1. Cosa el voluntad de Jehova ahora?

 AHORA, voluntad del Dios que predica con el buen noticia del Reino na entero tierra. (Mar. 13:10; 1 Tim. 2:3, 4) De Jehova este trabajo. Bien importante este poreso ya iscuji le con el de suyu unico Anak para encabeza con este. Puede kita asigura que bajo na guia de Jesus, el trabajo predicacion hay completa igual na cosa quierre si Jehova antes llega el fin.​—Mat. 24:14.

2. Cosa kita hay discuti na este articulo?

² Na este articulo, hay mira kita si paquemodo ta usa si Jesus con el de suyu “fiel y sabio esclavo” para dale espiritual comida y para organiza con el de suyu maga siguidores na de con todo grande campaña de predicacion. (Mat. 24:45, NWT) Hay aprende tambien kita si cosa el cada uno kanaton puede hace para suporta con Jesus y con el fiel esclavo.

3. Cosa autoridad el ya dale con Jesus?

³ Si Jesus el quien ta encabeza con el trabajo predicacion. Porque kita asigurao con ese? Antes subi na cielo si Jesus, yan cuento le con el cuanto del de suyu maga fiel siguidores na un monte na Galilea. Ya habla le kanila: “Ya dale conmigo todo autoridad na cielo y na mundo.” Nota si cosa le sunod ya habla: “Anda ustedes y hace maga dicipulo con todo el maga gente.” (Mat. 28:18, 19) Poreso, ya dale tambien autoridad con Jesus para guia con el trabajo predicacion.

4. Porque kita puede asigura que ta guia siempre si Jesus con el trabajo predicacion ahora?

 ⁴ Ya habla si Jesus que hay hace con el trabajo predicacion y hacida de dicipulo na todo maga nacion y que hay man junto le con el de suyu maga siguidores “todo el dia hasta na fin del mundo.” (Mat. 28:20) Ese maga palabra claro ta indica que hay continua guia si Jesus con el trabajo predicacion hasta na tiempo diaton ahora.

5. Paquemodo kita ta ayuda cumpli con el Salmo 110:3?

⁵ Gendeh tan lingasa si Jesus si tiene ba bastante maga predicador durante na conclusion del sistema del maga cosas. Sabe le que el maga palabra del salmista hay cumpli: “El de tuyu maga siervo hay ofrece con el diila mismo cuerpo na dia que ajunta tu con el de tuyu maga soldao.” (Sal. 110:3) Si ta predica tu con el buen noticia, ta suporta tu con Jesus y con el fiel esclavo y ta ayuda cumpli con este profecia. Ta continua el trabajo pero tiene maga dificultad.

6. Cosa un dificultad el ta experiencia el maga predicador del Reino ahora?

⁶ El un dificultad que ta experiencia el maga predicador del Reino amo el oposicion. El maga apostata, lider del religion y politico ya habla imbusterias na manada gente acerca na diaton trabajo. Si ya creé el diaton maga pariente, conoce y uban na trabajo con este falso informacion, posible man pressure sila kanaton que descanza sirvi con Jehova y descanza predica. Na cuanto nacion, el diaton maga enemigo ta amenaza, ta ataca o ta arresta con el diaton maga hermano y hermana, y ta pone pa gane kanila na preso. Gendeh ya kita espanta que ta trata kanaton el maga gente na ansina manera. Si Jesus ya predicta: “Todo el maga gente ay odia con ustedes por causa del dimio Nombre.” (Mat. 24:9) Ciendo ta experiencia kita con ese, asigurao que ta aproba kanaton si Jehova. (Mat. 5:11, 12) Trabajo del Diablo este oposicion. Pero, mas poderoso si Jesus contra con ele! Na suporta de Jesus, el buen noticia ta alcanza na maga gente na todo nacion. Considera con este evidencia.

