Asigurao que quierre si Jehova que queda alegre el dos gente quien hay casa y tene cerca relacion con uno y otro que hay esta na diila entero vida. (Mat. 19:4-6) Si quierre tu casa, paquemodo tu puede incuntra un buen marido o mujer? Como diaton Creador, sabe si Jehova si cosa kita necesita hace para tene un alegre matrimonio. Entonces si aplica tu con el maga principio que ya dale le kanaton, hay queda gayot tu deverasan alegre. Considera con el cuanto de ese maga principio.

Una, necesita kita admiti que deverasan este kanaton: “El corazon mas traidor que na maskin cosa y desperao.” (Jer. 17:9) Si el dos persona quien quierre casa y principia man date, pronto lang sila tiene fuerte sentido para na uno y otro. Si sucede se, dificil para kanila que hace justo decision. Si el diila decision base lang na diila emocion, posible sila sinti duele na uliji. (Prov. 28:26) Poreso, gendeh justo que habla el dos persona con el diila hondo sentido o hace maga promesa si gendeh pa sila bien conoce con uno y otro.

El Proverbio 22:3 ta habla: “El un sabio ta puede mira con el peligro y ta esconde, pero el nuay experiencia ta continua y hay sufri na mal resulta.” Cosa posible el maga peligro si usa con el maga dating website? Makatriste que el cuanto ya conoce maga estranjero online, ya principia man date y na uliji ya realiza que ese persona ya engaña kanila. El maga deshonesto gente ta usa tambien maga peke account para hace loco con el maga inocente gente y ruba con el diila sen. Tiene vez, aquellos maga deshonesto gente ta clama que maga Testigo de Jehova sila.

Considera con el otro peligro. El cuanto dating website ta usa maga mathematical algorithm o carculacion para determina si con quien mas compatible el un persona. Pero, nuay evidencia que deverasan se. Justo ba que confia con el un computer program que ya hace el maga gente para hace un importante decision igual como si con quien casa? Gendeh igual na maga principio na Biblia, gendeh gayot puede confia con el maga computer program.—Prov. 1:7; 3:5-7.

El principio na Proverbio 14:15 ta habla: “El inocente ta creé con el todo cosa le ya oi, pero el sabio ta pensa antes hace paso.” Antes tu considera si casa tu con ese persona, necesita  tu anay conoce gayot con ele. Pero, dificil se hace online. Maskin pa sabe tu el informacion acerca con ele y ta comunica con ele por largo tiempo online, puede ba gayot tu habla que conoce ya gayot tu con ese persona? El cuanto quien ya pensa que ya incuntra ya sila diila “true love” ya espanta con el cosa sila ya sabe cuando ya conoce sila con ese persona na personal.

El salmista ya habla: “Gendeh yo tan junto con el maga gente engañador y ta evita yo con aquellos quien ta esconde si quien sila.” (Sal. 26:4) Manada ta pensa que normal lang man imbustero na diila profile para tiene kanila quien quierre. Posible, esconde sila si quien gayot sila o gendeh dale mira con el diila gendeh bueno calidad si ta imbia sila mensaje con otro. Maskin pa el cuanto ta habla que maga Testigo de Jehova sila, bautizao Cristiano ba gayot sila? Mature ba sila na espiritual? Tiene ba sila personal relacion con Jehova? Respetao ba sila na congregacion? O posible gaha que gendeh sila buen ejemplo o “barcada malo” pa gane? (1 Cor. 15:33; 2 Tim. 2:20, 21) Y puede ba sila casa asegun na maga principio na Biblia? Necesita tu sabe con ese maga cosas pero dificil se hace si gendeh tu man cuento na otro maga Testigo quien conoce gayot con ese persona. (Prov. 15:22) Y gane, el un leal siervo de Jehova gendeh gayot pensa que casa con el un persona que gendeh siervo del Dios.—1 Cor. 7:39; 2 Cor. 6:14.

Cay peligroso usa con ese maga dating website, tiene mas bueno manera para incuntra y conoce con el persona con quien tu posible casa. Onde tu puede incuntra con el un persona quien posible queda de tuyu marido o mujer? Si nuay prohibi que man junto-junto el maga gente na publico, el maga Testigo de Jehova puede man junto na personal si atende sila na maga miting na congregacion, asemblea y na otro pa maga ocasion.

Si gendeh posible man junto-junto na publico igual durante el COVID-19 pandemic, ta usa kita maga electronic tool para atende na maga miting na congregacion donde puede kita conoce otro single Testigo de Jehova. Puede tu mira si paquemodo sila ta participa na maga miting y oi con el diila maga comento que ta revela con el diila fe. (1 Tim. 6:11, 12) Posible, puede tambien tu man cuento con otro na breakout room despues del maga miting. Na otro maga ocasion que ta usa maga electronic tool, puede tu observa si paquemodo ta trata con otro el persona con quien tu interesao. Na ansina manera, puede tu sabe si cosa clase gayot le de persona. (1 Ped. 3:4) Mientras ta conoce tu con ese persona, puede tu sabe si igual de ustedes goal o si compatible ba ustedes.

Si el maga single usa maga principio na Biblia para busca con quien casa, grande el posibilidad que experiencia sila con el cosa ta habla el proverbio: “El quien ya incuntra un buen mujer [o marido] ya puede incuntra un buen cosa, y ricibi le el favor de Jehova.”—Prov. 18:22.