1. Cosa ya hace si Jehova para contigo?

PAQUEMODO tu ya queda uno del maga Testigo de Jehova? Una, ya oi tu con “el Buen Noticia”—posible estaba na de tuyu mayores, un uban na trabajo o na escuela, o por medio na predicacion na casa en casa. (Mar. 13:10) Despues, tiene quien ya dale grande tiempo y esfuerzo para conduci Bible study contigo. Durante na ese estudiada, ya principia tu ama con Jehova y ya aprende tu que ta ama tambien le contigo. Ya guia contigo si Jehova na verdad y ahora, como un dicipulo de Jesucristo, tiene tu el esperanza que vivi hasta para cuando. (Juan 6:44) Asigurao, ta rindi gayot tu gracias con Jehova cay tiene Le con quien ya usa para enseña contigo el verdad y ya acepta Le contigo como uno del de suyu maga siervo.

2. Cosa kita hay discuti na este articulo?

² Ahora cay sabe ya kita el verdad, tiene kita el privilegio que ayuda con otro que man junto kanaton na camino para na vida. Posible, facil lang kanaton que predica na casa en casa pero baka dificil kanaton que ofrece y conduci maga Bible study. Amo ba se el cosa tu ta sinti? Si ansina, posible puede ayuda contigo el cuanto maga sugestion na este articulo. Hay discuti kita si cosa el ta motiva kanaton para ayuda hace maga dicipulo. Hay considera tambien kita si paquemodo kita enfrenta con el maga dificultad que posible ta sangga kanaton para conduci un Bible study. Una, hay considera kita si porque kita gendeh lang debe predica sino enseña tambien el buen noticia.

3. Porque kita ta predica?

³ Cuando taqui si Jesus na tierra, ya manda le con el de suyu  maga siguidores que hace con el un trabajo que tiene dos parte. Una, ya habla le kanila que predica con el buen noticia del Reino y ya dale le mira kanila si paquemodo hace con ese. (Mat. 10:7; Luc. 8:1) Por ejemplo, ya habla si Jesus con el de suyu maga dicipulo si cosa sila hace si oi kanila el maga gente y si gendeh. (Luc. 9:2-5) Ya explica tambien le que el de suyu maga dicipulo hay predica na mucho maga gente na manada lugar cuando ya habla le kanila que “man testigo con todo el maga nacion.” (Mat. 24:14; Act. 1:8) Maskin cosa man el reaccion del maga gente na diila predicacion, el maga dicipulo necesita habla con el maga gente acerca el Reino del Dios y si cosa ese cumpli.

4. Asegun na Mateo 28:18-20, cosa pa kita debe hace puera que predica acerca con el Reino?

⁴ Cosa el segundo parte del mandamiento de Jesus? Ya habla le con el de suyu maga siguidores que enseña con el maga gente que obedece con el todo cosa le ya manda. Pero, aplicable lang ba este trabajo predicacion y enseñada na maga Cristiano del primer siglo, como cosa ta habla el cuanto? Gendeh, cay ya indica si Jesus que este importante trabajo hay continua hasta na diaton tiempo ahora, “hasta na fin del mundo.” (Le con el Mateo 28:18-20.) Posible, ya dale se ele mandamiento cuando ya aparece le con el mas de 500 del de suyu maga dicipulo. (1 Cor. 15:6) Y na revelacion que ya dale le con Juan, claro ya indica si Jesus que quierre le que el todo del de suyu maga dicipulo hay ayuda con otro aprende acerca con Jehova.—Rev. 22:17.

