1. Cosa quierre decir del termino “verdad”?

“PAQUEMODO tu ya incuntra con el verdad?” “Ya engranda ba tu na verdad?” “Paquemodo de tarda ya tu na verdad?” Posible ya pregunta ya se contigo​—o etu mismo ya pregunta se con otro. Cosa quierre decir del termino “verdad”? Mas mucho, ta usa kita se para refiri na cosa kita ta creé, el diaton manera de adoranza y el diaton manera de vida. El maga gente quien talli na verdad sabe si cosa el Biblia ta enseña y ta aplica sila con el maga principio de este na diila vida. Como resulta, ya queda sila librao na maga falso enseñanza y tiene sila el de con todo alegre vida que posible para na maga imperfecto gente.​—Juan 8:32.

2. Asegun na Juan 13:34, 35, cosa posible el razon si porque el un persona ya queda interesao na verdad del primero?

² Porque tu ya queda interesao na verdad del primero? Posible por causa na buen conducta del maga siervo de Jehova. (1 Ped. 2:12) O baka por causa na amor que ya dale sila mira. Manada el quien ya puede observa con ese amor na diila primer atendida na miting, y mas ya acorda pa sila con ese contra na cosa ya discuti alla. Gendeh mas se maka-espanta cay ya habla si Jesus que el identificacion del de suyu maga dicipulo amo el amor para na uno y otro. (Le con el Juan 13:34, 35.) Pero, mas pa con ese el necesita si quierre kita tiene fuerte fe.

3. Cosa posible sucede si el diaton fe con Dios base lang na amor que ta dale mira el maga hermano y hermana?

³ El diaton fe gendeh lang debe base na amor que tiene el maga siervo del Dios. Porque? Pone kita que tiene un hermano​—un anciano o pioneer—​ya comete serioso culpa. O cosa gaha si el un hermano o hermana ya hace sinti duele contigo? O baka tiene quien ya queda apostata quien ta habla que nuay kanaton el verdad. Si sucede ese maga cosas, hay man luya ba tu  y descanza sirvi con Jehova? Este el leccion: Si tiene tu fe con Dios por causa lang na cosa el otro gente ta hace y gendeh por causa na de tuyu buen relacion con Jehova, gendeh queda fuerte el de tuyu fe. Para tiene fuerte fe, gendeh lang este debe base na de tuyu sentido o emocion sino na maga deverasan informacion para asigurao tu que justo el cosa tu ta aprende. Necesita tu queda convincido que el Biblia ta contene el verdad acerca con Jehova.​—Roma 12:2.

4. Asegun na Mateo 13:3-6, 20, 21, cosa hace el cuanto si llega el maga problema?

⁴ Si Jesus ya habla que el cuanto hay acepta con el verdad “con alegria” pero man luya el diila fe si llega el problema. (Le con el Mateo 13:3-6, 20, 21.) Posible nuay sila realiza que aquellos quien sigui con Jesus hay enfrenta maga dificultad. (Mat. 16:24) O baka ya pensa sila que si queda sila Cristiano, queda sila librao na problema y puro bendicion ya lang sila ricibi. Pero na diaton mundo ahora, hay tiene gayot kita maga problema. Ta cambia el diaton situacion y ta causa este para perde diaton alegria.​—Sal. 6:6; Ecl. 9:11.

5. Paquemodo el mayoria del diaton maga hermano y hermana ta dale mira que convincido sila que talli sila na verdad?

⁵ El mayoria del diaton maga hermano y hermana ta dale mira que convincido sila que talli sila na verdad. Paquemodo? Gendeh sila tan luya maskin pa el un hermano y hermana ya hace sinti duele kanila o ya queda envuelto na gendeh buen conducta. (Sal. 119:165) Cada vez ta enfrenta sila problema, el diila fe mas ta queda fuerte y gendeh tan luya. (Sant. 1:2-4) Paquemodo tu tiene ansina clase de fe?

