1. Cosa ya admiti si apostol Pablo acerca na de suyu mismo cuerpo?

SABE si apostol Pablo que tiene vez ta sinti le maluya. Ya admiti le que “ya perde el fuerza” del de suyu cuerpo, que necesita gayot le hace esfuerzo para hace si cosa el justo y si Jehova gendeh pirmi ta contesta con el de suyu maga rezo na manera que ta expecta le. (2 Cor. 4:16; 12:7-9; Roma 7:21-23) Sabe tambien si apostol Pablo que aquellos quien tan contra con ele ta mira con ele como maluya. * Pero nuay le permiti que el maga negativo opinion del otro acerca con ele o el de suyu mismo imperfeccion hay manda sinti con ele que nuay le sirvi.​—2 Cor. 10:10-12, 17, 18.

2. Asegun na 2 Corinto 12:9, 10, cosa importante leccion ya aprende si Pablo?

² Si Pablo ya puede aprende un importante leccion​—puede queda mafuerza el un persona maskin pa ta sinti le maluya. (Le con el 2 Corinto 12:9, 10.) Si Jehova ya habla con Pablo que el De Suyu poder “ta trabaja mas embuenamente cuando maluya el gente.” Quierre decir, si Jehova hay dale con Pablo el fuerza que nuay ele. Pero una, considera kita si porque gendeh kita debe man lingasa si el diaton maga contrario ta insulta kanaton.

3. Porque kita puede queda alegre maskin pa ta insulta kanaton?

³ No quierre kita que insulta kanaton el otro. Pero, si el diaton maga enemigo ta insulta kanaton y pone gayot kita  atencion na cosa sila ta habla, posible kita queda maluya. (Prov. 24:10) Poreso, paquemodo kita mira con el insulto del diaton maga contrario? Igual con Pablo, puede kita ‘incuntra alegria na maga insulto.’ (2 Cor. 12:10) Porque? Cay si el gente ta insulta y tan contra kanaton, ta dale este mira que kita maga deverasan dicipulo de Jesus. (1 Ped. 4:14) Si Jesus ya habla que hay persigui con el de suyu maga siguidores. (Juan 15:18-20) Ya sucede se del primer siglo. De aquel tiempo, aquellos ya queda influenciao na cultura de Griego ta mira con el maga Cristiano como gendeh inteligente y mahina. Y el cuanto na maga Judio ta mira con el maga Cristiano que ‘gendeh estudiao,’ igual con apostol Pedro y Juan. (Act. 4:13) Dol mahina el maga Cristiano cay gendeh sila ta entra na politica o na militar y gendeh kanila ta respeta el maga gente na comunidad.

4. Cosa ya hace el maga Cristiano del primer siglo cuando ya persigui kanila?

⁴ El maga Cristiano del primer siglo ba ya permiti que el negativo mirada del diila contrario hace descanza kanila? Nuay. Por ejemplo, si apostol Pedro y Juan ya mira con el persecucion como un honor cay ta sigui sila con Jesus y ta enseña con otro acerca con ele. (Act. 4:18-21; 5:27-29, 40-42) Nuay razon para tiene huya el maga dicipulo. Maskin pa el maga gente na comunidad gendeh ta respeta con el maga Cristiano del primer siglo, mas manada pa sila cosa bueno ya puede hace contra con el diila maga contrario. Por ejemplo, el maga libro na Biblia que ya escribi el cuanto de aquellos maga Cristiano ta continua dale ayuda y esperanza con el millones de gente. Y el Reino que ya predica sila ta rula ya ahora na cielo y gendeh mas dura, hay rula este na entero tierra. (Mat. 24:14) El poderoso gobierno del Roma de antes, quien ya persigui con el maga Cristiano, ya dura ya nuay mas existi. Pero, aquellos maga leal dicipulo maga rey ya ahora na cielo. Pero el diila maga contrario muerto ya y si hay resucita man kanila, hay queda sila bajo del Reino que ya anuncia el maga Cristiano con quien sila ya odia.​—Rev. 5:10.

