ARTICULO 29
Queda Alegre na De Tuyu Mismo Progreso!
“Cada uno debe observa el di suyo mismo trabajo. . . . Pero no debe le compara el cosa ta hace le con el cosa ta hace el maga otro gente.”—GAL. 6:4, El Nuevo Testamento.
CANCION 34 Walking in Integrity
PREVIEW *
1. Porque si Jehova gendeh ta compara kanaton na otro?
NO QUIERRE si Jehova que igual-igual lang el todo cosas. Claro se puede mira na de suyu bonito creacion, incluido ya el maga gente. Diferente el cada uno kanaton poreso gendeh ta compara si Jehova contigo na otro. Ta examina le con el de tuyu corazon, si cosa clase gayot tu de persona. (1 Sam. 16:7) Sabe tambien le con el de tuyu maga abilidad, si cosa tu gendeh puede hace y si paquemodo contigo ya hace engranda. Y gendeh le ta pidi mas na cosa tu puede dale. Necesita kita imita con Jehova y mira con el diaton mismo cuerpo igual si paquemodo le ta mira kanaton. Como resulta, tiene kita “opinion justo” y gendeh pensa que bien bueno kita o pensa menos acerca na diaton mismo cuerpo.—Roma 12:3.
2. Porque gendeh bueno que compara kita con el diaton mismo cuerpo con otro?
2 Siempre, puede kita beneficia si observa kita con el buen ejemplo del un hermano o hermana quien productivo na de suyu ministerio. (Heb. 13:7) Posible, puede kita mira si paquemodo kita queda mas efectivo na diaton ministerio. (Fil. 3:17) Pero si ta imita tu con el ejemplo del un persona, gendeh se quierre decir que ta compara tu con el de tuyu mismo cuerpo con ele. Cay si ta compara tu, posible se causa para sinti tu envidia, luya o nuay valor. Igual como cosa kita ya aprende del ya pasa articulo, si man competencia kita con otro na congregacion, hay causa tambien se peligro na diaton espiritualidad. Poreso, si Jehova amable ya anima kanaton: “Cada uno debe observa el di suyo mismo trabajo y caracter. Si bueno ese di suyo trabajo y caracter, entonces puede le man alegre del cosa le ta hace. Pero no debe le compara el cosa ta hace le con el cosa ta hace el maga otro gente.”—Gal. 6:4, El Nuevo Testamento.
3. Cosa espiritual progreso tu ya puede hace que ta dale contigo alegria?
3 Quierre si Jehova que queda tu alegre na de tuyu espiritual progreso. Por ejemplo, si ya bautiza ya tu, debe tu queda alegre cay ya puede tu alcanza con ese goal. Etu mismo el ya hace con ese decision. Base se na de tuyu amor para con Dios. Pensa si cosa ya tu ya puede hace desde aquel tiempo. Por ejemplo, mas ya queda ba hondo el de tuyu amor na lehida y estudiada del Biblia? El de tuyu rezo ba mas ya queda con todo corazon? (Sal. 141:2) Ya queda ba mas facil contigo que principia man cuento con el maga gente y ya queda ba tu mas efectivo na usada del diaton maga tool na ministerio? Y si tiene tu familia, ya ayuda ba si Jehova contigo para queda mas buen marido, mujer o mayores? Hay queda tu bien alegre acerca na progreso que ya puede tu hace.
4. Cosa kita considera na este articulo?
4 Puede kita ayuda con otro queda alegre na diila espiritual progreso. Puede tambien kita ayuda con otro para gendeh mas compara con el diila mismo cuerpo con otro. Na este articulo, hay considera kita si paquemodo el maga mayores puede ayuda con el diila maga anak, si paquemodo el man maridable puede ayuda con uno y otro, y si paquemodo el maga anciano y el otro puede ayuda con el diila maga hermano y hermana. Na uliji, hay considera kita con el cuanto principio na Biblia que puede ayuda kanaton hace maga goal que puede kita alcanza asegun na diaton maga abilidad y circumstancia.
