Un anciano si Papang na United Church of Canada na diamon lugar poreso cada semana ta lleva le kanamon del de mio hermana na Sunday school. Despues, pagka-alas 11 de aga, ta sigui kame con ele para anda na iglesia. Llega el tarde, ta sigui kame con Mamang para na Kingdom Hall. Ya puede kame dayun mira si cosa el diferencia entre na ese dos religion.

Ya habla si Mamang el cosa le ya aprende na de suyu maga amigo y amiga que si Bob y Marion Hutcheson, y ya acepta tambien sila con el verdad. Del 1958, este man maridable ya lleva conmigo junto con el diila tres anak hombre na ocho dia Divine Will International Assembly na New York City. Ya puede yo realiza ahora que gendeh gale quel facil que lleva tambien sila conmigo. Pero ese asemblea amo uno na maga de con todo buen experiencia que ya tiene yo.

Cuando teenager yo, ta cuida kame manada animal na casa. Poreso, ya pensa yo que queda un veterinario. Ya menciona se de mio nana na un anciano na diamon congregacion. Ese anciano amable ya hace acorda conmigo que ta vivi ya kita na “ultimo maga dia.” Ya manda le pensa conmigo si cosa posible el efecto na de mio relacion con Jehova si entra yo escuela na un universidad por cuanto año. (2 Tim. 3:1) Poreso, ya decidi yo que gendeh mas entra escuela na un universidad.

Pero, ya pensa siempre yo si cosa yo hace despues yo gradua na high school. Maskin ta participa yo na ministerio cada semana, gendeh yo tan enjoy con ese y ta mira yo que gendeh yo queda un pioneer. El de mio tata y de mio angkol  que gendeh maga Testigo ya anima conmigo que trabaja full-time na un grande insurance company na Toronto. Alto el posicion del de mio angkol alla poreso ya acepta yo con el trabajo.

Na Toronto, gendeh yo ta puede queda regular na maga espiritual actividad cay pirmi yo tan overtime na trabajo y tan junto con el maga gente que gendeh maga Testigo de Jehova. Del primero, ta queda yo junto con el de mio aguelo que gendeh Testigo. Pero cuando ya muri le, ya busca yo otro lugar onde queda.

Dol de mio maga mayores ya el man maridable Hutcheson quien ya lleva conmigo na asemblea del 1958. Ya invita sila conmigo que queda junto kanila y ya ayuda sila conmigo para progresa na espiritual. Del 1960, ya bautiza yo junto con el diila anak que si John. Yan pioneer si John y ya anima se conmigo para mas dale tiempo na ministerio. Ya puede nota el maga hermano na congregacion con el de mio progreso y despues del cuanto tiempo, ya iscuji sila conmigo para queda el Theocratic Ministry School servant. a

Del 1966, ya casa yo con Randi Berge, un activo pioneer quien bien quierre sirvi donde tiene mas grande necesidad. El diamon traveling overseer ya dale mira personal interes kanamon y ya anima kanamon que ayuda con el congregacion na Orillia, Ontario. Poreso, yan empaque dayun kame y ya anda alla.

Cuando ya llega kame na Orillia, yan regular pioneer tambien yo igual con Randi. Cay ya mira yo que bien con gana le na ministerio, quierre tambien yo se hace! Cuando ya hace yo esfuerzo na de mio pioneering, ya puede yo sinti el alegria mientras ta usa con el Biblia y ta mira con el maga gente que ta entende con el verdad. Un bendicion gayot que puede ayuda con el un man maridable na Orillia que hace maga cambio na diila vida y queda maga siervo de Jehova.

Cuando ya visita kame na Toronto, ya conoce yo con Arnold MacNamara que uno del maga hermano quien ta guia na Bethel. Ya pregunta le si quierre ba kame queda special pioneer. Ya contesta dayun yo: “Siempre! Basta gendeh lang na Quebec!” Ya puede influencia conmigo el mirada del maga gente na Canada quien ta converza English acerca na provincia de Quebec que French el lengguaje del maga gente. Na aquel tiempo, tan protesta el maga gente contra na gobierno cay quierre sila que gendeh mas queda parte el Quebec del Canada.

Ya contesta si Arnold, “Na Quebec lang ta imbia maga special pioneer el branch ahora.” Ya conforma dayun yo cay sabe yo daan que quierre si Randi sirvi alla. Ya puede yo realiza na uliji que uno quel del maga de con todo buen decision que ya hace kame!

