1-2. (a) Cosa aviso ya dale si Jesus na de suyu maga dicipulo? (b) Porque ya abandona el maga dicipulo con Jesus? (Mira tambien con el maga letrato.)

 “EL ESPIRITU dicidido, pero el cuerpo maluya.” a (Mat. 26:41b) Ya dale mira si Jesus na este maga palabra que sabe le que imperfecto kita. Pero el de suyu maga palabra ta dale tambien aviso: No tene sobra confianza na cuerpo. Cuanto hora antes se habla si Jesus, ya habla con ele el de suyu maga dicipulo que nunca sila deja con ele. (Mat. 26:35) Bueno el diila motivo pero nuay sila realiza que posible sila man luya si talli sila na un dificil situacion. Poreso, ya dale aviso kanila si Jesus: “Esta despierto y reza para gendeh ustedes ay cai na tentacion.”—Mat. 26:41a.

² Maka-triste cay nuay esta alerto el maga dicipulo. Cuando ya arresta con Jesus, ya esta ba sila junto con ele o ya cae sila na tentacion y ya abandona con ele? Cay nuay sila queda con cuidao, ya hace el maga dicipulo el cosa que ya habla sila que gendeh sila hace—ya abandona sila con Jesus.—Mat. 26:56.

3. (a) Para esta leal con Jehova, porque debe kita evita tene sobra confianza na cuerpo? (b) Cosa kita hay discuti na este articulo?

³ Debe kita evita tene sobra confianza na cuerpo. Deverasan, determinao kita que nunca hace el maga cosas que ta hace triste con Jehova. Pero, pronto lang kita cae na tentacion cay maga imperfecto kita. (Roma 5:12; 7:21-23) Baka bigla lang, puede kita enfrenta maga situacion que dol quierre kita hace si cosa el malo. Para esta leal con Jehova y na de suyu Anak, debe kita sigui con el consejo de Jesus que esta  alerto para gendeh cae na tentacion. Este articulo puede ayuda kanaton para hace se. Una, hay considera kita si na cosa maga situacion kita debe esta alerto. Despues, hay discuti kita si cosa kita hace para gendeh cae na tentacion. Na uliji, hay considera kita si paquemodo esta alerto.

NA COSA MAGA SITUACION KITA DEBE ESTA ALERTO?

4-5. Porque kita debe evita hace maskin con el maga diutay culpa?

⁴ Maskin el maga diutay culpa puede afecta na diaton relacion con Jehova. Y puede este guia kanaton que comete mas serioso culpa.

⁵ Todo kita ta enfrenta maga tentacion para comete culpa. Pero tiene maga cosas que donde mahina el cada uno kanaton. Por ejemplo, el un persona posible ta enfrenta tentacion que comete sexual imoralidad. El otro posible ta hace grande esfuerzo para evita hace maga mabuling practica, igual na masturbacion o mirada de pornografia. Posible el otro tan dificil quita con el miedo na gente, orgullo, rabia y otro pa. Como cosa ya habla si Santiago, “el ta tenta con el gente amo el maga mal deseo del disuyo mismo cuerpo.”—Sant. 1:14.

6. Na cosa kita debe queda honesto?

⁶ Sabe ba tu si na onde tu mahina? Bien peligroso si ta pensa kita que nuay kita mal inclinacion o que gendeh kita cae na tentacion cay bien fuerte kita. (1 Juan 1:8) Gane, ya habla si Pablo que maskin aquellos “maga gente espiritual” posible siempre cae na tentacion si gendeh sila esta alerto. (Gal. 6:1) Debe kita queda honesto na diaton mismo cuerpo y admiti que tiene maga cosas que mahina kita.—2 Cor. 13:5.

7. Na onde kita debe dale mas atencion? Ilustra.

⁷ Si ya puede kita identifica si na onde kita mahina, cosa kita debe hace? Hace esfuerzo para resisti con ese. Para ilustra: Na tiempo de Biblia, el maga grande puerta amo el de con todo mahina parte del ciudad. Poreso, manada guardia el ta vicia alli. Na igual manera, debe kita dale mas atencion na maga cosas que donde kita mahina.—1 Cor. 9:27.

SI PAQUEMODO RESISTI TENTACION

8-9. Paquemodo era ya puede evita comete serioso culpa el joven hombre que ya menciona na Proverbio capitulo 7? (Proverbio 7:8, 9, 13, 14, 21)

⁸ Cosa kita hace para gendeh kita cae na tentacion? Considera si cosa kita puede aprende con el joven hombre que ya menciona  na Proverbio capitulo 7. Ya comete le sexual imoralidad na un imoral mujer. Ya menciona na versiculo 22 que este joven hombre “bigla lang” ya sigui con el mujer. Pero el maga versiculo antes con ese ta dale mira que tiene le cosa ya hace que hinay-hinay ya causa con ele para comete culpa.