SI COSA PUEDE HACE EL MAGA MAYORES Y MAN MARIDABLE
Maga mayores, aprecia con el esfuerzo del de ustedes cada anak (Mira con el parapo 5-6) *
5. Asegun na Efeso 6:4, cosa debe evita el maga mayores?
5 El maga mayores debe con cuidao que gendeh compara con el diila anak con otro o pidi con el diila anak mas pa na cosa este puede dale. Si hace este el maga mayores, puede sila hace luya con el diila anak. (Le con el Efeso 6:4.) El un hermana que el nombre Sachiko * ya habla: “El de mio maga maestra ta expecta conmigo que queda yo mas bueno contra na de mio maga classmate. Omento pa, el de mio nana quierre que queda yo mas bueno na escuela para el de mio maga maestra y de mio tata quien gendeh Testigo de Jehova hay pensa que bueno el maga siervo de Jehova. Gane, quierre le que pirmi yo perfect na de mio maga exam y para conmigo, imposible se. Ya tarda ya yo ya acaba entra escuela pero tiene vez ta sinti yo siempre si bastante ya ba el cosa yo ta dale para con Jehova.”
6. Cosa puede aprende el maga mayores na Salmo 131:1, 2?
6 Un importante leccion para na maga mayores el cosa puede le na Salmo 131:1, 2. (Le.) Si Rey David ya habla que nuay le “desea maga cosas que bien grande” o maga cosas que bien dificil para con ele. Cay humilde le, contento le y tiene paz. Cosa puede aprende el maga mayores na palabra de David? El maga mayores puede queda humilde gendeh lang na cosa sila ta expecta na diila mismo cuerpo sino na cosa tambien sila ta expecta na diila anak. El maga mayores puede manda sinti que valoroso el diila anak si determina sila si cosa le puede y gendeh puede hace, y despues ayuda con ele hace maga goal que puede le alcanza. El un hermana que el nombre Marina ya acorda: “El de mio nana nuay conmigo compara na de mio tres hermano o na otro maga bata. Ya enseña le conmigo que todo kita tiene diferente abilidad y el cada uno kanaton precioso con Jehova. Por causa con ele, nuay yo compara con el de mio mismo cuerpo con otro.”
7-8. Paquemodo el un marido puede dale mira honor con el de suyu mujer?
7 El un Cristiano marido debe dale mira honor con el de suyu mujer. (1 Ped. 3:7) Si ta dale mira honor quierre decir que dale especial atencion y respeto con otro. Por ejemplo, el un marido puede dale mira honor con el de suyu mujer si trata le con este con dignidad. Gendeh le pidi mas na cosa este puede dale. Y gendeh le compara con el de suyu mujer na otro maga mujer. Cosa posible el efecto si hace le se? El un hermana que el nombre Rosa tiene marido que gendeh Testigo de Jehova y pirmi este con ele ta compara na otro maga mujer. Ese maga gendeh bueno palabra nuay lang quita con el confianza na cuerpo de Rosa. Ele ya habla, “Necesita yo que tiene conmigo quien pirmi hace acorda que valoroso yo con Jehova.” Pero, el un Cristiano marido ta dale mira honor con el de suyu mujer. Sabe le que si hace le este, tene este buen efecto na de suyu relacion na de suyu mujer y na de suyu relacion con Jehova. *
8 El un marido quien ta dale mira honor con el de suyu mujer ta habla maga buen cosas acerca con ele na otro gente, ta asigura con el de suyu mujer que ta ama le con ele y ta dale con ele comendacion. (Prov. 31:28) Ese el cosa ya hace el marido de Katerina que ya menciona del ya pasa articulo para ayuda con ele que gendeh sinti que nuay le valor. Cuando bata le, ta hace con ele de menos el de suyu nana y pirmi con ele ta compara na otro maga mujer, incluido ya na de suyu maga amiga. Como resulta, ya principia si Katerina compara con el de suyu mismo cuerpo con otro—maskin despues le guinda na verdad! Pero, el de suyu Cristiano marido ya ayuda con ele evita hace con este y tiene justo mirada na de suyu mismo cuerpo. Si Katerina ya habla: “Ta ama le conmigo, ta dale comendacion na maga buen cosas yo ya puede hace y ta reza para conmigo. Ya hace tambien le acorda conmigo con el maga bonito calidad de Jehova y ya ayuda le conmigo corecta con el de mio negativo pensamiento.”
