1. Cosa debe el diaton mirada na privilegio de rezo?

 TIENE kita un bien bonito privilegio que atraca con el Creador del cielo y tierra por medio na rezo. Pensa este: Puede kita reza con Jehova maskin cosa hora y usando el maskin cosa lengguaje que gendeh necesita pidi permiso. Puede kita reza con ele maskin na hospital kita o na preso, con confianza que el diaton amable Tata hay oi kanaton. Ta dale gayot kita importancia con este privilegio.

2. Paquemodo ya dale mira si Rey David que ta aprecia le con el privilegio de rezo?

² Ya aprecia si Rey David con el privilegio de rezo. Na de suyu cancion con Jehova, ele ya habla: “Ojala el de mio rezo hay queda igual como incenso que ya prepara adelante contigo.” (Sal. 141:1, 2) Na tiempo de David, ta prepara enbuenamente con el sagrao incenso que ta usa el maga sacerdote para na puro adoranza. (Ex. 30:34, 35) Cay ya menciona si David con el incenso, ese ta dale mira que quierre le prepara enbuenamente con el cosa le habla con el de suyu Tata na cielo. Amo tambien se el cosa kita quierre. Quierre kita que el diaton maga rezo ta hace alegre con Jehova.

3. Paquemodo kita debe atraca con Jehova na rezo y porque?

³ Si ta reza kita con Jehova, debe gayot kita dale mira hondo respeto. Considera con el maga bonito vision que ya dale con Isaias, Ezequiel, Daniel y Juan. Otro-otro este maga vision pero tiene cosa comon con este. Todo este ta dale mira si paquemodo de marvelloso si Jehova como Rey. “Ya mira  [si Isaias] con Jehova que ta sinta na un alto trono.” (Isa. 6:1-3) Ya mira si Ezequiel con Jehova que sintao na carro na cielo y “ta brilla el de suyu alrededor igual na un arcoiris.” (Eze. 1:26-28) Ya mira si Daniel con el “Antigua de Maga Dia” que mudao de blanco ropa y tiene maga fuego que ta sale na De Suyu trono. (Dan. 7:9, 10) Y ya mira si Juan con Jehova que sintao na un trono que tiene dol un bonito verde arcoiris alrededor. (Rev. 4:2-4) Si ta medita kita con el incomparable gloria de Jehova, ta puede kita acorda que un bien grande privilegio que puede atraca con ele na rezo y importante que hace kita se con respeto. Pero, paquemodo kita debe reza?

4. Cosa kita puede aprende na cosa ya menciona si Jesus na principio del rezo na Mateo 6:9, 10?

⁴ Le con el Mateo 6:9, 10. Na Sermon na Monte, ya enseña si Jesus con el de suyu maga dicipulo si paquemodo reza na manera que aceptable con Dios. Despues le habla “ansina ustedes reza,” ya menciona si Jesus una con el maga de con todo importante cosas: el santificacion del nombre de Jehova; el llegada del Reino que amo hay destroza con el todo maga enemigo del Dios; y el maga bendicion na futuro que hay dale Le para na tierra y para na maga gente. Si ta inclui kita con ese maga cosas na diaton rezo, ta dale kita mira que importante para kanaton el voluntad del Dios.

5. Malo ba que reza acerca na maga personal cosas?

⁵ Na sunod parte del rezo, ya dale mira si Jesus que gendeh malo reza acerca na personal cosas. Puede kita pidi con Jehova que dale kanaton comida, perdona con el diaton maga culpa, protege kanaton desde na tentacion y libra kanaton na mal. (Mat. 6:11-13) Si ta pidi kita este maga cosas con Jehova, ta dale kita mira que ta depende kita con ele y quierre kita que hace alegre con ele.

6. Limitao lang ba el cosa kita puede reza na maga cosas que ya menciona na modelo rezo? Explica.

⁶ No quierre si Jesus que copia el de suyu maga siguidores con el maga exacto palabra del modelo rezo. Na otro maga rezo de Jesus, ya menciona le diferente maga cosas que importante con ele aquel tiempo. (Mat. 26:39, 42; Juan 17:1-26) Poreso igual con  ele, puede tambien kita reza acerca na maskin cosa que importante para kanaton. Si necesita kita hace decision, puede kita reza para pidi sabeduria y entendimiento. (Sal. 119:33, 34) Si ya ricibi kita un dificil assignment, puede kita pidi na rezo que ayuda kanaton entende si paquemodo cumpli con ese. (Prov. 2:6) El maga mayores puede reza para na diila maga anak, el maga anak puede reza para na diila maga mayores y todo kita debe reza para na diaton maga Bible study y con aquellos con quien kita ta predica. Siempre, el diaton maga rezo gendeh debe pirmi pidimiento lang.

