1-2. (a) Asegun na mandamiento de Jesus na Mateo 28:18-20, cosa el primer responsibilidad del Cristiano congregacion? (b) Cosa maga pregunta kita considera na este articulo?

ASIGURAO que el maga apostoles bien excited cuando yan junto-junto sila na monte. Despues del resureccion de Jesus, ya habla le kanila que man mirajan sila na ese lugar. (Mat. 28:16) Amo este posible el ocasion cuando “ya aparece Le con mas de quinientos del maga hermano y hermana na un tiempo lang.” (1 Cor. 15:6) Porque ya habla si Jesus con el de suyu maga dicipulo que man mirajan sila alla? Para dale kanila un mandamiento: “Anda ustedes y hace maga dicipulo con todo el maga gente.”​—Le con el Mateo 28:18-20.

² El maga dicipulo quien ya oi con el mandato de Jesus ya queda parte del Cristiano congregacion del primer siglo. El primer responsibilidad de aquel congregacion amo hace dicipulo del Cristo con el mas manada gente. * Ahora, tiene manada congregacion del maga verdadero Cristiano na entero mundo y nuay siempre cambia el diila responsibilidad. Na este articulo, hay considera kita cuatro pregunta: Porque bien importante que hace dicipulo con el maga gente? Cosa el envuelto con ese? Tiene ba parte el todo Cristiano na este trabajo? Y porque necesita kita paciencia na este trabajo?

3. Asegun na Juan 14:6 y 17:3, porque bien importante que hace dicipulo con el maga gente?

³ Porque bien importante que hace dicipulo? Cay el maga dicipulo del Cristo lang el puede queda amigo del Dios. Mas pa, aquellos quien ta sigui con el Cristo tiene buen clase de vida ahora y tiene el esperanza vivi hasta para cuando na futuro. (Le con el Juan 14:6; 17:3.) Claro que ya dale kanaton un importante responsibilidad si Jesus pero gendeh lang kita el envuelto na este trabajo. Si apostol Pablo ya escribi acerca con ele y con el de suyu maga uban: “Came ta trabaja junto con Dios.” (1 Cor. 3:9, El Nuevo Testamento) Ya dale gayot un privilegio si Jehova y si Jesus con el maga imperfecto gente.

4. Cosa kita puede aprende na experiencia de Ivan y Matilde?

⁴ Queda gayot kita alegre si hace kita dicipulo con el maga gente. Considera con el ejemplo de Ivan y de suyu mujer, si Matilde, na Colombia. Ya predica sila con el un joven hombre, si Davier, quien ya habla kanila: “Quierre yo hace cambio na de mio vida pero gendeh yo ta puede hace.” Si Davier un boxingero, burrachon, tan drugs y ta queda junto con el de suyu novia, si Erika. Si Ivan ya explica: “Ya principia kame man Bible study con ele. Lejos el diila barrio y malodo poreso tan bike kame por cuanto hora. Cuando ya puede nota si Erika que ya cambia el custumbre de Davier, yan junto le na diamon Bible study.” Ya llega el tiempo, si Davier ya descanza man drugs, toma y man boxing. Ya casa tambien le con Erika. Si Matilde ya habla: “Cuando ya bautiza kanda Davier y Erika del 2016, ya acorda kame con el cosa pirmi ta habla si Davier que quierre le hace cambio pero gendeh le ta puede hace. Ya puede kame llura na alegria.” Asigurao que hay queda tambien kita bien alegre si ayuda kita con el maga gente queda dicipulo del Cristo.

5. Cosa el primer cosa que necesita hace para puede hace dicipulo?

⁵ El primer cosa que necesita kita hace para puede hace dicipulo amo que “busca” con el maga gente quien tiene justo condicion de corazon. (Mat. 10:11, El Nuevo Testamento) Puede kita dale mira que maga Testigo de Jehova kita si predica kita con todo con quien kita puede man cuento. Si ta obedece kita con el mandato de Jesus que predica, prueba se que maga verdadero Cristiano kita.

6. Cosa puede ayuda kanaton para tiene buen resulta na ministerio?

⁶ Cuanto maga gente el quierre aprende acerca el verdad na Biblia pero manada de aquellos con quien kita ta predica dol gendeh interesao na primero. Posible que tiene kita cosa necesita hace para queda sila interesao. Para tiene buen resulta na ministerio, necesita kita prepara enbuenamente. Iscuji cuanto topico que posible puede tiene interes aquellos con quien kita puede man cuento. Despues, pensa si paquemodo tu puede introduci con el de tuyu topico.

