1. Porque bueno que prepara para na maga calamidad?

 SI PREPARAO kita, puede se salva con el diaton vida. Por ejemplo, si preparao el maga gente na un calamidad, mas grande el chansa que salva sila y puede ayuda con otro. El un organizacion na Europe que ta pricura ayuda con el maga gente ya habla: “El buen preparacion puede salva con el vida del maga gente.”

2. Porque kita debe prepara para na grande tribulacion? (Mateo 24:44)

² Bigla lang hay sucede el “grande calamidad” o tribulacion. (Mat. 24:21) Pero, gendeh este igual na otro maga calamidad cay sabe kita que hay llega gayot este. Maga 2,000 año ya el ya pasa, ya manda si Jesus con el de suyu maga siguidores que prepara para na ese dia. (Le con el Mateo 24:44.) Si preparao kita, mas pronto para kanaton aguanta na ese dificil tiempo y ayuda con otro que aguanta tambien.​—Luc. 21:36.

3. Si aguanta kita, tene compasion y demonstra amor, paquemodo se ayuda kanaton para queda preparao para na grande tribulacion?

³ Considera con el tres cosas que puede ayuda kanaton para queda preparao para na grande tribulacion. Cosa kita hace si pidi kanaton que predica con el mensaje de juzgamiento pero tan contra kanaton el maga gente? (Rev. 16:21) Necesita kita aguanta para puede kita obedece con Jehova y confia que hay protege le kanaton. Cosa kita hace si experiencia el diaton maga hermano que perde el diila maga material cosas? (Hab. 3:17, 18) Necesita kita tene compasion para dale el ayuda que necesita sila. Cosa kita hace si ataca kanaton el alianza de maga nacion y necesita kita junto queda con el diaton maga hermano y hermana? (Eze. 38:10-12) Necesita kita tene grande amor kanila para puede kita enfrenta con ese dificil tiempo.

4. Paquemodo ya dale mira el Biblia que debe kita continua aguanta y dale mira compasion y amor?

⁴ Ta anima kanaton el Palabra del Dios que continua aguanta, tene compasion y demonstra amor. El Lucas 21:19 ta habla: “Si  ay tene ustedes paciencia y ay puede aguanta ese maga sufrimiento deverasan gayot ay tene ustedes vida eterna.” (El Nuevo Testamento) El Colosa 3:12 ta habla: “Necesita ustedes tene lastima” o compasion. El 1 Tesalonica 4:9, 10 ta menciona: “Dios mismo ya enseña canaton si paquemodo kita debe ama con uno y otro. . . . Pero quiere came roga con ustedes que omenta pa el di ustedes amor.” (El Nuevo Testamento) Ya escribi con ese maga palabra para na maga dicipulo quien ya puede ya aguanta y dale mira compasion y amor. Pero, necesita sila continua hace con ese. Kita tambien ahora. Para ayuda kanaton, considera kita con el ejemplo del maga Cristiano na primer siglo. Despues, hay mira kita si paquemodo kita puede imita kanila y dale mira que preparao kita para na grande tribulacion.

5. Paquemodo el maga Cristiano del primer siglo ya aguanta na diila maga problema?

⁵ El maga Cristiano del primer siglo necesita aguanta. (Heb. 10:36) Puera na maga comon problema que ta experiencia el maga gente, tiene pa sila omento probanza. Manada kanila el ya experiencia persecucion, gendeh lang estaba na maga Judio lider de religion y na gobierno del Roma sino na diila mismo familia tambien. (Mat. 10:21) Y adentro mismo na congregacion, necesita sila resisti con el influencia del maga apostata y con el diila maga enseñanza. (Act. 20:29, 30) Maskin pa ansina, este maga Cristiano ya aguanta. (Rev. 2:3) Paquemodo? Ya medita sila con el maga ejemplo na Escritura quien ya aguanta, igual con Job. (Sant. 5:10, 11) Ya reza sila que dale kanila fuerza. (Act. 4:29-31) Y yan focus sila na maga buen resulta si aguanta sila.​—Act. 5:41.

