1. Cosa el resulta si tan competencia el maga gente con uno y otro?

NA MUNDO ahora, manada maga gente el tan competencia con uno y otro. Por ejemplo, el un negociante posible hace maga cosas que causa peligro con otro para lang queda mas enbuenamente el de suyu negocio. El un atleta posible intencional hace sinti duele con el de suyu contra para lang ganá na juego. El un estudiante quien quierre entra na un conocido universidad posible copia durante el entrance exam. Como maga Cristiano, sabe kita que gendeh justo este maga cosas cay parte este del “maga trabajo del mal naturaleza del cuerpo.” (Gal. 5:19-21) Pero, posible gaha que el cuanto maga siervo de Jehova hay man competencia con otro na congregacion que gendeh ta realiza con ese? Un importante pregunta este cay el espiritu de competicion puede afecta con el diaton unidad como maga hermano y hermana.

2. Cosa kita discuti na este articulo?

² Na este articulo, hay discuti kita con el maga negativo calidad que puede causa kanaton para man competencia con el diaton maga hermano y hermana. Hay considera tambien kita con el ejemplo del maga fiel hombre y mujer na Biblia quien nuay man competencia con otro. Pero una, hay considera kita si paquemodo kita puede examina con el diaton motivo.

3. Cosa kita debe pregunta na diaton mismo cuerpo?

³ Un buen cosa que regular kita examina con el diaton motivo. Puede kita pregunta na diaton mismo cuerpo: ‘Ta sinti lang ba  yo valoroso si ta compara yo con el de mio mismo cuerpo con otro? Si ta hace yo un cosa, por causa ba se cay tiene yo deseo para manda mira que bien bueno yo o mas bueno yo con el un particular hermano o hermana? O quierre lang yo dale con el de mio de con todo bueno con Jehova?’ Porque kita se debe pregunta na diaton mismo cuerpo? Nota si cosa ta habla el Palabra del Dios.

4. Porque kita debe evita compara con el diaton mismo cuerpo con otro, como cosa ya menciona na Galacia 6:3, 4?

⁴ Ta anima kanaton el Biblia que evita compara con el diaton mismo cuerpo con otro. (Le con el Galacia 6:3, 4.) Porque? Cay si ta pensa kita que mas bueno kita contra con el diaton maga hermano, posible hay queda kita orgulloso. Pero si pensa kita que mas bueno el diaton hermano que kanaton, posible kita man luya. Maskin cosa pa man na ese situacion, gendeh sabio ese clase de pensamiento. (Roma 12:3) El un hermana que si Katerina, * quien ta queda na Greece, ya habla: “De antes, ta compara yo con el de mio mismo cuerpo con otro quien mas bonita, mas efectivo na ministerio y mas bueno man amiga con otro. Como resulta, ya sinti yo nuay valor.” Debe kita acorda que si Jehova ya hace kanaton cerca con ele, gendeh por causa cay bonita kita, bueno converza o conocido sino cay ta ama kita con ele y ta oi con el de suyu Anak.—Juan 6:44; 1 Cor. 1:26-31.

5. Cosa tu ya aprende na experiencia del un hermano que si Hyun?

⁵ El otro cosa que puede kita pregunta na diaton mismo cuerpo amo, ‘Conocido ba conmigo como ta hace manera para tene paz o pirmi yo tan purpiajan con otro?’ Nota con el experiencia del un hermano que si Hyun, quien ta queda na South Korea. Del antes, ta mira le con el cuanto quien tiene privilegio na congregacion como tan competencia con ele. Ele ya habla, “Pirmi yo ta busca kamali con ese maga hermano y gendeh tan uyun na cosa sila ta habla.” Cosa el resulta? “Por causa na de mio custumbre, ya perde el unidad na congregacion,” ya admiti le. El cuanto del maga amigo de Hyun ya ayuda con ele para mira con el de suyu problema. Ya hace si Hyun maga necesita cambio y ahora ta sirvi ya le como un efectivo anciano. Si ta mira kita que tiene kita tendencia que man competencia con otro en vez de hace manera para tene paz, debe dayun kita hace maga cambio.

6. Asegun na Galacia 5:26, cosa el maga gendeh bueno calidad que puede causa kanaton para man competencia con otro?

⁶ Le con el Galacia 5:26. Cosa el maga gendeh bueno calidad que puede causa con el un persona para man competencia con otro? El uno amo el orgullo. El un orgulloso persona ta pensa lang con el de suyu mismo cuerpo. El otro gendeh bueno calidad amo el envidia. El un envidioso persona gendeh lang quierre tene el cosa tiene el otro sino quierre tambien le que perde se kanila. Este clase de persona ta odia con otro. Asigurao, quierre gayot kita evita con este maga gendeh bueno calidad!