Despues kame atende clase de French lengguaje por cinco semana, ya anda kame de Randi na Rimouski junto con el un man maridable. Maga 540 kilometro este northeast estaba na Montreal. Pero, gendeh kame siempre tanto sabe el lengguaje y claro se puede mira cuando ya le yo maga anuncio durante el un miting. Ya habla yo que na diamon venedero convencion, ta expecta kame manada “delegado que maga ostrich” en vez de maga “delegado de Austria.”

Na Rimouski, yan junto kanamon cuatro el cuatro activo maga single hermana y el man maridable Huberdeau y el diila dos anak mujer. Este man maridable yan renta un grande casa que tiene siete cuarto y el todo maga pioneer quien ta queda alla ya ayuda para paga el renta. Ya llama kame con este casa White House cay blanco el frentero y maga arigui de este. Maga 12 para 14 gente el ta queda alla. Ciendo maga special pioneer kame de Randi, ta predica kame aga, tarde y denoche. Poreso, ta aprecia gayot kame si tiene kanamon quien ta sigui na ministerio—maskin denoche y tiempo frio.

Ya queda kame bien close con aquel maga fiel pioneer que dol familia ya sila diamon. Tiene vez, ta sinta kame todo alrededor de un bonfire y tiene maga dia que junto kame ta cuci. Musiquero el uno del maga hermano poreso si Sabado denoche, mas mucho ta canta kame y ta baila.

Productivo gayot el teritorio na Rimouski! Adentro lang de cinco año, manada maga Bible study el ya progresa para na bautismo y ya tiene ya 35 publisher el diamon congregacion.

Na Quebec, ya ricibi kame training como maga predicador. Ya puede kame mira si paquemodo kanamon ya ayuda si Jehova na ministerio y na diamon maga material necesidad. Mas pa, ya aprende kame ama con el maga gente quien ta converza French, con el diila lengguaje y con el diila cultura. Como resulta, ya aprende tambien kame ama con el otro maga cultura.—2 Cor. 6:13.

Nuay kame expecta que pidi kanamon el branch que cambia na lugar de Tracadie, na este parte del New Brunswick. Gendeh este facil kanamon ciendo nuevo lang kame ya firma contrata de renta na un apartment y tiene tambien yo contrata que part-time enseña na un escuela. Mas pa, nuevo lang ya queda maga publisher el cuanto del diamon maga Bible study y nuay pa acaba construi con el diamon Kingdom Hall.

Ya reza kame entero weekend acerca con este y ya visita na Tracadie. Ya puede kame mira que diferente este na Rimouski. Pero ya decidi kame  que ciendo quierre si Jehova que anda kame alla, amo se el cosa kame hace. Ya pruba kame con Jehova y ya puede kame mira que ya quita le con el diamon maga sanggadura. (Mal. 3:10) Cay si Randi tiene buen espiritualidad, preparao hace maga sacrificio, sabe re y gendeh bien serioso, ya puede se ayuda cuando ya cambia kame na Tracadie.

Si Robert Ross lang el anciano na diamon nuevo congregacion. Yan pioneer le junto con el de suyu mujer que si Linda y ya decidi sila que esta alla despues nace el diila primer anak. Maskin pa ta cuida sila con el diila anak, ya puede gayot sila anima kanamon de Randi por causa na diila pagka-hospitable, determinacion y pagka-activo na ministerio.

Despues kame man pioneer na Tracadie por dos año, ya ricibi ya tambien kame otro regalo—un invitacion que sirvi na traveling work. Ya sirvi kame na maga circuito que English el lengguaje por siete año. Despues, yan reassign kanamon na un circuito na Quebec que French el lengguaje. El diamon district overseer na Quebec que si Léonce Crépeault ta dale conmigo comendacion na de mio maga talk. Pero pirmi tambien le conmigo ta pregunta, “Cosa gaha tu puede hace para hace con ese mas practical?” b El de suyu personal interes ya ayuda conmigo para hace mas especifico y simple con el de mio enseñada.

