1-2. Na cosa manera igual el maga gente na joven hombre que ya menciona na parapo 1?

 IMAGINA con el un joven hombre quien ya engranda na un rico familia. Un dia, ya accidenta el de suyu mayores y ya muri. Dolorido gayot este hombre pero tiene pa otro mal noticia. Ya sabe le que tiene grande debe el de suyu mayores. En vez de hereda el diila riqueza, ya hereda le el diila debe y con ele ahora ta cubra. Maskin cosa le hace, gendeh gayot le puede paga con ese debe.

² Semejante el diaton situacion na ese joven hombre. Perfecto el diaton primer mayores, si Adan y Eva, y ya queda na un bonito paraiso. (Gen. 1:27; 2:7-9) Puede era sila queda alegre y vivi hasta para cuando. Pero ya perde se todo. Ya culpa sila poreso ya quita kanila na jardin de Eden y gendeh mas sila puede vivi hasta para cuando. Cosa ya hereda kanila el diila maga anak? El Biblia ta habla kanaton: “Por medio de un gente [si Adan] el pecado ya entra na mundo. Y, por medio del pecado, ya entra el muerte. Y el muerte ya alcanza con todo el maga gente, cay todo sila ya peca.” (Roma 5:12) Pecado el cosa kita ya hereda con Adan y muerte el resulta de ese. Ese pecado amo igual na un bien grande debe que nuay ni uno kanaton el quien puede paga.—Sal. 49:8.

 3. Porque puede compara na “debe” con el diaton maga pecado?

 ³ Ya compara si Jesus na “debe” con el diaton maga pecado. (Mat. 6:12; Luc. 11:4) Si ta culpa kita, dol aquel ta tiene kita debe con Jehova y necesita kita paga con ese. Si gendeh puede paga con este debe, muerte lang el solamente puede cancela con este.—Roma 6:7, 23.

 4. (a) Cosa sucede con el todo pecador si nuay quien ayuda kanila? (Salmo 49:7-9) (b) Na Biblia, na cosa ta refiri el palabra “pecado”? (Mira con el cajon “ Pecado.”)

⁴ Puede ba kita obtene otravez el todo cosa que ya hace perde si Adan y Eva? Si na diaton mismo esfuerzo lang, imposible se. (Le con el Salmo 49:7-9.) Si nuay quien ayuda kanaton, nuay kita esperanza que vivi hasta para cuando o el esperanza de resureccion. Gane si muri kita, dol igual lang kita na maga animal.—Ecl. 3:19; 2 Ped. 2:12.

 5. Cosa ya hace el diaton amable Tata para ayuda kanaton paga con el diaton debe de pecado? (Mira con el letrato.)

⁵ Pensa otravez con el joven hombre que ya menciona enante. Cosa gaha le sinti si tiene un rico gente quien ayuda con ele paga con el todo de suyu debe? Asigurao, rindi gayot le gracias y acepta el ayuda de este gente. Na igual manera, el diaton amable Tata que si Jehova ya dale kanaton un regalo. Ese regalo puede paga con el debe que ya hereda kita con Adan. Acerca con ese, si Jesus ya habla: “Ansina gayot de grande el amor del Dios para con el mundo: que ya dale Le su Unico Anak para todo quien ta cree con [ele] gendeh ay muri, sino ay tene Vida hasta para cuando.” (Juan 3:16) Mas pa, por causa con este regalo, puede kita tene buen relacion con Jehova.

 6. Cosa kita considera na este articulo y porque?

⁶ Cosa kita hace para beneficia na este bonito regalo y para puede perdona con el diaton maga pecado? Para contesta con ese pregunta, discuti kita cuanto expresion na Biblia y si cosa se quierre decir. Si medita kita si cosa ya hace si Jehova para perdona kanaton, hay queda mas grande el diaton apresacion con ele.

QUIERRE EL DIOS QUE TENE KITA BUEN RELACION CON ELE

 7. (a) Cosa pa ya hace perde kanda Adan y Eva? (b) Como maga descendiente de Adan y Eva, cosa kita bien necesita? (Roma 5:10, 11)

⁷ Puera que ya hace perde kanda Adan y Eva con el diila esperanza que vivi hasta para cuando, ya hace tambien sila perde con el diila buen relacion na diila Tata, si Jehova. Del primero, parte sila del familia del  Dios. (Luc. 3:38) Pero cuando ya desobedece sila con Jehova, gendeh mas sila parte de ese familia. Ya sucede se antes pa sila tene maga anak. (Gen. 3:23, 24; 4:1) Poreso, ciendo maga descendiente kita de Adan y Eva, necesita kita tene buen relacion con Jehova o queda de suyu maga amigo. (Le con el Roma 5:10, 11.) Gane, si Jehova mismo el ya hace manera para sucede este. Paquemodo?

