YA SINTI ya ba tu que dol solo-solo tu ta enfrenta con el de tuyu maga problema? Ciendo manada “dificultad na ultimo maga dia” puede este causa kanaton que man luya y sinti que solo kita. (2 Tim. 3:1) Pero gendeh kita solo. El Biblia ya habla que el maga deverasan amigo puede ayuda kanaton “na tiempo de dificultad.”—Prov. 17:17.

Ya beneficia si apostol Pablo na ayuda del de suyu maga amigo quien yan junto con ele na de suyu viaje como un misionario. (Col. 4:7-11) Cuando preso le na Roma, ya hace el de suyu maga amigo el maga cosas que gendeh ta puede hace si Pablo. Por ejemplo, cuando ya dale el maga hermano y hermana de Filipo el maga cosas que necesita si Pablo, si Epafrodito el ya lleva con ese. (Fil. 4:18) Si Tiquico tambien el ya lleva con el maga carta de Pablo na diferente maga congregacion. (Col. 4:7; mira con el study note.) Y cuando yan preso si Pablo, ya puede le siempre cumpli con el de suyu ministerio por causa na ayuda del de suyu maga amigo. Igual kanila, paquemodo tu puede queda un deverasan amigo ahora?

El ejemplo del maga hermano y hermana ta dale mira si paquemodo ta ayuda con uno y otro el maga deverasan amigo. Considera con el experiencia de Elisabet, un regular pioneer na Spain. Cuando ya puede sabe que tiene cancer el de suyu nana, tiene un hermana quien manada beses yan text con ele maga versiculo na Biblia para anima con ele. Si Elisabet ya habla: “Ya puede gayot anima conmigo aquel maga text y ya sinti yo que gendeh yo solo.”—Prov. 18:24.

Puede kita queda mas cerca na diaton hermano y hermana si ayuda kita kanila na maga actividad na congregacion. Por ejemplo, puede ba tu hace hatud con el un de edad hermano o hermana para na miting o na ministerio? Si hace tu se, puede ustedes anima con uno y otro. (Roma 1:12) Pero el cuanto hermano y hermana gendeh ta puede sale na casa. Paquemodo kita dale mira que deverasan amigo kita diila?

El cuanto maga hermano y hermana gendeh ta puede atende na maga miting na personal por causa na problema na salud o otro pa maga circumstancia. Considera con el ejemplo de David quien tiene lymphoma que un clase de cancer. Mas de seis meses le yan chemotherapy. Durante na ese tiempo, ele y el de suyu mujer si Lidia ta atende na maga miting por medio na videoconference.

Paquemodo el maga hermano y hermana na congregacion ya suporta kanila? Despues del cada miting, el cuanto de aquellos quien ya atende na Kingdom Hall ta hace esfuerzo para puede man cuento con David y Lidia por medio na videoconference. Mas pa con ese, tan text el maga hermano  y hermana con David y Lidia para rindi gracias na diila maga comento. Cosa el efecto de este kanila? Ya sinti sila que cerca siempre sila na congregacion.

Puede ba kita man junto na ministerio con aquellos quien gendeh ta puede sale na casa? Si preparao kita man adjust na diaton ministerio, puede kita dale mira que nuay kita ulvida con aquellos quien tiene ansina limitacion. (Prov. 3:27) Pruba man schedule que man junto kanila na letter writing o telephone witnessing. Puede tambien kita hace manera para puede sila atende na meeting for field service por medio na videoconference. Alegre si David y Lidia cay ya hace ansina el diila congregacion. Si David ya habla, “Si tan junto kame con el maga hermano y hermana para discuti cuanto cosas y reza, ta puede gayot quel anima kanamon maskin pa unrato lang quel.” Puede tambien tu pregunta con el un hermano o hermana quien gendeh ta puede sale na casa si puede ba tu lleva con el de tuyu Bible study para alla conduci el estudiada junto con ele.

Si tan junto kita con el diaton hermano y hermana quien gendeh ta puede sale na casa y ta puede mira con el diila maga bonito calidad, mas ta queda kita cerca kanila. Por ejemplo, si tan junto kita kanila na ministerio, ta puede kita mira si paquemodo sila ta puede usa con el Biblia para ayuda con el un persona. Como resulta, mas ta aprecia kita kanila. Mas pa, si ta ayuda kita con el diaton maga hermano y hermana na diila maga espiritual actividad, ta omenta el diaton maga amigo y amiga.—2 Cor. 6:13.

Ya puede dale comforta con Pablo el de suyu amigo que si Tito cay ya esta este junto con ele. (2 Cor. 7:5-7) Ta hace este acorda kanaton que puede kita dale comforta con el diaton maga hermano y hermana, gendeh lang por medio del diaton palabra. Sino, puede tambien kita se hace si man junto kita kanila y hace kita cuanto cosas para ayuda kanila.—1 Juan 3:18.

El diaton maga hermano y hermana na Russia ya dale mira buen ejemplo si paquemodo ayuda con uno y otro. Considera con el experiencia de Sergey y del de suyu mujer, si Tatyana. Despues hace buscada el maga polis na diila casa, ya lleva kanila na estacion de polis. Una ya manda bolbe con Tatyana. Ya habla si Sergey: “Cuando ya llega na casa si Tatyana, tiene dayun un hermana ya visita con ele. Tiene pa otro maga amigo quien ya visita y ya ayuda sila kanamon arregla con el maga gamit na diamon apartment.”

Ya omenta pa si Sergey: “Ta gusta gayot yo con el Proverbio 17:17, donde ta habla: ‘El verdadero amigo ta ama na todo tiempo y un hermano quien ya nace para na tiempo de dificultad.’ Pero este maga palabra mas deverasan ya para conmigo durante na este tiempo de persecucion. Sabe yo que gendeh yo este puede enfrenta solo. Ya dale conmigo si Jehova maga amigo quien con coraje ya esta junto conmigo.” a

Mientras ta enfrenta kita mas dificil maga situacion, necesita kita el ayuda del diaton maga amigo. Y si llega ya el grande tribulacion, mas necesita ya kita kanila. Poreso ahora pa lang, hace ya kita el todo para dale mira que un deverasan amigo kita!—1 Ped. 4:7, 8.