Cuando ya principia yo man pioneer, ya cambia el de mio vida na manera que nuay gayot yo expecta. (Ef. 3:20) Pero baka pensa ustedes si paquemodo este ya sucede. Cunta yo de mio istoria desde el principio.

Ya nace yo na Berlin, Germany del 1939, cuanto meses despues principia el Guerra Mundial II. Cuando cerca ya acaba el guerra del 1945, ya hace cae manada bomba na Berlin. Na uno de este maga ataque, ya rebenta bomba na diamon lugar y el diamon familia ya evacua na un lugar donde gendeh kanamon tupa bomba. Para na diamon seguridad, ya anda kame na lugar del de mio nana na Erfurt.

Ya busca gayot de mio nana con el verdad. Poreso, ya le ele maga libro acerca na filosofia de gente y ya examina con el diferente religion pero gendeh le satisfechao. Del 1948, dos Testigo de Jehova el ya visita na diamon casa. Ya manda kanila entra diamon nana y manada le cosa ya pregunta kanila. Nuay pa un hora, ya habla le kanamon dos de mio hermana menor, “Ya incuntra ya yo con el verdad!” Nuay tarda, iyo, de mio nana y hermana ya principia ya atende miting na Erfurt.

Del 1950, ya bira kame na Berlin donde ya asocia kame na Berlin-Kreuzberg Congregation. Cuando ya cambia kame na otro lugar, ya atende kame na Berlin-Tempelhof Congregation. Nuay tarda, ya bautiza de mio nana pero ya sinti yo que gendeh pa yo preparao. Porque?

Diutay lang el de mio progreso cay huyain yo. Maskin pa ta sale yo predica pero por dos año, gendeh yo tan cuento na maga gente. Pero ya cambia se cuando yan junto yo con el maga hermano y hermana quien ya dale mira diila coraje y devocion con Jehova. El cuanto yan preso na Nazi concentration camp o na East Germany. El otro secreto ta lleva maga literatura na East Germany maskin pa posible kanila arresta y hace preso. Tiene gayot conmigo efecto el diila ejemplo. Ya pensa yo que si ya pone sila na peligro el diila vida y libertad para con  Jehova y na diila maga hermano, debe yo pricura gendeh queda bien huyain.

Cuando ya participa yo na special preaching campaign del 1955, ya menora de mio pagka-huyain. Na un carta que escribido na Informant, * ya anuncia si Hermano Nathan Knorr que uno este del maga bien grande campaña que ya hace el organizacion. Ya habla le que si el todo publisher hay participa, “este el de con todo bonito mes de predicacion que puede kita experiencia.” Amo se el cosa ya sucede! Nuay tarda, ya dedica yo de mio vida con Jehova y del 1956, ya bautiza yo junto con el de mio tata y hermana. Pero necesita ya tambien yo hace un importante decision.

Tarda ya yo sabe que debe yo man pioneer pero pirmi yo ta habla que gendeh anay yo man pioneer. Una, ya decidi yo aprende si paquemodo man buy and sell maga producto na otro nacion. Despues, quierre yo trabaja para queda yo experienciao na de mio trabajo antes yo principia man pioneer. Poreso, del 1961, ya acepta yo con el trabajo na Hamburg, uno del maga bien grande pantalan na Germany. Tan enjoy gayot yo na de mio trabajo poreso gendeh pa yo tan pioneer. Cosa yo hace?

Alegre yo cay ya usa si Jehova maga amable hermano para hace conmigo entende que bien importante sirvi con Jehova. Manada del de mio maga amigo el ya principia man pioneer y buen ejemplo sila para conmigo. Omento pa, si Hermano Erich Mundt, quien ya puede aguanta na concentration camp, ya anima conmigo que confia con Jehova. Ya habla le que na concentration camp, yan luya el maga hermano quien ya confia na diila mismo cuerpo. Pero aquellos quien ya confia con Jehova ya esta fiel y ya puede ayuda na organizacion.

Si Hermano Martin Poetzinger, quien na uliji ya sirvi como miembro del Cuerpo Gobernante, pirmi tambien ta anima con el maga hermano que ta habla, “El coraje amo el de con todo valoroso cosa que puede ustedes tiene!” Despues medita con aquel maga palabra, ya sale yo na de mio secular trabajo y ya principia man pioneer del Junio 1963. Ese el de con todo buen decision que ya hace yo! Despues del dos meses, antes pa yo puede busca nuevo trabajo, ya invita conmigo sirvi como un special pioneer. Despues del cuanto año, mas pa na cosa yo ta expecta el ya dale conmigo si Jehova. Ya invita conmigo na ika-44 clase na Gilead.