⁹ Cosa le ya hace antes le ya comete serioso culpa? Una, cuando denoche ya, “ya pasa le na calle cerca na casa del [imoral] mujer.” Despues, ya camina le para na direccion del casa de este. (Le con el Proverbio 7:8, 9.) Acabar, cuando ya mira le con el mujer, nuay le disvia. Sino, ya deja le que besa este con ele. Mas pa, ya oi le mientras ta habla el mujer que hay ofrece este maga ofrecimiento de paz, posible para dale mira que gendeh le mal persona. (Le con el Proverbio 7:13, 14, 21.) Si ya evita lang era el joven hombre con este maga peligro, nuay era le cae na tentacion y comete serioso culpa.

10. Paquemodo el un persona ahora puede hace el kamali que ya hace el joven hombre?

¹⁰ Este istoria ta dale mira si cosa puede sucede con el un siervo de Jehova. Posible ya comete le serioso culpa y ya sinti que “bigla lang” se ya sucede. Pero si pensa le enbuenamente acerca na cosa ya sucede, posible puede le realiza que tiene le maga cosas que ya hace gendeh justo antes le ya comete serioso culpa. Posible ya tiene le maga gendeh buen amigo, ya iscuji maga gendeh buen entretenimiento, ya visita na maga cuestionable website o ya anda na maga lugar que gendeh bueno para na maga Cristiano. Posible tambien que nuay mas ya le reza, le con el Biblia, atende maga miting o participa na ministerio. Igual na joven hombre que ya menciona na Proverbio, el de suyu culpa nuay lang basta “bigla” ya sucede.

11. Para gendeh comete serioso culpa, cosa kita debe evita?

¹¹ Cosa el leccion para kanaton? Debe kita evita gendeh lang con el culpa sino pati el maga cosas que ta guia para culpa kita. Ya hace claro si Solomon con ese leccion despues le relata con el istoria del joven hombre y del imoral mujer. Ya dale le aviso acerca con el mujer: “No pasa na de suyu maga camino.” (Prov. 7:25) Y ya habla pa gane si Solomon: “Desaleja con ele; no anda cerca na entrada del de suyu casa.” (Prov. 5:3, 8) Puede kita evita comete serioso culpa si desaleja kita na maga situacion que puede causa kanaton para hace se. b Incluido aqui el maga cosas que gendeh malo para na maga Cristiano pero puede causa kanaton para cae na tentacion.—Mat. 5:29, 30.

12. Na cosa ya queda determinao si Job y paquemodo se puede ayuda con ele para evita culpa? (Job 31:1)

¹² Para evita con el maga situacion que puede causa kanaton para culpa, debe kita queda determinao que evita maga tentacion. Ese el cosa ya hace si Job. ‘Ya hace le contrata na de suyu ojos’ que nunca mira con el otro maga mujer con mal deseo. (Le con el Job 31:1.) Ese conviccion puede ayuda con ele que evita comete adulterio. Debe tambien kita queda determinao que evita con el maskin cosa que puede causa kanaton para cae na tentacion.

13. Porque kita debe queda con cuidao na cosa kita ta pensa? (Mira tambien con el maga letrato.)

¹³ Debe tambien kita queda con cuidao na cosa kita ta pensa. (Ex. 20:17) El cuanto ta creé que gendeh malo que pensa acerca na maga gendeh justo deseo basta gendeh se  ta hace el un individual. Pero gendeh justo ese clase de pensamiento. El un persona quien pirmi ta pensa maga mal cosas ta hace fuerte con el de suyu mal deseo. Si hace le con ese, mas man dificil ya le resisti maga tentacion. Deverasan, tiene vez ta puede kita pensa maga gendeh buen cosas. Si sucede se, cambia dayun con el cosa tu ta pensa y pensa maga buen cosas. Como resulta, puede kita evita comete serioso culpa cay nuay kita permiti con el gendeh justo pensamiento que hace mas fuerte con el diaton deseo.—Fil. 4:8; Col. 3:2; Sant. 1:13-15.

14. Cosa pa el puede ayuda kanaton para puede evita tentacion?

¹⁴ Cosa pa el otro cosa que puede kita hace para puede evita tentacion? Debe kita queda bien convincido que pirmi tiene beneficio si ta obedece con el maga ley de Jehova. Tiene vez, posible dificil para kanaton que pensa y sinti harmonia na cosa quierre si Jehova. Pero gendeh gayot sayang el diaton esfuerzo cay hay queda kita deverasan alegre y tene kita paz na pensamiento.

15. Si cultiva kita maga justo deseo, paquemodo se puede ayuda kanaton para resisti tentacion?

¹⁵ Debe kita cultiva maga justo deseo. Si aprende kita “odia si cosa el malo y ama si cosa el bueno,” mas queda kita determinao que hace si cosa el justo y evita maga situacion que puede causa kanaton para culpa. (Amos 5:15) Si tiene kita justo deseo, mas puede kita resisti tentacion si talli kita na maga situacion que gendeh kita ta expecta.