SI COSA PUEDE HACE EL MAGA AMABLE ANCIANO Y EL OTRO
9-10. Paquemodo el maga amable anciano ya ayuda con el un hermana que gendeh compara con el de suyu mismo cuerpo con otro?
9 Cosa puede hace el maga anciano para ayuda con aquellos quien tiene tendencia compara con el diila mismo cuerpo con otro? Considera con el experiencia del un hermana que el nombre Hanuni, quien ya engranda que ralo lang ta ricibi comendacion. Ele ya habla: “Huyain yo y ta sinti yo que mas bueno el otro maga bata que conmigo. Ya principia yo compara con el de
mio mismo cuerpo con otro desde bata yo.” Maskin despues guinda na verdad si Hanuni, ta compara siempre le con el de suyu mismo cuerpo con otro. Como resulta, ta sinti le que gendeh le importante na congregacion. Pero ahora, alegre le ta sirvi como pioneer. Cosa con ele ya puede ayuda para cambia el de suyu mirada?10 Si Hanuni ya habla que ya ayuda con ele el maga amable anciano. Ya habla sila que valoroso le na congregacion y ya dale con ele comendacion na de suyu buen ejemplo. Ele ya escribi: “Tiene maga tiempo que el maga anciano ya pidi conmigo que anima con el cuanto maga hermana quien necesita ayuda. Ya manda este sinti conmigo que importante yo. Ya acorda yo cuando el maga amable anciano ya rindi conmigo gracias cay ya anima yo con el cuanto maga joven hermana. Despues, ya le sila conmigo el 1 Tesalonica 1:2, 3. Ya hace gayot se conmigo alegre! Por causa con aquel maga amable anciano, ta sinti ya yo ahora que valoroso yo na organizacion de Jehova.”
11. Paquemodo kita puede ayuda con el maga “ta sufri,” como cosa ta habla na Isaias 57:15?
11 Le con el Isaias 57:15. Ta ama si Jehova con aquellos maga “ta sufri.” Todo kita, gendeh lang el maga anciano, puede ayuda anima con este maga hermano y hermana. El un manera que puede kita anima kanila amo si dale kita mira sincero interes kanila. Quierre si Jehova que dale kita mira kanila si paquemodo le ta ama kanila. (Prov. 19:17) Puede tambien kita ayuda con el diaton maga hermano y hermana si humilde kita y gendeh man hambug con el diaton maga abilidad. No quierre kita saca el atencion del otro que posible resulta que man envidia kanaton el otro. En vez, usa kita con el diaton maga abilidad y saber para anima con uno y otro.—1 Ped. 4:10, 11.
Ta gusta el maga dicipulo de Jesus con ele cay gendeh le ta manda sinti que mas bueno le. Alegre le man junto con el de suyu maga amigo (Mira con el parapo 12)
12. Porque el maga ordinario gente quierre man junto con Jesus? (Mira con el letrato na cover.)
12 Manada kita cosa puede aprende si paquemodo trata con otro si considera kita si paquemodo si Jesus ya trata con el de suyu maga siguidores. Ele el de con todo importante gente que ya vivi. Pero, si Jesus “paciencioso y humilde de corazon.” (Mat. 11:28-30) Nuay le man hambug si paquemodo le de inteligente y si paquemodo le de manada cosa sabe. Si ta enseña le, ta usa le maga simple palabra y ilustracion que puede alcanza na corazon de aquellos maga ordinario gente. (Luc. 10:21) Gendeh igual na maga arogante religioso lider, si Jesus nuay manda sinti con otro que nuay sila valor con Dios. (Juan 6:37) Sino, ya trata le con respeto con el maga ordinario gente.
