1-2. Cosa ta habla el Biblia acerca na cuanto rey de Israel?

 YA MENCIONA el Biblia mas de 40 hombre quien ya queda maga rey de Israel. a Ya revela tambien este cuanto detalle acerca kanila. Por ejemplo, maskin el maga buen rey ya hace maga mal cosas. Considera con el ejemplo de Rey David. Si Jehova ya habla: “De mio siervo que si David . . . ya sigui conmigo con todo corazon; pirmi le ta hace si cosa el justo na de mio ojos.” (1 Rey 14:8) Pero, ese gente ya comete sexual imoralidad na un casao mujer y ya plaña le para muri el marido de este na guerra.—2 Sam. 11:4, 14, 15.

² Manada tambien del maga gendeh fiel rey el ya hace maga buen cosas. Considera con el ejemplo de Rey Rehoboam. Na ojos de Jehova, “ya hace le si cosa el malo.” (2 Cron. 12:14) Pero, ya obedece si Rehoboam con el mandato del Dios que deja con el diez tribo que separta na de suyu reino. Ya hace tambien le fuerte con el maga ciudad del de suyu reino para protege con el maga siervo del Dios.—1 Rey 12:21-24; 2 Cron. 11:5-12.

3. Cosa kita puede pregunta y cosa kita discuti na este articulo?

³ Puede kita pensa con este pregunta: Si el maga rey de Israel ya hace maga malo y buen cosas, paquemodo ta determina si Jehova si fiel ba el un rey o gendeh? El contestacion na  ese pregunta hay ayuda kanaton entende si cosa ta expecta kanaton si Jehova. Hay discuti kita tres cosas que ya mira si Jehova con el maga rey de Israel: el condicion del diila corazon, si deverasan sila ya arripinti y si ya adora sila con Jehova na justo manera.

YA SIRVI SILA CON TODO CORAZON CON JEHOVA

4. Cosa el un diferencia entre del maga fiel rey y del maga gendeh fiel rey?

⁴ El maga fiel rey ya adora con Jehova con todo corazon. b El buen rey que si Josafat “ya busca con Jehova con todo corazon.” (2 Cron. 22:9) Acerca con Josias, el Biblia ya habla: “Nuay rey quien ya rula una con ele el igual con ele que ya bira con Jehova con todo de suyu corazon.” (2 Rey 23:25) Quetal si Solomon, quien ya hace si cosa el malo na uliji? “Nuay le sirvi con todo corazon con Jehova.” (1 Rey 11:4) Y acerca con el otro gendeh fiel rey que si Abiam, el Biblia ya habla: “Nuay le sirvi con todo corazon con Jehova.”—1 Rey 15:3.

5. Cosa quierre decir que sirvi con Jehova con todo corazon? Explica.

⁵ Cosa quierre decir que sirvi con Jehova con todo corazon? El un persona quien ta sirvi con todo corazon con Dios gendeh ta sirvi con Ele por causa lang cay debe le se hace. Sino, ta sirvi le con Dios por causa na de suyu amor y devocion. Mas pa, ta mentena le con ese amor y devocion na de suyu entero vida.

6. Cosa kita hace para puede continua ama con Jehova con todo corazon? (Proverbio 4:23; Mateo 5:29, 30)

⁶ Paquemodo kita puede imita con el maga fiel rey quien con todo corazon ya ama con Jehova? Puede se kita hace si evita kita con el maga mal influencia na diaton vida. Por ejemplo, el maga gendeh buen entretenimiento puede dividi con el diaton corazon. Peligroso tambien el mal asosacion y materialismo. Si ya puede kita sinti que ta principia ya queda mahina el diaton amor para con Jehova por causa na un cosa, debe dayun kita quita con ese.—Le con el Proverbio 4:23; Mateo 5:29, 30, NWT.

7. Porque importante que evita maga mal influencia?

⁷ Gendeh kita debe deja con el diaton corazon que queda dividido. Si gendeh kita con cuidao, baka pensa kita que basta ocupao lang kita na maga espiritual actividad, gendeh mas kita necesita evita maga mal influencia. Para ilustra: Imagina que bien caliente el sol apuera. Cuando ya llega tu na casa, ya abri tu con el aircon. Pero cosa sucede si deja lang tu abierto con el puerta? Hay entra siempre el calor estaba apuera. Puede kita compara con este na diaton relacion con Jehova. Gendeh bastante el maga espiritual comida que ta ricibi kita para queda mas cerca con ele. Igual si paquemodo no quierre kita entra el calor na diaton casa, no quierre tambien kita hace entra na diaton corazon con el maskin cosa que estaba na mundo.—Ef. 2:2.

YA ARRIPINTI SILA

8-9. Cosa ya hace si Rey David y si Rey Ezequias cuando ya corecta kanila? (Mira con el letrato.)

