Ya enseña si Jesus que el maga gente debe mentena paz con uno y otro. Pero na un ocasion, ya habla le con el de suyu maga apostoles: “No ustedes pensa cay ya vene yo para lleva paz na mundo. Noay yo vene para lleva paz, sino espada. Ya vene yo para manda con el anak hombre man contra con su tata, y con el anak mujer man contra con su nana, y con el yerna man contra con su suegra.” (Mat. 10:34, 35) Cosa quierre decir de Jesus?

No quierre si Jesus que el maga familia hay man separtajan. Pero, sabe le que el de suyu maga enseñanza posible causa division na cuanto familia. Poreso, aquellos quien quierre queda maga dicipulo del Cristo y bautiza necesita sabe si cosa el maga posible resulta del diila decision. Si ya enfrenta sila oposicion estaba na diila marido o mujer que gendeh Testigo o con otro na familia, posible man dificil sila continua sigui con el maga enseñanza del Cristo.

El Biblia ta anima con el maga Cristiano que “hace todo el que puede para vivi con paz con uno y otro.” (Roma 12:18) Pero el maga enseñanza de Jesus puede queda igual na un “espada” na cuanto familia. Ta sucede este si el un miembro del familia ta acepta con el maga enseñanza de Jesus mientras el otro gendeh ta acepta o tan contra pa gane con ese. Na ansina situacion, el maga miembro del familia ta queda “maga contrario” del persona quien ta aprende con el verdad.​—Mat. 10:36.

El maga dicipulo del Cristo que el maga familia otro el religion posible enfrenta maga situacion que puede pone na probanza con el diila amor para con Jehova y con Jesus. Por ejemplo, el diila maga pariente posible convida kanila que man junto na un religioso celebracion. Si sucede se, con quien sila iscuji? Si Jesus ya habla que “si quien ta ama con su tata o su nana mas pa que [con ele], gendeh ta merece” o gendeh conviene sigui con ele. (Mat. 10:37) Siempre, gendeh ta habla si Jesus que para queda de suyu maga dicipulo, aquellos quien ta aprende con el verdad debe menos el amor para con el diila maga mayores. Sino, ta enseña le kanila si cosa debe el de con todo importante na diila vida. Si el maga miembro del diaton familia tan contra con el diaton adoranza con Jehova, ta continua siempre kita ama kanila. Pero sabe kita que mas importante el diaton amor para con Dios.

Asigurao, duele gayot si tan contra kanaton el diaton familia. Pero, el maga dicipulo de Jesus debe acorda con el de suyu maga palabra: “Si quien gendeh ta carga su cruz [“estaca,” NWT] y ta sigui conmigo, gendeh ta merece conmigo.” (Mat. 10:38) Quierre decir, ta mira el maga Cristiano con el oposicion na familia como parte del sufrimiento que conforme sila acepta. Pero maskin pa ansina, ta esperanza sila que por causa na diila buen conducta, hay cambia el pensamiento del maga miembro del diila familia y hay queda interesao na mensaje del Biblia.​—1 Ped. 3:1, 2.