1. Cosa dayun ya hace si Jehova despues culpa kanda Adan y Eva? (Genesis 3:15)

 DESPUES culpa kanda Adan y Eva, ya dale dayun esperanza si Jehova con el diila maga descendiente por medio na un importante profecia. El cosa le ya habla puede incuntra na Genesis 3:15.—Le.

2. Porque importante este profecia?

² Puede mira con este profecia na primer libro del Biblia. Pero, tiene coneccion con ese el otro maga libro del Biblia. Igual si paquemodo el maga pagina ta queda un libro cay tiene cosa ta hace pilit con este, el laman del cada libro del Biblia ta queda un unido mensaje por causa na Genesis 3:15. Este mensaje amo que el Dios hay imbia un Salvador para destroza con el Diablo y con el todo de suyu maga siguidores. * Un bendicion gayot este para con aquellos quien ta ama con Jehova!

3. Cosa kita discuti na este articulo?

³ Na este articulo, hay contesta kita con el siguiente pregunta acerca na profecia na Genesis 3:15: Quien el maga caracter que ya menciona aqui? Paquemodo ya cumpli este profecia? Y paquemodo kita ta beneficia con ese?

4. Quien el “culebra” y porque se kita puede habla?

⁴ El Genesis 3:14, 15 ya menciona con el “culebra,” el “descendiente” del culebra, el “mujer” y el “descendiente” del mujer. El Biblia puede ayuda kanaton para identifica con el cada uno kanila. * Principia kita con el “culebra.” El un literal culebra gendeh puede entende con el cosa ya habla si Jehova na jardin de Eden. Poreso, ta dale este mira que el juzgamiento de Jehova amo para na un inteligente creatura. Quien se? El Revelacion 12:9 claro ta explica si quien el culebra. Ta habla este que “el daan Culebra” amo si Satanas Diablo. Pero, quien el descendiente del culebra?

5. Quien el descendiente del culebra?

⁵ Tiene vez, ta usa el Biblia con el palabra “descendiente” para refiri con aquellos quien ta imita gayot con el un persona que puede ya llama kanila como de suyu maga anak. Poreso, el descendiente del culebra amo el maga gendeh fiel angel y gente. Igual con Satanas, ta resisti sila con Dios Jehova y tan contra con el De Suyu maga siervo. Incluido aqui el maga angel quien ya deja con el diila posicion na cielo na tiempo de Noe y el maga gente quien ta actua igual con el diila tata, el Diablo.​—Gen. 6:1, 2; Juan 8:44; 1 Juan 5:19; Jud. 6.

6. Porque imposible que si Eva el “mujer”?

⁶ Despues, identifica kita con el “mujer.” Imposible que si Eva este. Porque? Considera kita un razon. Asegun na profecia, el descendiente del mujer “hay machaca” con el cabeza del culebra. Como cosa kita ya discuti, el culebra amo el mal angel que si Satanas y nuay maskin quien imperfecto  descendiente de Eva el puede machaca con ele. Poreso, paquemodo destroza con el culebra?

7. Como cosa ya indica na Revelacion 12:1, 2, 5, 10, quien el mujer que ya menciona na Genesis 3:15?

⁷ Ya revela na ultimo libro del Biblia si quien el mujer que ya menciona na Genesis 3:15. (Le con el Revelacion 12:1, 2, 5, 10.) Gendeh este un mujer na tierra! El luna talli abajo na de suyu pies y tiene un corona de 12 estrellas na de suyu cabeza. Ya pari le y el de suyu anak amo el Reino del Dios. Na cielo el Reino poreso ta dale este mira que na cielo tambien el mujer. Ta representa le con el organizacion de Jehova na cielo​—el maga fiel angel.​—Gal. 4:26.

