1. Cosa el de tuyu mirada na verdad?

 TA APRECIA gayot el maga siervo de Jehova con el verdad na Biblia. Alli base el diaton fe. (Roma 10:17) Ta creé kita que ya establicia si Jehova con el Cristiano congregacion para “guarda [con] el verdadero enseñanza de Dios.” (1 Tim. 3:15, El Nuevo Testamento) Y alegre kita somete con “aquellos quien ta guia” kanaton quien ta explica el verdad estaba na Biblia y ta dale direccion que harmonia na voluntad del Dios.—Heb. 13:17, NWT.

2. Asegun na Santiago 5:19, cosa posible sucede kanaton maskin pa ya aprende ya kita con el verdad?

² Maskin pa ya acepta kita con el verdad y sabe que necesita kita sigui con el guia estaba na organizacion del Dios, posible siempre kita disvia na verdad. (Le con el Santiago 5:19.) Quierre gayot si Satanas que perde el diaton confianza na Biblia o na direccion que ta ricibi kita estaba na organizacion del Dios.—Ef. 4:14.

3. Porque necesita kita continua obedece con el verdad? (Efeso 6:13, 14)

³ Le con el Efeso 6:13, 14. Gendeh dura, hay usa el Diablo maga propaganda para engaña con el todo nacion y influencia kanila para man contra con Jehova. (Rev. 16:13, 14) Sabe tambien kita que mas pricura pa gayot engaña si Satanas con el maga siervo de Jehova. (Rev. 12:9) Poreso, bien importante que aprende kita si paquemodo determina si verdad ba o  falso el un cosa y queda obediente na verdad. (Roma 6:17; 1 Ped. 1:22) Alli ta depende el diaton salvacion na grande tribulacion!

4. Cosa kita considera na este articulo?

⁴ Na este articulo, hay considera kita dos calidad que ayuda kanaton identifica con el verdad na Biblia y para acepta con el direccion estaba na organizacion. Despues, considera kita tres sugestion que debe kita hace para esta na verdad.

MAGA CALIDAD PARA PUEDE IDENTIFICA CON EL VERDAD

5. Paquemodo el miedo con Jehova puede ayuda kanaton para sabe si cosa el verdad?

⁵ Miedo con Jehova. Si tiene kita el justo miedo con Jehova, nunca kita hace el maskin cosa que hace triste con ele ciendo ta ama kita con ele. Quierre gayot kita aprende si cosa el diferencia entre del justo y mali, y entre del verdad y falso para puede ganá el favor de Jehova. (Prov. 2:3-6; Heb. 5:14) Gendeh kita debe permiti que queda mas grande el diaton miedo na gente contra na diaton amor con Dios, ciendo mas mucho na cosa ta hace alegre con el maga gente gendeh ta hace alegre con Jehova.

6. Paquemodo ya cambia con el verdad el diez Israelita por causa na miedo na gente?

⁶ Si mas fuerte el diaton miedo na gente contra con Dios, puede se causa kanaton para disvia na verdad. Considera con el ejemplo del 12 jefe quien ya anda man espia na tierra que ya promete si Jehova na maga Israelita. Mas grande el miedo del diez espia na maga Canaanita contra na diila amor para con Jehova. Ya habla sila con el diila maga uban Israelita: “Gendeh kita ganá contra kanila cay mas mafuerza sila contra kanaton.” (Num. 13:27-31) Deverasan, na mirada del maga gente mas mafuerza el maga Canaanita contra na maga Israelita. Pero cuando ya habla el diez espia que gendeh  sila ganá contra na diila contrario, nuay sila pensa con Jehova. Yan focus era sila si cosa quierre si Jehova que hace sila y ya medita tambien era sila si cosa ya puede hace si Jehova para kanila. Si ya hace se sila, ya puede era sila mira que nuay lang el maga Canaanita compara na poder de Jehova. Pero, otro si Josue y Caleb con aquel diez espia. Ya habla sila con el maga Israelita: “Si tiene kita el favor de Jehova, hay lleva gayot le kanaton na aquel lugar y dale le quel kanaton.”—Num. 14:6-9.

