezo puede ayuda contigo perdona?
11 Reza y pidi con Jehova que ayuda contigo que perdona. c Si Ann que ya menciona enante ya explica si paquemodo el rezo ya ayuda con ele: “Ya pidi yo con Jehova que perdona con el de mio familia na maga gendeh buen cosas que ya habla y ya hace kame. Despues, ya escribi yo un carta para na de mio tata y de suyu nuevo mujer, y ya habla que ya perdona ya yo kanila.” Ya admiti si Ann que gendeh se facil para hace. Pero ya habla le: “Ya pricura yo imita el perdon de Jehova. Era puede este manda move con el de mio tata y de suyu mujer que aprende mas acerca con Jehova.”
12. Porque debe kita confia con Jehova en vez na diaton sentido? (Proverbio 3:5, 6)
12 Confia con Jehova, gendeh na de tuyu sentido. (Le con el Proverbio 3:5, 6.) Pirmi sabe si Jehova si cosa el de con todo bueno para kanaton. (Isa. 55:8, 9) Y nunca le pidi que hace kita un cosa que puede causa peligro kanaton. Poreso, cuando ya habla le kanaton que perdona, puede kita confia que hay beneficia gayot kita si hace kita con ese. (Sal. 40:4; Isa. 48:17, 18) Pero si confia kita con el diaton sentido, baka gendeh gayot kita puede perdona. (Prov. 14:12; Jer. 17:9) Si Naomi que ya menciona enante ya habla: “Del una, ya sinti yo que justo lang que gendeh perdona con el de mio marido cay ta mira le pornografia. Ya tiene yo miedo que baka hace le conmigo sinti duele otravez o baka ulvida le si paquemodo de duele el cosa le ya hace. Y ya pensa yo que ta entende si Jehova si cosa yo ta sinti. Pero ya puede yo realiza que maskin pa ta entende si Jehova con el de mio sentido, gendeh se quierre decir que uyun le con ese. Sabe le si cosa yo ta sinti y que necesita yo tiempo para quita con el de mio rabia pero quierre tambien le que perdona yo con el de mio marido.” d
CULTIVA POSITIVO SENTIDO
13. Asegun na Roma 12:18-21, cosa kita debe hace?
13 Si ta perdona kita con el un persona quien ya hace sinti duele kanaton, gendeh lang kita basta gendeh man cuento acerca na cosa ya sucede. Si hermano o hermana le diaton na fe, quierre kita que tene otravez paz con ele. (Mat. 5:23, 24) En vez de esta rabiao, ta iscuji kita que dale mira lastima y perdona con ele. (Le con el Roma 12:18-21; 1 Ped. 3:9) Cosa puede ayuda kanaton para hace con ese?
14. Cosa kita debe pricura hace y porque?
14 Pricura kita mira con el persona quien ya hace sinti duele kanaton igual si paquemodo si Jehova ta mira con ele. Ta iscuji si Jehova mira si cosa el bueno na maga gente. (2 Cron. 16:9; Sal. 130:3) Mas mucho, tiene gayot kita cosa puede mira bueno o malo na un persona. Pero si iscuji kita mira si cosa el bueno kanila, mas facil para kanaton que perdona kanila. Por ejemplo, el un hermano que si Jarrod ya habla, “Mas facil para conmigo que perdona con el un hermano si ta pensa yo con el manada cosas que quierre yo acerca con ele, gendeh con el de suyu kamali.”
15. Porque bueno que habla con el un persona que ya perdona ya tu con ele?
15 El otro importante cosa que puede ayuda contigo amo si habla tu con el persona que ya perdona ya tu con ele. Porque? Nota si cosa ya habla si Naomi que ya menciona enante: “Ya pregunta conmigo de mio marido, ‘Ya perdona ya ba tu conmigo?’ Habla era yo que ya perdona ya yo con ele pero gendeh yo quel ta puede habla. Ya realiza yo que nuay pa gale yo con ele perdona completamente. Pero ya llega el tiempo, ya puede ya yo quel habla. Ya puede gayot llura el de mio marido y ya sinti gayot le alivio. Ya sinti tambien yo que ya tiene yo paz na pensamiento. Desde aquel, ya aprende yo confia ele otravez y close ya kame otravez.”
16. Cosa tu ya aprende acerca na perdon?
16 Quierre si Jehova que perdona kita. (Col. 3:13) Maskin pa ansina, posible man dificil kita hace con ese. Pero puede kita hace con ese si gendeh kita ignora con el diaton sentido y hace kita esfuerzo para quita con el diaton rabia. Mas pa, hace kita esfuerzo que cultiva positivo sentido na ese persona.—Mira con el cajon “ Si Cosa Hace Para Puede Perdona.”
PENSA CON EL MAGA BENEFICIO SI TA PERDONA
17. Porque kita debe perdona con otro?
17 Manada razon si porque bueno que perdona kita. Considera con el cuanto de ese. Una, ta imita kita y ta hace alegre con el diaton lastimoso Tata, si Jehova. (Luc. 6:36) Ika-dos, ta dale kita mira que ta aprecia kita con el perdon que ya extende si Jehova kanaton. (Mat. 6:12) Y ika-tres, hay tene kita buen salud y puede kita mentena con el diaton fuerte amistad con otro.
18-19. Cosa posible el resulta si ta perdona kita?
18 Si perdona kita con otro, posible hay ricibi kita maga bendicion que gendeh kita ta expecta. Por ejemplo, nota si cosa ya sucede con Denise que ya menciona enante. Maskin pa no sabe le aquel tiempo, el gente quien ya hace bangga kanila ya plaña man suicide despues del hearing. Pero por causa na perdon de Denise, ya motiva este con ele que estudia con el Biblia junto na maga Testigo de Jehova.
19 Posible sinti kita que el uno na de con todo dificil cosa que hace amo que perdona. Pero posible bendici tambien gayot kanaton si hace kita con ese. (Mat. 5:7) Poreso, ojala hace kita el todo para imita con el perdon de Jehova.
CANCION 125 “Happy Are the Merciful!”
a Ya cambia con el cuanto nombre.
b Na ansina maga situacion, el cada uno Cristiano debe decidi si cosa hace.
c Mira con el video del maga original cancion “Forgive One Another,” “Forgive Freely” y “Friends Again” na jw.org.
d Si ta mira el un persona pornografia, un culpa se y puede se hace sinti duele con el de suyu marido o mujer. Pero, gendeh se razon para man divurcio sila asegun na Biblia.
