1. Cosa cambio el ya sucede na cuanto maga nacion na reciente maga año?

POR miles de año, mayoria del maga gente na entero mundo tiene religion. Pero na reciente maga decada, tiene grande cambio el ya sucede. Mas ta omenta el maga gente quien ta habla que gendeh sila religioso. Gane, na cuanto maga nacion mayoria del maga gente ta habla que nuay sila religion. *​—Mat. 24:12.

2. Cosa el cuanto maga razon si porque bien manada gente el gendeh religioso?

² Porque ta omenta el numero del maga gente que gendeh religioso? * El otro posible tan focus na diila alegria o na diila maga problema. (Luc. 8:14) El cuanto ya queda maga atheist. El otro ta creé con el Dios pero ta pensa que el religion de antes pa, gendeh mas practical y gendeh harmonia na ciencia y logica. Posible, ta puede sila oi na diila maga amigo, maestro o na maga de media que el vida ya principia por medio de evolucion pero gendeh sila tanto ta puede oi maga razon para creé con Dios. El otro rabiao na maga religioso lider cay ta saca lang el diila sen y quierre lang tiene poder. Na otro maga lugar, el gobierno ta pone restriccion con el maga actividad que tiene que hace na religion.

3. Cosa el proposito de este articulo?

³ Si Jesus ya dale mandato kanaton que “hace maga dicipulo con todo el maga gente.” (Mat. 28:19) Paquemodo kita puede ayuda con el maga gendeh religioso para aprende ama con Dios y queda dicipulo del Cristo? Debe kita realiza que el reaccion del  un persona na diaton mensaje posible ta depende si onde le ya engranda. Por ejemplo, otro el reaccion na diaton mensaje del maga gente estaba na Europe si compara con el maga estaba na Asia. Porque? Na Europe, manada el tiene cosa sabe acerca na Biblia y familiar con el idea que ya crea el Dios con el todo las cosas. Pero na Asia, mayoria del maga gente un poco lang o nuay gayot saber acerca na Biblia y posible gendeh ta creé na Creador. Este articulo hay ayuda kanaton para alcanza con el corazon del todo con quien kita puede incuntra na ministerio maskin onde man sila estaba o maskin cosa el diila creencia.

4. Porque puede kita esta positivo?

⁴ Queda Positivo. Cada año, tiene maga gendeh religioso el ta queda Testigo de Jehova. El otro tiene ya alto principio na moral y bien rabiao mira con el hipocresia na religion. El los de mas tiene bajo principio na moral y manada kanila tiene maga mal practica que debe sila cambia. Na ayuda de Jehova, asigurao kita que puede kita incuntra con “aquellos quien tiene justo condicion de corazon para obtene vida eterna.”​—Act. 13:48, NW; 1 Tim. 2:3, 4.

5. Cosa el razon si porque positivo el reaccion del maga gente na diaton mensaje?

⁵ Trata Kanila Enbuenamente y con Respeto. Mas mucho, positivo el reaccion del maga gente na diaton mensaje, gendeh por causa na cosa kita ta habla sino si paquemodo kita ta habla con ese. Ta aprecia sila si trata kita kanila enbuenamente, con respeto y dale mira que interesao kita kanila. Gendeh kita forza kanila que oi kanaton. Sino, ta pricura kita entende si porque ansina el diila opinion acerca na religion. Por ejemplo, sabe kita que el cuanto no quierre man cuento acerca na religion na maga gente que no conoce sila. El otro ta sinti que gendeh justo que pregunta con el un persona si cosa de suyu opinion acerca con Dios. El los demas ta tiene huya que puede kanila mira que ta le Biblia, especialmente junto con el un Testigo de Jehova. Maskin cosa pa el razon, ta pricura kita entende con el diila sentido.​—2 Tim. 2:24.

6. Paquemodo ya dale mira si apostol Pablo que sabe le man adjust con el de suyu presentacion y paquemodo kita puede imita con ele?

⁶ Cosa kita puede hace si ta sinti kita que gendeh comfortable el un persona si ta menciona kita maga palabra igual na “Biblia,” “creacion,” “Dios” o “religion”? Puede kita imita con apostol Pablo y man adjust con el diaton presentacion. Cuando tan cuento le na maga Judio, si Pablo ta usa con el Escritura. Pero cuando yan cuento le con el maga Griego na Areopago, nuay le directa menciona con el Escritura. (Act. 17:2, 3, 22-31) Paquemodo kita puede imita con el ejemplo de Pablo? Si puede tu conoce un persona quien gendeh ta creé na Biblia, mas bueno si gendeh tu directa menciona con el Biblia si tan cuento con ele. Si ta sinti tu que gendeh le comfortable cay baka mira con ele el otro que ta le Biblia junto contigo, dale con ele mira texto na manera que gendeh puede nota el otro, igual como na de tuyu gadget.

