1. Porque kita debe prepara para na persecucion?

NA NOCHE antes muri el diaton Señor Jesus, ya habla le que hay odia con todo quien quierre queda de suyu dicipulo. (Juan 17:14) Hasta ahora, el maga fiel Cristiano ta experiencia persecucion estaba con aquellos quien tan contra con el verdadero adoranza. (2 Tim. 3:12) Mientras mas ta queda cerca el fin de este sistema, ta expecta kita que el diaton maga enemigo mas man contra kanaton.​—Mat. 24:9.

2-3. (a) Cosa kita debe sabe acerca na miedo? (b) Cosa kita considera na este articulo?

² Cosa kita debe hace ahora para queda preparao enfrenta con el persecucion? Gendeh necesita que pensa kita el todo cosas que posible sucede kanaton. Si hace se kita, posible kita tiene miedo y man lingasa. Baka descanza ya kita sirvi con Jehova antes pa kita experiencia problema. (Prov. 12:25; 17:22) El diaton “contrario, el demonio” ta pricura usa con el diaton miedo contra kanaton. (1 Ped. 5:8, 9) Cosa kita puede hace ahora para queda preparao na persecucion?

³ Na este articulo, hay considera kita si paquemodo mas hace fuerte el diaton relacion con Jehova y si porque importante que hace se ahora. Discuti tambien kita si cosa hace para mas tiene kita coraje. Y na ultimo, hay examina kita si cosa kita puede hace si ta odia kanaton el maga gente.

4. Base na Maga Hebreo 13:5, 6, na cosa kita debe queda convincido y porque?

⁴ Queda convincido que ta ama contigo si Jehova y nunca le abandona contigo. (Le con el Maga Hebreo 13:5, 6.) Manada  año ya el ya pasa, El Torre de Guardia ya habla: “El persona quien bien conoce con Dios hay confia gayot con ele na tiempo de probanza.” Deverasan gayot se! Para aguanta na persecucion, debe kita completamente ama y confia con Jehova y nunca man duda con el de suyu amor para kanaton.​—Mat. 22:36-38; Sant. 5:11.

5. Cosa tu hace para puede tu sinti el amor de Jehova?

⁵ Le con el Biblia todo’l dia que tiene goal queda cerca con Jehova. (Sant. 4:8) Mientras ta le tu, man focus na maga bonito calidad de Jehova. Pricura sinti si paquemodo de hondo el de suyu amor contigo na maga cosas que ya habla le y ya hace. (Ex. 34:6) El cuanto posible tan dificil creé que ta ama kanila el Dios cay nuay kanila quien ya dale mira amor. Si ta sinti tu igual ansina, pruba hace lista cada dia si paquemodo si Jehova ya dale mira lastima y pagka-bueno contigo. (Sal. 78:38, 39; Rom. 8:32) Mientras ta pensa tu con el de tuyu mismo experiencia y ta medita con el cosa tu ya le na Palabra del Dios, grande el posibilidad que manada tu cosa puede escribi que ya hace si Jehova para contigo. Si mas aprecia tu con el cosa ya hace si Jehova, mas queda tu cerca con ele.​—Sal. 116:1, 2.

6. Base na Salmo 94:17-19, paquemodo el rezo que con todo corazon puede ayuda contigo?

⁶ Pirmi reza. Imagina que ta abraza el un tata con el de suyu anak hombre. Ta sinti protegido el bata y gendeh ta tiene miedo man cuento con el de suyu tata acerca na maga bueno y maga mal cosas que ya sucede con ele na ese dia. Puede tambien tu experiencia con ese clase de relacion si atraca tu con Jehova cada dia por medio na rezo que con todo corazon. (Le con el Salmo 94:17-19.) Mientras ta reza tu con Jehova, “vacia con el de tuyu corazon igual como agua” y habla con el de tuyu amable Tata acerca na cosa tu ta tiene miedo y tan lingasa. (Lam. 2:19) Cosa el resulta? Hay experiencia tu el cosa ta habla el Biblia que “el paz del Dios, ese paz que noay quien ta puede entende.” (Fil. 4:6, 7) Si mas reza tu na ansina manera, mas sinti tu que cerca tu con Jehova.​—Rom. 8:38, 39.

7. Porque debe tu queda convincido que el promesa del Dios acerca na de suyu Reino hay cumpli?

⁷ Queda convincido que el maga bendicion del Reino del Dios hay cumpli. (Num. 23:19) Si mahina el de tuyu fe na ese maga promesa, mas facil con Satanas y con aquellos bajo na de suyu poder que hace miedo contigo. (Prov. 24:10; Heb. 2:15) Paquemodo tu hace fuerte ahora con el de tuyu fe na Reino del Dios? Dale tiempo man research acerca na maga promesa del Dios acerca na de suyu Reino y el maga razon si porque tu puede asigura que cumpli este. Paquemodo este puede ayuda? Considera el ejemplo de Stanley Jones quien yan preso por siete año por causa na de suyu fe. * Cosa ya puede ayuda con ele  para aguanta? Ele ya habla: “Fuerte el de mio fe cay sabe yo acerca na Reino del Dios y si cosa este puede hace y nunca yo yan duda con ese. Poreso, nuay gayot maskin cosa razon para deja yo con Jehova.” Si fuerte el de tuyu fe na maga promesa del Dios, hay queda tu mas cerca con Jehova y gendeh tu descanza sirvi con ele por causa na miedo.​—Prov. 3:25, 26.