16. Porque el maga espiritual actividad puede ayuda kanaton evita maga tentacion? (Mira tambien con el maga letrato.)

¹⁶ Paquemodo kita puede cultiva justo deseo? Debe kita queda ocupao na maga espiritual actividad. Si talli kita na maga miting o na ministerio, mas ta queda fuerte el diaton deseo que hace alegre con Jehova y gendeh kita pronto cae na tentacion. (Mat. 28:19, 20; Heb. 10:24, 25) Si ta le y ta estudia  kita con el Palabra del Dios y ta medita con ese, mas ta queda fuerte el diaton amor na cosa el bueno y mas ta odia kita si cosa el malo. (Jos. 1:8; Sal. 1:2, 3; 119:97, 101) Acorda que ya habla si Jesus con el de suyu maga dicipulo: “Esta despierto y reza para gendeh ustedes ay cai na tentacion.” (Mat. 26:41) Si ta dale kita tiempo para reza con el diaton Tata na cielo, ta permiti kita con ele que ayuda kanaton y ta hace kita fuerte con el diaton determinacion para hace alegre con ele.—Sant. 4:8.

ESTA ALERTO

17. Cosa mal inclinacion el nuay dayun puede quita si Pedro?

¹⁷ Posible, ya puede ya kita quita con el cuanto del diaton maga mal inclinacion. Pero posible el cuanto de ese ta continua siempre kita resisti. Considera con el experiencia de apostol Pedro. Por causa na de suyu miedo na gente, ya desconoce le con Jesus tres beses. (Mat. 26:69-75) Dol ya puede ya quita si Pedro con ese miedo cuando con coraje le ya predica adelante del Sanhedrin. (Act. 5:27-29) Pero despues del cuanto año, ya descanza le come junto con el maga Gentil Cristiano cay ya “tiene le miedo con [el] grupo de maga Judio.” (Gal. 2:11, 12) Ya bira el miedo de Pedro. Posible nuay pa gayot le siempre puede quita con ese.

18. Cosa posible sucede na cuanto del diaton mal tendencia?

¹⁸ Posible tambien kita experiencia igual ansina. Paquemodo? Baka tiene kita un mal tendencia que pensaba kita ya puede ya kita completamente quita. Por ejemplo, el un hermano ya admiti: “Nuay mas yo mira pornografia por diez año y asigurao yo que nuay mas ya yo problema acerca con ese. Pero, dol igual na un peligroso animal el de mio adiccion y ta espera lang el justo tiempo para ataca.” Bueno ya lang ya continua le resisti con ese. Ya realiza le que tiene le cosa debe hace cada dia para resisti con ese y posible necesita le se hace mientras ta vivi na este daan sistema. Na ayuda del de suyu mujer y del maga anciano na congregacion, mas ya hace le grande esfuerzo para resisti con el pornografia.

19. Cosa kita puede hace si tiene kita un mal inclinacion que nuay pa kita puede completamente quita?

 ¹⁹ Cosa puede ayuda kanaton para gendeh hace con el un cosa que ta pricura kita resisti? Debe kita sigui con el consejo de Jesus que esta alerto. Maskin pa na maga tiempo que ta sinti tu que fuerte tu, continua evita maga situacion que puede guia na tentacion. (1 Cor. 10:12) Continua hace el maga cosas que puede ayuda contigo resisti maga tentacion. El Proverbio 28:14 ya habla: “Alegre el gente quien pirmi alerto.”—2 Ped. 3:14.

MAGA BENDICION SI TA ESTA ALERTO

20-21. (a) Cosa el maga bendicion si continua kita resisti tentacion? (b) Si continua kita resisti tentacion, cosa hace si Jehova? (2 Corinto 4:7)

²⁰ Puede kita asigura que gendeh gayot sayang el diaton esfuerzo si esta kita alerto y resisti maga tentacion. Temporario lang el “maga alegria que ta sale na pecado” pero si ta sigui kita con el maga principio de Jehova, queda kita mas alegre. (Heb. 11:25; Sal. 19:8) Porque? Cay ya diseña kanaton para vivi asegun na de suyu maga principio. (Gen. 1:27) Como resulta, puede kita tene limpio conciencia y tene vida hasta para cuando na futuro.—1 Tim. 6:12; 2 Tim. 1:3; Jud. 20, 21.

²¹ Deverasan, “el cuerpo maluya.” Pero gendeh este quierre decir que nuay mas ya kita cosa puede hace. Pirmi preparao si Jehova para ayuda kanaton. (Le con el 2 Corinto 4:7.) Acorda que grande poder el cosa ta dale el Dios kanaton. Pero debe kita una usa con el diaton mismo poder para resisti tentacion—quierre decir, debe kita hace esfuerzo cada dia. Si hace kita con ese, puede kita asigura que hay contesta si Jehova con el diaton maga rezo y dale le kanaton el omento fuerza que necesita kita. (1 Cor. 10:13) Na ayuda de Jehova, puede kita esta alerto y resisti tentacion.