Pagka-sunod año, ya anuncia na familia Bethel que necesita maga voluntario para sirvi na South Africa branch, donde man install con el un nuevo rotary printing press. Ya pone yo el de mio nombre y excited yo cuando ya iscuji conmigo. Ya iscuji tambien con el tres Bethelite de Canada—si Dennis Leech, Bill McLellan y Ken Nordin. Ya habla sila kanamon que dura kame esta na South Africa.

Ya llama yo con el de mio nana: “Mang, tiene yo noticia para contigo. Anda yo na South Africa!” Un silencio mujer el de mio nana pero tiene le fuerte fe y cerca relacion con Jehova. Nuay le tanto cosa ya habla pero sabe yo que ta suporta le conmigo. Maskin pa triste sila cay queda yo lejos, si Mamang y Papang nuay man contra na de mio decision.

Na Brooklyn Bethel, kame cuatro ya ricibi tres meses de training para na un especifico clase de printing. Despues, ya munta kame un grande barco para na Cape Town, South Africa. Nuevo lang yo ya queda 20 año. Denoche quel cuando ya principia kame con el diamon largo viaje na tren estaba na Cape Town para na Johannesburg. Ya para kame madrogada na Karoo, un lugar que semejante na desierto. Mapolvos, maumera y caliente el lugar. Ya iscucha kame cuatro pa-apuera del bentana y ya pensa si cosa clase este de lugar. Cosa gaha sucede kanamon na este nuevo assignment? Cuanto año despues, ya bira kame aqui. Tiene paz este lugar y ya realiza kame si paquemodo este de bonito.

El de mio assignment por cuanto año amo man operate con el bonito y complicao Linotype machine, y ta prepara con el maga linea de letra para imprimi con el magasin El Torre de Guardia y Awake! El branch office ta imprimi maga magasin na manada lengguaje de Africa, gendeh lang para na South Africa sino para na manada nacion na parte norte. Alegre kame que este nuevo printing press que ya lleva kame estaba na Canada ya puede gayot usa enbuenamente.

Nuay dura, ya trabaja yo na Factory Office que ta mira con el trabajo igual na printing, shipping y translation. Ocupao el de mio vida y bien alegre.

Del 1968, ya casa yo con Laura Bowen quien ta queda cerca na Bethel. Tan pioneer le y ta sirvi tambien na Bethel como uno del maga quien tan type na Translation Department. De aquel tiempo, nuay pa arreglamiento para na maga nuevo casao que puede esta na Bethel poreso ya dale kanamon assignment como maga special pioneer. Un poco malingasa yo. Despues del diez año na Bethel que tiene quien ta dale conmigo comida y onde esta, paquemodo sustene kanamon el allowance que ta dale para na special pioneer? El cada uno kanamon ta ricibi 25 rand (que valor de maga ₱1,700 de aquel tiempo) cada mes—si alcanza kame con el necesita hora, return visit y literatura. Alli hay saca el pago para na diamon renta, comida, transportacion y para na medical, y otro pa personal gasto.

Yan assign kanamon na un diutay grupo cerca na ciudad de Durban, na Indian Ocean. Manada maga gente de India el ta queda aqui y manada kanila maga descendiente del maga trabajador quien ya anda na South Africa para trabaja onde ta hace azucar del maga 1875. Ahora, otro ya el diila trabajo pero ya esta siempre el diila cultura, manera de cucida, incluido ya el diila sabroso cari-cari. Y ta converza sila Ingles que ya hace mas facil para kanamon.

Ta expecta con el maga special pioneer que alcanza 150 hora cada mes na ministerio. Poreso, iyo y si Laura yan schedule seis hora na predicacion para na primer dia. Bien caliente el tiempo y nuay pa viento. Nuay kame return visit y Bible study poreso necesita kame predica na casa en casa por seis hora. Cuanto tiempo despues kame principia, ya mira yo na de mio relo—40 minuto pa lang el ya pasa! Ya puede yo pensa, ‘Paquemodo kame este hace?’

Nuay dura, ya puede kame hace un buen rutina. Cada dia, ta prepara kame maga sandwich y ta pone caldo o cafe na un termos. Si necesita kame descanza, tan park kame con el diamon diutay coche abajo na sombra del un pono. Tiene vez, alrededor kanamon el maga Indian bata y curioso ta mira kanamon. Adentro del cuanto dia, ya realiza kame que despues del primer dos y tres hora, pronto ya lang ta pasa el dia.