8. Quien el primer descendiente del mujer y cuando le ya queda descendiente? (Genesis 22:15-18)

⁸ El Palabra del Dios ta ayuda tambien kanaton para identifica con el primer descendiente del mujer. Un descendiente este de Abraham. (Le con el Genesis 22:15-18.) Como cosa ya predicta na profecia, descendiente si Jesus de ese fiel patriarca. (Luc. 3:23, 34) Pero, el descendiente del mujer debe mas poderoso pa na un gente ciendo hay machaca le con Satanas Diablo. Bueno, cuando maga 30 año si Jesus, ya iscuji con ele por medio del sagrao espiritu. Durante ese tiempo, si Jesus ya queda el primer parte del descendiente del mujer. (Gal. 3:16) Despues del muerte y resureccion de Jesus, el Dios “con gloria y honor ya corona . . . con ele” y ya dale con ele “todo autoridad na cielo y na mundo,” incluido el autoridad “para destroza el maga trabajo del demonio.”​—Heb. 2:7; Mat. 28:18; 1 Juan 3:8.

9-10. (a) Quien pa el parte del descendiente del mujer y cuando sila ya queda descendiente? (b) Cosa kita sunod discuti?

⁹ Pero, tiene pa segundo parte del descendiente. Ya identifica con este si apostol Pablo cuando ya habla le con el maga Judio y Gentil quien ya queda iscujido Cristiano: “Si ustedes de Cristo, entonces descendencia ustedes de Abraham y maga heredero ustedes asegun con el promesa.” (Gal. 3:28, 29) Si ta iscuji si Jehova con el un Cristiano por medio del sagrao espiritu, ese persona ta queda parte del descendiente del mujer. Entonces, el descendiente amo si Jesucristo y el 144,000 quien rula junto con ele. (Rev. 14:1) Todo sila ta imita con el diila Tata, si Dios Jehova.

¹⁰ Ahora, cay ya identifica ya kita con el maga caracter que ya menciona na Genesis 3:15, discuti kita unrato si paquemodo si Jehova hinay-hinay ta cumpli con este profecia y si paquemodo kita ta beneficia.

11. Na cosa manera ya cumpli el profecia que hace iri con el descendiente del mujer “na talon”?

¹¹ Asegun na profecia na Genesis 3:15, el culebra hay hace iri con el descendiente del mujer “na talon.” Ya cumpli se cuando ya usa si Satanas con el maga Judio y Romano para mata con el Anak del Dios. (Luc. 23:13, 20-24) Igual si paquemodo el un persona temporario gendeh puede camina si tiene le irida na talon, temporario tambien nuay cosa ya puede hace si Jesus cuando muerto ele na sepultura.​—Mat. 16:21.

12. Paquemodo y cuando machaca con el cabeza del culebra?

¹² El profecia na Genesis 3:15 ta dale mira que gendeh esta si Jesus na sepultura. Porque? Cay asegun na profecia, el descendiente hay machaca con el cabeza del culebra. Este quierre decir que hay queda bueno el irida del descendiente na talon. Y amo gayot se el cosa  ya sucede! Na ika-tres dia despues del muerte de Jesus, ya resucita con ele y ya tiene le un imortal vida na cielo. Llega el tiempo, hay destroza si Jesus con Satanas. (Heb. 2:14) Aquellos quien hay rula junto con el Cristo hay ayuda quita na tierra con el todo maga enemigo del Dios​—el descendiente del culebra.​—Rev. 17:14; 20:4, 10. *

13. Paquemodo kita ta beneficia na cumplimiento de este profecia?

¹³ Si un dedicao siervo tu del Dios, ta beneficia tu na cumplimiento de este profecia. Ya vene si Jesus na tierra como un gente. Ya puede gayot le imita con el personalidad del de suyu Tata. (Juan 14:9) Poreso por medio con ele, puede kita conoce y ama con Dios Jehova. Ta beneficia tambien kita na maga enseñanza y direccion de Jesus mientras ta guia le con el Cristiano congregacion ahora. Ya enseña le kanaton si paquemodo vivi na manera que ayuda kanaton para hace alegre con Jehova. Y cay ya hace iri con Jesus na talon o ya muri le, todo kita ta beneficia. Na cosa manera? Cuando ya resucita si Jesus, ya acepta si Jehova con el perfecto sacrificio del de suyu Anak que “ta limpia todo el diaton maga pecado.”​—1 Juan 1:7.

