1. Cosa maga verdad tu ya aprende cuando ya estudia tu con el Biblia?

 TA ACORDA pa ba tu si cuando tu ya principia estudia con el Biblia? Siguro ya espanta tu cuando ya sabe tu que tiene nombre el Dios. Posible ya sinti gayot tu comforta cuando ya aprende tu que gendeh ta castiga el Dios con el maga gente na infierno. Y asigurao alegre gayot tu cuando ya sabe tu que puede tu mira otravez y man junto na paraiso tierra con el de tuyu maga familia y amigo quien ya muri.

2. Puera que ya aprende tu maga verdad na Biblia, cosa progreso pa tu ya puede hace? (Efeso 5:1, 2)

² Cuando ya estudia tu mas con el Palabra del Dios, mas ya queda grande el de tuyu amor para con Jehova. Ese amor ya motiva contigo para aplica con el cosa tu ya aprende. Ya puede tu hace maga buen decision base na maga principio na Biblia. Ya hace tu maga cambio na de tuyu custumbre y conducta cay quierre tu hace alegre con Dios. Igual con el un bata que ta imita con el de suyu amable mayores, ta imita tu con el de tuyu Tata na cielo.—Le con el Efeso 5:1, 2.

3. Cosa kita puede pregunta na diaton mismo cuerpo?

³ Puede kita pregunta con el diaton mismo cuerpo: ‘Mas fuerte ya ba el de mio amor para con Jehova ahora contra cuando ya queda yo Cristiano? Desde ya bautiza yo, mas ta puede ya ba yo imita con Jehova y dale mira amor con el de mio maga hermano y hermana?’ Si ya queda frio el “amor de antes” que tiene tu, no man luya. Ya sucede tambien se na maga Cristiano del primer siglo. Maskin pa ansina, nuay kanila abandona si Jesus y gendeh tambien le ta abandona kanaton ahora. (Rev. 2:4, 7) Sabe le que puede kita hace bira otravez con el amor que tiene kita de antes cuando ta aprende kita el verdad.

4. Cosa kita considera na este articulo?

⁴ Este articulo hay discuti si paquemodo kita puede continua  hace grande con el diaton amor para con Jehova y con otro. Despues, hay considera kita con el cuanto bendicion que hay ricibi kita y el otro si hace kita grande con el diaton amor.

5-6. Cosa maga dificultad ya experiencia si apostol Pablo na de suyu ministerio pero cosa ya motiva con ele para continua sirvi con Jehova?

⁵ Alegre si apostol Pablo na servicio con Jehova pero ya enfrenta le manada dificultad. Pirmi le ta viaja na maga lejos lugar y gendeh quel facil aquel tiempo. Tiene vez, ta enfrenta le maga “delicao situacion . . . por causa del maga avinida” y “maga bandido.” Tiene tambien maga tiempo que ya gulpia con ele el maga gente. (2 Cor. 11:23-27) Mas pa, tiene tambien maga hermano na congregacion quien nuay dale mira apresacion con el cosa le ya hace para ayuda kanila.—2 Cor. 10:10; Fil. 4:15.

⁶ Cosa ya ayuda con Pablo para continua sirvi con Jehova? Manada cosa ya aprende si Pablo acerca na personalidad de Jehova por causa na Escritura y na de suyu mismo experiencia. Ya queda convincido si Pablo que ta ama con ele si Dios Jehova. (Roma 8:38, 39; Ef 2:4, 5) Y mas ya queda grande el de suyu amor para con Ele. Ya dale mira si Pablo que ta ama le con Jehova “por medio del servicio que ya hace [le].”—Heb. 6:10.

7. Cosa kita puede hace para queda mas grande el diaton amor con Jehova?

⁷ Puede kita hace mas grande con el diaton amor para con Dios si estudia kita enbuenamente con el de suyu Palabra. Mientras ta le tu con el un istoria na Biblia, pricura pensa si cosa se ta enseña contigo acerca con Jehova. Pregunta con el de tuyu mismo cuerpo: ‘Paquemodo este istoria ta dale mira que ta ama conmigo si Jehova? Base aqui, cosa maga razon yo tiene para ama con Jehova?’