8. Explica si cosa ta indica acerca kanaton el diaton mirada na atendida na miting.

⁸ Regular atende na maga miting. El diaton maga miting puede kanaton ayuda queda cerca con Jehova. El diaton mirada na atendida na miting ta indica si aguanta ba kita bajo na persecucion na futuro. (Heb. 10:24, 25) Porque kita se puede habla? Si gendeh kita ta atende miting ahora por causa na maga diutay sanggadura, cosa sucede si necesita ya kita pone na peligro con el diaton mismo cuerpo para man junto con el diaton maga hermano y hermana? Pero si determinao kita atende maga miting, gendeh kita descanza si el diaton maga enemigo pricura sangga kanaton para man junto con el diaton maga hermano y hermana. Este ya el tiempo para dale importancia con el diaton maga miting. Si quierre-quierre kita atende miting, hay continua kita obedece con Dios en vez con el maga gente maskin tiene oposicion o maskin pa prohibi kanaton el gobierno.​—Act. 5:29.

9. Porque bueno que man memorize texto si ta prepara na persecucion?

⁹ Man memorize con el de tuyu favorito texto. (Mat. 13:52) Gendeh tu puede acorda con el todo cosa tu ya le pero si Jehova puede usa con el de suyu sagrao espiritu para ayuda contigo acorda con el maga texto na Biblia. (Juan 14:26) El un hermano quien yan preso na East Germany y solo-solo na un selda ya habla: “Bien alegre yo cay ya puede yo man memorize mas de 200 texto! Ocupao yo medita maga diferente topico na Biblia.” Aquel maga texto ya ayuda con el diaton hermano queda cerca con Jehova y puede aguanta.

10. Porque kita debe man memorize maga cancion?

¹⁰ Man memorize y canta maga cancion que ta alaba con Jehova. Cuando yan preso na Filipo kanda Pablo y Silas, ya canta sila maga cancion para alaba con Jehova que yan memorize sila. (Act. 16:25) Cuando el diaton maga hermano y hermana na Soviet Union de antes ya queda destierro na Siberia, paquemodo sila ya hace fuerte con el diila mismo  cuerpo? Si Hermana Mariya Fedun ya acorda: “Ya canta kame con el todo cancion que sabe kame na diaton songbook.” Ya habla le que aquel maga cancion ya puede anima kanila y ya sinti sila que cerca sila con Jehova. Ta sinti ba tu fuerte si ta canta tu con el de tuyu favorito cancion? Poreso, man memorize ya!​—Mira con el cajon “ Dale Conmigo Coraje.”

11-12. (a) Asegun na 1 Samuel 17:37, 45-47, porque si David tiene coraje? (b) Cosa importante leccion kita ya aprende na ejemplo de David?

¹¹ Necesita tu coraje para enfrenta con el persecucion. Si ta sinti tu que falta tu ese calidad, cosa tu puede hace? Acorda que el deverasan coraje gendeh ta depende na de tuyu grandor, fuerza o abilidad. Considera con el ejemplo de David cuando ya enfrenta le con Goliat. Compara con ese gigante, si David diutay, mahina y nuay defensa. Nuay gane le maskin espada. Pero, bien valiente si David. Con coraje le ya anda para enfrenta con ese gigante.

¹² Porque tiene si David ese coraje? Asigurao le que junto con ele si Jehova. (Le con el 1 Samuel 17:37, 45-47.) Nuay man focus si David si paquemodo de grande si Goliat compara con ele. Sino, yan focus le si paquemodo de diutay si Goliat compara con Jehova. Cosa kita puede aprende na ese istoria? Hay tiene kita coraje si tiene kita confianza que si Jehova junto kanaton y si convincido kita que el diaton maga contrario mas diutay si compara con el Dios Todopoderoso. (2 Cron. 20:15; Sal. 16:8) Cosa kita hace ahora para tiene coraje antes pa llega el persecucion?

13. Cosa kita hace para tiene coraje? Explica.

¹³ Puede kita tiene coraje ahora si predica kita con el buen noticia acerca na Reino del Dios. Porque? Cay si ta predica kita, ta aprende kita confia con Jehova y gendeh tiene miedo na gente. (Prov. 29:25) Igual na un muscle que ta queda duro si tan exercise, el diaton coraje hay queda fuerte si predica kita na casa en casa, na publico lugar, na informal manera y na lugar de negocio. Si cultiva kita ahora el coraje para predica, queda kita preparao para continua predica maskin pa prohibi con el diaton trabajo.​—1 Tes. 2:1, 2.

