“Cuando yan purpiajan kame pati de mio primo, ya puede yo agarra de suyu pescueso y ya hace yo cuga con ele. Quierre yo mata con ele.”​—Paul.

“Na casa, pronto lang yo rabia maskin nuay razon. Hay hace yo quebra gamit, jurguesa y maskin cosa yo puede agarra.”​—Marco.

Posible, gendeh kita hace igual ansina. Pero tiene vez, todo kita tan lisud controla con el diaton mismo cuerpo. Ta sucede se cay todo kita ya hereda imperfeccion con el primer gente, si Adan. (Roma 5:12) El cuanto, igual con Paul y Marco, tan lisud controla con el diila rabia. Posible, el otro tan dificil controla con el diila pensamiento. Pirmi sila ta pensa con el maga cosas negativo o na maga cosas que ta hace kanila miedo. Y posible, el otro tan dificil resisti na tentacion que comete sexual imoralidad, toma sobra alcoholico tomada o usa droga.

Aquellos quien gendeh ta controla con el diila pensamiento, deseo y accion puede hace malo con el diila vida. Pero puede kita evita con ese. Paquemodo? Si cultiva kita control na cuerpo. Para puede kita se hace, considera kita tres pregunta: (1) Cosa el control na cuerpo? (2) Porque este importante? (3) Paquemodo kita cultiva con este calidad que un aspeto del “fruta del Espiritu”? (Gal. 5:22, 23) Despues, hay considera kita si cosa kita puede hace si tiene vez nuay kita control na cuerpo.

El un persona quien tiene control na cuerpo gendeh dayun ta hace con el cosa le quierre hace. Sino, ta aguanta le para gendeh habla o hace maga cosas que gendeh ta hace alegre con Dios.

Ya dale mira si Jesus si cosa quierre decir que tiene control na cuerpo. El Biblia ya habla: “Cuando ya insulta con Ele, noay Ele contesta de insulto. Cuando ya sufri Le, noay Le dale amenazo, sino ya pone Le su esperanza con el Juez justo.” (1 Ped. 2:23) Si Jesus ya dale mira control na cuerpo cuando el de suyu maga enemigo ya gangguia con ele mientras bitay le na estaca. (Mat. 27:39-44) Ya puede tambien le controla con el de suyu mismo cuerpo cuando el maga religioso lider ya pruba con ele para causa con ele habla maga cosas gendeh justo. (Mat. 22:15-22) Y cuando el cuanto maga rabiao Judio ya guerria con ele piedra, nuay ele man balus. Sino “si Jesus ya esconde y ya sale na Templo.”​—Juan 8:57-59.

Puede ba kita imita con el ejemplo de Jesus? Puede! Si apostol Pedro ya escribi: “Si Cristo mismo ya sufri por causa de ustedes, y ya dale Le un ejemplo para que ustedes ay sigui na disuyo maga paso.” (1 Ped. 2:21) Maskin pa imperfecto kita, puede kita sigui con el ejemplo de Jesus y tiene control na cuerpo. Porque se importante?

Necesita kita tiene control na cuerpo para ganá el favor de Jehova. Maskin pa ya dura ya kita ta sirvi fiel con Jehova, puede perde el diaton buen amistad con ele si gendeh kita controla con el cosa kita ta habla o ta hace.

Considera con Moises quien el “de con todo sumiso na todo gente na entero tierra” de aquel tiempo. (Num. 12:3) Despues del cuanto decada que con paciencia oi con el maga reclamo del maga Israelita, nuay puede controla si Moises con el de suyu mismo cuerpo. Ya rabia le cuando ya reclama ya tambien sila que falta agua. Rabiao le ya habla con el maga gente: “Oi ustedes maga rebelloso! Hay hace ba kame sale agua na este grande piedra para con ustedes?”​—Num. 20:2-11.

Si Moises nuay puede controla con el de suyu mismo cuerpo. Nuay le habla que si Jehova el quien ya hace milagro para dale kanila agua. (Sal. 106:32, 33) Como resulta, nuay con ele permiti si Jehova entra na tierra que ya promete kanila. (Num. 20:12) Hasta na dia del de suyu muerte, posible que ya arripinti gayot si Moises que nuay le puede controla con el de suyu mismo cuerpo.​—Deut. 3:23-27.

