1. Base na Colosa 2:4, 8, paquemodo si Satanas ta pricura influencia con el diaton pensamiento?

QUIERRE si Satanas que gendeh mas kita ama con Jehova. Para sucede este, ta pricura le influencia con el diaton pensamiento y manda kanaton pensa asegun na cosa le quierre. Ta usa le con el maga deseo que tiene kita para pricura convinci y engaña kanaton que sigui con ele.​—Le con el Colosa 2:4, 8.

2-3. (a) Porque kita debe pone atencion na aviso que ya escribi na Colosa 2:8? (b) Cosa kita considera na este articulo?

² Posible ba gayot kanaton engaña si Satanas? Si! Acorda que nuay escribi si Pablo con el aviso na Colosa 2:8 para na maga gendeh siervo del Dios. Ya escribi le se para na maga iscujido Cristiano. (Col. 1:2, 5) Na peligro aquellos maga Cristiano de aquel tiempo y mas na peligro kita ahora. (1 Cor. 10:12) Porque? Cay ya buta con Satanas na tierra y ta pricura le hace todo lo que puede para engaña con el maga leal siervo del Dios. (Rev. 12:9, 12, 17) Y mas pa, ta vivi kita ahora donde el maga mal gente y impostor ta “queda mas malo.”​—2 Tim. 3:1, 13.

³ Na este articulo, hay discuti kita si paquemodo si Satanas ta usa con el “maga insiñanza falso” para pricura influencia con el diaton maga pensamiento. Considera kita tres del de suyu “maga ataque” o tactica. (Ef. 6:11) Na siguiente articulo, hay discuti kita si paquemodo quita con el negativo efecto del de suyu maga tactica na diaton pensamiento. Pero una, considera kita si cosa kita puede aprende si paquemodo ya  engaña si Satanas con el maga Israelita despues sila entra na tierra que ya promete kanila si Jehova.

4-6. Asegun na Deuteronomio 11:10-15, cosa nuevo manera de siembrada el necesita aprende el maga Israelita cuando ya esta sila na Canaan?

⁴ Ya hace manera si Satanas para influencia con el maga Israelita que comete idolatria. Paquemodo le se ya hace? Sabe le que necesita sila comida poreso ya usa le con este para manda kanila hace el cosa le quierre. Cuando ya entra el maga Israelita na tierra que ya promete kanila si Jehova, necesita sila cambia el diila manera de siembrada. Cuando na Egipto sila, ta saca sila agua estaba na Rio de Nilo para usa na sementera. Pero nuay grande rio na diila nuevo lugar poreso para puede sila siembra, necesita sila agua estaba na ulan y hamuk. (Le con el Deuteronomio 11:10-15; Isa. 18:4, 5) Entonces, el maga Israelita necesita aprende otro manera de siembrada. Gendeh este facil cay el mayoria de aquellos quien sabe siembra ya acaba ya muri na desierto.

⁵ Ya explica si Jehova con el maga gente que ya cambia el diila circumstancia. Y despues, ya habla le este aviso que dol nuay coneccion na siembrada: “Tiene ustedes cuidao que el de ustedes maga corazon gendeh disvia y adora con otro maga dios y hinca kanila.” (Deut. 11:16, 17) Porque ya dale kanila aviso si Jehova acerca na adoranza na maga falso dios cuando ya habla le acerca na nuevo manera de siembrada?

⁶ Sabe si Jehova que tiene inclinacion el maga Israelita que aprende cuanto manera de siembrada na maga pagano alrededor kanila. Siempre, mas manada experiencia na siembrada el diila maga vecinos y el maga Israelita  tiene cosa puede aprende kanila pero peligroso este. El maga siembrador de Canaan ta adora con Baal. Ta creé sila que si Baal el dueño del cielo y el quien kanila ta dale ulan. No quierre si Jehova que el de suyu maga siervo hay creé con ese falso creencia. Pero el maga Israelita manada beses ya iscuji adora con Baal. (Num. 25:3, 5; Jue. 2:13; 1 Rey 18:18) Ahora, mira kita si paquemodo si Satanas ya puede controla con el maga Israelita.