5. Asegun na Juan 15:19, porque el maga gente na mundo gendeh ta respeta con el maga siervo de Jehova?

⁵ Ahora, el cuanto maga gente gendeh ta respeta con el maga siervo de Jehova y ta gangguia kanaton cay ta mira sila kanaton como gendeh inteligente y mahina. Porque? Cay gendeh kita tan ta sigui con el maga custumbre de aquellos alrededor kanaton. Ta pricura kita queda humilde, sumiso y obediente. Pero, el maga gente ahora ta alaba con el maga orgulloso, arogante y maga rebelloso. Omento pa, gendeh kita ta entramete na politica y na militar del maskin cosa nacion. Diferente kita na maga gente del mundo poreso ta mira sila kanaton como mahina.​—Le con el Juan 15:19; Roma 12:2.

6. Cosa grande trabajo el ta cumpli si Jehova por medio na de suyu maga siervo?

⁶ Maskin pa el maga gente na mundo ta mira kanaton como maga mahina, si Jehova ta usa kanaton para hace maga grande cosas. Ta puede cumpli con el de con todo grande trabajo predicacion na entero tierra. El de suyu maga siervo ahora ta produci con el de con todo manada translation de magasin que ta distribui na entero tierra. Ta usa tambien sila con el Biblia para ayuda con el millones de maga gente para progresa el diila vida. Todo este ya queda posible na ayuda de Jehova quien ta usa con el grupo de maga gente que ta mira el mundo como maga mahina. Pero quetal kita como maga individual? Puede ba ayuda kanaton si Jehova para queda mafuerza? Si ansina, cosa kita puede hace  para puede ricibi el de suyu ayuda? Considera kita ahora con el tres especifico cosas que puede kita aprende na ejemplo de apostol Pablo.

7. Cosa el un leccion que puede kita aprende na ejemplo de Pablo?

⁷ El un leccion que puede kita aprende na ejemplo de Pablo amo: No confia na de tuyu mismo fuerza o abilidad si ta sirvi con Jehova. Tiene razon si Pablo para queda orgulloso y confia na de suyu mismo cuerpo. Ya engranda le na Tarso​—el centro del un provincia na Roma. Rico el ciudad de Tarso y tiene este un conocido universidad. Educao si Pablo​—ya enseña con ele el uno na maga respetao Judio lider de aquel tiempo, si Gamaliel. (Act. 5:34; 22:3) Y si Pablo ya queda un importante persona na de suyu maga uban Judio. Ele ya habla: “Siguro ya oi ustedes . . . si paquilaya de importante ya queda yo entre el los demas maga Judio del dimio tiempo.” (Gal. 1:13, 14; Act. 26:4) Pero nuay confia si Pablo na de suyu mismo cuerpo.

8. Asegun na Filipo 3:8, paquemodo ta mira si Pablo con el maga cosas que ya deja le, y porque le ‘ya incuntra alegria’ na de suyu maga limitacion?

⁸ Alegre ya deja si Pablo con el maga cosas que para na mundo ta hace con ele mafuerza. Gane, ya puede le realiza que este maga cosas amo maga “basura.” (Le con el Filipo 3:8.) Ya experiencia manada dificultad si Pablo cay ya queda le siguidores del Cristo. Ya odia con ele el de suyu mismo nacion. (Act. 23:12-14) Y ya latiga y ya hace preso con ele el de suyu mismo maga uban Romano. (Act. 16:19-24, 37) Mas pa, ya realiza si Pablo que imperfecto le y tan dificil hace si cosa el justo. (Roma 7:21-25) Pero en vez de permiti que hace con ele descanza el de suyu maga contrario o de suyu imperfeccion, ‘ya incuntra le alegria’ na de suyu maga limitacion. Porque? Cay si maluya le, ta puede le mira si paquemodo el Dios ta ayuda con ele.​—2 Cor. 4:7; 12:10.