7. Cosa evidencia tu ta puede mira que ta cumpli el Revelacion 14:6, 7?

⁷ El otro dificultad que ta experiencia kita si ta predica amo que ta converza el maga gente diferente maga lengguaje. Na revelacion que ya dale con apostol Juan, si Jesus ya predicta que hay continua siempre el predicacion na diaton tiempo maskin tiene ansina dificultad. (Le con el Revelacion 14:6, 7.) Paquemodo? Ta dale kita oportunidad con el manada gente que acepta con el mensaje del Reino. Ahora, el maga gente na entero mundo puede le con el maga publicacion que base na Biblia na diaton jw.org website cay ta contene este informacion na mas de 1,000 lengguaje! El Cuerpo Gobernante ya aproba que man translate con el libro Queda Alegre Hasta Para Cuando! na mas de 700 lengguaje para usa kita na hacida de dicipulo. Ya hace tambien maga video recording para na maga apa y maga publicacion de braille para na maga bulak para puede tambien sila ricibi espiritual comida. Ta puede kita mira que ta cumpli el maga profecia na Biblia. El maga gente que “estaba na otro-otro maga lengguaje del maga nacion” ta aprende converza con el “puro lengguaje” del verdad na Biblia. (Zac. 8:23; Sof. 3:9) Todo este ta cumpli bajo na guia de Jesucristo.

8. Cosa ya el maga resulta del diaton predicacion?

⁸ Ahora, mas de 8,000,000 gente na 240 lugar el parte del organizacion de Jehova y cada año, mas de 100,000 el quien ta bautiza! Pero,  el mas importante amo que este maga nuevo dicipulo ta cultiva con el “nuevo naturaleza” o personalidad. (Col. 3:8-10) Manada el gendeh mas ta discrimina, imoral, violente y nacionalistico. El profecia na Isaias 2:4 ta cumpli; sila ‘gendeh mas ta aprende man guerra.’ Mientras ta hace kita esfuerzo para cultiva con el nuevo personalidad, ta ayuda kita con el maga gente para queda interesao que queda parte del organizacion de Jehova y ta dale kita prueba que ta sigui kita con el quien ta encabeza kanaton, si Cristo Jesus. (Juan 13:35; 1 Ped. 2:12) Porque este ta sucede? Cay ta dale si Jesus el ayuda que necesita kita.

9. Asegun na Mateo 24:45-47, cosa ya predicta si Jesus acerca na tiempo del fin?

⁹ Le con el Mateo 24:45-47, NWT. Ya predicta si Jesus que durante na tiempo del fin, hay iscuji le “fiel y sabio esclavo” para dale espiritual comida. Poreso, puede kita expecta que ese esclavo hay trabaja gayot enbuenamente na diaton tiempo ahora. Y amo gayot se el cosa ta sucede. Ya usa si Jesus con el un diutay grupo de maga iscujido hombre para “dale . . . come [na espiritual] na justo tiempo” con el maga siervo del Dios y maga interesao persona. Este maga hombre gendeh ta mira con el diila mismo cuerpo como mas alto con otro. (2 Cor. 1:24) Sino, ta conoce sila que si Jesucristo el “lider y comandante” del maga siervo del Dios.​—Isa. 55:4.

10. Cosa publicacion que ya dale mira na letrato el ya convinci contigo para principia sirvi con Jehova?

¹⁰ Desde 1919, el fiel esclavo ya prepara manada publicacion que ya puede ayuda con el maga interesao persona que aprende con el verdad estaba na Palabra del Dios. Del 1921, el esclavo ya prepara con el libro The Harp of God para ayuda con el maga interesao persona que aprende con el maga importante enseñanza  na Biblia. Mientras ta pasa el tiempo, ya produci maga omento publicacion. Cosa publicacion el ya ayuda contigo para conoce y ama con el diaton Tata na cielo? El libro ba “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Cosa Kanaton Puede Enseña el Biblia? o Queda Alegre Hasta Para Cuando!, el diaton nuevo publicacion? Este maga publicacion amo gayot el cosa kita necesita na tiempo que ya produci con este.

11. Porque importante que todo kita puede ricibi espiritual comida?

¹¹ Gendeh lang el maga interesao persona el necesita espiritual comida. Todo kita necesita con ese. Si apostol Pablo ya escribi: “El comida duro para del maga gente grande,” o mature na espiritual. Si Pablo ya omenta que si aplica kita con el cosa kita ta aprende estaba na Biblia, hay ayuda este kanaton para “distingui el bueno y el malo.” (Heb. 5:14) Na este tiempo donde bien bajo el moralidad del maga gente, posible dificil obedece con el maga principio de Jehova. Pero, si Jesus ta asigura que ta ricibi kita el espiritual comida que necesita kita para puede mentena con el diaton fuerte fe. Estaba este comida na inspirao Palabra del Dios, el Biblia. El fiel esclavo ta prepara y ta distribui con este comida bajo na guia de Jesus.