YA HACE MANERA EL DIOS PARA TENE KITA BUEN RELACION CON ELE

 8. Cosa ya hace si Jehova para na maga gente?

⁸ Ya hace manera si Jehova para tene buen relacion con ele el maga imperfecto gente. Este amo el arreglamiento de tapada de culpa donde necesita dale un cosa que igual el valor na cosa ya perde. Na este manera, puede bira otravez el un cosa que ya perde. Ya menciona tambien na Cristiano Griego Escritura acerca el manera que ya usa si Jehova para queda amigo de suyu el un persona.—Roma 3:25.

 9. Cosa temporario arreglamiento ya hace si Jehova para perdona con el pecado del maga Israelita?

⁹ Para puede tene buen relacion el maga Israelita con Jehova, ya hace le un temporario arreglamiento para puede perdona con el diila maga pecado. Ta celebra sila con el Dia de Tapada de Culpa una vez na un año. Na ese dia, el alto sacerdote ta ofrece maga animal como sacrificio por parte del maga gente. Siempre, este maga sacrificio gendeh completamente puede tapa con el pecado del maga gente ciendo el maga animal mas bajo contra na maga gente. Pero si ta arripinti el maga Israelita y ta ofrece el maga sacrificio que ta pidi si Jehova, hay perdona le con el diila maga pecado. (Heb. 10:1-4) Este arreglamiento y el maga sacrificio que ta hace sila na otro maga tiempo ya ayuda con el maga Israelita para acorda que maga pecador sila y que necesita sila un permanente solucion na diila situacion.

10. Cosa permanente arreglamiento ya hace si Jehova para perdona con el diaton maga pecado?

¹⁰ Para puede perdona con el maga pecado del maga gente, ya hace un permanente arreglamiento si Jehova donde el de suyu unico Anak hay “ofrece . . . su cuerpo una vez lang para carga el maga pecado de mucho maga gente.” (Heb. 9:28) Ya dale si Jesus “el de suyu vida como un rescate para na manada.” (Mat. 20:28, NWT) Cosa el rescate?

EL PAGO PARA PUEDE KITA TENE BUEN RELACION CON DIOS

11. (a) Asegun na Biblia, cosa el rescate? (b) Cosa el necesita para puede paga con el rescate?

¹¹ Na Biblia, el rescate amo el cosa que debe paga para puede tapa con el diaton maga culpa y tene kita buen relacion con Jehova. a Cosa debe el pago para hace bira con el cosa ya hace perde si Adan? Acorda que ya hace perde kanda Adan y Eva el diila perfecto vida y el esperanza que vivi hasta para cuando. Entonces, igual debe el valor del rescate na cosa ya perde. (1 Tim. 2:6) Puede lang con ese paga el un adulto hombre quien (1) perfecto; (2) tiene esperanza que vivi hasta para cuando na tierra; y (3) conforme sacrificia de suyu vida para kanaton. El vida de ese persona el solamente puede hace bira con el cosa ya perde.

12. Porque ya puede paga si Jesus con el rescate?

¹² Considera tres razon si porque ya puede paga si Jesus con el rescate. (1) Ya nace  le perfecto y ‘nuay le culpa.’ (1 Ped. 2:22) (2) Por causa con ese, puede le vivi hasta para cuando na tierra. (3) Conforme le muri y dale el de suyu vida para kanaton. (Heb. 10:9, 10) Cay perfecto si Jesus, igual el valor del de suyu vida na valor del vida del primer gente que si Adan antes le culpa. (1 Cor. 15:45) Poreso cuando ya muri si Jesus, ya puede le tapa con el pecado de Adan o ya puede le hace bira con el cosa ya hace perde si Adan. (Roma 5:19) Poreso, ya llama con Jesus “el ultimo Adan.” Gendeh mas necesita que muri el otro perfecto persona para paga con el cosa ya hace perde si Adan. Ya muri si Jesus “una vez lang para na todo tiempo.”—Heb. 7:27, NWT; 10:12.