6. Onde base el fe del maga dicipulo del primer siglo?

⁶ El maga dicipulo del primer siglo ya tiene fe por causa na cosa sila ya aprende na Escritura y na maga enseñanza de Jesucristo, que amo “el verdad del Buen Noticia.” (Gal. 2:5) Este verdad amo el todo cosas que ta creé kita como maga Cristiano, incluido el verdad acerca na rescate de Jesus y de suyu resureccion. Si apostol Pablo convincido que verdad este maga enseñanza. Porque? Cay ya usa ele con el Escritura para “dale prueba [que] el Cristo necesita gayot sufri y levanta entre el maga muerto.” (Act. 17:2, 3) El maga dicipulo del primer siglo ya acepta con ese maga enseñanza y ya confia con el sagrao espiritu para ayuda kanila entende con el Palabra del Dios. Ya asigura sila que ese maga enseñanza base na Escritura. (Act. 17:11, 12; Heb. 5:14) El diila fe gendeh lang base na sentido y emocion. Y nuay sila sirvi con Jehova por causa lang cay alegre sila man junto con el maga hermano y hermana. Sino ya tiene sila fe cay ya ‘sabe sila mas acerca de Dios.’​—Col. 1:9, 10, El Nuevo Testamento.

7. Cosa kita puede hace si tiene kita fuerte fe na maga verdad na Biblia?

⁷ El verdad na Biblia gendeh ta cambia. (Sal. 119:160) Por ejemplo, gendeh se ta cambia si el un hermano ya hace sinti duele kanaton o ya comete serioso culpa. Y gendeh tambien este ta cambia si ta enfrenta kita problema. Poreso, necesita kita queda bien familiar con el maga enseñanza na Biblia y queda convincido que este el verdad. Si tiene kita fuerte fe na cosa ta enseña el Biblia, ayuda este kanaton esta fiel con Jehova durante na maga dificil situacion. Paquemodo tu hace fuerte con el de tuyu conviccion que talli tu na verdad?

8. Como cosa ya dale mira na 2 Timoteo 3:14, 15, paquemodo si Timoteo ya queda convincido que na verdad le?

⁸ Convincido si Timoteo que na verdad le.  Paquemodo se ele ya puede asigura? (Le con el 2 Timoteo 3:14, 15, El Nuevo Testamento.) El de suyu nana y el de suyu aguela ya introduci con ele el maga enseñanza na “Sagrada Escritura de Dios.” Pero, asigurao que ya dale tambien ele tiempo y esfuerzo para estudia con ese. Como resulta, “ya creé” le y ya queda convincido que ese verdad. Despues, si Timoteo, el de suyu nana y de suyu aguela ya aprende acerca na maga enseñanza del Cristo. Asigurao ya tiene gayot efecto con Timoteo el amor que ya dale mira el maga siguidores de Jesus. Y bien quierre le man junto y ayuda con el maga hermano y hermana na congregacion. (Fil. 2:19, 20) Pero, de suyu fe gendeh base na sentido para na maga hermano y hermana. Sino, base este na cosa ele ya puede aprende na Escritura que ya hace con ele mas cerca con Jehova. Debe tambien tu estudia con el Biblia y queda convincido si cosa ese ta enseña acerca con Jehova.

9. Cosa el tres importante enseñanza que debe tu queda convincido?

⁹ Necesita tu queda convincido na este tres importante enseñanza. Una, necesita tu asigura que si Dios Jehova amo el Creador del todo las cosas. (Ex. 3:14, 15; Heb. 3:4; Rev. 4:11) Ika-dos, debe tu queda convincido que el Biblia ta contene el mensaje del Dios para na maga gente. (2 Tim. 3:16, 17) Y ika-tres, debe tu queda asigurao que si Jehova tiene organizao grupo del maga gente quien ta adora con ele bajo na direccion del Cristo, y ese grupo amo el maga Testigo de Jehova. (Isa. 43:10-12; Juan 14:6; Act. 15:14) Para queda convincido con ese maga verdad, gendeh quierre decir que necesita tu sabe todo acerca na Biblia. El de tuyu goal amo que usa el de tuyu “abilidad para examina” para hace fuerte con el de tuyu conviccion que talli tu na verdad.​—Roma 12:1, NWT.