6. Cosa tu ya puede aprende na cosa ya hace si Merita para aguanta con el oposicion?

⁶ Puede tambien kita aguanta si regular kita estudia y medita con el maga ejemplo de aquellos quien ya aguanta que puede le na Biblia y na diaton maga publicacion. Cuando ya hace se si Merita, un hermana na Albania, ya puede le enfrenta con el grabe oposicion na familia. Ele ya habla: “Ya anima gayot conmigo cuando ya estudia yo el istoria de Job. Ya sufri gayot le. Pero maskin no sabe le si quien ta causa con el de suyu maga problema, ele ya habla: ‘Hasta hay muri yo, gendeh yo hace perde el de mio integridad!’ (Job 27:5) Nuay lang gayot el de mio maga problema si compara na cosa ya experiencia si Job. Y gendeh igual con ele, sabe yo si quien ta causa con este maga problema.”

7. Maskin gendeh kita ta experiencia grabe probanza, cosa kita debe aprende que hace ahora?

⁷ Puede tambien kita mas aguanta si reza kita pirmi con Jehova y habla el diaton maga lingasa con ele. (Fil. 4:6; 1 Tes. 5:17) Posible gendeh tu ta experiencia grabe probanza ahora. Pero ta pidi ba tu el guia de Jehova si ta sinti tu triste y dol no sabe si cosa hace? Si regular tu reza con Dios acerca na de tuyu maga diutay problema ahora, gendeh tu man alang-alang reza con ele si experiencia tu grande problema na futuro. Y puede tu asigura que sabe le si cuando y paquemodo contigo exacto ayuda.​—Sal. 27:1, 3.

8. Paquemodo el ejemplo de Mira ta dale mira que puede kita aguanta na diaton maga probanza na futuro si aguanta kita na diaton maga probanza ahora? (Santiago 1:2-4) (Mira tambien con el letrato.)

⁸ Grande el chansa que puede kita aguanta na grande tribulacion na futuro si ta aguanta kita ahora na diaton maga probanza. (Roma 5:3) Porque se kita puede habla? Manada maga hermano y hermana ya habla que cada vez sila aguanta na un dificil situacion, ta ayuda se kanila para aguanta na diila sunod problema. Si ta puede sila aguanta na ayuda de Jehova, ta queda mas fuerte el diila fe que quierre ayuda kanila si Jehova. Como resulta, ese fe ta ayuda  kanila para aguanta con el diila sunod probanza. (Le con el Santiago 1:2-4.) Si Mira, un pioneer hermana na Albania, ya puede realiza que ta puede le continua aguanta cay ya aguanta le de antes. Ya admiti le que tiene vez ta sinti le que ele lang el tiene manada problema. Pero ya acorda le si cosa ya hace si Jehova para ayuda con ele del ya pasa 20 año y ele ya habla na de suyu mismo cuerpo: ‘Esta fiel. No hace sayang con el maga año que ya puede tu aguanta por causa na ayuda de Jehova.’ Puede tambien tu pensa si paquemodo ya ayuda contigo si Jehova para aguanta. Queda convincido que ta mira si Jehova cada vez ta aguanta tu un probanza y hay premia le contigo. (Mat. 5:10-12) Despues, si principia ya el grande tribulacion, sabe ya tu si paquemodo aguanta y determinao ya tu que continua aguanta.

9. Paquemodo ya dale mira compasion el congregacion de Antioquia?

⁹ Considera si cosa ya sucede cuando el maga Cristiano na Judea ya experiencia grabe escasez de comida. Cuando ya oi el congregacion de Antioquia na Siria acerca con este, asigurao ya sinti sila compasion para na diila maga hermano na Judea. Pero puera con ese, ya actua tambien sila. “Ya decidi [sila] imvia ayuda con el maga hermano ta queda na Judea; cada y cual ay contribui el cosa sila puede dale.” (Act. 11:27-30) Maskin pa lejos ta queda el maga hermano quien ya sale afectao na escasez, el maga Cristiano na Antioquia determinao ayuda kanila.​—1 Juan 3:17, 18.

10. Na cosa maga manera puede kita dale mira compasion si el diaton maga hermano ya sale afectao na calamidad? (Mira tambien con el letrato.)