7. Cosa kita hace para queda mas grande el diaton miedo con Jehova? (Mira tambien con el letrato.)

⁷ Para queda mas grande el diaton miedo con Jehova, necesita kita considera con ele cada vez kita ta hace decision. (Sal. 16:8) Si ta le tu un istoria na Biblia, pregunta na de tuyu mismo cuerpo, ‘Si iyo el talli na ese situacion, cosa yo hace?’ Por ejemplo, imagina que talla tu cuando ya habla el diez espia que gendeh puede ganá el maga Israelita contra na maga Canaanita. Hay creé ba tu kanila y tiene miedo na gente o hace tu si cosa quierre si Jehova cay ta ama tu con ele? Nuay puede realiza el maga Israelita que verdad el cosa ya habla si Josue y Caleb. Como resulta, nuay sila puede entra na Tierra Prometido.—Num. 14:10, 22, 23.

8. Cosa calidad kita debe pricura cultiva y porque?

⁸ Humildad. Ta revela si Jehova con el verdad na maga humilde. (Mat. 11:25) Humilde kita ya acepta el ayuda del otro para aprende con el verdad. (Act. 8:30, 31) Maskin pa ansina, debe kita queda con cuidao para gendeh kita queda orgulloso. Si orgulloso kita, baka pensa kita que el diaton maga opinion igual de justo na maga principio na Biblia y na maga direccion estaba na organizacion de Jehova.

9. Cosa kita hace para esta humilde?

⁹ Para esta humilde, necesita kita acorda si paquemodo kita de diutay compara con Jehova. (Sal. 8:3, 4) Puede tambien kita reza que ayuda kanaton queda humilde. Si hace kita se, hay ayuda kanaton si Jehova para realiza que mas importante el cosa le ta pensa contra na cosa kita ta pensa. Na de tuyu lehida del Biblia, mira maga evidencia que ta dale mira que ta aprecia si Jehova con el humildad y ta odia le con el orgullo. Y si ricibi tu privilegio donde posible mas puede nota contigo el otro, pricura esta humilde.

SI PAQUEMODO KITA ESTA NA VERDAD

10. Con quien ya usa si Jehova para dale instruccion y direccion na de suyu maga siervo?

¹⁰ Continua confia na direccion del organizacion. Ya usa si Jehova con Moises y despues con Josue para dale maga instruccion na De Suyu maga siervo na tiempo del Israel. (Jos. 1:16, 17) Ya bendici con el maga Israelita cay ya mira sila con este maga hombre como representante de Dios Jehova. Cuanto siglo despues, cuando primer vez ya establicia con el Cristiano congregacion, el 12 apostoles el ta dale direccion. (Act. 8:14, 15) Nuay dura, ya queda tambien parte de ese grupo el otro maga anciano na Jerusalem. Cay ya sigui el maga congregacion con el direccion estaba con este maga fiel hombre, ya “queda mas fuerte el diila fe y el diila maga miembro ta omenta cada dia.” (Act. 16:4, 5) Ahora, ta bendici tambien kanaton si Jehova cay ta sigui kita na maga direccion estaba na de suyu organizacion. Pero cosa sinti si Jehova si gendeh kita respeta con aquellos con quien le ya iscuji para guia kanaton? Hay sabe kita el contestacion de ese  si considera kita si cosa ya sucede cuando ta viaja el maga Israelita para na Tierra Prometido.

11. Cosa ya sucede con aquellos ya cuestiona con Moises y na papel que ya dale con ele si Jehova? (Mira tambien con el letrato.)

¹¹ Cuando tan viaje el maga Israelita para na Tierra Prometido, ya cuestiona el cuanto con Moises y con el papel que ya dale con ele si Jehova. Ya habla sila: “Sagrao el entero nacion [gendeh lang si Moises] y junto kanila si Jehova.” (Num. 16:1-3) Deverasan, sagrao “el entero nacion” para con Jehova pero ya iscuji le con Moises para guia con el De Suyu maga siervo. (Num. 16:28) Cuando ya cuestiona sila con Moises, el deverasan, con Jehova sila ya cuestiona. Nuay sila man focus na cosa quierre si Jehova sino yan focus sila na cosa sila quierre—tene autoridad y queda prominente. Ya destroza el Dios con aquellos ta guia con el rebellon y con el miles quien ya suporta kanila. (Num. 16:30-35, 41, 49) Puede tambien kita asigura ahora que gendeh aceptable con Jehova aquellos quien gendeh ta sigui na maga arreglamiento del de suyu organizacion.

12. Porque puede kita continua confia na organizacion de Jehova?

¹² Puede kita continua confia na organizacion de Jehova. Si tiene cambio que necesita hace na diaton entendimiento na un verdad na Biblia o si paquemodo ta organiza con el diaton trabajo, gendeh tan alang-alang hace con ese aquellos quien ta guia na diaton organizacion. (Prov. 4:18) Ta hace sila con ese cay quierre sila hace alegre con Jehova. Ta hace tambien sila el todo para man base el diila maga decision na Palabra del Dios—el modelo onde debe sigui el todo maga siervo de Jehova.