7. Cosa probanza na fe ya enfrenta el maga Israelita cuando ya entra sila na Canaan?

⁷ El primer tactica que ya usa si Satanas amo el normal deseo que cae ulan. Nuay tanto ulan na Canaan na fin del Abril hasta Septiembre cada año. Para continua vivi el maga Israelita y queda manada el diila maga siembra, ta depende sila na ulan que mas mucho ta principia na Octubre. Ya engaña si Satanas con el maga Israelita para creé que necesita sila sigui con el maga practica del diila maga pagano vecinos para tiene buen cosecha. Ta creé el diila maga vecinos que necesita sila hace maga ritual para el diila maga dios hay dale kanila ulan. Aquellos falta fe con Jehova ya creé que amo este el solamente manera para evita con el secas poreso ya participa sila na maga ritual para adora con Baal.

8. Cosa el segundo tactica que ya usa si Satanas? Explica.

⁸ Ya usa si Satanas con el segundo tactica na maga Israelita. Ya usa le con el maga imoral deseo para engaña kanila. El maga pagano nacion ta adora con el diila maga dios por medio na diila participacion na maga maka-asco y imoral acto. Incluido na este clase de imoral forma de adoranza el prostitucion del maga mujer y hombre alli na templo. Nuay lang sila basta permiti con el homosexualidad y otro clase de sexual imoralidad sino ya hace sila sale que normal este! (Deut. 23:17, 18; 1 Rey 14:24) Ta creé sila que si hace sila con este maga ritual, el diila dios hay hace mas productivo con el diila tierra. Manada Israelita el ya queda interesao na maga imoral ritual del maga pagano y como resulta, ya iscuji sila sirvi con el maga falso dios. El deverasan, ya controla kanila si Satanas.

9. Asegun na Oseas 2:16, 17, paquemodo si Satanas ya influencia con el maga Israelita para ulvida si quien gayot si Jehova?

⁹ Ya usa si Satanas con el ika-tres tactica. Ya influencia le con el maga Israelita para ulvida si quien gayot si Jehova. Na tiempo de profeta Jeremias, ya habla si Jehova que ya influencia el maga falso profeta con el De Suyu maga siervo para ulvida con el De Suyu nombre “por causa con Baal.” (Jer. 23:27) El maga Israelita nuay mas usa con el nombre de Jehova y ya cambia con este el nombre de Baal que quierre decir “Dueño” o “Amo.” Ya hace este dificil kanila para determina el diferencia de Jehova con Baal. Y como resulta, ya mezcla sila maga ritual para con Baal na adoranza con Jehova.​—Le con el Oseas 2:16, 17 y footnote.

10. Cosa maga tactica ta usa si Satanas ahora?

¹⁰ Ta usa si Satanas con ese maga tactica ahora. Para engaña con el maga gente, ta usa le con el maga normal deseo, imoral deseo y ta hace manera para ulvida el maga gente si quien gayot si Jehova. Considera kita una con el ultimo tactica.

11. Cosa ya hace si Satanas para ulvida el maga gente si quien gayot si Jehova?

¹¹ Ta hace manera si Satanas para ulvida el maga gente si quien gayot si Jehova. Despues  del muerte del maga apostoles de Jesus, cuanto de aquellos quien ta clama que Cristiano sila ya principia hace calayat maga falso enseñanza. (Act. 20:29, 30; 2 Tes. 2:3) Este maga apostata ya principia esconde si quien gayot el solamente verdadero Dios. Por ejemplo, nuay mas sila usa con el nombre del Dios na diila maga Biblia y ya cambia con este “Señor” y otro titulo. Cuando ya quita sila con el personal nombre del Dios y ya cambia con este “Señor,” ya hace este dificil para con el quien ta le con el Biblia para mira que si Jehova diferente na otro maga “señor” que ya menciona na Escritura. (1 Cor. 8:5, El Nuevo Testamento) Ya usa sila con el titulo “Señor” para refiri con Jehova y con Jesus poreso dificil para na maga gente mira que otro si Jehova con Jesus. (Juan 17:3) Aqui ya principia el doctrina acerca na Trinidad que gendeh base na Palabra del Dios. Como resulta, manada gente ta creé que imposible conoce con Dios. Un imbusterias gayot este!​—Act. 17:27.

12. Cosa ta hace sale el falso religion que aceptable y cosa el resulta base na Roma 1:28-31?

¹² Ta usa si Satanas con el maga imoral deseo para engaña con el maga gente. Na tiempo del Israel de antes, ya usa si Satanas con el falso religion para dale mira que aceptable el imoralidad. Ta hace tambien se ele ahora. El falso religion ta permiti y ta pricura hace sale que normal lang el maga imoral conducta. Poreso, manada de aquellos quien ta clama que ta sirvi con Dios nuay mas sigui con el de suyu principio na moralidad. Si apostol Pablo ya discuti na de suyu carta na maga de Roma si cosa el resulta. (Le con el Roma 1:28-31.) Entrao na “maga cosa-cosa que gendeh conviene” amo el todo clase de sexual imoralidad, incluido el homosexualidad. (Rom. 1:24-27, 32; Rev. 2:20) Bien importante que sigui kita con el maga claro enseñanza na Biblia.