13. Paquemodo el pagka-bueno y amor de Jesus claro puede mira na manera si paquemodo le ya trata con el de suyu maga dicipulo?
13 El pagka-bueno y amor de Jesus claro puede mira na manera si paquemodo le ya trata con el de suyu maga dicipulo. Sabe le que tiene sila diferente maga abilidad y circumstancia. Poreso, gendeh igual el diila responsibilidad y gendeh tambien igual el cosa sila ta puede hace na ministerio. Pero, ya aprecia le con el esfuerzo del cada uno. Ya dale se mira si Jesus na de suyu istoria acerca na talento. Na ese ilustracion, el amo ya dale trabajo con el cada esclavo “asegun el diila abilidad.” El uno na dos buen esclavo ya ganancia mas pa que con otro. Pero, el amo ya dale comendacion kanila dos usando el igual palabra: “Bien hacido, bueno y fiel muchacho.”—Mat. 25:14-23.
14. Paquemodo kita puede imita con el manera de Jesus si paquemodo le ya trata con otro?
14 Bueno y amable si Jesus na manera si paquemodo le ta trata kanaton. Sabe le que tiene kita diferente abilidad y circumstancia, y alegre le si ta hace kita con el diaton de con todo bueno. Debe kita imita con Jesus na manera si paquemodo kita ta trata con otro. No quierre kita manda sinti con el un hermano o hermana que nuay le valor o tiene huya cay
gendeh le ta puede hace el cosa ta puede hace el otro. En vez, busca kita oportunidad para dale comendacion con el diaton maga hermano y hermana cay ta dale sila el diila de con todo bueno para sirvi con Jehova.HACE MAGA GOAL QUE PUEDE TU ALCANZA
Puede tu queda alegre si hace tu maga goal que puede tu alcanza (Mira con el parapo 15-16) *
15-16. Paquemodo ya beneficia el un hermana cay ya hace le maga goal que puede le alcanza?
15 Si tiene kita maga espiritual goal, tiene direccion y proposito el diaton vida. Pero, debe kita hace goal depende na diaton maga abilidad y circumstancia, gendeh del otro. Cay si hace kita se, posible kita man luya si gendeh kita puede alcanza con ese goal. (Luc. 14:28) Considera con el ejemplo del un pioneer hermana que si Midori.
16 El tata de Midori, que gendeh un Testigo de Jehova, ta hace con ele huya cuando bata le. Ta compara con ele na de suyu hermano, hermana y maga classmate. “Ya sinti yo nuay valor,” ya habla si Midori. Pero mientras ta engranda le, ya tiene le confianza na cuerpo. Ele ya habla, “Ta le yo con el Biblia todo el dia para tene yo paz na corazon y puede yo sinti que ta ama conmigo si Jehova.” Omento pa, ya hace le maga goal y especifico ya reza que ayuda con ele que alcanza con ese maga goal. Como resulta, ya queda alegre si Midori na de suyu espiritual progreso.
CONTINUA DALE EL DE TUYU DE CON TODO BUENO CON JEHOVA
17. Cosa kanaton puede ayuda para cambia con el diaton pensamiento y cosa el maga resulta?
17 Necesita largo tiempo para quita con el maga negativo sentido y pensamiento. Poreso, si Jehova ya anima kanaton: “Vivi ustedes un vida nuevo por medio de un cambio espiritual na de ustedes pensamiento.” (Ef. 4:23, 24) Siempre para puede con ese hace, necesita kita reza, estudia con el Palabra del Dios y medita. Continua hace con este y pidi con Jehova que dale contigo fuerza. El de suyu sagrao espiritu hay ayuda contigo para quita con el tendencia que compara con el de tuyu mismo cuerpo con otro. Hay ayuda tambien contigo si Jehova para sabe si ya queda tu envidioso o orgulloso y hay ayuda le contigo para hace dayun maga necesita cambio.