7. Porque kita debe alaba con Jehova na rezo?

⁷ Debe kita acorda que alaba con Jehova na diaton maga rezo. Conviene gayot si Jehova ricibi alabanza. Ele “bueno y preparao para perdona.” Un Dios tambien le que “lastimoso y tiene compasion, gendeh pronto rabia y abundancia de amor leal y pagka-fiel.” (Sal. 86:5, 15) Conviene gayot si Jehova ricibi alabanza por causa na de suyu maga calidad y na cosa ele ta hace.

8. Cosa el cuanto cosas que puede kita rindi gracias con Jehova? (Salmo 104:12-15, 24)

⁸ Puera que quierre kita alaba con Jehova na diaton rezo, quierre tambien kita rindi gracias con ele na maga bonito cosas que ta dale le. Por ejemplo, puede kita rindi gracias con ele na maga bonito color del maga flores, na diferente clase de maga sabroso comida y na alegria que ta experiencia kita por causa na diaton maga amigo. Ta dale el diaton amable Tata este maga cosas y mas pa, para lang queda kita alegre. (Le con el Salmo 104:12-15, 24.) Y el mas importante, ta rindi kita gracias con Jehova na abundancia espiritual comida que ta dale le y na bonito esperanza que tiene kita na futuro.

9. Cosa puede ayuda kanaton para acorda que rindi gracias con Jehova? (1 Tesalonica 5:17, 18)

⁹ Posible, facil lang ulvida que rindi gracias con Jehova na todo cosas que ta hace le para kanaton. Cosa puede ayuda contigo para acorda? Puede tu hace un lista de maga cosas que ya pidi tu con ele na rezo y despues, chequia si paquemodo le ya contesta con ese. Acabar, reza para rindi gracias con  ele. (Le con el 1 Tesalonica 5:17, 18.) Pensa este: Alegre kita y ta sinti que ta ama kanaton si ta rindi gracias kanaton el otro. Na igual manera, ta queda alegre si Jehova si ta acorda kita rindi gracias con ele si ta contesta le con el diaton maga rezo. (Col. 3:15) Pero, cosa pa el otro razon si porque kita debe rindi gracias con el diaton Dios?

10. Asegun na 1 Pedro 2:21, porque kita debe rindi gracias con Jehova por causa con Jesus?

¹⁰ Le con el 1 Pedro 2:21. Debe kita rindi gracias con Jehova cay ya imbia le con el de suyu precioso Anak para enseña kanaton. Na diaton estudiada acerca con Jesus, ta aprende kita manada cosas acerca con Jehova y acerca si paquemodo hace alegre con Ele. Si demonstra kita fe na sacrificio del Cristo, puede kita tene cerca personal relacion y paz con Dios Jehova.​—Roma 5:1.

11. Porque kita ta reza con Jehova por medio na nombre de Jesus?

¹¹ Ta rindi kita gracias con Jehova cay ta puede kita reza con ele por medio na de suyu Anak. Ta usa si Jehova con Jesus para dale kanaton el cosa kita ta pidi. Ta oi si Jehova con el maga rezo que ya ofrece por medio na nombre de Jesus y ta contesta Le con ese. Si Jesus ya habla: “Maskin cosa ustedes ay pidi na mi Nombre ay hace yo, para el Tata ay recibi el gloria por medio del Anak.”​—Juan 14:13, 14.

12. Cosa el otro razon para rindi gracias con Jehova por causa na de suyu Anak?

¹² Ta perdona si Jehova con el diaton maga culpa por causa na rescate de Jesus. El Escritura ya menciona con Jesus como el diaton alto sacerdote o “Sumo Padre quien ta sinta na lao derecha del trono del Dios na cielo.” (Heb. 8:1) Si Jesus el diaton “representante quien ta suplica con el Dios.” (1 Juan 2:1, El Nuevo Testamento) Ta rindi gayot kita gracias con Jehova cay ya dale le kanaton un Alto Sacerdote quien ta entende con el diaton maga imperfeccion y “ta suplica con Dios . . . para di aton”! (Roma 8:34, El Nuevo Testamento; Heb. 4:15) Maga imperfecto kita poreso si nuay el sacrificio de Jesus, gendeh kita puede atraca con Jehova na rezo. Asigurao, uyun tu que gendeh gayot bastante el diaton las gracias na regalo que ya dale si Jehova kanaton​—el de suyu precioso Anak!

13. Na noche antes le muri, paquemodo si Jesus ya dale mira que ta ama le con el de suyu maga dicipulo?

¹³ Na noche antes le muri, largo el rezo de Jesus para na de suyu maga dicipulo. Ya pidi le con el de suyu Tata que “libra canila del mal.” (Juan 17:15) Ta dale se mira que amable gayot si Jesus. Sabe le que cerca ya le experiencia un dificil probanza pero malingasa pa le acerca na bien del de suyu maga apostoles.