13. Cosa el diferencia entre del tapada de culpa y del rescate?

¹³ Cosa el diferencia entre del tapada de culpa y del rescate? El tapada de culpa amo el arreglamiento que ya hace el Dios para puede otravez tene buen relacion con ele el maga gente. El rescate amo el pago que ya paga para puede tapa con el maga pecado del maga gente. Ya sacrificia si Jesus con el de suyu perfecto vida para puede paga con el diaton maga pecado.—Ef. 1:7; Heb. 9:14.

YA LIBRA Y YA DECLARA KANATON RECTO

14. Cosa kita ahora considera y porque?

¹⁴ Cosa el maga resulta del arreglamiento de tapada de culpa? Para contesta con ese pregunta, discuti kita si cosa quierre decir del dos expresion na Biblia. Puede se ayuda kanaton para entende si paquemodo kita ta beneficia na perdon de Jehova.

15-16. (a) Cosa el resulta por causa na rescate? (b) Cosa el efecto de este kanaton?

¹⁵ Ya habla el Biblia que ciendo ya dale ya con el rescate, ya libra ya kanaton. Acerca con este, si apostol Pablo ya habla: “Si Jesucristo ya otorga entrega con ele mismo para muri, para rescata canaton maga gente, y para libra canaton de todo maldad.”—Tito 2:14a.

¹⁶ Por causa na rescate, puede kanaton libra na pecado y muerte. (Roma 5:21) Ta rindi gayot kita gracias con Jehova y con Jesus cay ya rescata kanaton por medio na precioso sangre o vida de Jesus.—1 Cor. 15:22.

17-18. (a) Cosa quierre decir que ya declara recto con el un persona? (b) Cosa el efecto de este kanaton?

¹⁷ Ya habla el Biblia que ya declara recto con el maga siervo del Dios. Quierre decir de este que gendeh mas le ta pidi kanaton que paga con el maga culpa que ya comete kita. Maskin pa ya hace este si Jehova, ta sigui siempre le con el de suyu maga principio de justicia. Na cosa manera? Nuay le kanaton declara recto por causa na diaton mismo esfuerzo o cay ta consinti le con el diaton maga culpa. Sino, puede le perdona con el diaton maga pecado por causa na diaton fe na de suyu arreglamiento de tapada de culpa y na rescate que ya paga si Jesus.—Roma 3:24; Gal. 2:16.

¹⁸ Cosa el beneficio de este kanaton? El cuanto ta beneficia cay ya iscuji kanila para rula na cielo junto con Jesus y ya queda sila maga anak del Dios. (Tito 3:7; 1 Juan 3:1) Ya perdona con el diila maga pecado. Na ojos de Jehova, dol aquel nuay sila comete culpa poreso cualificao sila para queda parte del Reino. (Roma 8:1, 2, 30) Ta beneficia tambien aquellos quien tiene esperanza na tierra cay ya perdona con el diila maga pecado y ya queda sila maga amigo del Dios. (Sant. 2:21-23) El grande grupo quien hay sobrevivi na Armagedon hay tene el oportunidad que nunca muri. (Juan 11:26) Hay resucita  tambien con el “maga recto” y con el “maga gendeh recto.” (Act. 24:15, NWT; Juan 5:28, 29) Na uliji, el todo obediente siervo de Jehova na tierra hay “participa na libertad y na gloria del maga anak del Dios.” (Roma 8:21) Ta espera gayot kita el tiempo donde todo kita hay queda otravez maga perfecto anak del diaton Tata, si Jehova!

19. Na cosa manera ya cambia el diaton situacion? (Mira tambien con el cajon “ El Perdon de Jehova.”)

¹⁹ Claro que el diaton situacion de antes igual con aquel joven hombre quien ya hereda un bien grande debe que nunca le puede paga. Pero ya ayuda kanaton si Jehova. Por causa na arreglamiento de tapada de culpa y na pago de rescate, ya cambia el diaton situacion. Cay tiene kita fe con Jesucristo, puede kanaton libra na pecado y muerte. Puede tambien perdona si Jehova con el diaton maga pecado que dol nuay kita comete con ese. Pero el mas importante, puede ya kita ahora tene un buen relacion na diaton amable Tata na cielo, si Jehova.

20. Cosa kita discuti na sunod articulo?

²⁰ Mas queda grande el diaton apresacion para con Jehova y con Jesus si medita kita con el maga cosas que ya hace sila para kanaton. (2 Cor. 5:15) Si nuay sila ayuda kanaton, nuay gayot kita esperanza! Pero paquemodo el cada uno kanaton ta beneficia na perdon de Jehova? Hay discuti kita con ese na sunod articulo.