1. Porque dificil entende con el perdon del gente?

 “YA PERDONA YA YO CONTIGO.” Bonito gayot para oi con ese maga palabra especialmente si tiene tu cosa ya hace o ya habla que ya sinti duele el otro. Pero, tiene vez dificil para sabe si cosa quierre decir si habla el un persona que ya perdona ya le contigo. Quierre decir ba de ese que man amigo ya ustedes otravez? O ta habla lang le que no quierre mas le man cuento acerca con ese? Dificil gayot entende con el perdon del gente.

 2. Cosa ya habla el Biblia acerca na perdon de Jehova? (Mira tambien con el footnote.)

² El manera si paquemodo si Jehova ta perdona con el maga imperfecto gente bien diferente na manera si paquemodo kita ta perdona con uno y otro. Nuay gente el quien puede perdona igual con Jehova. El salmista ya habla acerca con Jehova: “Etu deverasan ta perdona, para tiene hondo respeto el maga gente contigo.” a (Sal. 130:4) Si, “deverasan ta perdona” si Jehova. Ya dale le mira si cosa gayot quierre decir que perdona con otro. Na cuanto versiculo na Hebreo Escritura, ya usa el maga escritor del Biblia un palabra para refiri con el perdon de Jehova que nunca hay usa para refiri na perdon del gente.

 3. Na cosa manera diferente el perdon de Jehova na perdon del maga gente? (Isaias 55:6, 7)

³ Si ta perdona si Jehova con el un persona, ta borra le con el culpa de este. Mas pa, hay bira el de suyu buen relacion con Jehova. Alegre kita cay completamente ta perdona kanaton si Jehova maskin cuanto beses pa kita ta culpa.—Le con el Isaias 55:6, 7.

 4. Paquemodo si Jehova ya ayuda kanaton para entende si cosa quierre decir del deverasan perdon?

 ⁴ Si diferente el perdon de Jehova, paquemodo puede entende con ese el maga imperfecto gente? Por medio na maga ilustracion, ya ayuda kanaton si Jehova para entende si cosa el deverasan perdon. Este articulo hay considera con el cuanto de ese. Hay aprende kita que si hay arripinti kita, hay quita si Jehova con el diaton pecado y hay queda kita otravez de suyu amigo. Mientras ta considera con ese maga ilustracion, hay queda mas hondo el diaton apresacion na diaton amable Tata, quien ta perdona kanaton na manada manera.

TA QUITA SI JEHOVA CON EL DIATON CULPA

 5. Cosa ta sucede si ta perdona si Jehova con el diaton maga pecado?

⁵ Na Biblia, ya compara con el pecado na un pesao carga. Acerca na de suyu maga pecado, si Rey David ya habla: “El de mio maga kamali yan lampas ya na de mio cabeza; igual na un pesao carga, gendeh yo con este puede ganá.” (Sal. 38:4) Pero, ta perdona si Jehova con el maga pecado de aquellos quien ta arripinti. (Sal. 25:18; 32:5) El Hebreo expresion que yan translate “perdona” quierre decir “alza” o “carga.” Puede kita pensa que igual si Jehova na un mafuerza gente quien ta carga con el pesades del diaton culpa y ta pone con ese lejos kanaton.

 6. Paquemodo de lejos ta pone si Jehova con el diaton pecado?

⁶ Tiene pa otro ilustracion que ta ayuda kanaton para entende si paquemodo de lejos ta pone si Jehova con el diaton pecado. El Salmo 103:12 ta habla: “Si paquemodo de lejos el subida del sol na abajada de este, ansina tambien de lejos le ya pone el diaton maga pecado.” Gendeh ta sucede na igual tiempo y lugar el subida y abajada del sol. Nunca este sucede. Ansina tambien de lejos ta pone si Jehova con el diaton pecado. Ta asigura se kanaton que completamente ta perdona si Jehova!

 7. Asegun na Miqueas 7:18, 19, cosa ta hace si Jehova con el diaton maga pecado?

⁷ Maskin pa ta hace lejos si Jehova con el diaton maga pecado, ta continua ba le agarra con ese? Gendeh. Acerca con Jehova, si Rey Ezequias ya escribi: “Ya buta tu con el todo de mio pecado na atras de tuyu.” Na footnote ya habla, “ya quita tu na de tuyu vista el todo de mio pecado.” (Isa. 38:9, 17; ftn.) Este ilustracion ta dale mira que ta buta si Jehova con el maga pecado de aquellos quien ta arripinti y gendeh mas le ta mira con ese otravez. Este versiculo puede tambien man translate como: “Para contigo, dol nuay sucede [el de mio culpa].” Ya hace claro el Biblia con este punto na ilustracion que puede le na Miqueas 7:18, 19. (Le.) Alli puede kita le que ya buta si Jehova con el diaton maga pecado na hondura del mar. De antes, bien imposible que puede saca otravez con el un cosa que ya buta na hondura del mar.

