1-2. (a) Porque gendeh mas kita espanta si prohibi con el diaton adoranza? (b) Cosa kita considera na este articulo?

DEL 2018, mas de 223,000 publisher el ta queda na maga lugar donde ya prohibi o ya pone restriccion na diaton maga espiritual actividad. Gendeh este maka-espanta. Como cosa kita ya considera del ya pasa articulo, el maga verdadero Cristiano hay experiencia persecucion. (2 Tim. 3:12) Maskin onde man kita ta queda, posible bigla lang el gobierno hay manda kanaton descanza na diaton servicio con el diaton amable Dios, si Jehova.

² Si el gobierno na de ustedes lugar ya decidi prohibi con el adoranza con Jehova, baka pregunta tu este: ‘Ta persigui ba kanaton cay nuay mas bendici kanaton si Jehova? Gendeh ya ba kita puede sirvi con Jehova? Debe ba yo cambia na otro lugar donde puede yo sirvi con Dios?’ Na este articulo, hay discuti kita con ese maga pregunta. Considera tambien kita si paquemodo puede continua sirvi con Dios y cosa gendeh debe hace si prohibi con el diaton trabajo.

3. Asegun na 2 Corinto 11:23-27, cosa persecucion ya experiencia si apostol Pablo y cosa kita puede aprende na de suyu ejemplo?

³ Si el gobierno ya prohibi con el diaton adoranza, posible kita pensa que gendeh mas ta bendici kanaton el Dios. Pero acorda que si ta persigui kanaton, gendeh se quierre decir que gendeh mas alegre kanaton si Jehova. Pensa por ejemplo el experiencia de apostol Pablo. Asigurao tiene le el favor del Dios.  Ya tiene le el privilegio para escribi con el 14 carta de Cristiano Griego Escritura y queda apostol del maga nacion. Maskin pa ansina, ya experiencia siempre le grabe persecucion. (Le con el 2 Corinto 11:23-27.) Puede kita aprende na cosa ya pasa con Pablo que ta permiti si Jehova que persigui con el de suyu maga fiel siervo.

4. Porque kanaton ta odia el mundo?

⁴ Ya explica si Jesus si porque debe kita expecta oposicion. Ya habla le que hay odia kanaton el maga gente cay gendeh kita parte del mundo. (Juan 15:18, 19) Si ta persigui kanaton, gendeh se quierre decir que nuay mas kita el bendicion de Jehova. Sino, ta dale este mira que ta hace kita si cosa el justo!

5. Puede ba el maga gente hace descanza con el diaton adoranza con Dios Jehova? Explica.

⁵ El maga gente gendeh puede hace descanza con el diaton adoranza con Dios Jehova. Manada el ya pruba pero nuay tiene buen exito. Considera si cosa ya sucede del Guerra Mundial II. Na aquel tiempo, el gobierno del manada nacion grabe ya persigui con el maga siervo del Dios. Ya prohibi con el trabajo del maga Testigo de Jehova gendeh lang el maga Nazi del Germany sino maskin el gobierno na Australia, Canada y na otro pa lugar. Pero, nota el cosa ya sucede. Cuando ya principia el guerra del 1939, tiene 72,475 publisher na entero mundo. El report ta dale mira que cuando ya acaba el guerra del 1945, tiene ya 156,299 publisher por causa na bendicion de Jehova. Mas ya queda doble el numero del maga publisher!

6. Cosa el maga buen resulta del persecucion? Dale ejemplo.

⁶ El persecucion puede ayuda kanaton queda mas determinao sirvi con Dios Jehova en vez de tiene miedo. Por ejemplo, el un maridable que tiene un diutay anak ta queda na un nacion donde ya prohibi con el diaton adoranza. En vez de tiene miedo, el man maridable ya sirvi como regular pioneer. Yan resign pa gane el mujer na de suyu trabajo maskin grande el sueldo. Ya habla el marido que cuando ya prohibi con el diaton trabajo, manada gente el ta pregunta acerca na maga Testigo de Jehova. Y como resulta, mas facil ya para con ele principia Bible study. Y gendeh lang ese el buen resulta. Un anciano na aquel mismo nacion ya habla que manada de aquellos nuay mas sirvi  con Jehova ya principia atende maga miting y ya queda otravez activo.