⁸ Como ya menciona enante, ya comete maga serioso culpa si Rey David. Pero cuando yan cuento con ele si profeta Natan acerca na de suyu culpa, humilde si David y ya arripinti. (2 Sam. 12:13) Na cosa le ya escribi na Salmo 51, claro kita puede sinti con el de suyu sincero arripintimiento. Nuay lang basta pretende si David que triste le na cosa le ya  hace para hace loco con Natan o para gendeh con ele castiga.—Sal. 51:3, 4, 17, superscripcion.

⁹ Ya culpa tambien si Rey Ezequias con Jehova. El Biblia ya habla: “Ya queda orgulloso el de suyu corazon poreso ya rabia con ele el Dios y con el Juda y Jerusalem.” (2 Cron. 32:25) Porque ya queda orgulloso si Ezequias? Posible cay ya tiene le bien manada riqueza, ya ganá le contra na maga Asiriano o cay ya queda le bueno na de suyu enfermedad. Posible que el de suyu orgullo el ya causa con ele para dale mira el de suyu riqueza na maga de Babilonia poreso ya confronta con ele si profeta Isaias. (2 Rey 20:12-18) Pero igual con David, humilde tambien si Ezequias y ya arripinti. (2 Cron. 32:26) Poreso, na ojos de Jehova, un fiel rey le quien ‘ya continua hace si cosa el justo.’—2 Rey 18:3.

10. Cosa ya hace si Rey Amazias cuando ya corecta con ele?

¹⁰ Gendeh igual con David y con Ezequias, si Rey Amazias de Juda ya hace si cosa el justo “pero gendeh con todo corazon.” (2 Cron. 25:2) Cosa el de suyu kamali? Despues con ele ayuda si Jehova para ganá contra con el maga Edomita, ya principia adora si Amazias con el diila maga dios. c Cuando ya corecta con ele el profeta de Jehova, nuay le oi con este.—2 Cron. 25:14-16.

11. Asegun na 2 Corinto 7:9, 11, cosa kita debe hace para perdona kanaton si Jehova? (Mira tambien con el maga letrato.)

¹¹ Cosa kita puede aprende na este maga ejemplo? Si ya puede kita comete culpa, debe kita arripinti y hace el todo para gendeh mas repiti con ese. Paquemodo si ya ricibi kita consejo estaba na maga anciano maskin na maga cosas que dol gendeh tanto importante? Gendeh kita debe sinti que gendeh kanaton ta ama si Jehova o tan contra kanaton el maga anciano. Maskin el maga buen rey de Israel ya ricibi maga consejo y coreccion. (Heb. 12:6) Poreso si ya corecta kanaton, debe kita (1) queda humilde, (2) hace maga necesita cambio y (3) continua sirvi con Jehova con todo corazon. Si arripinti kita, hay perdona kanaton si Jehova.—Le con el 2 Corinto 7:9, 11.

YA ADORA SILA CON JEHOVA NA JUSTO MANERA

12. Cosa pa el otro diferencia entre del maga fiel rey y del maga gendeh fiel rey?

¹² El maga fiel rey ya adora con Jehova na justo manera. Ya anima tambien sila con el maga gente que hace con ese. Como cosa kita ya discuti, yan kamali tambien sila. Pero, con Jehova lang sila ya adora y ya pricura pa gane quita con el idolatria na diila nacion. d

13. Porque ya considera si Jehova que gendeh fiel si Rey Ajab?

¹³ Quetal el maga rey con quien ya considera si Jehova como gendeh fiel? Asigurao que gendeh todo malo el cosa sila ya hace. Gane, maskin el mal rey que si Ajab ya queda humilde y ya arripinti na cosa ya sucede con Nabot. (1 Rey 21:27-29) Ya planta tambien le maga ciudad y ya ganá maga guerra para na Israel. (1 Rey 20:21, 29; 22:39) Pero tiene un cosa que ya hace si Ajab que bien malo. Bajo na influencia del de suyu mujer, ya suporta le  con el falso adoranza y ya anima con el maga gente que hace tambien con ese. Nuay gayot le arripinti con este culpa.—1 Rey 21:25, 26.

14. (a) Porque ya considera si Jehova que gendeh fiel si Rey Rehoboam? (b) Cosa mal cosa ya hace el mayoria del maga gendeh fiel rey?

¹⁴ Considera con el otro gendeh fiel rey—si Rehoboam. Como ya menciona enante, tiene le maga buen cosas que ya hace durante el de suyu rulanza. Pero cuando fuerte ya el de suyu reino, ya abandona le con el Ley de Jehova y ya suporta con el falso adoranza. (2 Cron. 12:1) Tiene maga tiempo, ta suporta le con el verdadero adoranza. Pero na otro tiempo, ta practica le con el falso adoranza. (1 Rey 14:21-24) Gendeh lang kanda Rey Rehoboam y Rey Ajab el ya disvia na verdadero adoranza. Gane, mayoria del maga gendeh fiel rey el ya adora na maga falso dios y ya anima con el maga gente que hace tambien con ese. Claro que na ojos de Jehova, ya considera le como fiel con el maga rey quien ya adora con ele na justo manera.