10. Puera que sabe con el verdad, cosa pa kita debe hace?

¹⁰ Despues tu asigura que deverasan el tres importante enseñanza acerca con Dios, con  el Biblia y con el maga siervo del Dios, necesita tu usa con el Biblia para dale prueba con otro que deverasan se. Porque? Cay como maga Cristiano, tiene kita el responsibilidad para enseña el verdad que ya aprende kita con aquellos quien oi kanaton. * (1 Tim. 4:16) Y mientras ta pricura kita convinci con otro acerca na verdad na Biblia, ta hace kita fuerte con el diaton mismo conviccion na ese maga verdad.

11. Cosa el buen ejemplo que ya dale mira si apostol Pablo cuando ta enseña le con otro?

¹¹ Cuando si apostol Pablo ya enseña na maga gente, “ya precura [le] convinci canila acerca de Jesus por medio del Ley de Moises y del maga Profeta.” (Act. 28:23) Paquemodo kita imita con Pablo si ta enseña el verdad con otro? Gendeh lang kita basta habla si cosa ta enseña el Biblia. Debe kita ayuda con el diaton maga Bible study para estudia y pensa enbuenamente acerca na cosa sila ta puede aprende na Biblia para queda sila cerca con Jehova. Quierre kita acepta sila el verdad, gendeh cay bilib sila kanaton, sino cay ya estudia sila enbuenamente y ya realiza que verdad el cosa sila ta aprende acerca na diaton amable Dios.

12-13. Paquemodo el maga mayores puede ayuda con el diila maga anak para esta na verdad?

¹² Maga mayores, asigurao que quierre ustedes que el de ustedes maga anak hay esta na verdad. Posible ta pensa ustedes que si tiene sila buen amigo na congregacion, hay progresa sila na espiritual. Pero, si quierre ustedes que queda convincido de ustedes maga anak na verdad, gendeh bastante que tiene lang sila buen amigo. Necesita sila tiene personal relacion con Dios y queda convincido que verdad el cosa ta enseña el Biblia.

¹³ Para el maga mayores puede enseña con el diila maga anak el verdad acerca con Dios, debe sila dale ejemplo que ta estudia tambien sila con el Biblia. Debe sila dale tiempo para medita con el cosa sila ta aprende. Si hace sila se, puede sila enseña con el diila maga anak que hace tambien con ese. Necesita sila enseña con el diila maga anak que usa con el diaton maga research tool, igual si paquemodo sila ta enseña con el diila maga Bible study. Si hace sila se, puede sila ayuda con el diila maga anak para ama con Jehova y confia con el “fiel y sabio esclavo” quien ta dale kanaton espiritual comida. (Mat. 24:45-47, NWT) Maga mayores, gendeh bastante que enseña lang ustedes con el de ustedes maga anak el maga simple verdad na Biblia. Enseña kanila el maga hondo cosas del Dios que justo na diila edad y abilidad.​—1 Cor. 2:10.

14. Porque kita debe estudia con el maga profecia na Biblia? (Mira tambien con el cajon “ Puede Ba Tu Explica con Este Maga Profecia?”)

¹⁴ El profecia na Biblia amo un importante parte na Palabra del Dios que ta ayuda kanaton para tiene fuerte fe con Jehova. Cosa maga profecia el ya hace fuerte con el de tuyu fe? Posible, pensa tu con el maga profecia acerca na “ultimo maga dia.” (2 Tim. 3:1-5; Mat. 24:3, 7) Pero, cosa pa maga otro profecia que ya cumpli ya el puede hace fuerte con el de tuyu conviccion? Por ejemplo, puede ba tu explica si paquemodo el maga profecia na Daniel capitulo 2 o na Daniel capitulo 11 ya cumpli del antes y ta continua cumpli ahora? * Si el de tuyu fe base gayot na Biblia, gendeh se basta-basta man luya. Considera con el ejemplo del diaton maga hermano quien ya experiencia grabe persecucion na Germany durante el Guerra Mundial II. Maskin pa nuay sila tanto entende con el maga profecia na Biblia acerca na ultimo maga dia, tiene siempre sila fuerte fe na Palabra del Dios.

