1. Cosa aviso ya escribi si apostol Pablo para na maga iscujido Cristiano?

“NO USTEDES sigui con el maga custumbre de este mundo.” (Rom. 12:2) Ya escribi si Pablo aquel maga palabra para na maga Cristiano del primer siglo. Porque le ya dale ese directa aviso para na maga hombre y mujer quien dedicao con Dios y iscujido por medio de sagrao espiritu?​—Rom. 1:7.

2-3. Cosa ta hace si Satanas para gendeh mas kita sirvi con Jehova pero paquemodo kita puede quita na diaton pensamiento el maga cosas que dificil quita?

² Yan lingasa si Pablo cay el peligroso idea del mundo que controlao de Satanas ya influencia ya con el cuanto Cristiano. (Ef. 4:17-19) Puede este sucede con maskin quien kanaton. Si Satanas, el dios de este sistema de maga cosas, ta usa diferente tactica para influencia kanaton para gendeh sirvi con Jehova. Uno de ese amo el diaton tendencia que quierre queda importante. Posible usa tambien le el diaton background, cultura o educacion para manda kanaton pensa asegun na cosa le quierre.

³ Posible ba para kanaton quita con el maga cosas que talli na diaton pensamiento? Nota si paquemodo ya contesta si Pablo: “Ta destroza came con el maga argumento y con todo clase de orgullo que ta man contra con el saber del Dios. Ta hace  came somete el pensamiento de todo el maga gente y ta manda canila obedece con Cristo.” (2 Cor. 10:4, 5) Si, por medio na ayuda de Jehova puede kita quita con el maga cosas que gendeh bueno na diaton pensamiento. Igual con el medicina que puede quita con el efecto del veneno, el Palabra del Dios puede kanaton ayuda para quita con el efecto del mundo de Satanas.

4. Cosa maga cambio ya hace el manada kanaton cuando ya aprende kita el verdad?

⁴ Pensa con el maga cambio que necesita tu hace cuando ya aprende tu con el verdad na Palabra del Dios y decidi sirvi con Jehova. Para na manada kanaton, necesita kita descanza hace el cuanto clase de mal conducta. (1 Cor. 6:9-11) Ta rindi kita gracias con Jehova cay ya ayuda le kanaton para gendeh mas kita hace este maga mal cosas.

5. Cosa el dos cosas que debe kita hace asegun na Roma 12:2?

⁵ Pero, nunca pensa que gendeh mas kita necesita hace cambio. Maskin pa gendeh ya kita ta comete serioso culpa, necesita siempre kita evita con el maskin cosa que puede kanaton influencia para comete con ese otravez. Paquemodo kita con ese hace? Si Pablo ya contesta: “No ustedes sigui con el maga custumbre de este mundo, sino cambia el de ustedes maga custumbre por medio del de ustedes maga pensamiento nuevo.” (Rom. 12:2) Poreso, debe kita hace este dos cosas. Una, “no [kita] sigui con el maga custumbre de este mundo.” Ika-dos, necesita kita “cambia” si paquemodo kita ta pensa.

6. Cosa kita ya puede aprende na palabra de Jesus na Mateo 12:43-45?

⁶ El cambio que ta refiri si Pablo mas pa na cosa lang ta puede mira apuera. Afectao el todo aspeto del diaton pagka-persona. (Mira  con el cajon “ Cambiao o Ta Pretende Lang?”) Necesita kita completamente cambia con el diaton pensamiento—diaton custumbre, sentido y deseo. Poreso, todo kita necesita pregunta diaton mismo cuerpo, ‘El cambio ba que ta hace yo para queda un Cristiano aquel lang cosa ta puede mira el otro o con todo corazon y pensamiento yo ta hace cambio?’ Importante que sabe kita si cosa el diferencia de este dos cambio. El palabra de Jesus na Mateo 12:43-45 ta indica si cosa necesita hace. (Le.) Ese maga palabra ta enseña un importante leccion: Gendeh bastante que quita lang con el gendeh buen pensamiento; necesita con ese cambia el clase de pensamiento que ta aproba el Dios.