14. Paquemodo kita puede dale mira que ta ama kita con el diaton maga hermano y hermana?

¹⁴ Para imita con Jesus, gendeh kita tan focus na diaton lang mismo maga necesidad. Sino, regular kita ta reza para na diaton maga hermano y hermana. Si ta hace kita se, ta obedece kita con el mandato de Jesus que ama con uno y otro, y ta dale kita mira con Jehova que ta ama gayot kita con el diaton maga hermano y hermana. (Juan 13:34) Gendeh sayang el diaton tiempo si reza kita para kanila. El Palabra del Dios ta habla que “tiene grande poder el rezo de un gente bueno.”​—Sant. 5:16, El Nuevo Testamento.

15. Porque el diaton maga hermano y hermana necesita con el diaton maga rezo?

 ¹⁵ Necesita el diaton maga hermano y hermana con el diaton maga rezo cay ta experiencia sila manada maga dificultad. Puede kita pidi con Jehova que ayuda kanila para aguanta na maga enfermedad, natural calamidad, guerra, persecucion o otro maga probanza. Puede tambien kita reza para na maga hermano y hermana quien ta hace esfuerzo para ayuda con aquellos quien tiene necesidad. Posible, tiene tu conoce que ta enfrenta ansina maga probanza. Puede tu menciona con el diila maga nombre na de tuyu personal rezo. Si ta pidi kita con Jehova que ayuda kanila aguanta, ta dale kita mira que deverasan kita ta ama kanila.

16. Porque kita debe reza para con aquellos quien ta guia kanaton?

¹⁶ Aquellos quien ta guia con el congregacion ta aprecia gayot si ta reza kita para kanila y ta beneficia sila na diaton maga rezo. Deverasan se con apostol Pablo. Ele ya escribi: “Reza tamen para dimio, para ay recivi yo el Palabra y ansina ay puede yo predica y manda sabe sin miedo el Misterio del Evangelio.” (Ef. 6:19) Ahora, tiene tambien kita manada maga hermano quien ta hace esfuerzo para guia kanaton. Ta dale kita mira que ta ama kita kanila si ta pidi kita con Jehova que bendici con el diila trabajo.

17-18. Cuando posible pidi kanaton que reza para con otro y cosa kita debe acorda?

¹⁷ Tiene vez, ta invita kanaton que reza para con otro. Por ejemplo, el un hermana quien ta conduci un Bible study posible pidi con el de suyu uban hermana que reza. Este hermana posible gendeh pa bien conoce con el estudiante poreso baka mas iscuji le que reza na fin del estudiada. Na ese manera, mas sabe ya le si cosa le habla si reza le para na estudiante.

¹⁸ Posible tambien que hay pidi con el un hermano que reza na un miting para na ministerio o na un miting de congregacion. El maga hermano quien tiene ese privilegio debe acorda si cosa el proposito del miting. Gendeh debe usa con el rezo para dale consejo na congregacion o hace maga anuncio. Na mayoria del maga miting na congregacion, tiene  lang cinco minuto para na cancion y rezo. Poreso, el un hermano gendeh necesita dale “largo rezo” especialmente na principio del un miting.​—Mat. 6:7.

19. Cosa puede ayuda kanaton para queda preparao na dia de juzgamiento de Jehova?

¹⁹ Necesita kita dale mas grande importancia con el rezo na diaton vida mientras ta queda mas cerca el dia de juzgamiento de Jehova. Acerca con este, si Jesus ya habla: “Esta ustedes despierto y reza firmi, para ay tene ustedes fuerza para resisti todo el maga cosa-cosa que ay sucede.” (Luc. 21:36) Si pirmi kita reza, puede se ayuda kanaton para esta dispierto na espiritual para preparao kita na dia de juzgamiento del Dios.

20. Paquemodo el diaton maga rezo puede queda como bien oloroso incenso?

²⁰ Cosa kita ya discuti? Ta dale gayot kita grande importancia con el diaton privilegio de rezo. El de con todo importante que debe kita inclui na rezo amo el maga cosas que acerca na proposito de Jehova. Debe tambien kita rindi gracias con Jehova por causa na de suyu Anak y na de suyu rulanza na Reino y reza para na diaton maga hermano y hermana. Y siempre, puede kita reza para na diaton maga fisical y espiritual necesidad. Si ta pensa kita enbuenamente si cosa kita habla na rezo, ta dale kita mira que ta aprecia kita con este bonito privilegio. El diaton maga palabra hay queda igual como bien oloroso incenso para con Jehova y “alegre Le” con ese ricibi.​—Prov. 15:8.