7. Cosa kita posible necesita hace para puede imita con Pablo como cosa ya menciona na 1 Corinto 9:20-23?

⁷ Pricura Entende y Oi Kanila. Debe kita pricura entende si cosa ta influencia con el maga gente na diaton teritorio. (Prov. 20:5) Considera otravez el ejemplo de Pablo. Ya engranda le junto con el maga Judio. Poreso, asigurao que necesita le man adjust para puede predica na maga Gentil quien tiene un poco lang o nuay gayot saber acerca con Jehova y na Escritura. Posible necesita kita man research o consulta na maga experienciao hermano y hermana na congregacion para mas puede kita entende si cosa ta pensa y ta sinti el maga gente na diaton teritorio.​—Le con el 1 Corinto 9:20-23.

8. Cosa el un manera para puede kita principia man cuento na maga gente acerca na Biblia?

 ⁸ El diaton proposito amo busca con aquellos quien sincero na buen noticia. (Mat. 10:11) Para puede este hace, debe kita pregunta con el maga gente si cosa diila opinion y oi kanila. Un hermano na England ta pregunta con el maga gente si paquemodo tiene un alegre matrimonio, si paquemodo hace engranda con el maga anak o si paquemodo enfrenta con el injusticia. Acabar oi con el diila opinion, ta pregunta le, “Cosa de tuyu opinion acerca con este consejo que ya escribi cerca 2,000 año ya el ya pasa?” Despues, ta dale le mira kanila un texto na de suyu gadget y gendeh ta menciona con el palabra “Biblia.”

9. Paquemodo kita posible ayuda con el maga gente quien ta evita man cuento acerca con Dios?

⁹ Puede kita alcanza el corazon del maga gente quien ta evita man cuento acerca con Dios por medio de discuti maga topico que daan ya sila interesao. Por ejemplo, manada el tan bilib na maga cosas na tierra y na cielo. Poreso, puede kita habla igual: “Siguro sabe tu que manada del maga invencion del maga scientist ya copia lang sila na maga cosas que ta existi ya na tierra. Por ejemplo, el maga tan design microfono ta estudia acerca na orejas y el maga tan design camera ta estudia acerca na ojos. Cosa tu ta puede pensa si ta mira tu con el maga cosas aqui na tierra? Para contigo, ya existi ba este por causa na un fuerza, un persona o otro pa?” Despues oi con ele, puede kita omenta: “Si ta estudia el maga engineer acerca na diseño del orejas y ojos, posible kita pensa si acerca con quien sila ta aprende. Ya queda yo interesao na cosa ya escribi el un escritor de antes: ‘El Uno quien ya hace con el orejas, gendeh ba le puede oi? El Uno quien ya forma con el ojos, gendeh ba le puede mira? . . . Ele el quien ta dale saber con el maga gente!’ El cuanto scientist tan uyun con ese maga palabra.” (Sal. 94:9, 10) Despues, puede kita dale mira kanila un video estaba na jw.org^® under na “Interviews and Experiences” na serie “Viewpoints on the Origin of Life.” (Mira under na PUBLICATIONS > VIDEOS.) O puede kita dale kanila el brosyur Was Life Created? o el The Origin of Life​—Five Questions Worth Asking.

10. Paquemodo kita posible principia man cuento con el un persona quien no quierre man cuento acerca con Dios?

¹⁰ Mayoria del maga gente quierre que tiene un bonito futuro. Pero, manada el ta creé que hay destroza con este mundo o gendeh mas puede queda con este. Un traveling overseer na  Norway ya habla que el maga gente quien no quierre man cuento acerca con Dios, interesao man cuento acerca na cosa ta sucede na mundo. Despues le man greet con el maga gente, ele ta pregunta: “Para contigo, posible ba tiene un bonito futuro? Ta depende ba este na maga politico, scientist o con otro pa?” Despues kanila oi enbuenamente, ta le o ta menciona le un texto acerca na un buen futuro. El cuanto quierre sabe mas acerca na promesa del Biblia que este mundo hay esta hasta para cuando y el maga buen gente hay tiene vida eterna.​—Sal. 37:29; Ecl. 1:4.

11. Porque kita debe usa maga diferente manera de introduccion y paquemodo kita puede imita con el ejemplo de Pablo que ya menciona na Roma 1:14-16?

¹¹ Debe kita usa maga diferente introduccion con aquellos con quien kita puede predica. Porque? Cay otro-otro el cada persona. Gendeh igual el diila interes. El cuanto quierre oi acerca con Dios o con el Biblia mientras el otro mas quierre que man cuento anay una acerca na otro cosas. Maskin cosa man el situacion, debe kita saca el oportunidad para man cuento con todo clase del maga gente. (Le con el Roma 1:14-16.) Pero, debe kita acorda que si Jehova el ta hace crici con el verdad na corazon del un persona quien ta ama si cosa el justo.​—1 Cor. 3:6, 7.

12. Cosa kita hace para puede predica con el maga gente estaba na Asia quien nuay considera que tiene Creador?

¹² Na entero mundo, manada publisher el ya puede conoce maga gente que estaba na maga nacion na Asia, incluido aquellos estaba na maga lugar donde el gobierno ya pone restriccion na maga religioso actividad. Na cuanto lugar na Asia, manada gente el nuay considera si tiene ba Creador o nuay. El cuanto kanila quierre sabe mas y man Bible study pero el otro, gendeh interesao aprende. Cosa kita hace para ayuda kanila? El cuanto experienciao publisher ya tiene buen resulta cuando ya principia sila el diila presentacion na gendeh sobra de formal, ya dale mira personal interes y ya relata si paquemodo ya queda enbuenamente el diila vida cuando ya aplica sila con el maga principio na Biblia.