Uno na maga assignment que gendeh gayot yo ulvida amo durante el “Victorious Faith” International Convention na Montreal del 1978. Ya sirvi yo na Food Service. Ta expecta kame que maga 80,000 gente el atende y ya principia kame un nuevo manera si paquemodo kanila dale come. Nuevo el todo: el maga equipment, el comida y el manera si paquemodo prepara con ese. Tiene kame maga 20 grande ref pero tiene vez, ta queda este malo. Antes principia el primer dia del convencion, nuay dayun kame puede entra na stadium para prepara. Media noche ya kame se ya puede hace ciendo tiene pa sport event que ta hace alla. Y antes pa subi el sol, debe preparao ya el maga oven para puede kame hace almuerzo! Cansao kame pero ya puede gayot yo aprende cuando ya mira yo que el de mio maga uban maga buen trabajador, mature y sabe re mientras ta trabaja. Man amigo siempre kame hasta ahora. Alegre gayot yo cay ya puede yo atende na este importante convencion na Quebec donde tiene grabe persecucion del maga 1940 hasta 1960!

 Manada gayot yo cosa ya aprende na de mio maga uban overseer durante el diamon maga grande convencion na Montreal. Si David Splane quien ta sirvi ahora na Cuerpo Gobernante ya queda convention overseer de antes por un año. Despues de cuanto año, cuando ya dale conmigo ese assignment, ya suporta gayot conmigo si David.

Del 2011, despues kame sirvi na traveling work por 36 año, ya pidi conmigo que queda un instructor na School for Congregation Elders. Adentro de dos año, ya esta kame de Randi na 75 diferente lugar pero nuay gayot man sayang el diamon maga sacrificio. Na fin del cada semana, lleno gayot de apresacion el maga anciano cay ya puede sila mira que bien interesao el Cuerpo Gobernante na espiritualidad del maga anciano.

Despues de cuanto tiempo, ya enseña yo na School for Kingdom Evangelizers. Mas mucho, el maga estudiante ta sinti cansao y malingasa por causa na diila schedule: sintao sila na clase por maga siete hora cada dia, ta hace assignment por tres hora cada noche y ta dale maga cuatro o cinco parte cada semana. Kame maga instructor ya habla kanila que gendeh sila puede hace con ese si nuay el ayuda de Jehova. Pirmi gayot yo ta puede acorda si paquemodo de alegre el maga estudiante si ta mira sila que por causa cay ya confia sila con Jehova, ya puede sila hace el maga cosas que pensaba sila imposible.

El personal interes del de mio nana con otro ya puede ayuda con el de suyu maga Bible study para progresa. Gane, ya ayuda tambien este para queda interesao el de mio tata na verdad. Ya espanta gayot kame cay tres dia despues muri si Mamang, ya atende si Papang na Kingdom Hall y ya continua le se hace por 26 año. Nuay le bautiza pero ya habla conmigo el maga anciano que ele pirmi el ta llega una na miting cada semana.

Un buen ejemplo gayot tambien si Mamang conmigo y con el de mio maga hermana. El todo de mio tres hermana y diila marido fiel ta sirvi con Jehova. El de mio dos hermana ta sirvi na branch office—el uno na Portugal y el uno na Haiti.

Maga special pioneer kame ahora de Randi na Hamilton, Ontario. Cuando na traveling work kame, alegre kame sigui con otro na diila maga return visit y Bible study. Pero ahora, alegre kame mira que ta progresa na espiritual el diamon mismo maga Bible study. Y mientras tan junto kame con el maga hermano y hermana na diamon nuevo congregacion, ta puede gayot anima kanamon cay ta puede kame mira si paquemodo kanila ta suporta si Jehova, bueno man el situacion o gendeh.

Si ta pensa kame con el diamon pasada, ta rindi gayot kame gracias cay bien manada maga hermano y hermana el ya dale kanamon mira personal interes. Poreso, ta pricura tambien kame dale mira personal interes con otro y anima kanila que hace el diila de con todo bueno na servicio con Jehova. (2 Cor. 7:6, 7) Por ejemplo, na un familia, maga regular pioneer el mujer y el diila dos anak. Ya pregunta yo con el marido si ya puede ya ba le pensa que man pioneer. Ya habla le conmigo que ta suporta ya le tres pioneer. Poreso ya pregunta yo con ele, “Puede ba tu suporta kanila mas pa contra con Jehova?” Ya habla yo con ele que puede tambien le man enjoy con el cosa sila tan enjoy. Seis meses despues, ya queda le pioneer.

Hay continua kame de Randi “habla con el sunod generacion” acerca na “maga bonito trabajo” de Jehova y ta esperanza kame que man enjoy gayot sila na servicio con Jehova igual kanamon.—Sal. 71:17, 18.