18. Paquemodo el maga palabra na 2 Cronicas 6:29, 30 puede dale comforta contigo?
18 Le con el 2 Cronicas 6:29, 30. Sabe si Jehova si cosa kita ta pensa y ta sinti. Sabe tambien le que ta hace kita esfuerzo para ganá contra con el espiritu del mundo y con el diaton mismo imperfeccion. Si ta mira si Jehova si paquemodo de grande esfuerzo kita ta hace para ganá con este maga negativo cosas, mas ta queda grande el de suyu amor para kanaton.
19. Paquemodo si Jehova ya ilustra con el cosa le ta sinti para kanaton?
19 Para ilustra si cosa ta sinti si Jehova para kanaton, ya usa le con el ejemplo del amor del un nana para na de suyu baby. (Isa. 49:15) Considera con el ejemplo del un nana que si Rachel. Ele ya escribi: “El de mio anak, si Stephanie, ya nace que falta mes. Cuando primer vez yo ya mira con ele, bien diutay gayot le y maka-lastima. Pero, el hospital ya permiti conmigo que carga yo con ele todo el dia durante el primer mes cuando na incubator le. Durante na ese tiempo, ya queda kame bien cerca na uno y otro. Seis año ya le ahora y mas diutay le compara con otro que igual el de suyu edad. Pero, mas ta ama yo con ele cay ya hace le esfuerzo para vivi y ya dale gayot le grande alegria conmigo.” Ta queda kita bien alegre cay sabe kita que ansina de hondo el amor de Jehova para kanaton si ta mira le que ta hace kita esfuerzo para sirvi con ele con todo alma.
20. Como un dedicao siervo de Jehova, porque tu puede queda alegre?
20 Cay siervo tu de Jehova, precioso miembro tu del de suyu familia y nuay ni uno el igual contigo. Nuay le contigo hace cerca con ele por causa cay mas bueno tu contra na de tuyu projimo. Ya hace le se cay ya mira le na de tuyu corazon que humilde tu y preparao aprende y hace maga cambio. (Sal. 25:9) Puede tu asigura que ta aprecia le si ta hace tu el de tuyu de con todo bueno para sirvi con ele. Ciendo ya aguanta tu y fiel, evidencia se que “tiene [tu] buen corazon.” (Luc. 8:15, El Nuevo Testamento) Poreso, continua dale con Jehova el de tuyu de con todo bueno. Como resulta, hay queda tu ‘alegre na cosa tu ta hace.’
CANCION 38 He Will Make You Strong
^ par. 5 Si Jehova gendeh ta compara kanaton na otro. Pero, posible kita compara con el diaton mismo cuerpo con otro y tiene negativo mirada na diaton mismo cuerpo. Na este articulo, hay considera kita si porque peligroso que compara kita con el diaton mismo cuerpo con otro. Hay discuti tambien kita si paquemodo kita puede ayuda con el diaton miembro na familia y con aquellos na congregacion que mira con el diila mismo cuerpo igual si paquemodo si Jehova ta mira kanila.
^ par. 5 Ya cambia con el cuanto nombre.
^ par. 7 Maskin pa ta discuti kita aqui acerca na maga marido, manada del maga principio aplicable tambien na maga mujer.
^ par. 58 DETALLE DE LETRATO: Durante el de familia adoranza, el mayores ya dale mira que alegre sila na cosa ta hace el diila cada anak para hace con el arca de Noe.
^ par. 62 DETALLE DE LETRATO: El un solo nana, quien tiene diutay anak, ta hace con el de suyu schedule para puede man auxiliary pioneer y alegre le cay ya puede le alcanza ese goal.