13. Cosa puede ayuda con el maga gente para queda interesao na Biblia? (Mira con el letrato na cover.)

¹³ Manada gente el una ya queda interesao na maga justo principio na Biblia que puede ayuda kanila. (Ecl. 7:12) Na New York, un hermana quien ta visita na maga gente que ta converza Mandarin, ya habla: “Ta pricura yo dale mira interes na maga gente y oi kanila. Si puede yo sabe que nuevo lang sila ya cambia, ta pregunta yo: ‘Quetal el de tuyu adjustment? Ya puede ya ba tu incuntra trabajo? Ta trata ba contigo enbuenamente el maga gente aqui?’” Tiene vez, ta puede este ayuda con ele para introduci un enseñanza na Biblia. Si posible, el hermana ta pregunta: “Para contigo, cosa gaha el secreto para puede kita man uyun na maga gente? Puede ba yo dale mira contigo un consejo estaba na Biblia? Este ta habla: ‘El principio del peleajan igual como ta abri dam de agua; antes pa queda grande el peleajan, sale ya.’ Ta mira tu, puede gaha este ayuda para tiene kita buen amistad con otro?” (Prov. 17:14) Si converza kita con el maga gente na ansina manera, puede kita sabe si quien quierre aprende mas.

14. Paquemodo el un hermano na Asia ta ayuda con el maga gente quien ta habla que gendeh sila ta creé con Dios?

¹⁴ Cosa kita puede habla con aquellos quien gendeh ta creé con Dios? Un hermano na Asia quien ya dura ya ta predica na maga gente que gendeh ta creé con Dios ya habla: “Mas manada, si el un persona ta habla ‘Gendeh yo ta creé con Dios,’ quierre decir quel que gendeh le ta adora na maga dios que ta adora el mayoria del  maga gente na diila lugar. Poreso tan uyun yo kanila que mayoria del maga dios, maga gente lang ya hace y gendeh deverasan. Tiene vez, ta le yo con el Jeremias 16:20: ‘El un gente ba puede hace maga dios? Gendeh deverasan dios el cosa le ta hace.’ Despues, ta pregunta yo: ‘Paquemodo kita puede sabe si cosa dios el deverasan y el ya hace lang el gente?’ Ta oi yo enbuenamente y despues ta le yo el Isaias 41:23: ‘Habla kanamon si cosa sucede na futuro para sabe kame que maga dios ustedes.’ Despues, ta dale yo ejemplo si cosa ya habla si Jehova que sucede na futuro.”

15. Cosa kita puede aprende na ejemplo del un hermano na East Asia?

¹⁵ Un hermano na East Asia ta usa este manera si tan return visit. Habla le: “Ta dale yo mira kanila el cuanto del maga sabeduria na Biblia, maga profecia na Biblia que ya cumpli ya y maga ley que ta controla con el universo. Despues, ta dale yo mira si paquemodo este todo ta indica que tiene un vivo y sabio Dios. Si el un persona principia pensa con el posibilidad que tiene Dios, ta dale yo mira con ele si cosa ta habla el Biblia acerca con Jehova.”

16. Asegun na Maga Hebreo 11:6, porque el maga Bible study necesita tiene fe con Dios y na Biblia y paquemodo kita ayuda kanila cultiva con este?

¹⁶ Si ta conduci kita Bible study con el maga gente que gendeh religioso, necesita kita continua hace fuerte con el diila fe que el Dios ta existi. (Le con el Maga Hebreo 11:6.) Y necesita kita ayuda kanila hace fuerte diila fe na Biblia. Posible, necesita kita discuti con el cuanto enseñanza por cuanto beses. Cada vez man Bible study kanila, posible necesita kita discuti con el maga evidencia que el Biblia amo el Palabra del Dios. Puede kita discuti kanila unrato si paquemodo ya cumpli el maga profecia na Biblia, si paquemodo el Biblia harmonia na ciencia y historia y si paquemodo el Biblia puede ayuda kanaton cada dia.

17. Cosa el efecto del diaton amor na otro gente?

¹⁷ Puede kita ayuda con el maga gente queda dicipulo del Cristo si demonstra kita amor kanila, religioso man sila o gendeh. (1 Cor. 13:1) Mientras ta enseña kita kanila, el diaton goal amo para dale mira kanila que ta ama el Dios kanaton y quierre le que ama tambien kita con ele. Cada año, miles del maga gente quien del una tiene diutay o nuay gayot interes na religion el ya bautiza cay ya aprende sila ama con Dios. Poreso, queda positivo y demonstra amor con el todo clase de gente. Oi kanila. Pricura entende kanila. Por medio na de tuyu ejemplo, enseña kanila queda dicipulo del Cristo.