14. Porque kita puede habla que nuay dayun cumpli el profecia na jardin de Eden?

¹⁴ El cosa ya habla si Jehova na profecia na Eden ta dale mira que hay pasa pa el cuanto tiempo antes este completamente cumpli. Necesita tiempo para puede produci el mujer con el descendiente, para puede ajunta el Diablo con el de suyu maga siguidores y para tene pelea (o rabia) entre con ese dos grupo. Si ta entende kita con este profecia, ta beneficia kita cay ta dale este aviso kanaton que si Satanas ta controla con el mundo y hay odia este mundo con el maga siervo de Jehova. Si Jesus ya dale tambien semejante aviso con el de suyu maga dicipulo. (Mar. 13:13; Juan 17:14) Ya puede gayot kita mira que ya cumpli ese parte del profecia especialmente del ya pasa 100 año. Paquemodo?

15. Porque ya queda mas grabe el rabia del mundo pero porque kita gendeh debe tene miedo con Satanas?

¹⁵ Nuay dura despues queda Rey si Jesus del 1914, ya arria le con Satanas na cielo. El Diablo taqui ahora na tierra y ta espera el de suyu destrozo. (Rev. 12:9, 12) Pero, gendeh lang le basta ta espera. Bien rabiao si Satanas y ta ataca le con el maga siervo del Dios. (Rev. 12:13, 17) Amo se el razon si porque ya queda mas grabe el rabia del maga gente na mundo con el maga siervo del Dios. Pero, gendeh kita debe tene miedo con Satanas y con el de suyu maga siguidores. Sino, puede kita tene el conviccion que tiene si apostol Pablo, quien ya escribi: “Si el Dios afavor canaton, quien pa ay puede man contra canaton?” (Roma 8:31) Puede gayot kita confia con Jehova cay como cosa kita ta puede mira, ya cumpli le el primer parte del profecia na Genesis 3:15.

16-18. Paquemodo ya beneficia si Curtis, Ursula y Jessica cay ya entende sila con el Genesis 3:15?

¹⁶ El promesa de Jehova na Genesis 3:15 puede ayuda kanaton para enfrenta con el maskin cosa probanza na diaton vida. El un hermano que si Curtis, quien ta sirvi como un misionario na Guam, ya habla: “Ya experiencia yo maga probanza que ya pruba con el de mio devocion con Jehova. Pero cay ya medita yo con el profecia na Genesis 3:15, ya puede este ayuda para mentena el de mio  confianza na de mio Tata na cielo.” Ta espera si Curtis con el dia cuando hay termina si Jehova con el todo del diaton maga probanza.

¹⁷ El un hermana na Bavaria que si Ursula ya habla que ya puede ayuda con ele queda convincido que el Biblia inspirao del Dios cay ya entende le con el Genesis 3:15. Ya puede le mira si paquemodo el otro maga profecia conectao na este profecia y yan bilib gayot le. Ya habla tambien le: “Mas ya queda hondo el de mio amor con Jehova cuando ya sabe yo que ya actua dayun le para tene esperanza el maga gente.”

¹⁸ Si Jessica de Micronesia ya habla: “Ta puede pa yo acorda si cosa yo ya sinti cuando ya realiza yo que ya incuntra yo el verdad! Ta cumpli el profecia na Genesis 3:15. Ya hace este acorda conmigo que el cosa kita ta experiencia ahora gendeh el deverasan vida. Este profecia ya hace tambien fuerte con el de mio confianza que si sirvi yo con Jehova, hay tene yo el de con todo buen vida que posible ahora y mas buen vida na futuro.”

19. Porque kita puede asigura que hay cumpli el ultimo parte del profecia?

¹⁹ Como cosa kita ya puede mira, ta cumpli ya ahora el Genesis 3:15. Claro ya puede identifica con el descendiente del mujer y el descendiente del culebra. Ya queda bueno el irida na talon del primer parte del descendiente del mujer que si Jesus y un poderoso y imortal Rey ya le ahora. Cerca ya acaba iscuji si Jehova si quien queda incluido na segundo parte del descendiente. Cay ya cumpli ya el primer parte del profecia, puede kita asigura que hay cumpli tambien el ultimo parte de este​—que hay machaca con el cabeza del culebra. Hay queda gayot alegre el maga siervo del Dios si destroza ya con Satanas! Mientras nuay pa se llega, no perde esperanza. Puede gayot confia con el diaton Dios. Por medio na descendiente del mujer, hay bendici gayot si Jehova con el “todo maga nacion na tierra.”​—Gen. 22:18.