8. Paquemodo el rezo puede ayuda para queda mas grande el diaton amor para con Jehova?

⁸ Puede tambien queda grande el diaton amor para con Jehova si regular kita reza y habla con ele si cosa gayot kita ta sinti. (Sal. 25:4, 5) Si hace kita se, hay contesta si Jehova con el diaton rezo. (1 Juan 3:21, 22) Si Khanh, un hermana na Asia, ya habla: “Del primero, ta ama yo con Jehova por causa na cosa yo ya aprende acerca con ele. Pero ya queda mas grande ese amor cuando ya mira yo si paquemodo le ta contesta con el de mio maga rezo. Ya motiva se conmigo para hace si cosa ta hace alegre con ele.” b

9. Paquemodo ya dale mira si Timoteo que ya queda mas grande el de suyu amor para con el maga hermano?

⁹ Cuanto año despues queda Cristiano si Pablo, ya puede le conoce con el un joven que si Timoteo. Ta ama si Timoteo con Jehova y con el maga gente. Ya habla si Pablo con el maga de Filipo: “Nuay mas gayot yo otro gente aqui igual como con Timoteo, cay ta pensa le con ustedes igual como ta pensa yo con ustedes, y tiene le lingasa gayot para el bien di ustedes.” (Fil. 2:20, El Nuevo Testamento) Na ese texto, nuay menciona si Pablo que bueno organiza si Timoteo o bueno este dale discurso. Sino ya aprecia aqui si Pablo con el amor que ya dale mira si Timoteo con el maga hermano y hermana. Asigurao que ta espera gayot el maga congregacion si cuando kanila visita otravez si Timoteo.—1 Cor. 4:17.

10. Paquemodo si Anna y el de suyu marido ya dale mira que ta ama sila con el diila maga hermano y hermana?

¹⁰ Ta busca tambien kita maga manera para ayuda con el diaton maga hermano y hermana.  (Heb. 13:16) Considera con el experiencia de Anna que ya menciona del ya pasa articulo. Despues del un fuerte tifun, ya visita sila del de suyu marido na casa del un familia que maga Testigo y ya mira sila que ya queda destrozao el techo del casa. Poreso, nuay mas limpio ropa el familia. Si Anna ya habla: “Ya saca kame con el diila maga ropa, ya laba con este, ya plancha, ya dubla y ya debolbe kanila. Para kanamon, diutay lang el cosa kame ya hace pero por causa con aquel, ya queda kame mas close kanila hasta ahora.” Cay ta ama si Anna y el de suyu marido con el maga hermano y hermana, ya motiva se kanila para dale practical ayuda.—1 Juan 3:17, 18.

11. (a) Cosa posible el efecto con otro si dale kita mira amor kanila? (b) Asegun na Proverbio 19:17, cosa hace si Jehova si dale kita mira amor con otro?

¹¹ Mas mucho, si ta dale kita mira amor y ta trata enbuenamente con otro, ta puede sila nota que ta pricura kita imita con Jehova. Y posible no sabe kita que ya aprecia gale gayot sila con el cosa kita ya hace. Si Khanh que ya menciona enante ta puede pa gayot acorda con aquellos quien ya ayuda con ele. Ele ya habla: “Ta aprecia gayot yo con el todo maga amable hermana quien ta lleva conmigo na ministerio de antes. Ta saca sila conmigo, ta invita que junto come kanila y ta hace conmigo hatud na casa. Ya realiza yo ahora que gendeh gale quel facil pero alegre quel sila ya hace.” Siempre, gendeh todo hay habla kanaton que ya aprecia gayot sila con el cosa kita ya hace para kanila. Acerca con aquellos quien ya ayuda con ele, si Khanh ya habla: “Si puede lang, quierre yo debolbe el maga buen cosas que ya hace sila para conmigo pero no sabe yo si onde ya sila todo ta queda. Maskin pa ansina, sabe se si Jehova y ta reza yo que ele ya lang el paga kanila.” Justo si Khanh. Ta puede nota si Jehova maskin el maga bien diutay cosas que ta hace kita para con otro. Ta mira le con este como un  valuable sacrificio y un debe que hay paga gayot le.—Le con el Proverbio 19:17. c

12. Paquemodo el maga hermano puede dale mira el diila amor na congregacion? (Mira tambien con el maga letrato.)

¹² Si un hermano tu, paquemodo tu puede dale mira el de tuyu amor con otro y ayuda kanila? El un joven hermano que si Jordan ya pregunta con el un anciano si cosa le hace para mas puede ayuda con el congregacion. Ya comenda con ele el anciano na progreso que ya puede ya le hace y despues, ya dale con ele cuanto sugestion si cosa pa le puede hace. Por ejemplo, ya anima le con Jordan que anda temprano na Kingdom Hall y man greet con el maga hermano y hermana, man comento na maga miting, regular predica junto con el de suyu field service group y busca maga practical manera para ayuda con otro. Cuando ya sigui si Jordan con ese sugestion, nuay lang le basta aprende nuevo maga cosas sino ya queda tambien mas grande el de suyu amor para na de suyu maga hermano y hermana. Ya aprende si Jordan que si ta queda siervo ministerial el un hermano, gendeh ele alli ta principia ayuda con otro; sino na ese tiempo, ta continua ya lang le hace con ese.—1 Tim. 3:8-10, 13.

