DEL 1970, el maga arqueologo ya incuntra un bien quemao rollo na Ein Gedi, Israel, cerca na aplaya del parte oeste del Muerto Mar. Ya incuntra sila con el rollo cuando yan cali sila na tierra con el un sinagoga que ya quema cuando ya destroza con el barrio, posible despues del 500 C.E. Cay bien quemao el rollo, imposible ya con este puede le y queda pa gane este malo si abri. Pero por causa na 3-D scanner, ya puede “abri” con el rollo. Y por medio del un nuevo digital imaging software, puede ya le con ese.

Cosa sila ya puede mira cuando yan scan sila con este? Maga texto na Biblia el laman del rollo. Escribido na resto de este rollo el cuanto versiculo del primer parte del libro de Levitico. Incluido na este versiculo el personal nombre del Dios na Hebreo na Tetragrammaton. Posible, ya escribi con ese entre del 50 C.E. y 400 C.E., poreso este el de con todo daan rollo del Hebreo Escritura que ya incuntra desde ya discubri con el Dead Sea Scroll (Qumran). “Cuando nuay pa puede abri con el pedazo del Levitico que estaba na Ein Gedi,” ya escribi si Gil Zohar na The Jerusalem Post, “maga un mil año el diferencia entre na 2,000 año Dead Sea Scroll que ya escribi maga 100 B.C.E. y el segundo daan manuscrito amo el Aleppo Codex que ya escribi maga 930 C.E.” Asegun na maga experto, este rollo que ya puede abri ta dale mira que el cosa ya escribi na Torah “nuay cambia maskin mas de mil año ya el ya pasa y el kamali del maga ya copia nuay cambia con el mensaje de este.”