Maka-alegre gayot lleva el verdad na Biblia na maga hospitable gente na ese teritorio! Ya puede kame sabe que el maga gente de India maga respetoso, bueno y tiene miedo con Dios. Manada Hindu el ya acepta con el mensaje que ya lleva kame kanila. Quierre-quierre sila aprende acerca con Jehova, con Jesus, el Biblia, el nuevo mundo con paz na futuro y el esperanza del maga muerto. Despues del un año, ya tiene kame 20 Bible study. Cada dia, alegre kame come junto na uno del maga familia con quien kame tan Bible study. Bien alegre gayot kame!

Nuay dura, ya ricibi kame otro assignment —circuit work cerca na maga aplaya del Indian Ocean. Cada semana, ta queda kame na casa del un familia mientras ta visita y ta trabaja junto con el maga publisher na congregacion para anima kanila. Ya queda kame parte del diila familia y alegre kame man junto na diila maga anak y maga animal que ta cuida sila. Despues de dos año, tiene quien ya llama estaba na branch office. El hermano ya habla, “Quierre kame hace bira con ustedes na Bethel.” Ya contesta yo, “Sabe tu, bien alegre ya kame aqui.” Pero siempre, preparao kame sirvi maskin onde kanamon pone.

El de mio assignment na Bethel amo na Service Department, donde ya tiene yo el privilegio para trabaja junto na maga mature y experienciao hermano. Na aquel maga tiempo, el cada congregacion ta ricibi carta base na report del circuit overseer despues del de suyu visitada. El proposito del maga carta amo para anima y para dale direccion si necesita. Grande el trabajo del maga secretario para man translate con el maga report del circuit overseer estaba na lengguaje Xhosa, Zulu y otro pa lengguaje para na Ingles y Ingles para na maga lengguaje de Africa. Ya aprecia gayot yo con el maga trabajador translator quien ya ayuda conmigo para entende con el maga dificultad que ta enfrenta el diaton maga negro hermano y hermana na Africa.

 Na aquel tiempo, el maga gente de South Africa amo bajo na un palicia de gobierno. El cada raza tiene designao lugar onde queda. Poreso, gendeh ta puede man junto-junto el maga gente de diferente raza. El diaton maga negro hermano de Africa ta converza na diila mismo lengguaje, ta predica na diila mismo lengguaje y ta atende na congregacion na diila mismo lengguaje.

Nuay gayot yo tanto conoce maga negro gente de Africa ciendo el teritorio del de mio assignment amo pirmi na maga gente quien ta converza Ingles. Pero ahora, tiene ya yo el oportunidad para aprende acerca el cultura y manera de vida del maga negro gente de Africa. Ya aprende yo acerca el maga dificultad que ta enfrenta el diaton maga hermano por causa na maga local tradicion y creencia na religion. Puede gayot mira el diila animo cay ya puede sila quita con el maga tradicion que gendeh base na Biblia y enfrenta con el grabe oposicion estaba na diila familia y comunidad cay nuay sila sigui con el maga practica que tiene que hace na espiritismo. Bien pobre el maga gente quien ta queda lejos na centro del ciudad. Manada el falta el educacion pero ta respeta sila con el Biblia.

Ya tiene yo el privilegio trabaja na cuanto caso que tiene que hace na diaton libertad para adora y neutralidad. Ta puede gayot hace fuerte na fe que mira el lealtad y animo del maga anak del maga Testigo de Jehova con quien ya quita na escuela cay nuay sila conforma entra na maga rezo y canta maga religioso cancion.

El diaton maga hermano ya enfrenta otro dificultad na un diutay nacion na Africa que ta llama de antes Swaziland. Cuando ya muri si Rey Sobhuza II, el todo residente necesita sigui con el un tradicion que ta hace el maga gente si tiene quien ya muri. El maga hombre necesita afeita con el diila pelo y el maga mujer necesita hace corto con el diila pelo. Manada maga hermano y hermana el ya persigui por causa cay nuay sila participa na ese practica que tiene que hace na adoranza del maga tatarabuelo. El diila lealtad con Jehova ya hace gayot kanamon bien alegre! Manada kame cosa ya aprende acerca na pagka-fiel, lealtad y paciencia del diaton maga hermano y hermana na Africa y ya hace se fuerte con el diamon fe.