5. Asegun na 1 Corinto 3:6-9, paquemodo si Pablo ya ilustra con el coneccion del predicacion y enseñada?

⁵ Ya compara si apostol Pablo con el trabajo de hacida de dicipulo na siembrada, que ta dale mira que gendeh lang kita debe siembra similla. Ya hace le acorda con el maga de Corinto: “Yo ya siembra el similla y si Apolo ya rega . . . Ustedes el disuyo [del Dios] simentera.” (Le con el 1 Corinto 3:6-9.) Como maga trabajador na simentera del Dios, gendeh lang kita ta siembra similla sino ta rega kita y regular ta chequia con el cricida del diaton maga siembra. (Juan 4:35) Pero, sabe kita que el Dios amo el ta hace crici con el similla.

6. Cosa el envuelto si ta enseña kita con otro?

⁶ Ta busca kita con aquellos “tiene justo condicion de corazon para obtene vida eterna.” (Act. 13:48, NWT) Para ayuda kanila queda maga dicipulo, debe kita ayuda kanila para (1) entende, (2) acepta y (3) aplica con el cosa sila ya aprende na Biblia. (Juan 17:3; Col. 2:6, 7; 1 Tes. 2:13) El todo na congregacion puede ayuda con el maga Bible study si dale sila mira amor kanila y manda sinti que welcome sila si ta atende sila na maga miting. (Juan 13:35) El quien ta conduci con el estudiada posible necesita tambien dale grande tiempo y esfuerzo para ayuda con el un estudiante para deja con el un creencia o practica que yan anad le. (2 Cor. 10:4, 5) Posible llega cuanto meses para puede guia con el un individual para hace este maga cambio para queda le cualificao na bautismo. Pero, gendeh gayot sayang el diaton esfuerzo.

7. Cosa ta motiva kanaton para participa na trabajo predicacion y hacida de dicipulo?

⁷ Porque kita ta predica y ta hace maga dicipulo? Una, cay ta ama kita con Jehova. Si ta hace tu el todo para obedece con el mandamiento que predica y hace maga dicipulo, ta demonstra tu el de tuyu amor con Dios. (1 Juan 5:3) Pensa este: El de tuyu amor para con Jehova ya manda ya contigo move para predica na casa en casa. Facil ba obedece con ese mandamiento? Posible gendeh. Cuando ya  sigui tu na predicacion por primer vez, ya nervia ba tu? Asigurao lang! Pero, sabe tu que quierre si Jesus que hace tu este trabajo y ya obedece tu con ese. Y posible despues del cuanto tiempo, mas facil ya contigo que participa na predicacion. Quetal el conducida de Bible study? Ta nervia ba tu si ta pensa acerca con este? Posible. Pero si pidi tu ayuda con Jehova que ganá con el de tuyu nervios y tene coraje para ofrece Bible study, puede ayuda si Jehova hace fuerte con el de tuyu deseo para hace maga dicipulo.

8. Asegun na Marcos 6:34, cosa pa el manda move kanaton para enseña con otro?

⁸ El ika-dos razon que ta manda move kanaton para enseña con otro el verdad amo el diaton amor para na diaton projimo. Na un ocasion, bien cansao si Jesus y el de suyu maga dicipulo despues predica. Necesita sila un lugar onde puede descanza pero ya puede kanila incuntra el bien manada maga gente. Ya tiene lastima si Jesus con el maga gente y ya principia le kanila enseña “por largo tiempo.” (Le con el Marcos 6:34.) Ya hace siempre le esfuerzo maskin pa cansao le. Porque? Cay ya pone si Jesus con el de suyu mismo cuerpo na lugar del maga gente. Ya mira le si paquemodo sila ta sufri, que necesita sila esperanza y quierre le ayuda kanila. Ansina tambien el condicion del maga gente ahora maskin pa dol alegre sila na diila vida. Igual sila na maga carnero perdido y nuay pastor el quien ta guia kanila. Si apostol Pablo ya habla que nuay Dios y nuay esperanza el maga gente igual ansina. (Ef. 2:12) Ta entra sila na “puerta para na destruccion”! (Mat. 7:13) Si considera kita con el espiritual condicion del maga gente na diaton teritorio, el amor y compasion hay manda move kanaton para ayuda kanila. Y el de con todo buen manera para ayuda kanila amo si ofrece kita kanila Bible study.