12. Igual con Jesus, paquemodo kita ya dale honor con el nombre del Dios?

¹² Igual con Jesus, ya dale kita el honor que conviene para na nombre del Dios. (Juan 17:6, 26) Por ejemplo, del 1931 ya usa kita con el nombre maga Testigo de Jehova. Por medio con ese, ya dale kita mira si paquemodo de importante para kanaton el nombre del Dios y que quierre kita que conoce kanaton na ese nombre. (Isa. 43:10-12) Y desde Octubre  de ese año, puede mira con el nombre del Dios na cover del cada issue de este magasin. Omento pa, el New World Translation of the Holy Scriptures ya restora na justo lugar con el nombre del Dios na de suyu Palabra. Diferente gayot este na maga religion quien ta clama que Cristiano sila pero ya quita con el nombre de Jehova na manada del diila translation del Biblia!

13. Cosa ta convinci contigo que ta usa si Jesus con “el fiel y sabio esclavo” ahora? (Juan 6:68)

¹³ Por medio na “fiel y sabio esclavo,” si Jesus ya establicia un organizacion na tierra que ta practica con el puro adoranza. Cosa tu ta sinti acerca na ese organizacion? Posible, ya pensa tu con el maga palabra de apostol Pedro, quien ya habla con Jesus: “Con quien man came ay anda? Uste tiene el maga palabra de Vida Eterno.” (Juan 6:68) Onde gaha kita ahora si nuay kita puede conoce con el organizacion de Jehova? Por medio na organizacion, el Cristo ta asigura que tiene kita el todo que necesita kita para esta fiel con Dios. Tan train tambien le kanaton para puede kita cumpli con el diaton ministerio na efectivo manera. Mas pa, ta ayuda le kanaton cultiva con el “Nuevo Naturaleza” o personalidad para puede kita hace alegre con Jehova.​—Ef. 4:24.

14. Paquemodo tu ya puede beneficia cay parte tu del organizacion de Jehova durante el COVID-19 pandemic?

¹⁴ Si Jesus ta dale buen direccion na tiempo de dificultad. El maga beneficio de ese direccion claro puede mira cuando ya principia el COVID-19 pandemic. Manada na mundo el no sabe si cosa hace pero ya asigura si Jesus que ricibi kita claro instruccion para puede kita esta safe. Ya anima kanaton que usa face  mask si ta sale y sigui con el physical distancing. Ya hace acorda con el maga anciano que regular man quetal con el todo na congregacion para puede sabe el diila fisical y espiritual necesidad. (Isa. 32:1, 2) Ta dale tambien kanaton animo y omento direccion por medio na maga update del Cuerpo Gobernante.

15. Cosa direccion el ya dale acerca si paquemodo hace con el maga miting y trabajo predicacion durante el pandemic y cosa el maga resulta?

¹⁵ Durante el pandemic, ya puede tambien kita ricibi claro direccion acerca si paquemodo hace con el maga miting y trabajo predicacion. Ya puede dayun kita atende maga miting y asemblea por medio de Internet. Ya puede tambien kita principia predica por medio de carta y telefono. Ya bendici si Jehova con el diaton maga esfuerzo. Manada maga branch el yan report que ya subi el numero del maga publisher na diila lugar. Gane, manada el ya tiene bonito maga experiencia durante este tiempo.​—Mira con el cajon “ Ta Bendici si Jehova con el Diaton Predicacion.”

16. Cosa kita puede asigura?

¹⁶ El cuanto posible ta sinti que el organizacion sobra de istricto si acerca na pandemic. Pero, pirmi kita ta puede mira que justo gayot el direccion que ta ricibi kita. (Mat. 11:19) Y si medita kita con el amable manera si paquemodo ta guia si Jesus con el maga siervo del Dios, puede kita asigura que maskin cosa man sucede na futuro, si Jehova y el de suyu amable Anak hay man junto kanaton.​—Le con el Maga Hebreo 13:5, 6.

17. Cosa tu ta sinti cay si Jesus el quien ta encabeza kanaton?

¹⁷ Bien alegre kita cay si Jesus el quien ta encabeza kanaton! Parte kita del un organizacion que gendeh dividido maskin pa diferente el diaton maga cultura, nacionalidad y lengguaje. Ta ricibi kita maga instruccion estaba na Palabra del Dios y maga training para puede cumpli con el trabajo predicacion. El cada uno kanaton ta aprende si paquemodo cultiva con el nuevo personalidad y si paquemodo ama con uno y otro. Manada kita razon para man hambug cay el quien ta encabeza kanaton amo si Jesus!