Cosa el leccion para kanaton? Maskin pa ya dura ya kita na verdad, gendeh kita debe converza sin respeto con aquellos quien ta manda consumi kanaton o con aquellos necesita corecta. (Ef. 4:32; Col. 3:12) Deverasan, mientras ta queda kita de edad, posible ta queda tambien corto diaton paciencia. Pero, acorda con Moises. No quierre kita hace malo con el diaton buen amistad con Jehova por causa lang cay nuay kita puede controla con el diaton mismo cuerpo. Paquemodo kita puede cultiva con este importante calidad?

Reza que dale contigo sagrao espiritu. Porque? Cay el control na cuerpo amo un aspeto del fruta del espiritu del Dios y ta dale si Jehova de suyu espiritu con aquellos quien ta pidi se con ele. (Luc. 11:13) Por medio del suyu espiritu, si Jehova ta dale kanaton el fuerza que ta necesita kita. (Fil. 4:13, NWT) Puede tambien le ayuda kanaton cultiva con el otro pa aspeto del fruta del espiritu, igual na amor que puede ayuda kanaton para mas facil demonstra control na cuerpo.​—1 Cor. 13:5.

Evita maskin cosa que puede hace mas dificil contigo para tiene control na cuerpo. Por ejemplo, evita maga Internet website y entretenimiento que ta dale mira gendeh justo conducta. (Ef. 5:3, 4) Gane, debe kita evita maskin cosa que puede causa kanaton para hace malo. (Prov. 22:3;  1 Cor. 6:12) Por ejemplo, el un persona quien tiene tendencia hace imoral cosas posible decidi que evita na maskin cosa romantico libro o salida.

Posible, tan dificil kita aplica con este consejo. Pero si hace kita esfuerzo, si Jehova hay dale kanaton el fuerza que necesita kita para controla con el diaton mismo cuerpo. (2 Ped. 1:5-8) Ayuda le kanaton para controla con el diaton maga pensamiento, palabra y accion. Como ejemplo de ese, si Paul y Marco que ya menciona enante, ya puede controla con el diila rabia. Considera tambien con el un hermano quien pronto lang rabia mientras ta maneja y tan purpiajan pa gane na otro driver. Cosa le ya hace? “Ta reza gayot yo cada dia. Ya estudia yo maga articulo acerca na control na cuerpo y yan memorize maga texto na Biblia. Maskin pa por cuanto año ya yo este ta hace, ta hace siempre yo acorda con el de mio mismo cuerpo cada aga que quierre yo esta calmao. Y temprano yo ta sale basta tiene yo onde anda para gendeh yo man dali-dali.”

Todo kita tiene vez gendeh ta puede controla con el diaton mismo cuerpo. Si sucede se, posible tiene kita huya atraca con Jehova na rezo. Pero amo se el tiempo que mas ta necesita kita reza con ele. Poreso, reza dayun con Jehova. Pidi con el de suyu perdon y ayuda y queda determinao que gendeh mas repiti con ese kamali. (Sal. 51:9-11) No pensa que si Jehova gendeh oi con el de tuyu sincero rezo. (Sal. 102:17) Si apostol Juan ta hace kanaton acorda que el sangre del Anak del Dios “ta limpia todo el diaton maga pecado.” (1 Juan 1:7; 2:1; Sal. 86:5) Acorda que si Jehova ya habla con el de suyu maga siervo que no descanza perdona con otro. Poreso, puede kita confia que ansina tambien le hace kanaton.​—Mat. 18:21, 22; Col. 3:13.

Nuay queda alegre si Jehova cuando nuay puede controla si Moises con el de suyu mismo cuerpo na desierto. Maskin pa ansina, si Jehova ya perdona con ele. Y el Palabra del Dios ta habla que fiel si Moises con quien kita debe imita. (Deut. 34:10; Heb. 11:24-28) Nuay permiti si Jehova con Moises entra na tierra que ya promete kanila, pero hay permiti le con Moises queda na Paraiso tierra y dale con ele el oportunidad para vivi hasta para cuando. Puede tambien kita tiene ese oportunidad si continua kita cultiva con ese importante calidad​—el control na cuerpo.​—1 Cor. 9:25.