9. Asegun na Filipo 2:13, paquemodo contigo puede ayuda si Jehova?

⁹ Posible, tan alang-alang tu ofrece Bible study cay sabe tu que necesita grande tiempo para hace con este. Si ansina el cosa tu ta sinti, habla se con Jehova. Pidi con ele que ayuda contigo cultiva el deseo para busca y conduci Bible study. (Le con el Filipo 2:13.) Ya asigura kanaton si apostol Juan que hay contesta el Dios con el diaton maga rezo que harmonia na De Suyu voluntad. (1 Juan 5:14, 15) Poreso, puede tu asigura que hay ayuda contigo si Jehova cultiva el deseo para participa na hacida de maga dicipulo.

10-11. Cosa posible sangga kanaton que conduci un Bible study?

¹⁰ Sabe kita que bien importante que enseña pero posible tan dificil kita hace pa mas na hacida de dicipulo. Considera kita con el cuanto maga dificultad y si paquemodo kita puede enfrenta con ese.

¹¹ Posible, limitao kita por causa na diaton circumstancia. Por ejemplo, el cuanto maga publisher de edad ya o gendeh bueno el salud. Amo ba se el de tuyu situacion? Si ansina, considera con el uno na maga leccion que ya aprende kita na COVID-19 pandemic. Ya puede kita discubri que puede kita conduci efectivo Bible study por medio na diaton gadget. Poreso, puede tu principia y conduci Bible study maskin na casa lang tu. Y tiene pa otro ventaja. Posible, quierre el otro man Bible study pero gendeh sila vacante durante el tiempo que ta sale predica el diaton maga hermano. Pero, posible vacante sila temprano aga o denoche. Puede ba tu hace vacante con el de tuyu mismo cuerpo durante na ese maga tiempo? Denoche ya enseña si Jesus con  Nicodemo, na tiempo que mas conveniente para con Nicodemo.—Juan 3:1, 2.

12. Cosa el puede dale kanaton confianza que puede kita queda un efectivo maestro?

¹² Posible, falta el diaton confianza na diaton abilidad que conduci Bible study. Posible, ta sinti kita que debe kita tene mas saber o abilidad como maestro antes kita man Bible study con otro. Si ese el cosa tu ta sinti, considera con el tres cosas que puede hace fuerte con el de tuyu confianza. Una, ta considera contigo si Jehova que cualificao para enseña con otro. (2 Cor. 3:5) Ika-dos, si Jesus, el quien tiene “todo autoridad na cielo y na mundo,” ya autoriza contigo para enseña. (Mat. 28:18) Y ika-tres, puede tu confia que hay ayuda contigo si Jehova y el de tuyu maga hermano. Ya ayuda si Jehova con Jesus para sabe si cosa le habla y puede tambien Le ayuda contigo. (Juan 8:28; 12:49) Omento pa, puede tu pidi na de ustedes field service group overseer, un cualificao pioneer o un experienciao publisher que ayuda contigo principia y conduci un Bible study. El un manera que puede tu tene confianza amo si sigui tu na Bible study na uno de ese maga publisher.

13. Porque kita necesita man adjust?

¹³ Posible, tan dificil kita man adjust na nuevo manera y nuevo tool de enseñada. Ya cambia ya el diaton manera si paquemodo ta conduci Bible study. Si ta conduci kita Bible study usando el publicacion Queda Alegre Hasta Para Cuando!, necesita kita prepara para na estudiada y conduci con este na manera que diferente compara de antes. Mas poco el maga parapo que hay le kita y mas necesita kita man cuento con el estudiante. Si ta enseña, ta usa kita mas manada video y otro maga tool igual na JW Library^®. Si no sabe tu usa con este maga tool, pidi con otro que enseña contigo si paquemodo usa con ese. Como maga gente, quierre-quierre kita hace el maga cosas que yan anad kita hace. Gendeh facil man adjust na maga nuevo cosas. Pero na ayuda de Jehova y del otro, mas facil tu puede man adjust y queda tu mas alegre conduci Bible study na maga gente. Como cosa ya habla el un pioneer, este manera de enseñada “maka-alegre para na estudiante y con el quien ta conduci.”

