TODO kita ta creé que si Jehova ta guia y ta sustene con el de suyu maga siervo na espiritual manera durante na este “ultimo maga dia.” (2 Tim. 3:1) Pero siempre, kita el decidi si sigui kita con ese. Puede kita compara con el diaton situacion na maga Israelita na desierto. Necesita sila actua si oi sila suna el trompeta.

Ya manda si Jehova con Moises que hace dos trompeta de plata “para llama con el maga gente y para manda sabe que sale ya el campo.” (Num. 10:2) El maga sacerdote necesita hace suna con el maga trompeta na diferente manera para manda sabe si cosa debe hace el maga gente. (Num. 10:3-8) Ahora, el maga siervo del Dios ta ricibi maga direccion na manada manera. Considera kita con el tres de este maga manera que ta hace acorda kanaton con el sonor del trompeta de antes. Este amo si tan junto-junto el maga siervo del Dios, si ta ricibi training el maga anciano y si tiene maga nuevo direccion para na todo congregacion.

Si quierre si Jehova que man junto-junto “el entero nacion” na entrada del este (east) parte del tabernaculo, el maga sacerdote hace suna con el dos trompeta. (Num. 10:3) El todo tribo que tan campo alrededor del tabernaculo na cuatro division, hay oi con ese sonor. El maga tan campo que cerca na entrada posible amo una llega. El otro bien lejos y posible necesita mas tiempo y esfuerzo para llega alla. Cerca man sila o lejos, quierre si Jehova que todo sila hay man junto-junto y oi con el de suyu maga instruccion.

Gendeh mas kita tan junto-junto ahora na tabernaculo, pero ta invita siempre kanaton para man junto-junto na maga siervo del Dios. Incluido aqui el maga asemblea de region y otro maga especial ocasion, donde ta ricibi kita maga importante informacion y direccion. Igual el programa que ta beneficia el maga siervo de Jehova na entero mundo. Poreso, el todo quien ta atende con este ta queda parte del un grande y alegre grupo. El otro necesita man viaje mas largo distancia que con otro para atende. Pero maskin cosa sacrificio pa sila ya hace, sabe sila todo que hay beneficia gayot sila.

Quetal aquellos quien ta queda na maga lejos lugar? Na ayuda del moderno tecnologia, manada de esos el ta beneficia con el igual programa y ta sinti pa gane sila que parte de ese ocasion. Por ejemplo, durante el visita del un representante del headquarters, el branch na Benin ya conecta con el programa na Arlit, Niger, un lugar na Sahara Desert. Veinte uno hermano,  hermana y maga interesao el quien ya atende. Maskin pa lejos, ya sinti sila que parte sila del 44,131 quien ya atende na ese ocasion. El un hermano ya escribi: “Ta rindi gayot kame gracias cay ya conecta ustedes con este programa. Ya dale ya tambien ustedes mira kanamon si paquemodo ustedes ta ama kanamon.”

Si el un Israelita sacerdote hay hace suna con el un trompeta lang, “el maga lider lang, el maga cabeza del miles na Israel” el necesita anda na tabernaculo. (Num. 10:4) Puede sila alla ricibi informacion y training con Moises. Puede se ayuda kanila para puede hace con el diila maga responsibilidad na diila maga tribo. Si uno tu de ese maga lider, gendeh ba hay hace tu el todo para puede tu atende y beneficia?

Ahora, gendeh “maga lider” el maga anciano na congregacion y gendeh tambien sila ta domina con el maga hermano y hermana. (1 Ped. 5:1-3) Pero asigurao que ta hace sila el todo para cuida kanila. Poreso, ta acepta sila con el invitacion para na omento training, igual na Kingdom Ministry School. Aqui, ta aprende el maga anciano si paquemodo queda mas efectivo para cumpli con el diila maga responsibilidad na congregacion. Como resulta, mas ta queda fuerte el espiritualidad del todo na congregacion. Maskin pa nuay tu atende na uno de ese maga escuela, ta beneficia siempre tu por causa con aquellos quien ya puede atende.

Tiene vez, el maga Israelita sacerdote ta cambia-cambia con el sonor del trompeta. Este quierre decir que quierre si Jehova que cambia sila campo. (Num. 10:5, 6) Si ta cambia campo el maga Israelita, ta hace sila con este na bien organizao manera pero necesita tambien este esfuerzo para na cada uno. Pero el otro baka tan alang-alang cambia campo. Porque?

Posible, el cuanto ta pensa que pirmi ya lang ta cambia campo y na tiempo que gendeh sila ta expecta. “Tiene vez, el celaje ta esta lang por entero noche.” Na otro tiempo, el diila cambiada ta llega ‘dos dia, un mes o mas largo pa.’ (Num. 9:21, 22) Y cuanto beses sila ya cambia campo? El Numero capitulo 33 ya menciona maga 40 lugar donde el maga Israelita yan campo.

Tiene vez, el maga Israelita tan campo na sombra lugar. Favorable este si na “grande y maka-miedo desierto” sila. (Deut. 1:19) Poreso, posible bien facil pensa que cambia sila na gendeh bonito lugar.

Si principia move el campo, el cuanto gente posible necesita paciencia para espera con el diila turno que move. Todo puede oi con el sonor del trompeta pero gendeh sila puede sale junto-junto. Si cambia-cambia el sonor del trompeta, quierre decir este que debe ya sale el maga tribo que tan campo na este, que amo el Juda, Isacar y Zabulon. (Num. 2:3-7; 10:5, 6) Despues sila sale, el maga sacerdote hay cambia-cambia otravez con el sonor del trompeta. Señales este que debe ya tambien sale el tres tribo que tan campo na sur. Hay continua este hace el maga sacerdote hasta puede sale el entero campo.

Posible, tiene maga cambio na organizacion que tan dificil tu acepta. Posible, ta pensa tu que bien manada cambio gayot ta sucede. O baka comfortable ya tu na cuanto maga arreglamiento y ya pensa que era nuay mas cambia con este. Maskin cosa pa el de tuyu razon, baka ta pensa tu que ta pruba gayot con el de tuyu paciencia y tan dificil tu acepta con el maga cambio. Pero si pricura kita sigui con el maga cambio, posible kita puede mira que ta bendici kanaton el Dios.

Na tiempo de Moises, ya guia si Jehova con el millones de maga hombre, mujer y maga bata na desierto. Si nuay el de suyu ayuda y direccion, gendeh sila sobrevivi. Ahora, ta guia kanaton si Jehova na este peligroso ultimo maga dia. Ta ayuda le kanaton para esta cerca con ele y para esta fuerte el diaton fe. Poreso, ojala todo kita hay esta determinao para hace igual na cosa ya hace el maga Israelita si ta oi sila con el diferente sonor del trompeta!