1-2. Quien si Sadoc? (1 Cronicas 12:22, 26-28)

 IMAGINA con el un grupo de mas de 340,000 hombre. Yan junto-junto sila para hace rey con David na entero Israel. Por tres dia, ya esta sila na maga gulud cerca na Hebron. Alegre sila alla tan cuento y ta canta maga cancion de alabanza. (1 Cron. 12:39) Na ese monton de maga gente, posible gendeh puede nota con el un joven hombre que el nombre Sadoc. Pero, ya asigura si Jehova que puede kita sabe que talla si Sadoc. (Le con el 1 Cronicas 12:22, 26-28.) Quien si Sadoc?

² Si Sadoc amo un sacerdote quien ya sirvi junto con el alto sacerdote que si Abiatar. Ya dale tambien con Sadoc grande sabeduria y el abilidad para entende el voluntad del Dios. (2 Sam. 15:27) Ta anda el maga gente con Sadoc para pidi consejo. Animoso tambien le. Na este articulo, hay aprende kita si paquemodo ya dale mira animo si Sadoc.

3. (a) Porque necesita tene animo el maga siervo de Jehova? (b) Cosa kita discuti na este articulo?

³ Na este ultimo maga dia, mas ta pricura ataca si Satanas con el maga siervo del Dios. (1 Ped. 5:8) Poreso, necesita kita tene animo mientras ta espera si cuando destroza si Jehova con Satanas y con el de suyu mal sistema. (Sal. 31:24) Considera kita ahora tres manera que puede kita imita con el coraje de Sadoc.

 SUPORTA CON EL REINO DEL DIOS

4. Porque necesita coraje el maga siervo de Jehova para puede suporta con el Reino del Dios? (Mira tambien con el letrato.)

⁴ Ciendo maga siervo kita de Jehova, con todo corazon kita ta suporta con el Reino del Dios. (Mat. 6:33) Pero, necesita kita coraje para puede hace con ese. Por ejemplo, necesita kita coraje para sigui con el maga principio de Jehova y para predica con el buen noticia. (1 Tes. 2:2) Necesita tambien kita coraje para esta neutral na este mundo que dividido por causa na politica. (Juan 18:36) Manada del maga siervo de Jehova el ya experiencia fisical abuso, problema na financial o yan preso cay nuay sila participa na politica o suporta na militar.

5. Porque necesita animo si Sadoc para puede suporta con David?

⁵ Nuay anda na Hebron si Sadoc para lang celebra cay ya queda ya rey si David. Armao le ya anda alla y preparao para na guerra. (1 Cron. 12:38) Preparao le sigui con David na guerra y defende con el Israel contra na maga enemigo de este. Maskin pa posible falta el experiencia de Sadoc na guerra, bien animoso le.

6. Porque si David un buen ejemplo de coraje para con Sadoc? (Salmo 138:3)

⁶ Ciendo un sacerdote si Sadoc, paquemodo le ya aprende queda animoso? Manada le conoce maga hombre quien mafuerza y animoso, y asigurao ya puede quel ayuda con ele. Por ejemplo, ya suporta con David el todo maga Israelita cay con coraje le ya “encabeza con el Israel na guerra.” (1 Cron. 11:1, 2) Pirmi ya depende si David na ayuda de Jehova para hace perde con el de suyu maga enemigo. (Sal. 28:7; le con el Salmo 138:3.) Tiene pa otro maga animoso hombre quien ya dale buen ejemplo con Sadoc. El cuanto de ese amo kanda Jehoiada, de  este anak que si Benaias y el otro 22 jefe del tribo quien ya suporta con David. (1 Cron. 11:22-25; 12:26-28) Determinao este maga hombre que hace rey con David y protege con ele.

7. (a) Paquemodo ya dale mira coraje el maga jovenes na moderno tiempo? (b) Base na video, cosa tu ya aprende na ejemplo de Hermano Nsilu?

⁷ Hay tene kita fuerza y coraje si considera kita con el ejemplo de aquellos quien ya suporta con el rulanza de Jehova. El diaton Rey, si Cristo Jesus, nuay gayot queda parte del politica de este mundo. (Mat. 4:8-11; Juan 6:14, 15) Ya tiene le coraje cay pirmi le ta confia con Jehova. Manada tambien maga joven hombre na diaton tiempo ahora el nuay participa na maga actividad que tiene que hace na politica o na militar. Puede tu le con el diila experiencia na jw.org. a

AYUDA CON EL DE TUYU MAGA HERMANO

8. Cuando posible necesita coraje el maga anciano para puede ayuda con el maga hermano?

⁸ El maga siervo de Jehova bien quierre ayuda con uno y otro. (2 Cor. 8:4) Pero tiene vez, necesita sila coraje para puede hace con ese. Por ejemplo, si tiene guerra na diila lugar, sabe el maga anciano que el diila maga hermano y hermana necesita comforta, suporta y posible espiritual o material provision. Cay ta ama sila con el maga carnero, preparao el maga anciano que pone na peligro con el diila vida para puede ayuda con este maga hermano y hermana. (Juan 15:12, 13) Si ta hace este el maga anciano, ta sigui sila con el ejemplo de Sadoc.