7. Paquemodo puede ilustra con el peligro si el un persona orgulloso y envidioso?

⁷ El orgullo y envidia puede compara na maga buling mezclao na gasolina que ta usa na eroplano. Posible que puede siempre bula el eroplano pero el maga buling puede sangga onde ta pasa el gasolina que causa para muri el maquina antes pa man landing el eroplano. Como resulta, man crash este. Na igual manera, el un persona posible ta sirvi ya con Jehova. Pero si orgulloso le y envidioso, hay tene gayot se mal resulta. (Prov. 16:18) Hay descanza le sirvi  con Jehova y causa peligro con el de suyu mismo cuerpo y con otro. Cosa kita puede hace para evita con el orgullo y envidia?

8. Cosa kita hace para evita con el orgullo?

⁸ Puede kita evita con el orgullo si acorda kita con el consejo de apostol Pablo con el maga de Filipo: “No ustedes hace nada por competencia ni orgullo, sino precura hace todo con humildad; y pone firmi na de ustedes maga pensamiento que el los demas mas bueno pa que con ustedes.” (Fil. 2:3) Si ta considera kita que mas bueno el otro que kanaton, gendeh kita man competencia con aquellos quien mas tiene talento y abilidad contra kanaton. Sino, hay queda kita alegre para kanila. Deverasan gayot este especialmente si ta usa sila con el diila maga abilidad na servicio con Jehova. Y si este maga hermano y hermana ta sigui con el consejo de apostol Pablo, hay man focus sila na maga calidad que ta aprecia sila kanaton. Como resulta, todo kita na congregacion hay hace manera para tene paz y unidad.

9. Cosa kita hace para evita con el diaton tendencia que man envidia?

⁹ Puede kita evita con el tendencia que man envidia si acorda kita que tiene kita maga limitacion. Si humilde kita, gendeh kita hace manera para dale mira que mas manada kita talento o mas bueno que con otro. Sino, hay mira kita si cosa kita puede aprende con aquellos quien tiene mas abilidad que kanaton. Por ejemplo, pone kita que el un hermano na congregacion bueno dale discurso. Puede kita pregunta con ele si paquemodo le ta prepara con el de suyu talk. Si bueno cuci el un hermana, puede kita pidi sugestion con ele que puede ayuda kanaton para queda bueno na cucida. Y si el un joven Cristiano ta tormenta tene maga amigo, puede le pidi consejo con el un persona quien facil lang man amigo con otro. Na este maga manera, puede kita evita man envidia y mejora con el diaton mismo abilidad.

10. Cosa dificultad ya enfrenta si Gideon?

¹⁰ Considera con el cosa ya sucede con Gideon, quien estaba na tribo de Manases, y con el maga hombre quien estaba na tribo de Efraim. Na ayuda de Jehova, si Gideon y el de suyu  300 gente ya ganá na guerra donde asigurao ya queda gayot sila alegre. El maga hombre de Efraim ya anda con Gideon, gendeh para comenda sino para pelea con ele. Ta sale que ya rabia sila cay nuay kanila invita si Gideon del primero que man junto na guerra contra con el maga enemigo del Dios. Yan focus sila na honor del diila tribo poreso nuay sila puede mira con el cosa que mas importante—si Gideon nuevo lang ya ayuda para honra con el nombre de Jehova y protege con el De Suyu maga siervo.—Juez 8:1.

11. Cosa ya habla si Gideon con el maga de Efraim?

¹¹ Si Gideon con humildad ya habla con el maga gente de Efraim: “Cosa lang man yo ya hace compara con ustedes?” Despues, ya dale le un especifico ejemplo si paquemodo ya bendici kanila si Jehova. Como resulta, “ya calma” el maga gente. (Juez 8:2, 3) Si Gideon conforme queda humilde para puede mentena con el paz entre el maga siervo del Dios.

12. Cosa kita puede aprende na ejemplo del maga de Efraim y de Gideon?

¹² Cosa kita puede aprende na este istoria? Na ejemplo del maga de Efraim, ya aprende kita que gendeh kita debe man focus na diaton mismo honor sino si paquemodo kita honra con Jehova. Como maga cabeza de familia y anciano, puede kita aprende un leccion con Gideon. Si ya rabia el un persona por causa na cosa kita ya hace, debe kita pricura entende si porque le ya rabia. Puede tambien kita comenda con ese persona na buen cosa que ya hace le. Necesita kita queda humilde para hace se, especialmente si bien claro que mali ese persona. Pero, mas importante el paz contra dale prueba que justo kita.

13. Cosa el dificultad de Ana y paquemodo le se ya enfrenta?

¹³ Pensa tambien con el ejemplo de Ana. Casao le con el un Levita que si Elcana quien ta ama gayot con ele. Pero si Elcana tiene otro mujer, si Penina. Mas ta ama si Elcana con Ana contra con Penina. Pero “tiene maga anak si Penina, pero si Ana nuay.” Por causa con este, si Penina “pirmi ta gangguia para hace sinti duele” con Ana. Cosa ya sinti si Ana? Ya queda le bien triste poreso “ta llura le y gendeh ta come.” (1 Sam. 1:2, 6, 7) Maskin pa ansina, gendeh kita puede le na Biblia que si Ana ya pricura vengga con Penina. En vez, ya habla le con Jehova si cosa le ta sinti y ya confia que hay ayuda le con ele. Ya cambia ba el tratamiento de Penina con Ana? Nuay habla el Biblia. Pero, sabe kita que si Ana ya puede hace bira con el de suyu paz na pensamiento y ya mentena con ese. “El de suyu cara gendeh mas triste.”—1 Sam. 1:10, 18.

