EL MAGA archaeologist ya puede discubri millones de maga ladrillo (o brick) que ya usa para construi con el ciudad de Babilonia de antes. Asegun na un archaeologist que si Robert Koldewey, ya hace con ese maga ladrillo na maga horno que puede incuntra “apuera del ciudad, donde tiene buen clase de lodo pandayan y manada maga siembra que puede usa para quema.”

Ya puede discubri el maga archaeologist que ta usa tambien el maga oficial de Babilonia con el diila maga horno para hace maga terrible cosas. Si Paul-Alain Beaulieu, un maestro de Assyriology na University of Toronto, ya habla: “El cosas que ya escribi de antes na Babilonia ta dale mira que ya dale mandato el rey que quema na horno con aquellos quien ta desobedece con ele y gendeh ta dale mira respeto con el maga sagrao cosas.” Por ejemplo, tiene un record na tiempo de Rey Nabucodonosor donde ta habla: “Destroza kanila, quema kanila, . . . na horno . . . buta kanila na fuego para muri sila.”

Ta hace este acorda con el maga gente quien ta le con el Biblia acerca na maga suceso que ya menciona na Daniel capitulo 3. Ya menciona alla que si Rey Nabucodonosor ya hace un bien grande imagen de oro na patag lugar de Dura—apuera na ciudad de Babilonia. Cuando nuay conforma que man hapa adelante de ese imagen el tres Hebreo que kanda Sadrac, Mesac y Abednego, ya queda bien rabiao si Nabucodonosor. Ya manda le que calenta con el horno “siete beses mas pa na normal” y buta kanila tres na “bien caliente horno.” El un poderoso angel ya salva kanila y nuay sila muri.—Dan. 3:1-6, 19-28.

Mismo el maga ladrillo de Babilonia ta dale evidencia que exacto el cosa escribido na Biblia. Manada de este el tiene escribido maga palabra que ta alaba con el rey. El uno de ese ta habla: “Iyo si Nabucodonosor, Rey de Babilonia . . . El palacio que ya planta yo como el Poderoso Rey . . . Ojala hay rula aqui el de mio maga descendiente hasta para cuando.” Bien semejante este na cosa ya menciona na Daniel 4:30, donde yan hambug si Nabucodonosor: “Gendeh ba amo este el Grande Babilonia que ya planta yo como palacio del rey por medio na de mio mismo fuerza y poder, y para na gloria del de mio autoridad?”