7. Paquemodo tu puede principia man cuento con el un persona y porque importante que oi y dale kita mira respeto?

⁷ Por ejemplo, puede tu pregunta con ele: “Puede ba yo sabe de tuyu opinion acerca na un cosa? Manada del maga problema que ta experiencia kita ahora, ta experiencia tambien el maga gente na entero mundo. Para contigo, necesita gaha kita un gobierno para  solva con el problema del entero mundo?” Despues, puede tu discuti con el Daniel 2:44. O puede tu habla con el un persona: “Para contigo, cosa gaha el un buen manera para engranda el maga bata que tiene buen custumbre?” Despues, discuti con el Deuteronomio 6:6, 7. Maskin cosa pa tu topico discuti, pensa con el maga gente quien oi contigo. Imagina si cosa el beneficio kanila si aprende sila si cosa deverasan ta enseña el Biblia. Si tan cuento tu kanila, importante que oi tu y respeta con el diila opinion. Na ese manera, puede tu mas entende kanila y tiene posibilidad que oi sila contigo.

8. Porque necesita kita continua bira con el maga persona na teritorio?

⁸ Antes decidi estudia con el Biblia el un persona, necesita tu dale tiempo y esfuerzo para bira con ele. Porque? Cay posible que gendeh kita puede man cuento con ele na tiempo que bira kita. Y baka necesita pa tu visita con el un persona por cuanto beses antes le conforma man Bible study. Acorda que grande el posibilidad que crici el un siembra si regular con este ta rega. Na igual manera, posible crici el amor del un persona para con Jehova y con el Cristo si regular kita tan cuento con ele acerca na Palabra del Dios.

9-10. Porque kita puede habla que ya ayuda busca el todo Cristiano con aquellos quien tiene justo condicion de corazon?

⁹ El todo Cristiano ta ayuda busca con el maga gente quien tiene justo condicion del corazon. Puede kita compara con este na buscada na un bata que ya perde. Na cosa manera? Pensa con el cosa ya sucede con el tres año bata hombre quien ya perde. Maga 500 persona el ta busca con ele. Despues del maga 20 hora que perdido el bata, ya puede con ele  mira el un hombre na maizan (cornfield). No quierre este persona que man bilib con ele el maga gente cay ya incuntra le con el bata. Ele ya habla: “Mas de cien gente el ya busca para incuntra con ele.”

¹⁰ Manada gente ahora el igual con ese bata. Perdido tambien sila y nuay direccion. Nuay sila esperanza pero quierre sila que ayuda kanila. (Ef. 2:12) Mas de ocho millon kita quien ta hace esfuerzo para busca con este maga gente. Posible, nuay tu puede incuntra quien quierre estudia con el Biblia. Pero, baka el otro maga publisher ya puede incuntra interesao quien quierre aprende el verdad na ese mismo teritorio. Si el un hermano o hermana ya puede incuntra un persona quien ya queda dicipulo del Cristo, alegre el todo quien ya ayuda busca con ese persona.

11. Maskin pa nuay tu con quien tan Bible study ahora, cosa el otro manera que puede tu ayuda hace dicipulo?

¹¹ Maskin pa nuay tu con quien tan Bible study ahora, puede siempre tu ayuda hace dicipulo na otro manera. Por ejemplo, si mira tu nuevo cara na Kingdom Hall, puede tu man welcome y ayuda kanila. Si dale tu mira amor na ese manera, puede tu ayuda con ele queda convincido que maga verdadero Cristiano kita. (Juan 13:34, 35) Si man comento tu na miting, maskin pa corto lang, ta enseña este con el maga nuevo que habla si cosa sila ta creé na sincero y respetoso manera. Puede tambien tu sigui con el un nuevo publisher na ministerio y ayuda con ele usa con el Escritura para enseña con el maga gente. Si hace tu este, ta enseña tu con ele que imita con el Cristo.​—Luc. 10:25-28.

12. Necesita ba kita especial abilidad para puede hace maga dicipulo del Cristo? Explica.

¹² Gendeh kita debe pensa que necesita kita especial abilidad para puede enseña con otro queda dicipulo del Cristo. Porque man? Considera con el ejemplo de Faustina quien ta queda na Bolivia. Cuando ya conoce le con el maga Testigo de Jehova, no sabe ele le. Pero desde aquel tiempo, ya aprende ya ele le un poco. Bautizao ya le y quierre-quierre enseña con otro. Ta conduci le cinco Bible study cada semana. Maskin pa gendeh pa gayot bien bueno le si Faustina igual con el de suyu maga Bible study, ya puede le ayuda seis persona para bautiza.​—Luc. 10:21.