14. Cosa kita puede aprende na ejemplo de Ana?

¹⁴ Cosa kita puede aprende na ejemplo de Ana? Si tiene quien ta pricura man competencia contigo, acorda que puede tu controla con  el situacion. Tiene tu cosa puede hace para evita man competencia con ele. En vez de man balus na mal cosas que ya hace le, pricura tene paz con ese persona. (Roma 12:17-21) Maskin pa gendeh le cambia, puede tu mentena con el de tuyu paz na pensamiento.

15. Na cosa manera semejante kanda Apolo y Pablo?

¹⁵ Ahora, considera si cosa kita puede aprende na maga ejemplo de dicipulo Apolo y apostol Pablo. Este dos gente bien familiar na Escritura. Igual sila prominente y buen maestro. Y sila dos ya puede ayuda con el manada para queda maga dicipulo. Pero, nuay sila man envidia con uno y otro.

16. Cosa clase de persona si Apolo?

¹⁶ Si Apolo amo “un Judio de Alejandria,” un lugar onde manada gente ta anda para aprende del primer siglo. Ta sale que bueno le converza y “estudiao na maga Escritura.” (Act. 18:24) Cuando ya anda si Apolo na Corinto, el cuanto na congregacion claro ya dale mira que mas quierre sila con ele contra na otro maga hermano, incluido ya con Pablo. (1 Cor. 1:12, 13) Tiene ba cosa ya hace si Apolo para perde el unidad na congregacion? Asigurao nuay. Gane maga cuanto tiempo despues sale si Apolo na Corinto, ya anima con ele si Pablo que bira alla. (1 Cor. 16:12) Gendeh se hace si Pablo si ta sinti le que tiene cosa ta hace si Apolo para perde el unidad na congregacion. Asigurao, ya usa si Apolo con el de suyu maga abilidad na buen manera—para proclama con el buen noticia y para hace fuerte con el de suyu maga hermano. Puede tambien kita asigura que humilde si Apolo. Por ejemplo, nuay kita cosa puede le na Biblia que ya rabia le cuando si Aquila y Priscila “ya explica con ele mas embuenamente acerca del Camino.”—Act. 18:24-28.

17. Cosa ya hace si Pablo para tene paz?

 ¹⁷ Sabe si apostol Pablo con el maga buen cosas que ya hace si Apolo. Pero, nuay sinti si Pablo que mas bueno con ele si Apolo. Claro puede mira que humilde y razonable si Pablo na consejo que ya dale le na congregacion de Corinto. En vez queda alegre cay el cuanto ta habla “yo de Pablo,” ya dale le el alabanza con Dios Jehova y con Jesucristo.—1 Cor. 3:3-6.

18. Base na 1 Corinto 4:6, 7, cosa kita puede aprende na ejemplo de Apolo y de Pablo?

¹⁸ Cosa kita puede aprende na ejemplo de Apolo y de Pablo? Posible, ta hace kita esfuerzo para con Jehova y ya puede ayuda con el manada que progresa para na bautiza. Pero, sabe kita que tiene lang kita buen exito por causa na bendicion de Jehova. Na ejemplo de Apolo y Pablo, tiene kita otro leccion que ya puede aprende—si mas manada kita responsibilidad na congregacion, mas manada kita oportunidad para mentena con el paz. Ta rindi gayot kita gracias si el maga hombre quien tiene responsibilidad ta pricura tene paz y unidad. Ta hace sila este si tan base sila el diila consejo na Palabra del Dios y si ta hace sila manera para el atencion gendeh guinda kanila sino con el diaton modelo, si Cristo Jesus.—Le con el 1 Corinto 4:6, 7.

19. Cosa puede hace el cada uno kanaton? (Mira tambien con el cajon “ Evita con el Espiritu de Competicion.”)

¹⁹ El cada uno kanaton tiene maga talento o abilidad que estaba con Dios. Puede kita usa con ese maga regalo “para el provecho de los demas.” (1 Ped. 4:10) Posible, ta sinti kita que gendeh tanto importante el diaton papel. Pero, acorda que ta forma el un camisa por causa na maga diutay custura. Poreso el maga diutay cosa que ta hace kita, puede ayuda para tene unidad el congregacion. Ojala, hay hace kita esfuerzo para evita man competencia con otro. Queda kita determinao que hace el todo lo que puede para mentena con el paz y unidad na congregacion.—Ef. 4:3.