15-17. Paquemodo el estudiada del Biblia ya puede hace fuerte con el diaton maga hermano con quien ya persigui el maga Nazi?

¹⁵ Bajo na rulanza del Nazi Germany, ya pone con el miles del diaton maga hermano y hermana na concentration camp. Si Hitler y el un prominente oficial que si Heinrich Himmler, ta odia gayot con el maga Testigo de Jehova. Asegun na un hermana, si Himmler ya habla con el un grupo del diaton maga hermana na un concentration camp: “El diinyo Jehova ta rula na cielo, pero aqui na tierra kame el quien ta rula! Mira kita si quien hay tarda, kamo o kame!” Cosa ya ayuda con el maga siervo de Jehova para esta fiel?

¹⁶ Sabe el maga Estudiante del Biblia que el Reino del Dios ya principia rula del 1914. Nuay mas sila estraña con el grabe persecucion que ya enfrenta sila. Convincido el maga siervo de Jehova que nuay gobierno del gente el quien puede sangga para cumpli el proposito del  Dios. Si Hitler gendeh puede quita con el verdadero adoranza o establicia un gobierno que mas poderoso pa na gobierno del Dios. Convincido el diaton maga hermano que termina el rulanza de Hitler.

¹⁷ Justo gayot el cosa ta creé el diaton maga hermano y hermana. Despues del cuanto año, ya termina el gobierno del Nazi y si Heinrich Himmler​—el gente quien ya habla “aqui na tierra kame el quien ta rula”—​ya anda escapa. Despues, yan encuentro le con Hermano Lübke, un preso del antes con quien le ya puede acorda. Bien triste este y ya pregunta con Hermano Lübke: “Estudiante del Biblia, cosa ya man pasa ahora?” Si Hermano Lübke ya habla con Himmler que el maga Testigo de Jehova sabe ya daan que termina el rulanza del Nazi y hay libra kanila. Si Himmler manada cosa malo ta habla acerca con el maga Testigo de Jehova de antes. Pero na ese tiempo, no sabe ya le cosa habla. Nuay tarda, yan suicide le. Cosa el leccion? Si ta estudia kita con el Biblia, incluido el maga profecia de este, puede este ayuda kanaton para tiene fuerte fe con Dios y dale kanaton confianza durante na tiempo de probanza.​—2 Ped. 1:19-21.

18. Como cosa ta indica na Juan 6:67, 68, porque necesita kita con el “verdadero saber . . . y con el buen entendimiento” que ya escribi si Pablo?

¹⁸ El cada uno kanaton debe dale mira amor​—el identificacion del maga verdadero Cristiano. Pero necesita tambien kita con el “verdadero saber . . . y con el buen entendimiento.” (Fil. 1:9, El Nuevo Testamento) Cay si gendeh, puede kita queda influenciao “na viento de maskin cosa clase de doctrina, victima del maldad del maga gente” incluido el maga apostata. (Ef. 4:14) Cuando el maga dicipulo del primer siglo C.E. ya descanza sigui con Jesus, si apostol Pedro ya dale mira con el de suyu conviccion cuando ya habla ele que si Jesus tiene el “palabra de Vida Eterno.” (Le con el Juan 6:67, 68.) Maskin pa na ese tiempo si Pedro nuay entende con el todo detalle del cosa ya habla si Jesus, ya esta siempre ele leal cay ya entende ele con el verdad acerca con el Cristo. Puede tambien tu hace fuerte con el de tuyu conviccion na cosa ta enseña el Biblia. Si hace tu se, el de tuyu fe hay esta fuerte maskin cosa pa el pasa y puede tambien tu ayuda con otro hace fuerte con el diila fe.​—2 Juan 1, 2.