 8. Cosa ya kita ya puede aprende?

⁸ Na este maga ilustracion, ya puede kita aprende que si ta perdona si Jehova, ta quita le completamente con el diaton maga pecado para gendeh mas kita man conciencia. Deverasan gayot el cosa ya habla si David: “Alegre aquellos de quien maldad ya perdona y aquellos de quien pecado ya tapa; alegre el gente de quien culpa gendeh mas acorda si Jehova.” (Roma 4:7, 8, NWT) Ese el deverasan perdon!

TA BORRA SI JEHOVA CON EL DIATON CULPA

 9. Cosa ilustracion ya usa si Jehova para dale mira que completamente le ta perdona kanaton?

⁹ Ya usa otro ilustracion si Jehova para ayuda kanaton entende que por medio del  rescate, ta borra le con el maga pecado de aquellos quien ta arripinti. Na Biblia, puede kita le que ta laba si Jehova con el diila culpa. Como resulta, ta queda sila limpio. (Sal. 51:7; Isa. 4:4; Jer. 33:8) Si Jehova mismo ya habla: “Maskin pa el de ustedes maga culpa igual como escarlata, hay queda se blanco igual na nieve; maskin pa el color de este igual na un colorao tela, hay queda se igual na color del pelo del carnero.” (Isa. 1:18) Bien dificil quita con el escarlata o colorao mancha na un tela. Pero, ya usa si Jehova con ese ilustracion para asigura kanaton que puede le laba con el diaton culpa. Poreso, gendeh mas kita con ese puede mira.

10. Cosa otro ilustracion ya usa si Jehova para dale mira el de suyu perdon kanaton?

¹⁰ Como ya menciona del ya pasa articulo, ya compara tambien con el diaton culpa na “debe.” (Mat. 6:12; Luc. 11:4) Poreso cada vez kita ta culpa con Jehova, dol aquel ta queda mas grande el diaton debe con ele. Pero si ta perdona si Jehova, dol aquel ta cancela le con el diaton debe y gendeh mas le se ta cubra kanaton. Igual si paquemodo de alegre el un persona si ya cancela con el de suyu debe, bien alegre tambien kita si ta perdona kanaton si Jehova!

11. Cosa quierre decir que ya borra con el diaton culpa? (Maga Actividad 3:19)

¹¹ Le con el Maga Actividad 3:19. Na original lengguaje, el Griego palabra que ya usa para na “perdona” na este versiculo quierre decir “borra.” Gendeh lang si Jehova ta cancela con el diaton maga debe o culpa sino ta borra le con ese. Si ya cancela con el diaton debe, puede kita imagina que ya marca grande X con ese. Pero, puede siempre mira con el diaton debe maskin tiene ese X. Pero otro si ta borra con el un cosa. Para entende con ese ilustracion, acorda que de antes, el ink que ta usa el maga gente para escribi ta puede lang borra usando el agua. Puede usa el un persona un muhao esponja para borra con el cosas escribido. Poreso si “ya borra” con el un debe, hay perde ya gayot este. Gendeh mas kita puede mira maskin rastro de este. Gane, dol aquel nuay kita man debe. Ta rindi gayot kita gracias con Jehova cay si ta perdona le con el diaton culpa, gendeh lang le ta cancela con ese sino ta borra tambien le con ese completamente!—Sal. 51:9.

12. Cosa kita puede aprende na ilustracion acerca na grueso celaje?

¹² Ya usa otro ilustracion si Jehova para dale mira si paquemodo le ta perdona con el diaton maga culpa. Ele ya habla: “Hay tapa yo con el de tuyu maga culpa que dol tapao se de celaje y con el de tuyu maga pecado que dol tapao se de grueso celaje.” (Isa. 44:22) Si ta perdona si Jehova, dol aquel ta usa le grueso celaje para tapa con el diaton pecado para gendeh mas con ese puede mira.

13. Cosa kita sinti cay ta perdona si Jehova con el diaton maga culpa?

¹³ Cosa este maga ilustracion ta enseña kanaton? Si ya perdona ya si Jehova con el diaton maga pecado, gendeh mas kita debe man conciencia. Por medio na sangre de Jesucristo, ya cancela ya completamente con el diaton debe. Gane, dol aquel nuay kita comete con ese culpa. Ese el cosa ta hace si Jehova si ta arripinti kita na diaton maga pecado.

