MIENTRAS ta prepara el maga Israelita para travesa na Rio de Jordan para na lugar que ya promete kanila el Dios, tiene kanila quien ya visita. Ese maga visita amo maga mujer que gendeh Israelita y ya invita con el maga hombre na un fiesta. Dol un bale oportunidad aquel. Tiene bailada, sabroso comida y conoce sila nuevo maga amigo y amiga. Maskin pa otro el tradicion y moral de aquel maga mujer na cosa ya aprende el maga Israelita na Ley del Dios, cuanto maga Israelita hombre el posible ya pensa: ‘Sabe kame si cosa el justo y el malo. Hay tiene kame cuidao.’

 Cosa ya sucede? El Biblia ta habla kanaton: “El maga gente ya principia comete sexual imoralidad na maga anak mujer del Moab.” El deverasan, quierre aquel maga mujer que el maga Israelita hombre hay adora con el maga falso dios. Y ese el cosa ya sucede! Poreso, “bien rabiao gayot si Jehova con el Israel.​”—Num. 25:1-3.

Aquel maga Israelita ya desobedece con el Ley del Dios na dos manera: Ya hinca sila na maga idolo y ya comete sexual imoralidad. Miles el ya muri cay ya desobedece sila con Dios. (Ex. 20:4, 5, 14; Deut. 13:6-9) Porque bien maka-triste el cosa kanila ya sucede? Cay si este miles de Israelita hombre ya obedece con el Ley del Dios, ya puede era sila cruza na Jordan para na tierra que ya promete kanila el Dios.​—Num. 25:5, 9.

Acerca con ese suceso, si apostol Pablo ya escribi: “Todo este maga cosa-cosa que ya sucede canila, un aviso para canaton. Y ya escribi con ese para leccion diaton quien ta vivi ahora na fin del tiempo.” (1 Cor. 10:7-11) Asigurao que bien alegre si Satanas cay cuanto del maga Israelita ya comete serioso culpa y nuay cualifica entra na lugar que ya promete kanila. Necesita kita aprende na cosa ya sucede kanila cay sabe kita que si Satanas bien alegre si tiene le cosa puede hace para gendeh kita puede entra na nuevo mundo del Dios!

Si Satanas quierre hace victima con el maga Cristiano y ta usa le maga tactica que efectivo na manada gente. Como cosa kita ya aprende acerca na maga Israelita, ya usa le con el imoral sexo. Na diaton tiempo ahora, el imoralidad ta continua queda un peligroso trampa. Un efectivo manera que puede kita cae na este trampa amo por medio na pornografia.

Ahora, el un persona puede mira pornografia que gendeh ta sabe el otro. Del antes, el un persona quien quierre mira con ese necesita pa anda na sine para mira maga gendeh bueno salida o na maga bookstore para cumpra maga material de pornografia. Manada gente el posible gendeh ta anda na este maga lugar cay tiene sila huya que baka tiene kanila quien mira. Pero ahora, el un persona quien tiene Internet puede mira maga material de pornografia na trabajo o maskin na diila auto mismo. Y na manada lugar, el un hombre o mujer puede mira pornografia maskin na diila mismo casa.

Gendeh lang ese. Bien facil ya mira pornografia na maga gadget. Mientras ta camina el maga gente o ta munta bus, puede sila mira maga imoral letrato na diila maga gadget.

Por causa cay bien facil ya ahora mira pornografia y gendeh ta puede sabe el otro, mas grande peligro este ta causa ahora si compara de antes. El quien ta mira con este ta hace malo con el diila matrimonio, tan conciencia y ta perde respeto na diila mismo cuerpo. Y mas grabe pa, ta pone sila na peligro el diila relacion con Dios. Poreso, puede tu asigura que tiene mal efecto el pornografia con aquellos quien ta mira con ese. Na manada situacion, ta causa este grabe dolor na emocion que posible hinay-hinay perde. Pero tiene vez, el un persona gendeh gayot puede quita con el mal efecto de este.

Pero debe kita acorda que si Jehova ta dale kanaton proteccion contra na este trampa de Satanas. Para ricibi kita el proteccion de Jehova, debe kita hace el cosa nuay puede hace el maga Israelita hombre​—‘obedece enbuenamente’ con ele. (Ex. 19:5) Necesita kita acorda que ta odia gayot el Dios con el pornografia. Porque se kita puede habla?

