Ta queda si Mary y el de suyu marido que si John a na un nacion donde manada Pilipino el ta anda para trabaja. Alegre sila predica con ese maga Pilipino. Durante el COVID-19 pandemic, ya puede principia man Bible study si Mary, gendeh lang con aquellos na diila nacion, sino con aquellos tambien na otro nacion. Paquemodo quel ya sucede?

Ta pregunta si Mary con el de suyu maga Bible study, “Tiene ba ustedes conoce quien quierre tambien man Bible study?” Si ta habla sila que tiene sila conoce, ta pidi le que manda conoce con ele kanila. Maskin simple lang quel pregunta, mas mucho, ta tene quel maga buen resulta. Porque? Cay manada de aquellos quien ta aprecia con el Palabra del Dios quierre que sabe tambien el diila maga familia y amigo el cosa sila ta aprende. Cosa el reaccion del maga Bible study de Mary cuando ya pregunta le quel kanila?

El Bible study de Mary que si Jasmin ya introduci con ele cuatro persona quien quierre tambien man Bible study. El uno kanila que si Kristine ya gusta gayot con el diila estudiada. Gane, ya pidi le con Mary que dos beses na un semana sila man Bible study. Cuando ya pregunta si Mary con ele si tiene ba le conoce quien quierre tambien man Bible study, ya habla si Kristine, “Si, manda yo contigo conoce na de mio maga amiga.” Adentro lang na cuanto semana, ya puede ya conoce si Mary con el cuatro na maga amiga de Kristine quien quierre man Bible study. Despues del cuanto tiempo, ya introduci si Kristine con el de suyu otro pa maga amiga. Y el cuanto kanila ya introduci tambien con el diila maga amiga.

Quierre si Kristine que sabe tambien el de suyu familia na Pilipinas acerca el cosa le ta aprende na Biblia. Poreso, yan cuento le con el de suyu anak que si Andrea. Del una, ta pensa si Andrea, ‘Un culto el maga Witness, gendeh sila ta creé con Jesus y con el Daan Testamento lang sila ta usa.’ Pero despues lang del primer Bible study diila, ya puede le realiza que mali gale el cosa le ta pensa. Cada vez tiene le nuevo cosa ta puede aprende na Biblia, ta habla le, “Deverasan se cay amo se ta habla na Biblia!”

Despues del cuanto tiempo, ya introduci si Andrea con Mary na de suyu dos amiga y un uban na trabajo y ya principia tambien sila estudia con el Biblia. Acabar, no sabe si Mary que si tan Bible study sila de Andrea, ta oi gale el anti de este que un bulak, si Angela. Un dia, ya pidi si Angela con Andrea que habla con Mary que quierre tambien le man Bible study. Ya gusta si Angela el cosa le ta aprende. Adentro lang na un mes, manada texto ya le ya puede man memorize y gane, cuatro  beses na un semana le quierre man Bible study. Ya ayuda tambien con ele si Andrea para puede le regular atende na maga miting por medio na videoconference.

Ya sabe si Mary que si tan Bible study sila de Kristine, talli pirmi cerca el de este marido que si Joshua. Poreso, ya pregunta le si quierre ba tambien si Joshua man Bible study junto kanila. Ya habla si Joshua, “Oi lang yo. No conmigo pregunta cay si gendeh, sale yo.” Pero na primer cinco minuto pa lang del diila estudiada, mas manada le cosa ya pregunta contra con Kristine y quierre ya tambien le estudia con el Biblia.

Por causa na aquel simple pregunta de Mary, manada el quien ya principia man Bible study. Ya pidi le con el cuanto maga hermano y hermana que conduci con el manada na este maga Bible study. Todo-todo, 28 el quien ya principia estudia con el Biblia na cuatro diferente maga nacion.

Si Jasmin, el primer quien yan study na este experiencia, ya bautiza del Abril 2021. Del Mayo 2022, ya bautiza tambien si Kristine y ya bira ya na Pilipinas para man junto na de suyu familia. Ya bautiza tambien el dos amiga de Kristine que ya introduci le con Mary. Despues del cuanto meses, ya bautiza tambien si Angela y un regular pioneer ya le ahora. El marido de Kristine que si Joshua, el diila anak que si Andrea y el otro pa maga Bible study ta continua tambien progresa na diila estudiada.

Del primer siglo, manada el quien ya sabe el buen noticia por causa na diila maga familia y amigo. (Juan 1:41, 42a; Act. 10:24, 27, 48; 16:25-33) Puede tu pregunta na de tuyu maga Bible study y con el otro quien interesao si tiene ba sila conoce quien quierre tambien estudia con el Biblia. Baka espanta tu que manada tambien el quien principia man Bible study por causa lang na este simple pregunta.