13. Paquemodo el amor ya motiva con Christian que hace esfuerzo para queda otravez un anciano?

¹³ Un siervo ministerial ba tu o un anciano de antes? Ta acorda si Jehova con el cosa tu ya hace de antes y sabe le que amor el ya motiva contigo para hace con ese. (1 Cor. 15:58) Ta puede tambien le mira con el amor que ta continua tu dale mira. Ya queda triste el un hermano que si Christian cuando ya perde el de suyu privilegio como un anciano. Pero, ya habla le: “Ya decidi yo que hace el todo que puede yo hace para sirvi con Jehova cay ta ama  yo con ele—tiene man yo privilegio o nuay.” Despues del cuanto tiempo, ya queda le un anciano otravez. Si Christian ya habla: “Yan alang-alang yo sirvi otravez como un anciano. Pero ya pensa yo que si quierre si Jehova que sirvi yo otravez como un anciano, hace yo con ese cay ta ama yo con ele y con el de mio maga hermano y hermana.”

14. Cosa tu ya aprende na cosa ya habla el un hermana de Georgia?

¹⁴ El maga siervo de Jehova ta dale tambien mira amor na otro maga gente. (Mat. 22:37-39) Por ejemplo, si Elena, un hermana que ta queda na nacion de Georgia, ya habla: “Del primero, ta predica lang yo cay ta ama yo con Jehova. Pero cuando ya queda mas grande el de mio amor para con el de mio Tata na cielo, ya queda tambien grande el de mio amor para na maga gente. Ta pricura yo pensa si cosa maga problema sila ta enfrenta y na cosa maga topico sila posible queda interesao. Cay pirmi yo ta pensa ansina, mas quierre ya yo ayuda kanila.”—Roma 10:13-15.

15-16. Base na reenactment na maga letrato, cosa el maga bendicion si dale kita mira amor con otro?

¹⁵ Si ta dale kita mira amor con el diaton maga hermano, gendeh lang sila el ta beneficia. Despues principia el COVID-19 pandemic, el un hermano que si Paolo y el de suyu mujer ya enseña con el manada de edad hermana si paquemodo usa con el diila maga gadget para puede predica. Del primero, tan dificil el un hermana si paquemodo usa con el de suyu gadget.  Pero ya puede lang siempre le aprende na uliji. Ya puede le usa con ese para invita con el de suyu maga pariente que atende na Comemoracion. Sesenta diila el ya atende por medio de videoconference! Ya beneficia gayot el hermana y el de suyu maga pariente na cosa ya hace si Paolo y el de suyu mujer. Na un carta, ya habla el hermana con Paolo: “Gracias gayot cay ya enseña ustedes kanamon maga de edad. Gendeh gayot yo ulvida el amor de Jehova para kanamon y el esfuerzo que ya hace ustedes.”

¹⁶ El maga experiencia igual ansina ya enseña con Paolo un importante leccion. Ya hace se acorda con ele que mas importante el amor contra na saber o abilidad. Ele ya habla: “Un circuit overseer yo de antes. Ya puede yo realiza ahora que maskin pa posible ya ulvida ya el maga publisher con el de mio maga talk, ta acorda siempre sila con el practical ayuda que ya dale yo kanila.”

17. Quien pa hay beneficia si dale kita mira amor?

¹⁷ Si ta dale kita mira amor con otro, ta beneficia tambien kita. Si Jonathan quien ta queda na New Zealand ya puede discubri que deverasan este. Un Sabado tarde, ya puede le mira un pioneer hermano que ta predica solo-solo. Poreso, ya decidi si Jonathan que sigui con aquel pioneer cada Sabado tarde. Nuay le puede realiza aquel tiempo que hay beneficia gayot le na cosa le ya hace. “Na aquel tiempo,” ya habla si Jonathan, “gendeh yo tan enjoy con el de mio ministerio. Pero cuando ya oi yo si paquemodo le ta enseña y ya puede mira si paquemodo de productivo el de suyu ministerio, ya ayuda se conmigo para man enjoy con ese trabajo. Ya queda tambien le de mio amigo y ya ayuda le conmigo para progresa na espiritual, para man enjoy con el ministerio y para queda mas cerca con Jehova.”

18. Cosa quierre si Jehova que hace kita?

¹⁸ Quierre si Jehova que todo kita hay tene grande amor para con ele y con otro. Como cosa kita ya aprende, puede kita hace mas grande con el diaton amor para con Jehova si le kita con el de suyu Palabra, medita con ese y regular man cuento con ele por medio na rezo. Hay queda tambien grande el diaton amor para con el diaton maga hermano y hermana si ayuda kita kanila na practical manera. Mientras mas ta queda grande el diaton amor, hay queda tambien kita mas cerca con Jehova y con el diaton espiritual familia. Y hay queda sila diaton maga amigo hasta para cuando!