9. Base na 2 Samuel 15:27-29, cosa ya manda si David con Sadoc? (Mira tambien con el letrato.)

⁹ Na peligro el vida de David. El de suyu anak que si Absalom bien quierre rebata el reino con ele. (2 Sam. 15:12, 13) Poreso, necesita dayun sale si David na Jerusalem! Ya  habla le con el de suyu maga siervo: “Sale ya kita cay si gendeh, nuay ni uno kanaton el puede escapa con Absalom!” (2 Sam. 15:14) Cuando ta sale ya el maga siervo, ya puede realiza si David que debe tiene quien hay esta para informa con ele acerca na plano de Absalom. Poreso, ya habla le con Sadoc y con el otro maga sacerdote que bira na ciudad para queda maga espia. (Le con el 2 Samuel 15:27-29.) Bien peligroso el cosa ya manda si David con este maga sacerdote. Poreso, necesita sila queda bien con cuidao. Bien violente, orgulloso y traidor si Absalom. Imagina si cosa le hace con Sadoc y con el otro maga sacerdote si sabe le que tan espia sila con ele para protege con David!

10. Paquemodo ya protege si Sadoc y el de suyu maga uban con David?

¹⁰ Ya hace un plano si David donde necesita le el ayuda de Sadoc y del de suyu otro leal amigo que si Husai. (2 Sam. 15:32-37) Ya pretende si Husai que ta suporta le con Absalom y ya dale idea con este si paquemodo ataca con David. Por causa con ese, ya tiene tiempo si David que prepara para na guerra. Despues, ya informa si Husai con kanda Sadoc y Abiatar acerca na plano de Absalom. (2 Sam. 17:8-16) Acabar, ese dos hombre ya informa tambien con David acerca con este plano. (2 Sam. 17:17) Na ayuda de Jehova, ya puede protege si Sadoc y el de suyu maga uban sacerdote con el vida de David.—2 Sam. 17:21, 22.

11. Paquemodo kita puede imita con el animo de Sadoc mientras ta ayuda con el diaton maga hermano?

¹¹ Si tiene peligro y ya pidi kanaton que ayuda con el diaton maga hermano, paquemodo kita puede dale mira animo igual con Sadoc? (1) Sigui na maga direccion. Na ese maga situacion, bien importante que esta kita unido. Sigui con el maga instruccion estaba na branch office. (Heb. 13:17) Debe regular man  repaso el maga anciano con el maga direccion acerca si paquemodo prepara para na maga calamidad y si cosa hace si tiene calamidad. (1 Cor. 14:33, 40) (2) Queda animoso pero con cuidao. (Prov. 22:3) Pensa enbuenamente antes actua. No basta pone na peligro con el de tuyu vida. (3) Confia con Jehova. Acorda que bien interesao si Jehova contigo y con el de tuyu maga hermano. Puede le ayuda contigo para asisti con el de tuyu maga hermano na safe manera.

12-13. Cosa tu ya aprende na experiencia de Viktor y Vitalii? (Mira tambien con el letrato.)

¹² Considera con el experiencia de Viktor y Vitalii, dos hermano quien yan voluntario lleva comida y agua na maga hermano y hermana na Ukraine. “Ya busca kame onde puede saca comida,” ya habla si Viktor. “Ta puede kame oi tirajan alrededor kanamon. Tiene un hermano quien tiene manada supply el ya dona comida. Ya puede este ayuda con el manada publisher para tiene que come por cuanto tiempo. Cuando ta pone kame con el maga comida na diamon truck, tiene ya cae bomba maga 20 metro lang de lejos kanamon. Na ese dia, manada beses yo ya pidi con Jehova que dale conmigo coraje para puede yo continua ayuda con el maga hermano y hermana.”

¹³ “Necesita yo coraje,” ya habla si Vitalii. “Ya alcanza 12 hora el de mio primer viaje. Na ese maga tiempo, ya reza yo con Jehova.” Animoso si Vitalii pero con cuidao tambien le. Ele ya omenta: “Pirmi yo ta pidi con Jehova que dale conmigo sabeduria y ayuda conmigo queda modesto. Ta pasa lang yo na maga camino que ya permiti el maga autoridad. Ya queda fuerte el de mio fe cuando ya mira yo si paquemodo tan ayudajan el maga hermano y hermana. Ya quita sila con el maga sanggadura na camino, ya colecta ayuda y ya pone se na diamon truck, y ya dale kanamon comida y lugar onde puede descanza.”