15. Porque bien importante con Jehova que adora con ele na justo manera?

¹⁵ Porque bien importante con Jehova que adora con ele na justo manera? El un razon amo cay responsibilidad del maga rey que ayuda con el maga siervo del Dios que adora con Ele na justo manera. Puera con ese, el falso adoranza ta causa con el maga gente para comete otro pa maga serioso culpa y hace maga mal cosas con otro. (Os. 4:1, 2) Mas pa, dedicao con Jehova el maga rey y el maga Israelita. Poreso cuando ya practica sila falso adoranza, dol aquel ya comete sila adulterio. (Jer. 3:8, 9) El un persona  quien ya comete adulterio ya hace gayot sinti duele con el de suyu marido o mujer. Na igual manera, el un dedicao siervo de Jehova quien ta practica falso adoranza ta hace gayot sinti duele con Ele. e—Deut. 4:23, 24.

16. Na ojos de Jehova, cosa el diferencia entre del maga recto y del maga malo?

¹⁶ Cosa maga leccion kita puede aprende? Debe kita hace el todo para evita con el falso adoranza. Pero debe tambien kita continua adora con Jehova na justo manera y queda activo na verdadero adoranza. Claro ya explica si profeta Malaquias si cosa el diferencia entre del un buen persona y del un mal persona. Ya escribi le: “Hay mira tu otravez el diferencia entre del un persona recto y malo, entre del quien ta sirvi con Dios y del quien gendeh ta sirvi con ele.” (Mal. 3:18) Poreso, gendeh kita debe permiti con el maskin cosa—maskin el diaton imperfeccion y kamali—para hace luya kanaton y descanza sirvi con Dios. Gane, un serioso culpa que descanza sirvi con Jehova.

17. Porque kita debe queda con cuidao si ta iscuji con quien casa?

¹⁷ Si single tu y ta pensa casa, ta puede ba tu mira si paquemodo el maga palabra de Malaquias puede ayuda contigo si ta iscuji con quien casa? Posible que tiene maga buen calidad el un persona pero si gendeh le ta sirvi con el verdadero Dios, recto gaha le na ojos de Jehova? (2 Cor. 6:14) Si casa tu con ese persona, ayuda ba le contigo para esta fiel con Jehova? Considera este: Posible que tiene maga buen calidad el maga pagano mujer de Rey Solomon. Pero, gendeh sila ta adora con Jehova y hinay-hinay ya influencia sila  con Solomon para adora na maga falso dios.—1 Rey 11:1, 4.

18. Cosa debe enseña el maga mayores na diila maga anak?

¹⁸ Maga mayores, puede ustedes usa con el maga istoria na Biblia acerca na maga rey para ayuda con el de ustedes maga anak que iscuji sirvi con Jehova. Ayuda kanila para entende que fiel el maga rey na ojos de Jehova cay ya suporta sila con el verdadero adoranza. Enseña con el de ustedes maga anak por medio na palabra y ejemplo que mas importante el maga espiritual cosas—igual na estudiada del Biblia, atendida na maga miting y participacion na ministerio—contra na otro maga actividad. (Mat. 6:33) Cay si gendeh, baka decidi el de ustedes maga anak que queda maga Testigo de Jehova por causa lang cay ese el de ustedes religion. Como resulta, baka gendeh sila hace prioridad con el verdadero adoranza o deja pa gane con ese na uliji.

19. Puede ba queda amigo otravez de Jehova aquellos quien ya descanza sirvi con Ele? Explica. (Mira tambien con el cajon “ Puede Tu Bira con Jehova!”)

¹⁹ Puede ba queda amigo otravez de Jehova el un persona quien ya descanza sirvi con Ele? Si, basta arripinti le y adora otravez con Jehova. Para hace se, posible necesita le queda humilde y acepta el ayuda del maga anciano. (Sant. 5:14) Maskin paquemodo pa de grande el esfuerzo que hace le, gendeh gayot se sayang cay queda le otravez amigo de Jehova!

20. Si imita kita con el maga fiel rey, cosa el mirada de Jehova kanaton?

²⁰ Cosa maga leccion kita ya aprende na maga rey de Israel? Puede kita queda igual con el maga fiel rey si continua kita sirvi con Jehova con todo corazon. Aprende kita na diaton maga kamali, arripinti y hace el maga necesita cambio. Acorda tambien kita que bien importante que continua adora na justo manera con el solamente verdadero Dios. Si esta tu fiel con Jehova, hay mira le contigo como un persona quien pirmi ta hace si cosa el justo.