1-2. Paquemodo el maga palabra de Jehova que escribido na Isaias 65:16, 17 ya anima kanaton que continua aguanta?

“DON’T GIVE UP!” el tema del asemblea de region del 2017. El programa ya dale mira kanaton si paquemodo kita puede aguanta na diaton maga problema. Cuatro año ya el ya pasa desde aquel tiempo y ta continua siempre kita aguanta na este presente sistema de maga cosas.

² Cosa problema tu nuevo lang ya enfrenta? El muerte de un miembro na familia o un amigo? Un grabe enfermedad? El maga dificultad cay de edad ya? Un natural calamidad, violencia o persecucion? O el maga efecto del un enfermedad como el COVID-19 pandemic? Ta esperanza kita que llega el dia cuando todo este maga problema hay perde ya—hay ulvida ya kita con ese todo y gendeh ya se sucede otravez!—Le con el Isaias 65:16, 17.

3. Cosa kita debe hace ahora y porque?

³ Bien tormento el vida na este sistema y posible hay enfrenta kita mas dificil problema na futuro. (Mat. 24:21) Claro, ta necesita kita continua aprende si paquemodo mas aguanta. Porque? Cay si Jesus ya habla: “Si ay tene ustedes paciencia y ay puede aguanta ese maga sufrimiento deverasan gayot ay tene ustedes vida eterna.” (Luc. 21:19, El Nuevo Testamento) Si pensa kita si paquemodo el otro ya puede aguanta na manada problema igual diaton, puede se ayuda kanaton que mas aguanta.

4. Porque kita puede habla que si Jehova el de con todo buen ejemplo quien ya puede aguanta?

⁴ Quien el de con todo buen ejemplo quien ya puede aguanta? Si Dios Jehova. Posible, ya estraña tu. Pero si pensa tu acerca con ese, hay entende tu. El mundo ahora bajo na control del Diablo poreso bien manada problema. Tiene poder si Jehova para  termina con el diaton problema ahora pero ta espera le con el un especifico dia para hace con ese. (Roma 9:22) Mientras tanto, el diaton Dios ta continua aguanta hasta llega ese tiempo. Considera kita con el nueve cosas que ya iscuji si Jehova que aguanta.

5. Paquemodo ya insulta con el nombre del Dios y cosa tu ta sinti acerca con ese?

⁵ El insulto na de suyu nombre. Ta ama si Jehova con el de suyu nombre y quierre le que el todo respeta con ese. (Isa. 42:8) Pero adentro del 6,000 año, ya insulta con el de suyu nombre. (Sal. 74:10, 18, 23) Ya principia este na jardin de Eden cuando el Diablo (quierre decir “Falso Acusador”) ya clama que el Dios no quierre que kanda Adan y Eva hay tene el un cosa que necesita sila para queda alegre. (Gen. 3:1-5) Desde de aquel tiempo, falso ya acusa con Jehova que no quierre dale con el maga gente el cosa sila deverasan necesita. Yan lingasa si Jesus con el insulto que ya lleva na nombre del de suyu Tata. Por causa con ese razon, ya enseña le con el de suyu maga dicipulo que reza: “Tata diamon na cielo, dale gloria con el de Uste Nombre.”—Mat. 6:9.

6. Porque ya permiti si Jehova pasa largo tiempo antes solva con el issue del de suyu soberania?

⁶ El oposicion na de suyu soberania. Si Jehova lang solamente el tiene derecho para rula na cielo y na tierra, y el de suyu manera de rulanza amo el de con todo bueno. (Rev. 4:11) Pero, ya pricura el Diablo engaña con el maga angel y maga gente para pensa que el Dios nuay ese derecho. Necesita tiempo para dale prueba que si Jehova el tiene derecho para rula y ele el de con todo bueno quien puede rula kanaton. Poreso, ya permiti el Dios con el maga gente que rula por largo tiempo para puede sila mira que gendeh puede tene buen exito el diila rulanza si gendeh sila oi con el Creador. (Jer. 10:23) Por causa na paciencia del Dios, hay solva ese issue. El todo hay sabe que el manera de rulanza de Jehova amo el de con todo bueno y el Reino lang de suyu amo el solamente puede dale deverasan paz y seguridad na tierra.

7. Quien yan rebelde contra con Jehova y cosa le hace kanila?

⁷ El rebelion del cuanto del de suyu maga anak. Perfecto ya crea si Jehova con el maga angel y gente. Pero, el un rebelde angel que si Satanas, (quierre decir “El uno quien ta resisti”) ya convinci con el maga perfecto gente, si Adan y Eva, que man contra tambien con Jehova. El otro maga angel y gente ya sigui con ese rebelion. (Jud. 6) Despues del cuanto tiempo, maskin el maga miembro del nacion de Israel, el maga iscujido siervo del Dios, yan rebelde tambien con ele y ya principia adora na maga falso dios. (Isa. 63:8, 10) Ya sinti gayot si Jehova que ya traiciona con ele. Pero ya aguanta siempre le y hay continua aguanta hasta llega el tiempo que hay destroza le con el maga rebelde. Hay dale gayot este alivio con el maga fiel siervo de Jehova quien ta continua aguanta junto con ele na este mal sistema de maga cosas.

