Ya nace yo na St. Paul, Minnesota, U.S.A., del 1954. El de mio mayores gendeh rico, gendeh tambien pobre y maga Catolico kame. Ika-dos yo na cinco man hermano y hermana. Ya entra yo na un Catholic school y un sacristan yo. Pero maskin pa ansina, poco lang el de mio saber na Biblia. Maskin pa ta creé yo que tiene Dios quien ya crea con el todo cosas, ya perde el de mio creencia na iglesia.

Na primer año de mio na William Mitchell College of Law, ya visita el maga Testigo de Jehova na de mio casa. Ta laba yo ropa y el man maridable ya habla que bira sila. Cuando ya bira sila, tiene yo dos pregunta kanila: “Porque mas enbuenamente el vida del maga malo contra na maga bueno?” y “Cosa necesita hace el maga gente para queda alegre?” Ya acepta yo con el libro The Truth That Leads to Eternal Life y con el New World Translation of the Holy Scriptures que tiene green cover. Ya conforma tambien yo man Bible study y manada yo cosa ya puede aprende. Alegre yo cuando ya sabe yo que el Reino del Dios  amo el gobierno que hay rula con el tierra. Ya puede yo mira que ya falla gayot el rulanza del gente y ya causa este grabe dolor, sufrimiento, injusticia y tragedia.

Ya dedica yo de mio vida con Jehova del 1982 y ya bautiza conmigo na ese mismo año na Convencion “Kingdom Truth” que ya hace na St. Paul Civic Center. Na siguiente semana, ya bira yo na civic center para saca bar exam. Ya llega el Octubre, ya sabe yo que ya pasa yo na bar exam y un abogao ya yo.

Na aquel mismo convencion, ya puede yo conoce con Mike Richardson, un Bethelite na Brooklyn, quien ya habla conmigo que tiene legal office na headquarters. Ya puede yo acorda con el palabra del eunuco de Etiopia na Maga Actividad 8:36 y ya pregunta yo con el de mio mismo cuerpo, ‘Cosa ta sangga conmigo para trabaja na Legal Office?’ Poreso, yan apply yo na Bethel.

Gendeh alegre el de mio maga mayores que ya queda yo uno del maga Testigo de Jehova. De mio tata ya pregunta si cosa puede hace el Watchtower na de mio pagka-abogao. Ya habla yo que trabaja yo como un voluntario y tiene yo diutay reimbursement cada mes igual na otro maga Bethelite.

Despues yo hace acaba con el de mio maga obligacion na trabajo, ya principia yo trabaja na Bethel na Brooklyn, New York, del 1984. Yan assign conmigo na Legal Office. Para conmigo, timing gayot el de mio andada aqui.

Ya cumpra con el Stanley Theater na New Jersey, del Noviembre 1983. Ya saca permit el maga hermano para man renovate con el electrical y plumbing system del building. Cuando ya anda sila con el maga local oficial, ya explica el maga hermano que usa con el Stanley Theater como convention hall del maga Testigo de Jehova. Pero ya tiene problema. Cay asegun na ordinanza del ciudad, el maga building de adoranza debe na maga lugar lang onde manada casa. El Stanley Theater talli na lugar de negocio, poreso el maga oficial del ciudad nuay kanila dale permit. Ya apela sila con ese pero nuay siempre cambia con el decision.

Durante el de mio primer semana na Bethel, ya lleva el organizacion con ese caso na corte. Cay dos año ya yo ta trabaja na corte, na St. Paul, Minnesota, familiar yo na ansina maga caso. Uno del diaton maga  abogao ya habla que el Stanley Theater ya usa na otro-otro maga ocasion, igual para dale mira salida y concert. Pero, porque man gendeh puede para na religioso ocasion? Ya considera el corte con ese caso y ya decidi que el Jersey City ya viola con el diaton libertad para practica con el diaton religion. El corte ya manda kanila que dale kanaton el permit y ya principia yo mira si paquemodo si Jehova ta bendici con el Legal Office del de suyu organizacion para cumpli con el de suyu trabajo. Alegre yo cay ya puede yo ayuda na ese trabajo.

El maga hermano ya principia hace con el renovation project. Y del Septiembre 8, 1985, ya hace con el graduation del ika-79 clase de Gilead na Jersey City Assembly Hall, nuay llega un año desde ya principia el renovation. Bien alegre yo cay ya puede yo ayuda na este clase de trabajo para con Jehova. Mas alegre yo aqui contra na de mio trabajo como abogao antes yo anda na Bethel. Nuay yo idea que usa pa conmigo si Jehova para na manada caso.

Del maga 1980, el maga doctor y hospital gendeh ta respeta con el decision del maga Witness que gendeh usa sangre si cura kanila. Ya enfrenta mas grande problema el maga priñada cay asegun na juez, nuay derecho ese maga mujer que gendeh manda abona sangre. El maga juez ya habla que si gendeh manda abona sangre el nana, posible engranda el bata nuay nana.

Del Deciembre 29, 1988, ya perde bien manada sangre con Hermana Denise Nicoleau despues le pari con el de suyu anak hombre. El de suyu hemoglobin abajo pa na 5.0 y el de suyu doctor ya pidi de suyu permiso que abona con ele sangre. Nuay conforma si Hermana Nicoleau. Alamañana, el hospital ya pidi permiso na corte que abona con ele sangre. Ya permiti el juez con el hospital que abona con ele sangre maskin nuay hace llamada na corte o informa con Hermana Nicoleau o con el de suyu marido.