14-15. Cosa maga leccion kita puede aprende con Nancy Yuen y Valentina Garnovskaya?

¹⁴ Manada kita cosa puede aprende na ejemplo del dos fiel hermana quien ya dale mira  coraje. Si Nancy Yuen mas de cinco pies lang el altor (1.5 m) pero nuay tiene miedo. * Nuay le descanza predica el buen noticia acerca na Reino del Dios. Como resulta, ya hace con ele preso mas de 20 año na China. El maga oficial quien ya investiga con ele ya habla que ele “el de con todo duro cabeza persona” na diila nacion!

¹⁵ Si Valentina Garnovskaya yan preso tambien por tres beses adentro de maga 21 año na Soviet Union de antes. * Bien determinao le continua predica poreso ya llama con ele el maga oficial como “un bien peligroso criminal.” Porque tiene coraje este dos fiel hermana? Cay convincido sila que si Jehova junto kanila.

16. Cosa necesita para tiene kita deverasan coraje?

¹⁶ Como cosa kita ya discuti, para tiene coraje gendeh kita debe man focus na diaton fuerza y abilidad. Sino, debe kita creé que junto kanaton si Jehova y ele el quien defende kanaton. (Deut. 1:29, 30; Zac. 4:6) Ese el manera para tiene kita deverasan coraje.

17-18. Como cosa ya habla na Juan 15:18-21, cosa aviso el ya dale si Jesus para kanaton? Explica.

¹⁷ Quierre kita que respeta kanaton el otro pero gendeh kita debe pensa que nuay kita valor si el otro no quierre kanaton. Si Jesus ya habla: “Alegre ustedes cuando el maga gente ta odia, ta arria y ta insulta con ustedes, y ta hace malo el de ustedes nombre por causa del Anak del Gente.” (Luc. 6:22) Cosa quierre decir del palabra de Jesus?

¹⁸ Nuay habla si Jesus que quierre el maga Cristiano si tiene quien ta odia kanila. Sino, realistico lang si Jesus. Gendeh kita parte de este mundo. Ta vivi kita base na enseñanza de Jesus y ta predica kita el mensaje que ele ya predica. Como resulta, el mundo ta odia kanaton. (Le con el Juan 15:18-21.) Quierre kita hace alegre con Jehova. Si odia sila kanaton, diila ya se problema.

19. Paquemodo kita puede imita con el ejemplo del maga apostoles?

 ¹⁹ Maskin cosa pa habla o hace el maga gente, no tiene huya que un Testigo de Jehova tu. (Miq. 4:5) Puede kita aprende si paquemodo enfrenta con el miedo na gente si considera kita el ejemplo del maga apostoles na Jerusalem despues muri si Jesus. Sabe sila que bien rabiao kanila el maga Judio religioso lider. (Act. 5:17, 18, 27, 28) Pero maskin pa ansina, todo’l dia sila ta anda na templo y ta manda conoce que maga dicipulo sila de Jesus. (Act. 5:42) Nuay sila permiti que ganá kanila el miedo. Puede tambien kita imita kanila si manda kita conoce que maga Testigo de Jehova kita​—na trabajo, na escuela y na diaton maga vecinos.​—Act. 4:29; Rom. 1:16.

20. Porque alegre el maga apostoles maskin pa ta odia kanila?

²⁰ Porque alegre el maga apostoles? Sabe sila si porque kanila ta odia y ta considera sila que un honor si maltrata kanila cay ta hace sila el voluntad de Jehova. (Luc. 6:23; Act. 5:41) Si apostol Pedro ya escribi: “Si tiene quien ta hace con ustedes sinti duele cay ustedes bueno, acepta con ese como un bendicion.” (1 Ped. 2:19-21; 3:14) Si ta entende kita que ta odia kanaton cay ta hace kita si cosa el justo, gendeh kita permiti que el diila rabia manda kanaton descanza sirvi con Jehova.

21-22. (a) Cosa tu ya decidi hace para prepara na persecucion? (b) Cosa kita considera na siguiente articulo?

²¹ No sabe kita si cuando principia el persecucion o si cuando prohibi el gobierno con el diaton trabajo. Pero, sabe kita que puede kita prepara ahora si hace kita fuerte el diaton relacion con Jehova, si hace kita esfuerzo para tiene coraje y aprende si cosa hace si ta odia kanaton el maga gente. El maga preparacion que ta hace kita ahora hay ayuda kanaton continua sirvi con Jehova na futuro.

²² Pero paquemodo si prohibi ya con el diaton trabajo? Na siguiente articulo, hay discuti kita maga principio na Biblia que puede ayuda kanaton para continua sirvi con Jehova maskin pa prohibi kanaton.