“No dayun man surrender na de tuyu assignment.” Ese el uno del de con todo importante cosas que ya puede yo aprende, especialmente estaba con Hermano Nathan Knorr y Lyman Swingle. Ya anima sila kanamon esta na diamon assignment maskin pa dificil. Si Hermano Knorr ya habla: “Na onde tu man focus? Na polvos, na insecto y na pobreza? O na maga pono, flores y na maga ngisi del maga gente? Aprende ama con el maga gente!” Un dia cuando ta explica si Hermano Swingle si porque el cuanto maga hermano pronto lang man surrender, nuay le puede aguanta y yan luha de suyu ojos. Necesita le descanza na de suyu talk para calma. Ya afecta gayot este conmigo y ya queda yo determinao que gendeh hace triste con el Cristo y con el de suyu maga fiel hermano.​—Mat. 25:40.

Cuando ya ricibi kame diamon assignment, cuanto maga Bethelite ya pregunta con el cuanto kanamon si onde kame anda. Bonito el diila maga comento acerca na maga assignment pero cuando ya habla yo: “Na Congo (Kinshasa)” yan silencio sila unrato y ya habla: “Ha, Congo? Ojala man junto contigo si Jehova!” Aquel maga tiempo, manada maga noticia que el maga gente na Congo (Kinshasa) tan peleajan y tan matajan. Pero pirmi yo ta pensa con el cosa yo ya aprende na Gilead. Nuay tarda despues del diamon graduation del Septiembre 1967, iyo, si Heinrich Dehnbostel y si Claude Lindsay yan viaje para na Kinshasa, el centro del Congo.

Cuando ya llega kame na Kinshasa, ya estudia kame French por tres meses. Despues, ya anda kame na Lubumbashi (Elisabethville del antes) cerca na boundary del Zambia na parte sur del Congo. Ya queda kame na casa del maga misionario na centro del ciudad.

Ciendo mayoria del teritorio na Lubumbashi nuay pa puede predica, alegre kame cay kame el una puede manda sabe el verdad na manada gente. Nuay tarda, ya tiene kame manada Bible study que gendeh ya kame puede conduci todo. Ya predica tambien kame na maga autoridad. Manada el quien ya respeta con el Palabra del Dios y con el trabajo predicacion. Manada del maga gente el ta converza Swahili, poreso iyo y si Claude Lindsay ya aprende tambien con ese lengguaje. Despues de ese, yan assign kanamon na un congregacion que Swahili el lengguaje.

Maskin tiene kame maga bonito experiencia, tiene tambien kame maga dificultad. Tiene vez necesita kame enfrenta con el maga burracho soldao y maga agresivo polis quien ta acusa falso kanamon. Un dia, manada armao polis el ya entra na diamon miting na casa del maga misionario y ya lleva kanamon na estacion del polis donde ya manda kanamon sinta na tierra hasta alas diez del noche antes kanamon larga.

Del 1969, yan assign conmigo na traveling work. Cuando circuit overseer yo, tiene vez ta camina yo lejos distancia, ta pasa yo na lodo y maga alto zacate​—maga cosas que comon na Africa. Na un barrio, ya hace pugaran abajo del  de mio cama el manok y el de suyu maga pisuh. Gendeh gayot yo ta ulvida si paquemodo le ya hace conmigo dispierta mientras iscuru pa. Alegre yo acorda con el maga tiempo junto yo con el maga hermano mientras ta sinta enfrente del bonfire y tan cuento acerca el verdad na Biblia.

Uno del diamon grande problema amo el maga persona quien ya pretende que maga Testigo de Jehova pero parte sila del Kitawala movement. * El cuanto diila ya bautiza y ya queda anciano. Pero el maga deverasan hermano y hermana nuay creé con este maga “maestro falso.” (Jud. 12, El Nuevo Testamento) Ya llega el tiempo, ya quita si Jehova con este maga gente na congregacion. Despues de ese, manada gente ya sabe el verdad y ya asocia na congregacion.

Del 1971, yan assign conmigo na branch office na Kinshasa, donde tiene yo diferente trabajo igual na correspondence, literature order y na Service Department. Na Bethel ya aprende yo organiza maga trabajo para na un grande nacion maskin dificil el situacion. Tiene vez, ta alcanza cuanto meses antes llega el diamon carta na maga congregacion. Estaba na eroplano, hace con este munta na bangca que ta sangga na maga siembra de agua por cuanto semana. Pero, ya cumpli siempre el trabajo maskin pa ya enfrenta este maga problema.

Bilib gayot yo con el maga hermano si paquemodo sila ya hace con el grande convencion maskin limitao lang diila sen. Ya hace sila stage con el casa del anay y usando el elephant grass (un clase de zacate semejante na cogon) ya hace sila dindin y ya rolla con este para hace bangco. Ya usa sila con el caña para hace poste y petate de tambo el diila techo y mesa. Y ya saca sila pellejo del pono para amarra con este ciendo nuay sila clavo. Bilib gayot yo mira con este maga hermano y hermana que tiene maga buen manera para puede enfrenta con el dificultad. Ya ama gayot yo kanila. Yan miss gayot yo kanila cuando ya tiene yo nuevo assignment.