Del Viernes, Deciembre 30, el maga ta trabaja na hospital ya abona sangre con Hermana Nicoleau maskin pa nuay conforma el de suyu marido y otro miembro na familia quien talla junto con ele. Na ese mismo noche, ya arresta con el cuanto miembro del de suyu familia y maga anciano cay ya acusa kanila que ta sangga para gendeh abona sangre con Hermana Nicoleau. Del Sabado aga, Deciembre 31, ya reporta con ese incidente na New York City y na maga lugar cerca con ese.

 Ya apela kame con el caso y del Lunes aga, yan cuento yo con el un juez que si Milton Mollen. Ya habla yo el detalle de ese caso y ya hace claro que el otro juez ya permiti que abona sangre maskin nuay hace llamada na corte. Si Judge Mollen ya habla conmigo que anda na de suyu oficina ese tarde para discuti con el detalle y ley que aplicable na este caso. Na ese noche, el de mio overseer, si Philip Brumley ya sigui conmigo na oficina de Judge Mollen. Ya invita tambien el juez con el abogao del hospital que man junto kanamon. Ya queda grabe el diamon discusion. Despues, si Hermano Brumley ya escribi na un papel que ta habla conmigo que “calma”. Buen consejo quel cay rabiao ya yo mientras ta dale prueba que gendeh justo el abogao del hospital.

Maga un hora despues, si Judge Mollen ya habla que ese caso amo una discuti mañana aga. Mientras pasalida kame na oficina, si Judge Mollen ya habla que man dificil gayot mañana el abogao del hospital. Quierre decir, man dificil gayot el abogao defende con el de suyu caso. Ya sinti yo que ya asigura conmigo si Jehova que grande el posibilidad que ganá kame. Un privilegio gayot mira si paquemodo si Jehova ta usa kanamon para cumpli con el de suyu voluntad.

Bien de noche ya kame ya acaba para prepara si cosa kame habla alamañana. Bien cerca lang na Brooklyn Bethel el corte poreso, mayoria de aquellos quien ta trabaja na Legal Office ya anda alla. Despues oi el cuatro juez con el diamon argumento, ya decidi sila que nuay era abona sangre con el paciente. Yan afavor el alto corte con Hermana Nicoleau y ya habla que contra na derecho del un persona que hace un decision si nuay considera con el decision del paciente.

El Corte Suprema del New York ya declara que si Hermana Nicoleau tiene derecho manda cura que gendeh usa sangre. Este el primero na cuatro decision del diferente alto corte na United States acerca na sangre que ya tiene yo privilegio participa. (Mira con el cajon “ Maga Caso que Ya Ganá na Corte Suprema na U.S.”) Yan junto tambien yo con el otro maga abogao na Bethel quien  ta agarra caso que tiene que hace na custodia de bata, divurcio y usada de maga tierra y building.

Cuando ya conoce yo con el de mio mujer si Dawn, divurciao le y tiene tres anak. Ta trabaja le y tan pioneer. Bien dificil el de suyu vida pero bilib yo con el de suyu determinacion sirvi con Jehova. Del 1992, ya atende kame con el District Convention “Light Bearers” na New York City y ya pregunta yo si puede ba yo enamora con ele. Ya casa kame despues del un año. Un regalo gayot estaba con Jehova que tiene un mujer quien pirmi ta pone una con Jehova na de suyu vida y bromista. Bien bueno gayot si Dawn conmigo na entero tiempo que junto kame.—Prov. 31:12.

Cuando ya casa kame, el edad del maga bata amo 11, 13 y 16. Quierre yo queda un buen tata kanila, poreso ya le y ya aplica yo con el todo cosa yo ta puede le na diaton publicacion acerca si paquemodo queda un buen padrasto. Tiene maga dificultad pero alegre yo cay ya acepta conmigo el maga bata como diila amigo con quien sila puede confia y amable tata. Welcome na diamon casa el amigo y amiga del diamon maga anak y alegre kame man junto con este maga teenager.

Del 2013, iyo y si Dawn ya cambia na Wisconsin para cuida con el diamon maga mayores. Pensaba yo gendeh ya yo puede man voluntario na Bethel. Pero ya invita conmigo que continua ayuda con el diaton organizacion como un temporary volunteer.

Del Septiembre 2018, ya puede yo observa que dol tiene problema el de mio garganta. Ya chequia conmigo el diamon doctor pero no sabe le si cosa el causa de este. Despues, el otro doctor ya habla conmigo que manda yo chequia na un neurologist. Del Enero 2019, el neurologist ya habla que baka tiene yo enfermedad que ta llama progressive supranuclear palsy (PSP).

Tres dia despues, mientras tan ice skating, ya tumba yo y ya balda el de mio pono’y derecha mano. Anad yo man ice skating poreso sabe yo que gendeh ya yo ta puede controla con el de mio movimiento. Bien paspas ya queda grabe el de mio enfermedad y ya afecta este con el de mio converzada, movimiento y maskin para traga.

Bien alegre yo puede usa con el de mio experiencia como abogao para ayuda con el organizacion de Jehova. Y alegre yo cay ya puede yo escribi manada articulo para na magasin que ta le el maga doctor, abogao y maga juez. Ya puede tambien yo converza na maga seminar na entero mundo y defende con el derecho del maga siervo de Jehova para cura que gendeh manda abona sangre. Pero maskin pa ansina, puede yo habla con el cosa ya habla na Lucas 17:10: ‘Muchacho lang yo. Ya hace lang yo el de mio obligacion.’