7. (a) Cosa leccion kita puede aprende na Levitico 26:36, 37? (b) Cosa tu hace si prohibi con el diaton adoranza?

⁷ Ta prohibi el diaton enemigo con el diaton adoranza, cay quierre sila que tiene kita miedo sirvi con Jehova. Puera que prohibi kanaton, el otro posible hay hace calayat maga istoria que gendeh deverasan, imbia maga oficial na diaton casa para busca evidencia, forzao kanaton lleva na corte o hace pa gane preso con el cuanto kanaton. Ta pensa sila que tiene kita miedo cay ya puede sila pone con el cuanto kanaton na preso. Si hay tiene kita miedo kanila y na cosa sila posible hace kanaton, baka kita ya mismo pone restriccion na diaton adoranza. No quierre kita queda igual con aquellos ya menciona na Levitico 26:36, 37. (Le.) Gendeh kita permiti con el miedo que causa kanaton para menora o descanza con el diaton maga espiritual actividad. Confia kita con Jehova y gendeh man panic. (Isa. 28:16) Ta pidi kita guia con Jehova na rezo. Cay si Jehova el ta suporta kanaton, sabe kita que nuay maskin quien puede sangga kanaton sirvi con Dios maskin pa el de con todo poderoso gobierno de gente.​—Heb. 13:6.

8-9. (a) Cosa decicion el debe hace el cada cabeza del familia o cada individual? (b) Cosa puede ayuda con el un persona para hace justo decicion?

⁸ Si el gobierno donde tu ta queda hay prohibi con el diaton adoranza, baka pensa tu anda na otro nacion donde puede tu sirvi con Jehova. Personal decicion se de tuyu. Antes de decidi el un persona, puede le considera con el cosa ya hace el maga Cristiano del primer siglo cuando ya persigui kanila. Despues mata el maga enemigo con Esteban, el maga dicipulo na Jerusalem ya anda na Judea y Samaria y ya guinda pa gane hasta na Fenicia, Chipre y Antioquia. (Mat. 10:23; Act. 8:1; 11:19) Pero, puede tambien considera el un persona que cuando ya persigui con el maga Cristiano del primer siglo, si apostol Pablo ya decidi que esta na lugar maskin pa tiene oposicion na trabajo predicacion. Ya predica le con el buen noticia y ya anima con el maga hermano y hermana na maga ciudad que grabe el persecucion maskin pa peligroso este para con ele.​—Act. 14:19-23.

⁹ Cosa kita puede aprende na este maga ejemplo? El cada cabeza del familia debe decidi si cambia ba sila lugar o gendeh. Antes de decidi, necesita le reza y pensa enbuenamente acerca con el circumstancia del de suyu familia y el positivo y negativo efecto de este kanila. Na este situacion, el cada Cristiano “necesita carga con el disuyo problema [“responsibilidad,” NW].” (Gal. 6:5) Gendeh kita debe juzga con otro si cosa el diila decicion.

10. Cosa maga instruccion hay dale el branch office y el maga anciano?

¹⁰ Paquemodo tu puede continua adora con Jehova si prohibi kanaton? El branch office hay dale instruccion y practical sugestion con el maga anciano si paquemodo puede obtene espiritual comida, si paquemodo atende na maga miting y si paquemodo predica con el buen noticia. Si gendeh puede man contact con el maga anciano el branch office, el maga anciano mismo el ayuda contigo y con el todo na congregacion para continua el adoranza con Jehova. Hay guia sila kanaton base na cosa ta habla el Biblia y na diaton maga publicacion.​—Mat. 28:19, 20; Act. 5:29; Heb. 10:24, 25.

