Ya nace yo del 1935 na Darlaston que un parte del Black Country​—un region na England que ya nombra asegun na negro humu que ta sale na manada factoria alla. Cuando maga cuatro año yo, el de mio maga mayores ya principia estudia con el Biblia junto con el maga Testigo de Jehova. Cuando maga 14 año yo, ya queda yo convincido na verdad y ya bautiza del 1952 na edad de 16.

Aquel maga tiempo, ya queda yo un trainee na un grande factoria que ta produci maga tool y maga pieza del maga vehiculo. Ya principia conmigo man train para queda secretario del compania y tan enjoy gayot yo con ese trabajo.

Necesita yo hace un importante decision cuando el un traveling overseer ya invita conmigo para principia conduci con el midweek Congregation Book Study na diamon congregacion na Willenhall. Pero, tiene problema. Aquel tiempo, ta asocia yo na dos congregacion. Durante el midweek, ta atende yo na congregacion cerca na de mio trabajo na Bromsgrove, maga 32 kilometro de lejos na diamon casa. Y na weekend, si ta bolbe yo na casa del de mio maga mayores, ta atende yo na congregacion de Willenhall.

Cay quierre yo suporta con el organizacion de Jehova, ya acepta yo con el invitacion del traveling overseer maskin pa este quierre decir que necesita yo deja con el de mio trabajo que quierre gayot yo. Nuay gayot yo arripinti con el decision que permiti con Jehova que guia con el de mio vida cay por causa con este, ya tiene yo un bien alegre vida.

Cuando ta atende yo na congregacion de Bromsgrove, ya puede yo conoce un bonita hermana que si Anne, quien focus na servicio con Jehova. Ya casa kame del 1957 y ya tiene kame manada bonito maga assignment na servicio con Jehova igual na regular pioneering, special pioneering, traveling work y servicio na Bethel. Uno si Anne na maga cosas que ta dale alegria na de mio vida.

Del 1966, alegre kame cay ya puede kame atende na ika-42 clase de Gilead. Yan assign kanamon na Malawi que conocido como el corazon del Africa cay bueno el maga gente na ese lugar.  Nuay kame expecta que gendeh kame puede dura esta alla.

Ya llega kame na Malawi del Febrero 1, 1967. Na diamon primer mes alla, ya usa kame con el mayoria del diamon tiempo para aprende con el lengguaje y despues quel, ya principia kame con el diamon district work. Ya usa kame un jeep que ta pensa el cuanto que puede viaja maskin donde, maskin na maga rio. Pero, gendeh se deverasan. Ta puede lang kame travesa si bien bajo el agua. Tiene vez, ta esta kame na un casa que necesita un trapal abajo’y techo para el agua gendeh entra adentro durante el tiempo de ulan. Gendeh gayot este bonito manera para principia con el diamon assignment como misionario pero yan enjoy kame con aquel!

Pagka-Abril, ya realiza yo que hay tene kame maga problema por causa na gobierno. Ya puede yo oi na radio el cosa ya habla el presidente de Malawi que si Dr. Hastings Banda. Ele ya clama que el maga Testigo de Jehova gendeh ta paga maga impuesto y ta entramete na politica. Siempre, maga falso acusacion este. Sabe kame que el deverasan razon amo el diamon neutralidad, especialmente cay gendeh kame ta cumpra con el maga membership card del maga partido na politica.

Pagka-Septiembre, ya le kame na diario que el presidente ya acusa con el maga hermano que ta causa gulu maskin donde. Ya anuncia le na un convencion de politica que gendeh dura, el de suyu gobierno hay prohibi con el maga Testigo de Jehova. Y ya hace este el gobierno del Octubre 20, 1967. Nuay dura, el maga polis y immigration official ya anda na branch office para cerra con este y para manda sale con el maga misionario na nacion.

 Despues del tres dia na preso, ya imbia kanamon na un nacion que bajo na control del Britain​—na Mauritius. Pero, el maga autoridad na Mauritius nuay kanamon permiti que esta como maga misionario. Poreso, yan assign kanamon na Rhodesia (que Zimbabwe ahora). Cuando ya llega kame alla, yan cuento kanamon el un agresivo oficial quien no quierre manda entra kanamon na nacion. Ele ya habla: “Ya prohibi kaninyo que esta na Malawi. Nuay tambien sila permiti kaninyo que esta na Mauritius y ahora taqui kamo cay puede lang kamo entra na diamon nacion.” Ya principia llura si Anne. Dol nuay quien quierre ricibi kanamon! Aquel tiempo, quierre yo bolbe ya lang na England. Na uliji, el maga autoridad ya permiti kanamon que esta un noche na branch office pero ya habla sila que necesita kame anda na diila headquarters alamañana. Bien cansao kame aquel tiempo pero ya continua kame espera y mira si paquemodo si Jehova hay ayuda kanamon. Pagka-alamañana tarde, ya ricibi kame permiso que esta como maga visita na Zimbabwe. Nuay gayot kame quel expecta. Nunca gayot yo ulvida si cosa yo ya sinti aquel dia​—convincido gayot yo que ta guia kanamon si Jehova.