7. Paquemodo kita cambia si quien gayot kita?

⁷ Posible ba cambia el diaton inclinacion o si quien gayot kita? El Palabra del Dios ta contesta: “Vivi ustedes un vida nuevo por medio de un cambio espiritual na de ustedes pensamiento. Y visti el camisa del Nuevo Naturaleza creao na ichura del Dios.” (Ef. 4:23, 24) Si, puede kita cambia si quien gayot kita pero gendeh este facil hace. Gendeh lang kita basta resisti con el mal deseo y descanza hace mal cosas. Sino, necesita kita hace “cambio espiritual na [diaton] pensamiento” o cambia si paquemodo kita ta pensa. Envuelto alli que cambia kita diaton maga deseo, custumbre y motivo. Necesita kita continua hace esfuerzo.

8-9. Paquemodo ta dale mira el experiencia del un hermano que necesita kita cambia si quien gayot kita?

⁸ Considera kita con el ejemplo del un hermano quien violente del antes. Despues le quita de suyu vicio de tomada y gendeh mas ta pelea gente, ya queda le cualificao na bautismo y ya puede le dale buen testigo na lugar onde le ta queda. Pero un noche, despues del de suyu bautismo, ya enfrenta le un probanza que nuay le expecta. Ya anda na de suyu casa el un burracho gente y ya cumbida con ele man bombiajan. Del primero, ya puede pa el hermano controla de suyu cuerpo. Pero cuando el gente ya gangguia con el nombre de Jehova, nuay mas le puede controla con el de suyu rabia. Ya sale le apuera y ya gulpia con el gente. Porque le se ya puede hace? Maskin pa el de suyu estudiada na Biblia ya ayuda con ele controla de suyu cuerpo, nuay pa le siempre puede cambia si quien gayot ele.

⁹ Pero, nuay descanza hace cambio este hermano. (Prov. 24:16) Na ayuda del maga anciano, ya continua le progresa. Na uliji, ya queda le cualificao para queda un anciano. Despues, un noche apuera del Kingdom Hall, ya enfrenta le semejante probanza que ya experiencia le del antes. Cerca ya gulpia con el un anciano el un burracho gente. Cosa ya hace el diaton hermano? Na calmao, humilde manera, yan cuento le con el burracho, ya hace con ele calma y ya ayuda con el gente bolbe. Porque otro ya el reaccion del diaton hermano este tiempo? El diaton hermano ya cambia si quien gayot le. Ya queda ya le un gente quien ta mentena paz y humilde. Ta lleva gayot este alabanza con Jehova!

10. Cosa kita debe hace para cambia si quien gayot kita?

¹⁰ Este maga cambio gendeh ta sucede dayun-dayun y gendeh este automatico. Necesita kita hace esfuerzo por largo tiempo. (2 Ped. 1:5) Gendeh este sucede por causa lang cay ya tarda ya kita ta sirvi con Jehova. Necesita kita hace el todo lo que puede para cambia si quien gayot kita. Tiene cuanto importante cosas que puede kanaton ayuda hace este maga cambio. Considera kita cuanto de ese.

11. Paquemodo el rezo ayuda kanaton para cambia si paquemodo kita ta pensa?

¹¹ El rezo amo el primer importante que hace kita. Necesita kita reza igual con el salmista: “Dale conmigo un limpio corazon, O Dios y dale conmigo un nuevo y leal espiritu.” (Sal. 51:10) Debe kita admiti que necesita kita cambia si paquemodo kita ta pensa y pidi ayuda con Jehova. Paquemodo kita puede asigura que ayuda kanaton si Jehova para hace cambio? Puede kanaton anima el maga promesa de Jehova acerca con el maga Israelita na tiempo de Ezequiel: “Hay dale yo kanila un unido corazon y un nuevo espiritu . . . y dale yo kanila un blando corazon igual na laman, [un corazon que sensitivo na guia del Dios].” (Eze. 11:19; ftn.) Preparao si Jehova ayuda con aquellos maga Israelita para cambia y preparao tambien le ayuda kanaton.

12-13. (a) Asegun na Salmo 119:59, cosa kita necesita medita? (b) Cosa maga pregunta tu debe pregunta na de tuyu mismo cuerpo?

¹² El ika-dos importante cosa que necesita kita hace amo el meditacion. Mientras ta le kita con el Palabra del Dios cada dia, necesita kita dale tiempo para medita o pensa enbuenamente si cosa pensamiento o sentido kita necesita cambia. (Le con el Salmo 119:59; Heb. 4:12; Sant. 1:25) Debe kita identifica con el maskin cosa pensamiento o sentido que tiene kita que influenciao na idea del mundo. Necesita kita admiti que tiene kita maga mal inclinacion y despues hace esfuerzo para quita con ese.