11. Porque tu puede asigura que obtene tu espiritual comida y cosa tu puede hace para protege con el de tuyu Biblia y publicacion?

 ¹¹ Ya promete si Jehova que hay obtene el de suyu maga siervo con el cosa sila necesita para esta fuerte na espiritual. (Isa. 65:13, 14; Luc. 12:42-44) Poreso, puede tu asigura que el de suyu organizacion hay hace el todo lo que puede para dale el cosa tu necesita para esta fiel. Cosa tu puede hace? Si prohibi con el diaton adoranza, busca buen lugar donde puede tu esconde con el de tuyu Biblia y otro pa maga publicacion. Con cuidao que no deja con ese maga precioso publicacion​—printed man este o electronic—​na un lugar que facil lang puede incuntra. Cada uno kanaton debe hace el todo cosa kita puede hace para esta fuerte el diaton fe.

12. Paquemodo el maga anciano organiza maga miting na manera que gendeh puede nota el otro?

¹² Paquemodo el diaton atendida na maga miting cada semana? Hay organiza el maga anciano con el maga miting na manera que gendeh nota el quien ta persigui kanaton. Posible habla sila contigo que hace con el miting na diutay grupo y posible pirmi sila cambia el hora y locacion del miting. Puede tu contribui na seguridad del congregacion si converza tu hinay si llega tu na miting y si bolbe ya tu. Posible necesita tu muda na manera que gendeh saca el atencion del otro maga gente.

13. Cosa kita puede aprende na diaton hermano y hermana na Soviet Union de antes?

¹³ Acerca na trabajo predicacion, el diaton circumstancia hay cambia depende na lugar donde kita ta esta. Pero ta ama kita con Jehova y alegre kita habla con otro acerca de suyu Reino, poreso hay busca kita manera para predica. (Luc. 8:1; Act. 4:29) El un historian, si Emily B. Baran, yan comento acerca con el predicacion del maga Testigo de Jehova na Soviet Union de antes. Ele ya habla: “Cuando el gobierno ya habla que gendeh mas sila puede predica, el maga Witness ya principia converza con el diila maga vecinos, uban na trabajo y maga amigo. Cuando ya pone kanila na preso por causa de este, ya predica sila con el diila uban na preso.” Maskin pa ya prohibi kanila, el diaton maga hermano na Soviet Union de antes nuay descanza predica. Si prohibi el trabajo predicacion na de ustedes lugar, ojala imita tu kanila!

14. Cosa aviso kanaton ta dale el Salmo 39:1?

¹⁴ Con cuidao si cosa tu dale informacion. Durante el tiempo de persecucion, debe sabe kita si cuando el “tiempo de silencio.” (Ecl. 3:7) Debe con cuidao kita acerca na maga informacion que gendeh debe sabe el otro, igual como el nombre del diaton maga hermano y hermana, el lugar donde kita tan miting, si paquemodo ta hace el predicacion y si paquemodo kita ta obtene espiritual comida. Gendeh kita habla  este maga informacion na maga gente que ta trabaja na gobierno o na diaton maga amigo y pariente na diaton nacion o de otro nacion. Cay si habla kita kanila, posible kita pone na peligro con el diaton maga hermano y hermana.​—Le con el Salmo 39:1.

15. Cosa pricura hace si Satanas kanaton y cosa kita debe hace?

¹⁵ No permiti que el diutay problema hay causa division kanaton. Sabe si Satanas que si el un familia gendeh unido, gendeh sila esta junto. (Mar. 3:24, 25) Hay pricura le causa division entre kanaton. Quierre le que kita mismo el man peleajan en vez de man contra con ele.