TA RESTORA SI JEHOVA CON EL DIATON BUEN RELACION CON ELE

14. Porque kita puede confia con el perdon de Jehova? (Mira tambien con el maga letrato.)

¹⁴ Si ta perdona kanaton si Jehova, puede kita asigura que queda le otravez amigo diaton. Ta ayuda se kanaton para gendeh mas man conciencia. Gendeh mas kita necesita  pensa que baka rabiao pa siempre kanaton si Jehova y ta busca le manera para castiga kanaton. Nunca se sucede. Porque kita puede confia na perdon de Jehova? Si Jehova ya habla con profeta Jeremias: “Perdona yo con el diila kamali y gendeh mas yo acorda con el diila pecado.” (Jer. 31:34) Ya coteja si apostol Pablo con ese maga palabra cuando ya habla le: “Nunca mas gayot ay acorda yo el diila maga pecado.” (Heb. 8:12) Pero cosa se quierre decir?

15. Cosa quierre decir que gendeh mas acorda si Jehova con el diaton maga pecado?

¹⁵ Na Biblia, el expresion “acorda” gendeh lang ta refiri con el un persona quien ta pensa con el un cosa que ya sucede de antes. Sino, puede tambien este refiri con el un persona quien tiene cosa ta hace. El criminal na costao de Jesus ya pidi: “Jesus, acorda conmigo cuando ay anda Uste na de Uste Reino.” (Luc. 23:42, 43) Nuay lang le basta pidi con Jesus que pensa con ele na aquel tiempo. El contestacion de Jesus ta indica que hay resucita le con el criminal. Entonces, cuando ya habla si Jehova que gendeh mas le acorda con el diaton maga pecado, quierre decir de este que ya perdona ya le kanaton y gendeh mas le castiga kanaton na futuro por causa con ese maga pecado.

16. Na Biblia, cosa el resulta del deverasan perdon que ta extende si Jehova?

¹⁶ Ya usa otro ilustracion el Biblia para dale mira si cosa el resulta del deverasan perdon que ta extende si Jehova. Por causa na diaton imperfeccion, ya compara kanaton na “maga muchacho del pecado.” (Roma 6:17, 18) Pero por causa na perdon de Jehova, dol aquel kita maga esclavo con quien “ya libra . . . na pecado.” (Rev. 1:5) Si, bien alegre kita cay ya queda kita librao na pecado por causa na perdon de Jehova.

17. Cosa el resulta cay ya perdona kanaton si Jehova? (Isaias 53:5)

¹⁷ Le con el Isaias 53:5. Por causa cay  imperfecto kita, el Biblia ya habla que dol igual kita na maga gente quien tiene grabe enfermedad. Pero por causa na rescate que ya dale si Jehova por medio del de suyu Anak, dol aquel ya cura kanaton. (1 Ped. 2:24) Si ta culpa kita, ta perde el diaton buen relacion con Jehova. Pero por causa del rescate, puede le perdona kanaton y queda kita de suyu amigo otravez. Bien alegre el un persona si ya puede cura con el de suyu enfermedad. Na igual manera, bien alegre kita cay ya puede kanaton cura na espiritual y cay tiene kita otravez el favor de Jehova.

SI COSA EL BENEFICIO DEL PERDON DE JEHOVA

18. Cosa kita ya aprende na maga ilustracion na Biblia acerca na perdon de Jehova? (Mira tambien con el cajon “Si Paquemodo si Jehova Ta Perdona.”)

¹⁸ Cosa kita ya aprende na maga ilustracion na Biblia acerca na perdon de Jehova? Si ta perdona le, ta hace le con ese completamente y permanente. Por causa con ese, tiene kita buen relacion na diaton Tata na cielo. Pero sabe tambien kita que un regalo el perdon que ta extende le. Ta dale se kanaton si Jehova gendeh cay conviene kita ricibi con ese sino cay ta ama le kanaton.—Roma 3:24.

19. (a) Na cosa kita debe rindi gracias? (Roma 4:8) (b) Cosa kita hay discuti na sunod articulo?

¹⁹ Le con el Roma 4:8, NWT. Ta rindi gayot kita gracias cay “deverasan ta perdona” si Jehova! (Sal. 130:4) Pero para perdona kanaton, tiene kita cosa debe hace. Si Jesus ya habla: “Si gendeh ustedes ta perdona con otros, el de ustedes Tata na cielo gendeh tamen ay perdona el de ustedes maga culpa.” (Mat. 6:14, 15) Entonces, bien importante que imita kita con el perdon de Jehova. Pero paquemodo kita hace con ese? Sabe se kita na sunod articulo.