¹⁰ Puede tambien kita dale mira compasion si ya sabe kita que ya sale afectao el diaton maga hermano na un calamidad. Ta actua kita dayun. Posible ta pregunta kita con el maga anciano si puede ba kita ayuda na un proyecto, ta dona na worldwide work o ta reza para con aquellos quien ya sale afectao na calamidad. b (Prov. 17:17) Por ejemplo, del 2020, mas de 950 Disaster Relief Committee el ya forma na entero mundo para ayuda con aquellos quien ya sale afectao na COVID-19 pandemic. Debe gayot kita comenda con aquellos quien ta sirvi na maga relief committee. Por causa na compasion na diila maga hermano y hermana, ya dale sila material y espiritual ayuda, y na cuanto ocasion, ya compone y construi maga casa y maga lugar de adoranza.​—Compara na 2 Corinto 8:1-4.

11. Si dale kita mira compasion con otro, paquemodo se ta honra con el diaton Tata na cielo?

¹¹ Si dale kita mira compasion con el diaton maga hermano y hermana despues del un calamidad, el otro ta puede nota con el diaton maga sacrificio. Por ejemplo, del 2019, el Tifun Dorian ya destroza un Kingdom Hall na Bahamas. Mientras ta construi otravez el maga hermano con el Kingdom Hall, ya pregunta sila con el un contractor que gendeh Testigo si cuanto le cubra para hace con el cuanto trabajo. Ya habla le kanila: “Quierre yo dona . . . con el maga materiales y gendeh ya ustedes necesita paga con el usada de equipment y con el de mio trabajo. . . . Quierre lang yo este hace para na de ustedes organizacion. Yan bilib gayot yo si paquemodo [ustedes] ta trata con el de ustedes maga amigo.” Mayoria na maga gente na mundo no conoce con Jehova. Pero, manada kanila el ta observa con el maga Testigo de Jehova. Bien alegre kita sabe que si dale kita mira compasion con otro, puede se ayuda con el maga gente para conoce mas con Jehova quien “bien grande gayot el lastima”!​—Ef. 2:4.

12. Si cultiva kita compasion ahora, paquemodo se ayuda kanaton prepara para na grande tribulacion? (Revelacion 13:16, 17)

 ¹² Porque kita necesita dale mira compasion durante el grande tribulacion? Ya menciona el Biblia que aquellos quien gendeh suporta con el maga gobierno de este mundo, hay experiencia maga problema​—ahora y durante el grande tribulacion. (Le con el Revelacion 13:16, 17.) El diaton maga hermano y hermana posible necesita ayuda para tene el diila maga necesidad. Si el diaton Rey, si Cristo Jesus, hay vene ya para juzga con el maga gente, ojala puede le mira kanaton que ta dale mira compasion con otro y invita le kanaton que “recivi . . . como herencia, el Reino.”​—Mat. 25:34-40.

13. Asegun na Roma 15:7, paquemodo el maga Cristiano del primer siglo ya hace fuerte con el diila amor con uno y otro?

¹³ El amor amo el identificacion del maga Cristiano del primer siglo. Pero pronto ba para kanila dale mira amor? Considera si paquemodo de diferente el maga miembro na congregacion na Roma. El cuanto kanila amo maga Judio quien ya engranda que ta obedece con el Ley de Moises pero el otro kanila amo maga Gentil quien tiene bien diferente background. El cuanto Cristiano posible maga esclavo mientras el otro gendeh​—gane, baka el cuanto tiene pa maga esclavo. Paquemodo ese maga Cristiano ya puede continua dale mira amor maskin diferente sila con uno y otro? Si apostol Pablo ya anima kanila que “acepta . . . con uno y otro.” (Le con el Roma 15:7.) Cosa le quierre decir? El palabra que yan translate “acepta” quierre decir que ricibi con el un persona igual como que ricibi con ele na de tuyu casa o acepta con ele como de tuyu amigo. Por ejemplo, ya habla si Pablo con Filemon si paquemodo le debe acepta con el esclavo que si Onesimo: “Recibi [con ele] enbuenamente.” (Filem. 17, El Nuevo Testamento) Ya acepta tambien si Priscila y Aquila con Apolo quien nuay tanto saber acerca na Cristianidad y “ya lleva sila con ele” junto kanila. (Act. 18:26) Este maga Cristiano nuay permiti que el diila diferente background causa division entre kanila sino ya acepta sila con uno y otro.