Pensa este: El maga ley del Dios na nacion de Israel bien diferente na ley del otro maga nacion de aquel tiempo. El ley na Israel puede compara na un pader que puede protege kanila na maga mal practica del otro nacion alrededor kanila.  (Deut. 4:6-8) Ese maga ley ta hace claro con el un importante verdad: Ta odia si Jehova con el sexual imoralidad.

Despues menciona si Jehova con el maga imoral cosas que ta hace el maga nacion alrededor del Israel, ya habla le con el maga Israelita: “No ustedes hace si cosa sila ta hace na tierra de Canaan, onde yo con ustedes lleva. . . . Mabuling el tierra y hay castiga yo con el maga quien ta queda aqui por causa na diila pecado.” Para con el sagrao Dios de Israel, bien maka-asco y imoral el manera de vida del maga Canaanita poreso ta mira le con el tierra onde sila ta queda como bien mabuling.​—Lev. 18:3, 25.

Maskin pa ya castiga ya si Jehova con el maga Canaanita, el otro maga gente ya continua siempre comete sexual imoralidad. Despues del mas de 1,500 año, si Pablo ya habla que el maga nacion donde ta queda el maga Cristiano ‘no sabe mas si cosa el bueno o el malo.’ Gane, “ya entrega sila el diila cuerpo na immoralidad para sigui firmi con ansias todo clase de cuchinadas.” (Ef. 4:17-19) Ahora, manada tambien el bien imoral y gendeh ta tiene huya na cosa sila ta hace. El maga verdadero Cristiano debe evita mira con el maga imoral actividad que ta hace aquellos na mundo.

El pornografia claro gendeh ta dale mira respeto con Dios. Ya crea le con el maga gente na de suyu imagen y ya dale kanaton el abilidad para sinti si justo ba el un cosa o mali. Claro que sabio el Dios cuando ya dale le ley acerca na sexo. Proposito de suyu que el sexual relacion queda un causa de alegria para con el man maridable. (Gen. 1:26-28; Prov. 5:18, 19) Pero cosa ta hace aquellos quien ta produci o ta influencia con otro para mira pornografia? Claro que ta ignora gayot sila con el principio del Dios na moral. El maga gente quien ta anima con otro mira pornografia nuay respeto con Jehova. El Dios hay juzga con aquellos quien ta ignora con el de suyu maga principio.​—Rom. 1:24-27.

Pero paquemodo aquellos quien intencional ta le o ta mira pornografia? El cuanto ta pensa que gendeh peligroso este clase de entretenimiento. Pero el deverasan, ta suporta sila con aquellos quien ta ignora con el maga principio de Jehova. Posible que gendeh se diila intencion cuando ya  principia sila mira pornografia. Pero claro na Biblia que el maga siervo del verdadero Dios debe odia gayot con el pornografia. El Biblia ta habla: “O ustedes quien ta ama con Jehova, odia el cosa malo.”​—Sal. 97:10.

Maskin aquellos quien quierre evita mira pornografia ta sinti que dificil con este hace. Imperfecto kita y necesita kita hace esfuerzo para resisti con el mabuling sexual deseo. Y mas pa, el diaton imperfecto corazon posible busca manera para gendeh sigui con el ley del Dios. (Jer. 17:9) Pero manada Cristiano el nuay cae na trampa de pornografia. Puede este anima contigo que puede tambien tu resisti con el pornografia. Nota si paquemodo el Palabra del Dios puede ayuda contigo evita con este trampa de Satanas.

Como cosa ya discuti enante, ya permiti el manada Israelita que crici el mal deseo y ya tiene este mal resulta. Puede tambien se sucede kanaton. El hermano de Jesus na nana, si Santiago, ya habla si cosa el peligro: “El ta tenta con el gente amo el maga mal deseo del disuyo mismo cuerpo, que ta hala y ta encanta con ele. Despues, el mal deseo ta entoja y ta pari con el pecado.” (Sant. 1:14, 15) Una vez crici el mal deseo na corazon del un persona, grande el posibilidad que comete le pecado. Poreso, debe kita forza con el diaton mismo cuerpo que gendeh pensa maga imoral cosas.

Si ya puede tu nota que ta pensa tu imoral cosas, hace dayun accion. Si Jesus ya habla: “Si el dituyo mano o pies ta hace contigo peca, corta con ese y buta lejos. . . . Y si el dituyo, ojos ta hace contigo peca, arranca con ese y buta lejos.” (Mat. 18:8, 9) Gendeh ta habla si Jesus que debe kita curta con el parte del diaton cuerpo. Sino, ya dale le ilustracion para dale mira si paquemodo de importante que quita dayun maskin cosa que ta causa kanaton para pensa imoral cosas. Y despues, hace el maga necesita cambio. Paquemodo kita puede aplica con ese consejo llega na pornografia?