Na branch office na Zimbabwe, yan assign conmigo na Service Department que ta mira con el trabajo na Malawi y Mozambique. Grabe ta persigui con el maga hermano na Malawi. Como parte del de mio trabajo, tan translate yo maga report que ya imbia el maga circuit overseer de Malawi. Un noche mientras ta trabaja yo, ya llura yo cuando ya le yo acerca na abuso que ta experiencia el maga hermano y hermana. * Pero, ya puede gayot anima conmigo si paquemodo sila ya aguanta, ya esta leal y ya mentena con el diila fe.​—2 Cor. 6:4, 5.

Ya hace kame el todo para dale espiritual comida con el maga hermano y hermana quien ta esta pa siempre na Malawi y con aquellos tambien quien ya escapa para na Mozambique por causa na violencia. El translation team del Chichewa, el lengguaje que ta usa el mayoria del maga gente na Malawi, ya cambia na un grande propiedad del un hermano na Zimbabwe. Ya construi le maga casa y un oficina para kanila. Ya continua sila hace alla con el diila importante trabajo que man translate con el maga publicacion que base na Biblia.

Ya hace kame manera para el maga circuit overseer de Malawi puede atende na Chichewa district convention cada año na Zimbabwe. Si talla sila, ta puede sila obtene con el maga outline del talk del convencion. Despues, si ta bira sila na Malawi, ta pricura sila man share con este con el maga hermano. Un año durante el diila visita na Zimbabwe, ya organiza kame un Kingdom Ministry School para anima con este maga animoso circuit overseer.

Del Febrero 1975, ya viaja yo para visita con el maga Testigo quien ya escapa na Malawi y ta queda na maga campo na Mozambique. Este maga hermano ta sigui con el reciente maga direccion estaba na organizacion de Jehova, incluido el nuevo arreglamiento que tene un grupo de maga anciano. El nuevo maga anciano ya conduci manada espiritual actividad, igual na maga public talk, discusion del texto del dia, El Torre de Guardia y maga asemblea pa gane. Ya organiza sila con el maga campo igual como un convencion, donde tiene maga departamento para na limpieza, distribucion de comida y seguridad. Manada cosa ya puede cumpli este maga fiel hermano por causa na bendicion de Jehova y ya anima gayot este conmigo.

Na fin del decada del 1970, el Zambia branch office ya el quien ta mira con el trabajo na Malawi. Pero, ta pensa siempre yo acerca con el maga hermano y hermana na Malawi y ta reza yo para kanila como cosa ta hace el manada. Na manada ocasion, como miembro del Branch Committee de Zimbabwe, ta puede yo man cuento con el maga representante estaba na world headquarters junto na maga responsable hermano estaba na Malawi, South Africa y Zambia. Pirmi kame ta discuti con el pregunta, “Cosa pa kita puede hace para na maga hermano y hermana na Malawi?”

 Despues del cuanto tiempo, ya menora el persecucion. El maga hermano y hermana quien ya sale na nacion hinay-hinay ya ta bira otravez na Malawi mientras aquellos quien ya esta alla, gendeh ya tanto ta experiencia persecucion. El maga nacion que cerca na Malawi ta permiti ya con el maga Testigo de Jehova que predica y man miting, y ya quita ya con el maga restriccion. Ansina tambien el cosa ya hace el nacion de Mozambique del 1991. Pero ya pensa kame, ‘Cuando pa gaha se sucede na maga Testigo de Jehova na Malawi?’

Na uliji, ya cambia ya el situacion na Malawi y del 1993, el gobierno nuay mas prohibi con el maga Testigo de Jehova. Nuay dura despues quel, mientras tan cuento yo con el un misionario, ya pregunta le conmigo, “Hay bira pa ba tu otravez na Malawi?” Aquel tiempo, 59 año ya yo poreso ya habla yo con ele, “Gendeh ya, bien viejo ya yo!” Pero aquel mismo dia, ya puede kame ricibi un mensaje estaba na Cuerpo Gobernante donde ta invita kanamon que bira alla.