13. Na cosa ta refiri el ‘modelo de buen enseñanza’ y cosa kita debe hace con ese?

¹³ “Sigui . . . , como el dituyo modelo, el buen insiñanza que ya oi tu.” (2 Tim. 1:13) El  ‘modelo de buen enseñanza’ ta refiri con el maga enseñanza del maga Cristiano que puede incuntra na Biblia. (Juan 17:17) Ese maga enseñanza amo el basejan del todo cosa kita ta creé. Ya enseña kanaton el organizacion de Jehova que esta na ese maga enseñanza. Si hace kita con ese, hay bendici kanaton si Jehova.

14. Na cosa manera el cuanto Cristiano ya disvia na ‘modelo de buen enseñanza’?

¹⁴ Cosa posible sucede si disvia kita na ‘modelo de buen enseñanza’? Considera con el un ejemplo. Del primer siglo, el cuanto maga Cristiano ya hace calayat maga istoria que ya llega ya el dia de Jehova. Posible tiene sila ya ricibi carta acerca con ese que pensaba sila si apostol Pablo el ya escribi. El cuanto maga Cristiano na Tesalonica ya creé con ese istoria y gane ya habla pa se con otro maskin nuay sila chequia si deverasan ba ese. Nuay era kanila puede engaña si ya acorda sila el maga cosas que ya enseña kanila si Pablo cuando junto pa le kanila. (2 Tes. 2:1-5) Poreso, ya conseja si Pablo con el de suyu maga hermano que no basta creé con el todo cosa sila ya oi. Y para gendeh mas kanila puede engaña otravez, ya habla si Pablo na fin del de suyu segundo carta para na maga de Tesalonica: “Ta imvia yo este saludo escribido por el dimio mismo mano. Yo, si Pablo. Este amo el señal que ta dale mira si deverasan dimio el carta. Ansina el forma del dimio escribida.”—2 Tes. 3:17.

15. Cosa kita hace para gendeh sale engañao na maga falso istoria que dol deverasan? Dale un ejemplo. (Mira tambien con el maga letrato.)

¹⁵ Cosa kita puede aprende na maga palabra de Pablo para na maga de Tesalonica? Si tiene kita cosa ya puede oi que gendeh harmonia na cosa kita ya aprende na Biblia o ya sabe maga istoria que dol maka-espanta, necesita kita pensa enbuenamente. Na Soviet Union de antes, ya hace pasa carta el diaton maga enemigo que dol ta sale estaba na world headquarters. Este carta ya anima con el cuanto maga hermano que forma un separtao y independiente organizacion. Dol deverasan el carta. Pero, nuay creé con ese  el maga fiel hermano. Ya puede sila realiza que el cosa ya habla na carta gendeh uyun na cosa kanila ya enseña. Ahora, ta usa el diaton maga enemigo con el moderno tecnologia para hace libug kanaton y causa division. En vez “queda dayun trambulicao,” considera una si el cosa kita ya oi o ya le harmonia na verdad que ya puede kita aprende. Como resulta, gendeh kita sale engañao.—2 Tes. 2:2, El Nuevo Testamento; 1 Juan 4:1.

16. Asegun na Roma 16:17, 18, cosa kita debe hace si tiene quien ya disvia na verdad?

¹⁶ Esta unido na maga leal siervo de Jehova. Quierre el Dios que queda kita unido na diaton adoranza. Si esta kita na verdad, hay esta tambien kita unido. Aquellos quien ta disvia na verdad ta causa division na congregacion. Poreso, ya dale aviso kanaton el Dios que “desaleja canila.” Cay si gendeh kita se hace, baka hay disvia tambien kita na verdad.—Le con el Roma 16:17, 18.

17. Cosa el maga beneficio si sabe kita identifica con el verdad y esta alli?

¹⁷ Si sabe kita identifica con el verdad y esta alli, hay esta kita cerca con Jehova y puede mentena fuerte fe. (Ef. 4:15, 16) Gendeh tambien kita sale engañao na maga falso enseñanza y propaganda de Satanas, y hay protege kanaton si Jehova durante el grande tribulacion. Continua esta na verdad y “el Dios de paz ay esta [kanaton].”—Fil. 4:8, 9.