16. Cosa bonito ejemplo ya dale mira si Hermana Gertrud Poetzinger?

¹⁶ Maskin el maga mature Cristiano debe con cuidao que gendeh cae na ese trampa. Considera con el ejemplo del dos iscujido hermana, si Gertrud Poetzinger y Elfriede Löhr. Ya hace preso kanila junto con el otro maga hermana na Nazi concentration camp. Yan selos si Gertrud cuando ya dale talk si Elfriede para anima con el otro maga hermana quien junto kanila na campo. Na uliji, si Gertrud ya tiene huya y ya pidi ayuda con Jehova na rezo. Ya escribi le: “Necesita kita acepta si el otro tiene mas abilidad o responsibilidad compara kanaton.” Paquemodo le ya puede quita con el de suyu selos? Yan focus si Gertrud na maga buen calidad de Elfriede. Cay ya hace le este, ya puede le otravez tiene buen relacion con Elfriede. Sila dos ya puede aguanta na concentration camp y ya sirvi fiel con Jehova hasta na fin del diila vida aqui na tierra. Si hace kita esfuerzo para solva con el problema que tiene kita con el diaton hermano, nuay maskin cosa que puede kanaton causa division.​—Col. 3:13, 14.

17. Porque debe sigui kita pirmi con el direccion estaba na organizacion de Jehova?

¹⁷ Pirmi sigui na instruccion. Si sigui kita el instruccion del maga responsable hermano con quien puede confia, puede kita evita maga problema. (1 Ped. 5:5) Por ejemplo, na un lugar donde ya prohibi con el diaton trabajo, el maga responsable hermano ya dale direccion con el maga publisher que no deja literatura na maga householder. Pero el un pioneer hermano nuay sigui con el direccion y ya distribui le literatura. Cosa el resulta? Nuay tarda despues del diila informal witnessing, ya investiga kanila el polis. Posible, ya sigui kanila atras el cuanto oficial de gobierno y ya acaba saca con el maga literatura que ya distribui sila. Cosa kita puede aprende na este experiencia? Necesita kita sigui con el direccion maskin pa gendeh kita uyun con este. Hay bendici kanaton si Jehova si coopera kita con el maga hermano con quien le ya iscuji para guia kanaton.​—Heb. 13:7, 17.

18. Porque debe kita evita hace maga gendeh necesita ley?

 ¹⁸ No hace maga gendeh necesita ley. Si el maga anciano hace maga ley que gendeh necesita, hay hace lang sila lisud con otro. Si Hermano Juraj Kaminský ya acorda con el cosa ya sucede cuando ya prohibi kanila na Czechoslovakia de antes: “Despues arresta con el manada anciano, el cuanto de aquellos quien ya queda para guia na congregacion y na circuito, ya principia hace diila mismo ley para na maga publisher y ya habla kanila si cosa debe y gendeh debe hace.” Nuay dale si Jehova kanaton el derecho para decidi para con otro. El quien ta hace con ese, gendeh ta protege con el de suyu hermano y hermana, sino ta pricura le controla con el diila fe.​—2 Cor. 1:24.

19. Asegun na 2 Cronicas 32:7, 8, porque kita puede tiene coraje maskin cosa pa hace si Satanas?

¹⁹ El diaton numero uno contrario, si Satanas Diablo, gendeh descanza persigui con el maga fiel siervo de Jehova. (1 Ped. 5:8; Rev. 2:10) Si Satanas y aquellos ta suporta con ele hay pricura hace descanza con el diaton adoranza con Jehova. Pero maskin pa tiene kita miedo, gendeh kita descanza sirvi con Jehova! (Deut. 7:21) Junto kanaton si Jehova y continua le suporta kanaton maskin pa prohibi con el diaton trabajo.​—Le con el 2 Cronicas 32:7, 8.

20. Cosa tu determinao hace?

²⁰ Ojala tiene kita el igual determinacion del maga hermano del primer siglo que ya habla con el maga ta rula na diila tiempo: “Hace ustedes el decision si cosa justo na vista de Dios, si ay obedece ba came con ustedes o con Dios? No puede came calla la boca, sino necesita gayot came habla acerca del cosa ya mira y ya oi came.”​—Act. 4:19, 20, El Nuevo Testamento.