¹³ Puede kita pregunta con el diaton mismo cuerpo: ‘Tiene ba maskin diutay envidia o selos na de mio corazon?’ (1 Ped. 2:1) ‘Ta sinti ba yo que mas bueno yo contra na otro por causa na de mio background, educacion o estado na vida?’ (Prov. 16:5) ‘Ta hace ba yo de menos con otro quien nuay maga cosas que tiene yo o quien estaba na diferente raza?’ (Sant. 2:2-4) ‘Quierre ba yo con el maga cosas na mundo de Satanas?’ (1 Juan 2:15-17) ‘Quierre-quierre ba yo imoral y violente entretenimiento?’ (Sal. 97:10; 101:3; Amos 5:15) El contestacion na este maga personal pregunta hay dale mira con el cuanto maga cosas que necesita tu cambia. Si puede kita quita con este maga cosas maskin pa dificil, puede kita hace alegre con el diaton Tata na cielo.​—Sal. 19:14.

14. Porque bien importante iscuji maga buen amigo?

¹⁴ El ika-tres importante cosa que necesita kita hace amo iscuji buen amigo. Puede man kita nota o gendeh, tiene grande influencia kanaton el diaton maga amigo o amiga. (Prov. 13:20) Na trabajo man o na escuela, na alrededor diaton el maga persona quien gendeh kanaton puede ayuda pensa na manera que ta aproba el Dios. Pero, puede kita incuntra buen amigo na diaton maga miting. Puede sila kanaton motiva o hace fuerte para “ama y hace maga trabajo bueno.”​—Heb. 10:24, 25.

15-16. Paquemodo ta pricura cambia si Satanas con el diaton pensamiento?

¹⁵ Acorda que determinao si Satanas cambia diaton pensamiento. Ta usa le todo clase de idea para destroza con el buen influencia del Palabra del Dios na diaton pensamiento.

¹⁶ Si Satanas ta continua usa igual pregunta que ya usa le con Eva na jardin de Eden: “Ya habla ba gayot el Dios que . . . ?” (Gen. 3:1) Na mundo que ta controla si Satanas, pirmi kita ta puede oi maga pregunta igual con este: ‘Ya habla ba gayot el Dios que gendeh le ta aproba con el same-sex marriage? Ya habla ba gayot el Dios que no quierre le que celebra tu  Pascua y cumpliaño? Quierre ba gayot el de tuyu Dios que gendeh tu abona sangre? Pidi ba gayot contigo el un amable Dios que evita tu asocia con el de tuyu familia que yan disfellow?’

17. Cosa kita debe hace si tiene maga importante pregunta acerca na cosa kita ta creé y cosa el resulta base na Colosa 2:6, 7?

¹⁷ Necesita convincido kita na cosa kita ta creé. Si gendeh kita busca con el contestacion del maga importante pregunta acerca na diaton creencia, hay principia kita man duda si verdad ba el cosa kita ta creé. Ese maga duda puede cambia con el diaton pensamiento y destroza con el diaton fe. Entonces, cosa kita necesita hace? El Palabra del Dios ta habla kanaton que cambia kita diaton pensamiento para queda kita convincido si cosa “el voluntad del Dios y sabe si cosa el bueno, cosa el ta gusta Le.” (Rom. 12:2) Si regular kita ta estudia, puede kita asigura que justo el cosa kita ya aprende estaba na Biblia. Y puede kita asigura que justo el maga principio de Jehova. Como resulta, puede kita “esta fuerte na fe.”​—Le con el Colosa 2:6, 7.

18. Cosa kanaton puede ayuda para queda kita protegido na efecto del mundo de Satanas?

¹⁸ Nuay quien puede hace fuerte con el de tuyu fe para contigo, poreso continua cambia si paquemodo tu ta pensa. Reza pirmi y pidi ayuda con Jehova por medio na de suyu espiritu. Medita enbuenamente; continua examina de tuyu pensamiento y motivo. Iscuji maga buen amigo quien puede ayuda cambia el manera tu ta pensa. Si hace tu este, puede tu quita y protege de tuyu cuerpo contra na mal efecto del mundo de Satanas y puede destroza con el “maga argumento y con todo clase de orgullo que ta man contra con el saber del Dios.”​—2 Cor. 10:4, 5.