Del 1974, ya cambia conmigo na branch office na Nairobi, Kenya. Manada kame cosa necesita hace cay el branch del Kenya ta suporta con el trabajo predicacion na diez cerca nacion y el cuanto de este yan ban con el diaton trabajo. Pirmi conmigo tan assign para visita con este maga nacion especialmente na Ethiopia, donde ta persigui con el diaton maga hermano y hermana alla y ta enfrenta sila maga dificil situacion. Ya maltrata con el manada kanila, ya hace preso y ya mata pa gane con el los demas. Pero ya puede sila aguanta cay tiene sila buen relacion con Jehova y na uno y otro.

Del 1980, bien alegre yo cay ya casa yo con Gail Matheson. De Canada si Gail y classmate kame na Gilead. Pirmi kame tan escribijan carta. Un misionario si Gail na Bolivia y despues del 12 año, yan mirajan kame na New York. Nuay tarda, ya casa kame na Kenya. Ta aprecia gayot yo cay si Gail tiene buen espiritualidad y contento na cosa le tiene. Ta continua le ama y suporta conmigo.

Yan assign kanamon de Gail na traveling work del 1986 mientras ta sirvi yo como un miembro de Branch Committee. Incluido na de mio trabajo amo que visita con el manada lugar bajo na Kenya branch.

Ta acorda yo cuando ta prepara kame para na un convencion na Asmara (na Eritrea) del 1992 cuando el diaton trabajo nuay pa man ban na ese lugar. Maka-triste, cay el venue que ya puede lang kame mira amo el un camarin que bien mal ichura apuera y mas malo ya adentro. Cuando dia ya del convencion, ya espanta yo cay ya puede hace bonito el maga hermano y hermana  con el lugar que puede usa para na adoranza con Jehova. Manada del maga familia el ya lleva maga tela y ya tapa con el maga gendeh bonito mira. Yan enjoy kame con el convencion y tiene 1,279 el ya atende.

Na traveling work, otro-otro el diamon accomodation. Tiene vez, ta esta kame na un grande y bonito casa cerca na aplaya; na otro tiempo, ta queda kame na casa que hacido de sin y el casillas maga 100 metro el distancia. Pero maskin onde pa man kame ta sirvi, gendeh kame ta ulvida con el tiempo que junto kame ta predica con el maga activo pioneer y publisher. Cuando ya ricibi kame diamon sunod assignment, necesita kame deja con el diamon maga amigo con quien man miss gayot kame.

Del 1987 hasta 1992, legal ya el diaton trabajo na cuanto lugar bajo na Kenya branch. Como resulta, tiene ya separtao branch office y country office na este maga lugar. Del 1993, yan assign kanamon na oficina na Addis Ababa, Ethiopia, donde legal ya ahora ta conoce con el diaton trabajo despues de cuanto decada que secreto con este ta hace.

Ya bendici gayot si Jehova con el trabajo na Ethiopia. Manada maga hermano y hermana el yan pioneer. Mas de 20 por ciento del maga publisher el ya sirvi como regular pioneer cada año desde 2012. Omento pa, el maga theocratic school ya dale training na maga hermano y mas de 120 Kingdom Hall el ya planta. Del 2004, ya cambia na nuevo lugar el Bethel family y ya planta tambien alla un Assembly Hall que un bendicion para na maga hermano.

Adentro na manada año, ya queda diamon maga amigo el maga hermano y hermana na Ethiopia. Ta ama gayot kame kanila cay bien bueno y amable sila. Ahora, manada ya kame cosa ta sinti poreso yan reassign kanamon na Central Europe branch. Ta cuida kanamon enbuenamente aqui pero tan miss gayot kame con el diamon maga amigo y amiga na Ethiopia.

Ya experiencia kame si paquemodo si Jehova ya bendici con el de suyu trabajo. (1 Cor. 3:6, 9) Por ejemplo, cuando una yo ya predica con el maga minero de Rwanda na Congo, nuay ni un publisher na Rwanda. Pero ahora tiene ya mas de 30,000 hermano y hermana na ese nacion. Del 1967, tiene maga 6,000 publisher na Congo (Kinshasa). Ahora tiene ya maga 230,000 y mas de un millon el ya atende na Comemoracion del 2018. Na todo nacion que bajo na Kenya branch de antes, el numero del maga publisher ya subi mas de 100,000.

Mas de 50 año ya pasa, ya usa si Jehova con el diferente hermano para ayuda conmigo man pioneer. Maskin huyain siempre yo, ya aprende yo confia completamente con Jehova. El cosa yo ya experiencia na Africa ya ayuda conmigo cultiva paciencia y queda contento. Bilib gayot kame de Gail con el maga hermano y hermana quien ya confia con Jehova, ya dale mira pagka-hospitable y ya puede enfrenta con el grande maga problema. Ta rindi gayot yo gracias con el de suyu incomparable pagka-bueno. Ya bendici gayot conmigo si Jehova na manera que nuay yo expecta.​—Sal. 37:4.