13. Cosa el otro tactica de Satanas?

¹³ Si Satanas ta usa con el diaton maga natural deseo. Todo kita tiene deseo para aprende maga nuevo skill para puede dale el diaton necesidad y del diaton familia. (1 Tim. 5:8) Ta puede kita se aprende na escuela y si ta estudia kita enbuenamente. Pero debe kita queda con cuidao. Na manada nacion, ta enseña con el maga estudiante gendeh lang maga practical skill sino pati maga filosofia del gente. Ta anima con el maga estudiante que cuestiona  si deverasan ba tiene Dios y pone no vale nada con el Biblia. Ta enseña tambien kanila que ya principia el vida por medio de evolucion. (Rom. 1:21-23) Ese maga enseñanza bien diferente na sabeduria del Dios.​—1 Cor. 1:19-21; 3:18-20.

14. Cosa ta enseña el maga filosofia del gente?

¹⁴ El filosofia del gente ta ignora y tan contra con el maga principio de Jehova. Gendeh este ta enseña con el maga gente que cultiva el fruta del espiritu del Dios sino ta anima kanila que hace el “maga trabajo del mal naturaleza del cuerpo.” (Gal. 5:19-23) Ta anima este con el maga gente que queda orgulloso y arogante y como resulta, ya queda sila “canalla.” (2 Tim. 3:2-4) Este custumbre bien diferente na humildad que quierre el Dios que cultiva el de suyu maga siervo. (2 Sam. 22:28) Cuanto del maga Cristiano quien ya entra escuela na maga universidad ya principia acepta con el mirada y pensamiento del mundo en vez del Dios. Considera kita un ejemplo si cosa sucede si ignora kita con este peligro.

15-16. Cosa tu ya aprende na experiencia del un hermana?

¹⁵ Un hermana quien mas de 15 año ya ta sirvi full-time ya habla: “Como un bautizao Cristiano, ya puede yo oi y le acerca na maga peligro si entra escuela na un universidad pero nuay yo pone atencion con ese. Ya pensa yo que gendeh aplicable conmigo ese consejo.” Cosa maga dificultad le ya enfrenta? Ele ya admiti: “Ya dale yo bien grande tiempo y esfuerzo na de mio curso. Poreso, nuay mas yo tiempo para reza con Jehova igual de antes y bien cansao ya para man cuento pa con otro  acerca na Biblia y para prepara enbuenamente na maga miting. Bueno ya lang, cuando ya puede yo nota que el alto educacion ta hace malo con el de mio relacion con Jehova, ya realiza yo que debe yo descanza entra escuela. Y ese el cosa yo ya hace.”

¹⁶ Cosa el efecto del alto educacion na de suyu pensamiento? Ele ya habla: “Tan huya yo admiti que el educacion que ya iscuji yo ya enseña conmigo que man focus na kamali del otro especialmente del de mio maga hermano y hermana, expecta grande kanila y man lejos kanila. Ya puede yo quita este clase de pensamiento despues pa de largo tiempo. Ese experiencia ya enseña conmigo si paquemodo de peligroso que ignora con el maga aviso del diaton Tata na cielo por medio del de suyu organizacion. Mas conoce si Jehova conmigo contra conoce yo con el de mio mismo cuerpo. Si ya oi lang era yo!”

17. (a) Cosa kita debe determinao hace? (b) Cosa kita discuti na siguiente articulo?

¹⁷ Queda determinao que gendeh permiti que controla kanaton el mundo de Satanas por medio del “saber de filosofia y maga insiñanza falso.” Nunca permiti que engaña contigo el maga tactica de Satanas. (1 Cor. 3:18; 2 Cor. 2:11) Nunca permiti que influencia contigo si Satanas que ulvida con Jehova. Sigui con el alto principio de Jehova na moral. Y no permiti que engaña contigo si Satanas que ignora con el consejo de Jehova. Pero paquemodo si ya puede tu nota que el pensamiento de este mundo ya afecta ya contigo? El siguiente articulo hay dale mira si paquemodo el Palabra del Dios puede ayuda kanaton “para destroza maskin cosa clase” de pensamiento y custumbre que yan anad kita.​—2 Cor. 10:4, 5.