14. Cosa kita debe acorda si ta predica kita na un dificil teritorio y paquemodo el 1 Corinto 3:6, 7 ta puede anima kanaton?

¹⁴ Posible, ta queda kita na un lugar que dificil principia Bible study. Posible, el maga gente gendeh interesao na diaton mensaje o gane tan contra pa con ese. Cosa puede ayuda kanaton para esta positivo na ese maga teritorio? Acorda que el circumstancia del maga gente puede lang cambia dayun na este trambulicao mundo y aquellos gendeh interesao del una posible realiza que necesita sila con el direccion del Dios na diila vida. (Mat. 5:3) El cuanto quien pirmi gendeh ta acepta con el diaton literatura ya acepta Bible study na uliji. Sabe tambien kita que si Jehova el Dueño del cosecha. (Mat. 9:38) Quierre le que continua kita siembra y rega pero ele el responsable na cricida de este. (1 Cor. 3:6, 7) Y ta puede gayot anima que maskin pa gendeh kita ta conduci Bible study ahora, hay bendici kanaton si Jehova base na diaton maga esfuerzo y gendeh base na diaton resulta. *

15. Cosa ta sinti si Jehova si tiene quien ta acepta Bible study y ta aplica con el maga cosa le ta aprende?

¹⁵ Alegre si Jehova si acepta el un persona con el verdad na Biblia y si habla tambien le se  con otro. (Prov. 23:15, 16) Asigurao, bien alegre si Jehova mientras ta mira con el cosa ta sucede ahora! Por ejemplo, maskin pa na pandemia que ta sucede na entero mundo durante el 2020 service year, tiene 7,705,765 Bible study el ya conduci que ya ayuda con el 241,994 gente para dedica con el diila mismo cuerpo con Jehova y bautiza. Y este maga nuevo dicipulo hay conduci tambien maga Bible study y hace pa mas manada dicipulo. (Luc. 6:40) Asigurao, ta hace kita alegre con Jehova si ta participa kita na trabajo de hacida de dicipulo.

16. Cosa goal kita puede hace?

¹⁶ Gendeh facil hace maga dicipulo. Pero na ayuda de Jehova, puede kita participa na trabajo que enseña con el maga gente que ama con el diaton Tata na cielo. Puede ba kita hace goal que principia y conduci maskin un Bible study? Posible kita espanta na cosa sucede si usa kita con el cada oportunidad para pregunta con aquellos con quien kita ya conoce si quierre ba sila man Bible study junto kanaton. Puede kita asigura que hay bendici si Jehova con el diaton maga esfuerzo.

17. Cosa kita hay experiencia si puede kita conduci un Bible study?

¹⁷ Que bien grande el privilegio que tiene kita para predica y enseña el verdad con otro! Este trabajo ta hace gayot kanaton deverasan alegre. Si apostol Pablo, quien ya ayuda con el manada na Tesalonica para queda maga dicipulo, ya expresa con el de suyu sentido na ese manera: “Cosa man el diamon esperanza y alegria? Cosa man el corona que ay dale canamon orgullo na presencia de Jesucristo cuando Ele ay vene? Gendeh ba ustedes? Ustedes amo gayot el diamon orgullo y alegria.” (1 Tes. 2:19, 20; Act. 17:1-4) Manada ahora el ya sinti tambien ansina. El un hermana que el nombre Stéphanie, quien junto con el de suyu marido ya puede ayuda manada individual para bautiza, ya habla, “Nuay onde puede compara el alegria que puede ayuda con el maga gente que dedica con el diila mismo cuerpo con Jehova.”