14. Paquemodo si Anna y el de suyu marido ya demonstra amor?

¹⁴ Puede tambien kita dale mira amor para na diaton maga hermano y hermana si acepta kita kanila como diaton maga amigo. Como resulta, hay motiva se kanila que dale tambien mira amor kanaton. (2 Cor. 6:11-13) Considera con el experiencia de Anna y del de suyu marido. Nuay dura despues sila cambia na diila nuevo assignment na West Africa como maga misionario, ya principia el COVID-19 pandemic. Por causa na pandemic, gendeh sila puede man junto con el maga hermano na personal. Paquemodo este man maridable ya dale mira el diila amor? Yan contact sila con el maga hermano y hermana por medio na videoconference y ya habla que quierre gayot sila conoce kanila. Ya aprecia gayot el maga hermano con el cosa ya hace este maga misionario y ya principia tambien sila llama y man text con este man maridable. Porque este ya hace el man maridable? Si Anna ya habla: “Nunca yo ulvida con el amor que ya dale mira el maga hermano y hermana conmigo y na de mio familia, bueno man el situacion o gendeh. El diila maga ejemplo ya motiva conmigo para dale mira amor.”

15. Cosa tu ya puede aprende na ejemplo de Vanessa acerca na amor para na todo diaton maga hermano y hermana? (Mira tambien con el letrato.)

¹⁵ Manada kanaton el parte del congregacion donde el maga hermano y hermana tiene diferente background y personalidad. Puede kita hace fuerte el diaton amor con todo kanila si  man focus kita na diila maga buen calidad. El un hermana que si Vanessa quien ta sirvi na New Zealand yan dificil tene buen relacion con el cuanto na diila congregacion. Pero en vez que evita con aquellos con quien le ta consumi por causa na diila personalidad, ya decidi le que mas man junto kanila. Cuando ya hace le se, ya mira le si porque ta ama kanila si Jehova. Ele ya habla: “Desde ya queda circuit overseer el de mio marido, tan junto kame con el manada maga hermano y hermana quien tiene diferente maga personalidad y mas pronto para conmigo ahora que tene buen relacion kanila. Ta gusta yo ahora el otro-otro personalidad del maga hermano y hermana. Asigurao ta gusta tambien se si Jehova cay ya permiti le que adora kita con ele maskin pa diferente kita con uno y otro.” Si mira kita con otro igual si paquemodo ta mira kanila si Jehova, ta dale kita prueba que ta ama kita kanila.​—2 Cor. 8:24.

16. Porque bien importante dale mira amor durante el grande tribulacion? (Mira tambien con el letrato.)

¹⁶ Bien importante que dale mira amor durante el grande tribulacion. Si principia ya ese tribulacion, onde kita puede incuntra proteccion? Considera si cosa ya manda si Jehova con el de suyu maga siervo que hace cuando ya ataca con el Babilonia de antes: “Entra ustedes, de mio maga siervo, na de ustedes maga bien adentro cuarto, y cerra con el maga puerta. Esconde ustedes unrato hasta pasa el rabia.” (Isa. 26:20) Este maga palabra posible aplicable tambien kanaton quien hay experiencia con el grande tribulacion. El “maga bien adentro cuarto” posible ta refiri na diaton maga congregacion. Durante el grande tribulacion, puede kita incuntra el proteccion que ya promete si Jehova si esta kita unido na diaton maga hermano y hermana. Poreso, debe kita hace esfuerzo ahora que gendeh basta acepta lang con el diaton maga hermano y hermana sino ama tambien kanila. Posible depende alli el diaton salvacion!

17. Si prepara kita ahora, cosa kita puede hace durante el grande tribulacion?

¹⁷ Hay queda un bien dificil tiempo para na todo maga gente “el grande dia de Jehova.” (Sof. 1:14, 15) Hay experiencia tambien maga problema el maga siervo de Jehova. Pero si prepara kita ahora, puede kita esta calmao y ayuda con otro. Hay puede kita aguanta con el maskin cosa dificultad. Si hay sufri el diaton maga hermano y hermana, hay hace kita el todo para dale mira compasion y dale kanila el diila necesidad. Y hay esta kita cerca con el diaton maga hermano y hermana con quien ta ama ya kita ahora. Como resulta, hay premia kanaton si Jehova vida eterna na un mundo donde el todo calamidad y tribulacion hay perde ya.​—Isa. 65:17.