9. Cosa debe el diaton mirada na maga cosas que ta hace kanaton dol maluya?

⁹ Si quierre kita obtene el fuerza estaba con Jehova, gendeh kita debe pensa que el fisical fuerza, educacion, cultura o el material riqueza  amo el determina si paquemodo kita de valoroso. Gendeh este amo el cosas que ta hace kanaton usable con Jehova. Gane, poco lang na maga siervo del Dios el ‘estudiao asegun na maga gente, poco lang diaton poderoso, poco lang diaton rico.’ Pero, si Jehova ya iscuji para usa “con el maga maluya de este mundo.” (1 Cor. 1:26, 27) Poreso, no mira con el maga cosas que ta hace contigo dol maluya como sanggadura para sirvi con Jehova. Sino, mira con este como maga oportunidad para puede mira si paquemodo si Jehova ta ayuda contigo. Por ejemplo, si ta tiene tu miedo con aquellos quien ta causa contigo para man duda na cosa tu ta creé, reza con Jehova que dale contigo animo si ta defende tu con el de tuyu fe. (Ef. 6:19, 20) Si ta experiencia tu problema na salud, pidi con Jehova que dale contigo el fuerza que necesita para esta ocupao na de suyu servicio. Cada vez tu mira si paquemodo si Jehova ta ayuda contigo, queda fuerte el de tuyu fe y queda tu mafuerza.

10. Porque kita debe estudia con el maga ejemplo del maga fiel siervo del Dios na Biblia, igual con aquellos ya menciona na Maga Hebreo 11:32-34?

¹⁰ Ya estudia gayot enbuenamente si Pablo con el Escritura. Ya puede le aprende manada maga verdad. Ya aprende tambien le na maga ejemplo del maga fiel siervo del Dios de quien experiencia ya escribi na Palabra del Dios. Cuando si Pablo ya escribi para na maga Hebreo Cristiano, ya pidi le kanila que medita acerca con el maga ejemplo del maga fiel siervo de Jehova. (Le con el Maga Hebreo 11:32-34.) Considera kita con el uno de este maga siervo, si Rey David. Necesita le aguanta na oposicion, gendeh lang estaba na de suyu maga enemigo, sino estaba tambien na de suyu maga amigo del una. Mientras considera kita con el ejemplo de David, puede kita entende si porque ya puede ayuda con Pablo el ejemplo de David y si paquemodo kita puede imita con Pablo.

11. Porque dol mahina mira con David? (Mira con el letrato na cover.)

¹¹ El mafuerza soldao que si Goliat ta mira con David como mahina. Cuando ya mira si Goliat con David, “ya gangguia le con ele” ciendo mas grande si Goliat, mas armao y mas preparao para na guerra. Pero si David un bata lang que nuay experiencia y dol gendeh preparao para na guerra. Pero ya queda mafuerza si David maskin pa dol mahina con ele mira. Ya confia le con Jehova para dale con ele fuerza y ya hace le perde con el de suyu enemigo.​—1 Sam. 17:41-45, 50.

12. Cosa otro dificultad el ya enfrenta si David?

¹² Tiene pa otro dificultad ya enfrenta si David que posible con ele manda sinti mahina. Leal ya sirvi si David con Saul, con quien ya iscuji si Jehova para queda rey del Israel. Del una, ta respeta si Rey Saul con David. Pero na uliji, el orgullo ya causa con Saul para man celos con David. Ya maltrata si Saul con David y ya pricura pa gane mata con ele.​—1 Sam. 18:6-9, 29; 19:9-11.

13. Cosa ya hace si David cuando si Rey Saul nuay trata con ele na justo manera?

¹³ Maskin pa na gendeh justo tratamiento de Rey Saul, si David ya continua dale mira respeto con el iscujido rey de Jehova. (1 Sam. 24:6) Nuay le disculpa con Jehova na maga mal cosas que ya hace si Saul con ele. Sino, ya confia si David con Jehova que dale con ele el fuerza que necesita le para aguanta na este dificil probanza.​—Sal. 18:1, superscription.