Ta ama kame con el diamon assignment na Zimbabwe poreso un dificil decision este para kanamon. Alegre ya kame na Zimbabwe y ya tiene manada maga buen amigo y amiga. El Cuerpo Gobernante ya habla kanamon que puede kame esta na Zimbabwe si quierre kame poreso puede lang era kame iscuji que esta alla. Pero ya acorda yo acerca si paquemodo si Abraham y Sara ya deja con el diila comfortable casa maskin de edad ya sila para obedece con el direccion de Jehova.​—Gen. 12:1-5.

Ya decidi kame que sigui con el direccion estaba na organizacion de Jehova y ya bira kame na Malawi del Febrero 1, 1995, exacto 28 año despues kame llega por primer vez alla. Ya forma un Branch Committee​—iyo y el dos otro hermano—​y ya principia kame organiza con el maga actividad del maga Testigo de Jehova.

Bien bonito mira si paquemodo ta bendici si Jehova con el trabajo! El numero del maga publisher ya subi estaba na maga 30,000 del 1993 y ya queda mas de 42,000 del 1998. * Ya aproba el Cuerpo Gobernante que tene un nuevo branch office por causa na grande trabajo que necesita hace alla. Ya cumpra kame un 12-hectarea tierra na Lilongwe y yan assign conmigo na construction committee.

Si Hermano Guy Pierce de Cuerpo Gobernante el ya dale con el dedication talk para na maga  nuevo facilidad del Mayo 2001. Mas de dos mil maga Testigo na Malawi el quien ya atende y mayoria kanila mas de 40 año ya bautizao. Este maga fiel hermano y hermana ya aguanta con el persecucion por manada año cuando ya prohibi kanila. Pobre sila na material pero bien rico sila na espiritual. Y ahora alegre sila man tour na diila nuevo Bethel. Maskin onde sila anda adentro na Bethel, ta canta sila maga Kingdom song asegun na estilo que ta canta el maga de Africa. Amo este el de con todo bonito experiencia que ya tiene yo. Un prueba este que ta bendici gayot si Jehova con aquellos quien fiel ta aguanta na maga probanza.

Despues acaba el construida na branch, ya ricibi yo maga assignment para man dedicate maga Kingdom Hall. El maga congregacion na Malawi ya beneficia na arreglamiento del organizacion que construi maga Kingdom Hall na maga lugar donde el maga hermano y hermana nuay tanto na financial. De antes, el cuanto maga congregacion tan miting na maga casa que ya hace usando el maga pono de eucalyptus. Ta usa sila petate que hacido de zacate para queda techo y maga pa-largo banco para onde sinta. Pero ahora, el maga hermano ta hace maga ladrillo na maga diutay horno que sila mismo ya construi. Ya usa se sila para hace maga nuevo lugar onde man miting. Pero, mas quierre siempre sila usa maga pa-largo banco na Kingdom Hall cay mas manada persona ta cabe!

Alegre tambien yo mira si paquemodo ta ayuda si Jehova con el maga hermano progresa na espiritual. Yan bilib gayot yo con el maga joven hermano de Africa cay yan voluntario sila y ya aprende dayun con el manada cosas estaba na training que ya dale el organizacion de Jehova y na actual hacida de trabajo. Como resulta, ya tiene sila mas grande responsibilidad na Bethel y na maga congregacion. Mas ya queda fuerte el maga congregacion por causa na maga nuevo circuit overseer de Malawi donde manada kanila el casao. Este maga maridable ya iscuji que gendeh tene maga anak para puede mas sirvi con Jehova, maskin mayoria del maga gente y el diila familia pa gane tan pressure kanila que tene maga anak.

Despues del 52 año na Africa, ya tiene yo cuanto problema na salud. El Cuerpo Gobernante ya aproba con el recomendacion del Branch Committee que man reassign kanamon na Britain. Triste kame deja con el diamon assignment que ta ama kame pero el familia Bethel na Britain ta cuida gayot kanamon.

Convincido yo que ya puede yo hace justo decision cuando ya permiti yo que si Jehova el guia con el de mio vida. Si ya confia yo con el de mio mismo saber, bien diferente siguro el de mio vida. Sabe ya daan si Jehova si cosa yo necesita para ‘hace derecho con el de mio camino.’ (Prov. 3:5, 6) Cuando joven yo, quierre gayot yo aprende con el maga detalle de trabajo na un grande compania. Pero, el trabajo que ya dale el organizacion de Jehova ya dale conmigo mas grande satisfaccion. Para conmigo, tiene yo bien alegre vida cay ta sirvi yo con Jehova!