Si ya puede tu mira pornografia, no pensa, ‘Gendeh se afecta conmigo.’ Quita dayun alli de tuyu ojos. Apaga dayun con el T.V. Hace dayun off con el de tuyu computer o gadget. Man  focus na otro cosa. Si hace tu se, ayuda se para controla tu con el de tuyu pensamiento en vez el mal deseo el controla contigo.

Paquemodo si nuay mas tu mira pornografia pero ta puede tu acorda tiene vez con el cosa tu ya mira? El un persona puede pensa o acorda con el maga letrato de pornografia que ya mira le de antes. Puede este sucede maskin cuando. Si sucede se, posible puede tu sinti que hace un cosa que gendeh bueno, igual como comete masturbacion. Poreso, acorda que posible tu pensa otravez con ese maga cosas y queda preparao para resisti con ese.

Queda mas determinao que pensa y actua asegun na cosa quierre el Dios que hace tu. Imita con apostol Pablo quien conforme ‘castiga gayot con el de suyu cuerpo y ta manda con ese obedece con ele.’ (1 Cor. 9:27) No permiti que el maga mabuling deseo amo controla contigo. “Cambia el [de tuyu] maga custumbre por medio del [de tuyu] maga pensamiento nuevo. Ansina ay puede [tu] discubri el voluntad del Dios y sabe si cosa el bueno, cosa el ta gusta Le, cosa el perfecto.” (Rom. 12:2) Acorda: Mas queda tu alegre si pensa y actua tu harmonia na voluntad del Dios contra si hace tu maga imoral cosas.

Pricura encabeza cuanto texto na Biblia. Si puede tu acorda gendeh buen cosas, forza con el de tuyu pensamiento que pensa con aquel maga texto. El maga texto igual na Salmo 119:37; Isaias 52:11; Mateo 5:28; Efeso 5:3; Colosa 3:5; y 1 Tesalonica 4:4-8 hay ayuda contigo tiene igual mirada de Jehova na pornografia y pensa si cosa le quierre que hace tu.

Paquemodo si ta sinti tu que gendeh tu puede resisti con el deseo que mira o pensa maga imoral cosas? Imita con el ejemplo de Jesus. (1 Ped. 2:21) Despues bautiza con ele, ya continua con ele tenta si Satanas. Cosa ya hace si Jesus? Ya continua le resisti con el tentacion. Ya usa le diferente escritura para resisti con el maga tentacion de Satanas. Ele ya habla: ‘Sale aqui, Satanas’ y ya deja con ele si Satanas. Igual si paquemodo nuay descanza resisti si Jesus con el Diablo, gendeh tambien tu debe descanza. (Mat. 4:1-11) Si Satanas y el de suyu mundo hay continua influencia kanaton para pensa imoral cosas pero continua resisti. Puede tu evita cae na trampa de pornografia. Na ayuda de Jehova, puede tu ganá con este contrario.

Reza con Jehova que ayuda contigo. Si Pablo ya habla: “Si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias. Y entonces el paz del Dios, ese paz que noay quien ta puede entende, ay guarda el de ustedes maga corazon y maga pensamiento unido con Cristo Jesus.” (Fil. 4:6, 7) El Dios hay dale contigo paz na pensamiento para ayuda contigo resisti con el maga cosas que gendeh justo. Si atraca tu con Jehova, “Ele ay atraca [contigo].”—Sant. 4:8.

Queda kita protegido na maga trampa de Satanas si tiene kita fuerte relacion con el Soberano del entero universo. Si Jesus ya habla: “El principe de este mundo [si Satanas] cerca ya. Ele noay poder contra conmigo.” (Juan 14:30) Porque sabe este si Jesus? Una vez ya habla le: “Aquel quien ya imvia conmigo taqui conmigo y noay Le nunca deja solo conmigo, cay ta hace yo firmi el cosa Le ta gusta.” (Juan 8:29) Si ta hace tu maga cosas que ta hace alegre con Jehova, puede tambien tu asigura que gendeh gayot le abandona contigo. Evita con el pornografia y gendeh tu cae na trampa de Satanas.