14. Cosa situacion el ya enfrenta si apostol Pablo que semejante con David?

¹⁴ Si apostol Pablo ya enfrenta un situacion que semejante con David. Mas poderoso el  maga enemigo de Pablo contra con ele. Manada del maga prominente lider na de suyu tiempo el ta odia con ele. Manada beses con ele ya latiga y ya pone na preso. Igual con David, ya maltrata con Pablo el maga gente que debe era de suyu maga amigo. Gane, el cuanto na Cristiano congregacion yan contra con ele. (2 Cor. 12:11; Fil. 3:18) Pero ya ganá si Pablo con aquellos quien tan contra con ele. Na cosa manera? Ya continua le predica maskin pa na oposicion. Ya esta le leal na de suyu maga hermano y hermana, maskin pa gendeh justo el diila tratamiento con ele. Y el de con todo importante, ya esta le fiel con Dios hasta na fin del de suyu vida. (2 Tim. 4:8) Ya puede le hace este todo, gendeh por causa na de suyu mismo abilidad, sino cay ya confia le con Jehova.

15. Cosa el diaton goal y paquemodo kita se puede hace?

¹⁵ Ta experiencia ba tu maga insulto o persecucion estaba na de tuyu maga classmate, uban na trabajo o gendeh Witness familia? Tiene ba na congregacion el ya trata contigo na gendeh justo manera? Si ansina, acorda con el ejemplo de David y Pablo. Puede tu continua ganá con el maldad “por medio del maga cosa-cosa bueno.” (Roma 12:21) Gendeh de tuyu goal que guerria piedra na frente del otro igual na cosa ya hace si David, sino para ayuda con el maga gente aprende acerca con Jehova y na Biblia. Puede tu se hace si usa tu con el Biblia para contesta con el pregunta del maga gente, si trata tu enbuenamente y con respeto con aquellos quien ta maltrata contigo y si hace tu bueno con todo, maskin na de tuyu maga enemigo.​—Mat. 5:44; 1 Ped. 3:15-17.

16-17. Cosa nuay ulvida si Pablo?

¹⁶ Antes queda dicipulo del Cristo si apostol Pablo, ta persigui le con el maga siguidores de Jesus. (Act. 7:58; 1 Tim. 1:13) Mismo si Jesus el ya sangga con Pablo, que conocido del una como si Saul, para gendeh le ataca con el Cristiano congregacion. Ya converza si Jesus con Pablo estaba na cielo y ya hace con ele bulak. Para bira otravez el de suyu vista, necesita si Pablo pidi ayuda mismo na maga gente con  quien le ta persigui. Con humildad le ya acepta el ayuda estaba na un dicipulo, que el nombre si Ananias, quien ya hace bira con el de suyu vista.​—Act. 9:3-9, 17, 18.

¹⁷ Na uliji, ya queda conocido miembro si Pablo del Cristiano congregacion, pero nuay le ulvida con el leccion que ya enseña con ele si Jesus na camino para na Damasco. Ya esta humilde si Pablo y ya acepta con el ayuda del de suyu maga hermano y hermana. Ya habla le que “grande el consuelo ya dale sila” con ele.​—Col. 4:10, 11.

18. Porque posible no quierre kita acepta el ayuda del otro?

¹⁸ Cosa kita puede aprende con Pablo? Cuando nuevo pa kita yan junto na maga siervo de Jehova, posible que bien quierre kita acepta ayuda con otro cay sabe kita que manada pa kita cosa debe aprende. (1 Cor. 3:1, 2) Pero quetal ahora? Si ya dura ya kita ta sirvi con Jehova y manada ya experiencia, posible que no quierre mas kita acepta ayuda especialmente con aquellos nuevo na verdad. Pero, ta usa si Jehova con el diaton maga hermano y hermana para hace fuerte kanaton. (Roma 1:11, 12) Poreso, si quierre kita saca fuerza estaba con Jehova, necesita kita acepta con el ayuda del diaton maga hermano y hermana.

19. Porque ya tiene buen exito el todo cosas que ya hace si Pablo?

¹⁹ Manada cosa ya puede hace si Pablo despues le queda un Cristiano. Porque? Cay ya puede le aprende que para tiene buen exito el un persona, gendeh se ta depende na de suyu fuerza, educacion o riqueza, sino na de suyu humildad y confianza con Jehova. Ojala imita kita con Pablo. Puede kita se hace (1) si confia kita con Jehova, (2) si aprende kita na maga ejemplo na Biblia y (3) si acepta kita ayuda estaba na diaton maga hermano y hermana. Maskin paquemodo man kita de mahina, si Jehova hay hace kanaton mafuerza!