ESTA LEAL CON JEHOVA

14. Cosa el efecto kanaton si ya deja con Jehova el un persona con quien kita ta ama?

¹⁴ El uno na maga de con todo dificil probanza amo si ya deja con Jehova el diaton miembro de familia o diaton cerca amigo. (Sal. 78:40; Prov. 24:10) Si mas close kita con el persona, mas dificil para kanaton que acepta con el situacion. Si ya puede tu experiencia igual ansina, puede anima contigo el lealtad que ya dale mira si Sadoc.

15. Porque necesita coraje si Sadoc para puede esta leal con Jehova? (1 Rey 1:5-8)

¹⁵ Ya esta leal si Sadoc con Jehova maskin pa el de suyu cerca amigo que si Abiatar ya iscuji deja con Jehova. Ya sucede este na fin del rulanza de David. Cuando de edad ya si David y pamurida ya, ya pricura rebata el de suyu anak que si Adonias con el trono que ya promete dale si Jehova con Solomon. (1 Cron. 22:9, 10) Ya suporta si Abiatar con Adonias. (Le con el 1 Rey 1:5-8.) Claro que nuay esta leal si Abiatar—gendeh lang con David sino pati con Jehova! Ta puede ba tu imagina si paquemodo de triste y desmayao si Sadoc na cosa ya sucede? Junto sila ya sirvi de Abiatar como maga sacerdote por maga cuatro decada. (2 Sam. 8:17) Junto tambien sila na assignment que tiene que hace na “Arca del verdadero Dios.” (2 Sam. 15:29) Ya suporta sila con el rulanza de David y ya hace manada cosas na servicio con Jehova.—2 Sam. 19:11-14.

16. Cosa posible ya ayuda con Sadoc para esta leal?

¹⁶ Ya esta leal si Sadoc con Jehova maskin pa na decision que ya hace si Abiatar. Asigurao si David que leal con ele si Sadoc. Cuando  ya sabe si David el plano de Adonias, ya pidi le con Sadoc, Natan y Benaias que hace rey con Solomon. (1 Rey 1:32-34) Asigurao que ya puede anima con Sadoc que esta fiel cay yan junto le con el maga leal siervo de Jehova, igual con Natan y otro pa quien ya suporta con Rey David. (1 Rey 1:38, 39) Cuando ya queda rey si Solomon, “ya iscuji [le] con el sacerdote que si Sadoc encambio con Abiatar.”—1 Rey 2:35.

17. Paquemodo tu puede imita con Sadoc si ya deja con Jehova el un persona con quien tu ta ama?

¹⁷ Paquemodo tu puede imita con Sadoc? Si ya deja con el verdad el un persona con quien tu ta ama, dale mira que ta iscuji tu queda leal con Jehova. (Jos. 24:15) Hay dale Le contigo el fuerza y coraje que necesita tu. Reza con Jehova y esta cerca na de suyu maga leal siervo. Ta aprecia gayot si Jehova con el de tuyu lealtad y hay bendici le contigo.—2 Sam. 22:26.

18. Cosa tu ya aprende na experiencia de Marco y Sidse?

¹⁸ Considera con el ejemplo de Marco y del de suyu mujer que si Sidse. El diila dos adulto anak mujer ya deja con Jehova. Si Marco ya habla: “Desde ya nace el de tuyu maga anak, bien grande el de tuyu amor para kanila. Preparao tu hace el maskin cosa para protege kanila. Poreso, ya sinti gayot kame duele cuando ya iscuji sila deja con Jehova.” Ele ya omenta: “Pero pirmi kanamon junto si Jehova. Ya asigura le que si mahina yo, fuerte el de mio mujer y si mahina le, iyo tambien el fuerte.” Si Sidse ya habla: “Gendeh gayot kame puede aguanta si nuay kanamon dale si Jehova el fuerza que necesita kame. Ya disculpa yo con el de mio mismo cuerpo poreso ya habla yo con Jehova si cosa yo ta sinti. Despues del cuanto dia, ya atraca conmigo el un hermana que cuanto año ya yo nuay mira. Ya agarra le con el de mio hombro, ya mira conmigo y ya habla: ‘Acorda tu Sidse que gendeh quel de tuyu culpa!’ Na ayuda de Jehova, ya puede yo mentena con el de mio alegria na servicio con ele.”

19. Cosa tu determinao hace?

¹⁹ Quierre si Jehova que queda animoso el todo de suyu maga siervo igual con Sadoc. (2 Tim. 1:7) Pero no quierre Le que confia kita na diaton mismo cuerpo sino con Ele. Poreso, si experiencia tu un situacion donde necesita tu coraje, pidi se con Jehova. Puede tu asigura que hace le contigo animoso igual na cosa le ya hace con Sadoc!—1 Ped. 5:10.