13. Maskin pa bien ocupao kita, cosa el cuanto bendicion que puede kita experiencia si ta hace kita dicipulo?

¹³ Manada Cristiano el bien ocupao cay manada sila importante responsibilidad. Pero maskin pa ansina, ta dale sila tiempo para conduci Bible study y ta resulta se na alegria. Considera el ejemplo de Melanie quien ta queda na Alaska. Solo-solo lang le ta hace engranda con el de suyu ocho año anak  mujer. Tiene tambien le full-time trabajo y ta ayuda cuida con el de suyu tata que tiene cancer. Si Melanie lang el Witness na diila barrio. Pirmi le ta reza que dale con ele fuerza para puede le sale predica maskin pa frio cay quierre gayot le incuntra interesao con quien le puede man Bible study. Ya incuntra le con Sara quien bien alegre sabe que tiene personal nombre el Dios. Despues del cuanto tiempo, si Sara ya conforma man Bible study. Si Melanie ya habla: “Llega Viernes denoche, cansao ya yo pero ta beneficia yo y el de mio anak si ta anda kame man Bible study. Quierre-quierre kame man research para contesta con el maga pregunta de Sara y bien alegre kame mira con ele queda amiga de Jehova.” Con coraje si Sara ya enfrenta oposicion, ya deja con el de suyu religion y ya bautiza.

14. (a) Na cosa manera igual na maga pescador aquellos quien ta hace dicipulo? (b) Cosa el efecto contigo del cosa ya habla si Pablo na 2 Timoteo 4:1, 2?

¹⁴ Maskin nuay pa tu con quien ya incuntra quien quierre queda dicipulo, continua siempre busca. Ya habla si Jesus que igual na maga pescador aquellos quien ta hace dicipulo. Posible que puede lang cuji pescao el maga pescador despues pa del cuanto hora. Mas mucho, ta pesca sila bien denoche o bien temprano y tiene vez, necesita pa sila pesca na maga lejos distancia. (Luc. 5:5) Na igual manera, el cuanto de aquellos quien ta hace dicipulo ta dale largo tiempo y con paciencia ta busca interesao na diferente hora y lugar. Porque? Para puede sila man cuento na mas manada gente. Mas mucho de aquellos quien  ta hace esfuerzo para hace con este ta incuntra maga gente quien interesao na diaton mensaje. Puede ba tu pruba predica na hora que mas manada tu con quien puede man cuento o na lugar donde mas manada gente?​—Le con el 2 Timoteo 4:1, 2.

15. Porque necesita paciencia si ta conduci Bible study?

¹⁵ Porque necesita paciencia si ta conduci Bible study? Un razon amo cay gendeh lang kita necesita ayuda con el persona que aprende y aprecia si cosa ta enseña el Biblia. Necesita tambien kita ayuda con ele que conoce y ama con el Autor del Biblia, si Jehova. Y puera que ta enseña kita con ele si cosa ta manda si Jesus con el de suyu maga dicipulo, necesita tambien kita ayuda con el persona que sabe si paquemodo aplica con ese mandato. Debe kita con paciencia asisti con ele mientras ta pricura le aplica con el maga principio na Biblia. El cuanto ta puede hace maga cambio na diila pensamiento y accion despues lang del cuanto meses; el otro ta necesita largo tiempo.

16. Cosa tu ya aprende na experiencia de Raúl?

¹⁶ Un misionario na Peru el ya tiene buen resulta cay paciencioso le. “Dos libro ya yo ya estudia con el de mio Bible study, si Raúl,” ya habla el misionario. “Pero tiene siempre le maga dificultad​—problema na de suyu matrimonio, ta habla le malo y gendeh con ele ta respeta el de suyu maga anak. Pero regular le ta atende miting poreso ta continua yo visita para ayuda con ele y con el de suyu familia. Despues del mas de tres año desde ya conoce yo con ele, ya cualifica le para na bautismo.”

17. Cosa kita discuti na siguiente articulo?

¹⁷ Ya manda kanaton si Jesus que “anda . . . hace maga dicipulo con todo el maga gente.” Para puede cumpli con ese mandato, necesita kita converza con el maga gente quien tiene creencia que bien diferente kanaton. Incluido aqui aquellos quien nuay religion o quien gendeh ta creé que tiene Dios. El siguiente articulo hay discuti si paquemodo kita puede predica con el buen noticia con este clase de maga gente.