8-9. Cosa maga imbusterias el ya habla acerca con Jehova y cosa kita puede hace acerca con ese?

⁸ El maga imbusterias del Diablo. Ya acusa si Satanas con Job y con el todo fiel siervo de Jehova que ta adora sila con Dios cay tiene lang sila cosa puede saca con ele. (Job 1:8-11; 2:3-5) Ta continua el Diablo acusa con el maga gente hasta ahora. (Rev. 12:10) Puede kita ayuda para dale prueba que imbustero si Satanas si aguanta kita na maga problema y esta leal con Jehova por causa na diaton amor con Ele. Igual con Job, hay bendici tambien kanaton si hay aguanta kita.—Sant. 5:11.

⁹ Ta usa si Satanas con el maga falso religioso lider para habla que si Jehova brutal y Ele el  causa del diaton maga sufrimiento. Gane el cuanto ta habla que si muri el maga bata, el Dios el quien ya saca kanila cay ta necesita pa manada angel na cielo. Bien grande imbusterias este! Pero, sabe kita que si Jehova un amable Tata. Si tiene kita grabe enfermedad o si tiene quien ya muri, gendeh kita ta disculpa con el diaton Dios. Sino, ta creé kita que un dia hay cura le con el maga enfermo y resucita con el maga muerto. Puede kita habla con todo quien oi si paquemodo de amable si Jehova. Puede se ayuda con ele contesta con el quien ta gangguia con ele.—Prov. 27:11.

10. Cosa el Salmo 22:23, 24 ta revela acerca con Jehova?

¹⁰ El sufrimiento del de suyu maga precioso siervo. Si Jehova un Dios de compasion. Ta sinti le triste si ta mira le kanaton ta sufri—posible por causa na persecucion, enfermedad o diaton imperfeccion. (Le con el Salmo 22:23, 24.) Ta sinti si Jehova con el dolor que ta sinti kita. Quierre le con ese termina y hay termina le con ese. (Compara na Exodo 3:7, 8; Isaias 63:9.) Hay llega el dia cuando “ay limpia Le el lagrimas na [diaton] maga ojos y nunca mas ay tene muerte, ni dolor, ni tristeza.”—Rev. 21:4.

11. Cosa si Jehova ta sinti acerca con el de suyu maga leal siervo quien ya muri?

¹¹ Queda separtao na de suyu maga amigo quien ya muri. Cosa si Jehova ta sinti acerca na maga fiel hombre y mujer quien ya muri? Quierre gayot le mira kanila otravez! (Job 14:15) Ta puede ba tu imagina si paquemodo si Jehova bien quierre mira otravez con el de suyu amigo, si Abraham? (Sant. 2:23) O con Moises con quien ele yan cuento “cara-cara”? (Ex. 33:11) Y asigurao, bien quierre gayot le oi otravez que canta si David y el otro maga salmista con el diila maga bonito cancion de alabanza. (Sal. 104:33) Maskin pa este maga amigo del Dios ya muri ya, nuay ulvida si Jehova kanila.  (Isa. 49:15) Ta acorda le con el cada detalle del diila personalidad. El Biblia ta habla que “para con Ele todo el maga gente vivo.” (Luc. 20:38) Un dia, hace le kanila vivi otravez y hay oi le otravez con el diila maga sincero rezo y acepta con el diila adoranza. Si ya muri el de tuyu familia o amigo, ojala este maga palabra puede contigo dale comforta.

12. Cosa ta hace triste con Jehova durante este ultimo maga dia?

¹² El maltratamiento del maga malo con el maga gente. Cuando ya principia el rebelion na Eden, sabe si Jehova que hay queda mas grabe el condicion na mundo antes este queda enbuenamente. Ta odia si Jehova con el maldad, injusticia y violencia na mundo ahora. Lastimoso le especialmente con el maga mahina—aquellos gendeh ta puede protege con el diila mismo cuerpo, el maga nuay mayores y maga viuda. (Zac. 7:9, 10) Triste si Jehova si ta mira le que ya maltrata y ya hace preso con el de suyu maga fiel siervo. Puede ustedes asigura que ta ama le con ustedes todo quien ta aguanta junto con ele.

13. Cosa maga imoral conducta el ta mira el Dios na maga gente y cosa le hace con ese?

¹³ El bien bajo moralidad del maga gente. Ya crea con el maga gente na imagen del Dios pero si Satanas quierre que hace sila maga imoral cosas. Cuando ya mira el Dios que “el maldad del gente abundancia na tierra” na tiempo de Noe, “ya arripinti si Jehova que ya hace le con el maga gente na tierra y ya queda triste el de suyu corazon.” (Gen. 6:5, 6, 11) Ya queda ba enbuenamente el condicion desde aquel tiempo? Nuay gayot! Bien alegre el Diablo si ta mira le que bien comon ya lang el todo clase de sexual imoralidad, incluido alli el imoral acto entre na hombre y mujer y na maga gente que igual sexo. (Ef. 4:18, 19) Y bien alegre si Satanas especialmente si el maga gente quien ta adora con Jehova ya comete serioso culpa. Si acaba ya el paciencia de Jehova, hay dale le mira que ta odia le con el imoral conducta si hay destroza le con el maga imoral gente quien no quierre cambia.