Del 1981, ya assign conmigo otravez na Printery para ayuda mira el trabajo na printing que ta usa maga computer. Bien bonito gayot aquel tiempo! Bien grande el cambio na manera si paquemodo ta imprimi. El un local sales representative ya dale un phototypesetter na branch que libre pruba usa. Como resulta, ya cambia con el nueve Linotype machine na cinco nuevo phototypesetter. Yan install tambien kame un nuevo printing press. Mas ya queda lijero el trabajo!

El maga computer ya ayuda kanamon para inventa maga nuevo manera si paquemodo arregla con el maga letra na pagina por medio del MEPS, el Multilanguage Electronic Publishing System. Bien grande gayot el progreso na tecnologia desde cuando ya imbia kanamon cuatro Bethelite de Canada para sirvi na South Africa! (Isa. 60:17) Na ese tiempo, ya puede kame casa cuatro maga buen pioneer hermana quien ta ama gayot con Jehova. Iyo y si Bill ta continua siempre sirvi na Bethel. Si Ken y Dennis tiene ya maga familia.

Ta omenta el maga trabajo na branch. Tan translate con el maga literatura y ta imprimi na mas manada lengguaje y ta imbia na otro maga branch. Poreso, necesita un nuevo facilidad de Bethel. Ya planta se el maga hermano na un bonito lugar na oeste parte del Johannesburg y ya dedica con este del 1987. Un grande privilegio que queda parte de este progreso y para sirvi como un miembro del Branch Committee na South Africa por manada año.

Del 2001, nuay gayot kame expecta que invita conmigo para sirvi na United States Branch Committee que nuevo lang ya forma. Triste kame deja con el diamon trabajo y maga amigo na South Africa pero alegre kame principia con el diamon nuevo vida como parte del familia Bethel del United States.

Pero, malingasa kame que queda kame lejos na nana de Laura que de edad ya. Cay gendeh mas kame puede atende con ele si talla ya kame na New York, el tres hermana de Laura ya ofrece que sila cuida con ele na fisical, emocional y financial. Ya habla sila, “Gendeh mas kame puede sirvi full-time pero si cuida kame con Mamang, puede kame asisti con ustedes para puede ustedes continua na de ustedes assignment.” Ta rindi gayot kame gracias kanila.

Ansina tambien el cosa ya dale mira el de mio hermano y el de suyu mujer, quien ta queda na Toronto, Canada, quien ta cuida con el diamon nana que viuda ya. Na aquel tiempo, ya queda le parte del diila familia por mas de 20 año. Ta aprecia gayot kame el amor y cuidada que ya dale sila con ele hasta na de suyu muerte cuanto tiempo despues kame llega na New York. Un grande bendicion gayot que tiene maga familia quien preparao hace cambio na diila vida para cuida con el diamon maga de edad mayores que tormento hace tiene vez.

Por cuanto año, el de mio trabajo na United States amo na produccion del maga literatura que ya queda mas moderno y simple. Del mas reciente, ya trabaja yo na Purchasing Department. Alegre gayot yo que adentro na 20 año, ya queda yo parte de este grande branch que ahora tiene ya maga 5,000 miembro del familia Bethel junto con el cerca 2,000 maga commuter.

Del 60 año ya pasa, nuay yo pensa que hay guinda yo aqui. Con todo corazon ya suporta conmigo si Laura hasta na este maga año. Bien alegre gayot el de mio vida! Ta aprecia gayot kame con el diferente assignment que ya tiene kame y el maga amable persona con quien kame ya trabaja junto, incluido el maga hermano na manada branch onde kame ya visita na diferente parte del mundo. Ahora mas de 80 año ya yo y menorao ya el trabajo que ya dale conmigo ciendo manada joven hermano el puede mira con el trabajo.

El salmista ya escribi: “Alegre el nacion que el Dios amo si Jehova.” (Sal. 33:12) Bien deverasan gayot se! Alegre gayot yo cay ya puede yo participa na alegria del maga alegre siervo de Jehova.