14. Cosa ta hace el maga gente con el creacion del Dios na tierra?

¹⁴ El destrozo del de suyu maga creacion. Gendeh lang el gente ‘ta domina con el gente para na de suyu perjuicio’ sino ta destroza tambien le con el tierra y maga animal que ya manda si Jehova que cuida el gente. (Ecl. 8:9; Gen. 1:28) El cuanto maga cientista ya habla que por causa na cosa ta hace el maga gente puede perde el un millon clase de maga animal y siembra na siguiente maga año. Poreso, gendeh maka-estraña si porque na peligro ya el maga cosas alrededor kanaton! Bueno ya lang, ya promete si Jehova que ‘hay destroza con el maga destrozador del mundo’ y hace con el tierra un paraiso.—Rev. 11:18; Isa. 35:1.

15-16. Cosa el debe motiva kanaton para aguanta junto con Jehova? Ilustra.

¹⁵ Pensa con el maga problema que ta aguanta el diaton Tata na cielo por miles de año. (Mira con el cajon “ Maga Cosas que Ta Aguanta si Jehova.”) Puede termina si Jehova con el sistema de maga cosas maskin cosa hora le quierre. Pero, el de suyu paciencia ya puede gayot ayuda kanaton. Pensa con este ilustracion. Por ejemplo, ya habla con el man maridable que el diila baby que nuay pa nace tiene defecto na cuerpo. Y despues le nace, queda dificil el de suyu vida y muri le temprano. Pero, alegre siempre el mayores cuando ya nace el diila anak maskin pa bien dificil para kanila que cuida con este. Por causa cay ta ama sila con el diila anak, ya aguanta sila na maskin cosa dificultad para puede dale con ele el de con todo buen vida que posible.

 ¹⁶ Na igual manera, el todo descendiente de Adan y Eva imperfecto cuando ya nace na mundo. Maskin pa ansina, si Jehova ta ama y ta cuida kanila. (1 Juan 4:19) Y gendeh igual con el mayores na ilustracion, si Jehova puede termina con el sufrimiento del de suyu maga anak. Ya iscuji ya le con el dia cuando hay termina le con el todo sufrimiento del maga gente. (Mat. 24:36) Gendeh ba el amor de suyu debe motiva kanaton que aguanta junto con ele hasta cuando necesita?

17. Paquemodo el cosa ya habla na Maga Hebreo 12:2, 3 acerca con Jesus puede anima kanaton que continua aguanta?

¹⁷ Si Jehova ya dale kanaton perfecto ejemplo si paquemodo aguanta. Ya puede gayot imita si Jesus con el de suyu Tata. Cuando taqui pa le na tierra, ya aguanta le na maga mal palabra, huya y muerte na estaca para kanaton. (Le con el Maga Hebreo 12:2, 3, NWT.) Asigurao, el ejemplo de Jehova ya dale fuerza con Jesus para aguanta. Puede tambien este hace fuerte kanaton.

18. Paquemodo el 2 Pedro 3:9 puede kanaton hace entende si cosa ya puede cumpli el paciencia de Jehova?

¹⁸ Le con el 2 Pedro 3:9. Sabe si Jehova el de con todo buen tiempo para termina con este mal mundo. Por causa na de suyu paciencia, manada maga gente el ya puede conoce con ele. Y ahora, el grande grupo que ta llega ya millones ta adora y ta alaba con ele. Alegre sila todo cay si Jehova ya aguanta por largo tiempo que ya hace posible para nace sila, aprende ama con ele y dedica el diila vida con ele. Si tiene millones de gente quien hay aguanta hasta na fin, claro este puede dale mira que si Jehova ya hace el justo decision cuando ya decidi le queda paciencioso!

19. Cosa kita debe determinao hace y cosa el diaton premio?

¹⁹ Ya puede kita aprende con Jehova si paquemodo aguanta con alegria. Maskin pa na todo dolor de corazon y sufrimiento que ya causa si Satanas, ya esta si Jehova un “alegre Dios.” (1 Tim. 1:11, NWT) Puede tambien kita esta alegre mientras con paciencia ta espera que santifica si Jehova con el de suyu nombre, vindica con el de suyu soberania, destroza con el todo maldad y termina con el diaton maga problema ahora. Ojala, queda kita determinao que aguanta y tene comforta cay sabe kita que el diaton Tata na cielo ta aguanta tambien. Si hace kita se, este maga palabra hay queda deverasan na cada uno kanaton: “Alegre el gente quien ta aguanta el maga sufrimiento, cay si victorioso le na maga sufrimiento, ay recivi le el corona del vida que el Señor [Jehova] ya promete con aquellos quien ta ama con Ele.”—Sant. 1:12.