1. Na cosa manera igual si Jehova na un nana quien ta dale mama?

“PUEDE ba ulvida el un nana con el de suyu anak que ta mama?” Amo se el cosa ya pregunta si Jehova na dia de profeta Isaias. “Maskin pa ulvida este nana, nunca yo ulvida contigo,” el Dios ya habla con el de suyu maga siervo. (Isa. 49:15) Gendeh le pirmi ta compara con el de suyu mismo cuerpo na un nana. Pero, ya hace le se na ese tiempo. Ya usa si Jehova con el relacion del un nana na de suyu anak para revela si paquemodo de hondo el de suyu amor na de suyu maga siervo. Mayoria del maga nana puede man uyun na cosa ya habla el un hermana que si Jasmin, “Si ta dale tu mama con el de tuyu anak, ta forma ustedes un bien especial relacion que gendeh basta-basta perde.”

2. Cosa ta sinti si Jehova si uno na de suyu maga anak el tan lejos con ele?

² Ta nota si Jehova si tiene maskin uno na de suyu maga anak el gendeh mas ta asocia na congregacion y gendeh mas ta participa na trabajo predicacion. Poreso, pensa si paquemodo de dolorido si Jehova si ta mira le con el miles del de suyu maga siervo que ta queda gendeh activo * cada año.

3. Cosa quierre si Jehova?

³ Manada de este maga hermano y hermana quien ya queda gendeh activo el ta bira otravez na congregacion y alegre kita kanila ricibi otravez. Quierre si Jehova que bira sila y amo tambien se el cosa kita quierre. (1 Ped. 2:25) Paquemodo kita puede ayuda kanila? Antes kita contesta con ese pregunta, mas bueno si sabe kita si porque el cuanto ya descanza atende na maga miting y participa na ministerio.

4. Paquemodo ya afecta con el cuanto el secular trabajo?

⁴ El cuanto ya queda bien ocupao na diila secular trabajo. “Ya dale yo bien sobra tiempo y fuerza na de mio secular trabajo,” ya habla si Hung, * un hermano quien ta queda na Southeast Asia. “Ya pensa yo que si tiene yo manada sen, mas puede gayot yo sirvi con Jehova. Poreso, ya trabaja yo mas manada hora. Ya principia yo gendeh atende na cuanto maga miting y na uliji, ya descanza yo man junto na congregacion. Ya diseña con el mundo para el maga gente hinay-hinay man lejos con Dios.”

5. Cosa el efecto na un hermana del todo problema que ya tiene le?

⁵ El cuanto maga hermano y hermana tiene grabe problema. Si Anne de Britain amo un nana que tiene cinco anak. “Uno del de mio maga anak el ya nace que tiene defecto,” ya habla si Anne. “Despues, uno del de mio maga anak mujer el yan disfellow y el de mio anak hombre ya tiene enfermedad de pensamiento. Ya queda yo bien depress poreso nuay mas yo atende na maga miting y sale predica. Na uliji, ya queda yo gendeh activo.” Tiene kita simpatia con Anne y na de suyu familia y tambien con aquellos quien ta enfrenta semejante maga problema.

6. Porque posible desaleja el un persona na maga siervo de Jehova si gendeh le aplica con el Colosa 3:13?

⁶ Le con el Colosa 3:13. El cuanto del maga siervo de Jehova ya sinti duele por causa na un hermano o hermana. Si apostol Pablo ya habla que tiene vez, posible kita tiene valido “reclamo con otro” hermano o hermana. Posible pa gane kita experiencia injusticia. Si gendeh kita con cuidao, posible kita tiene agrabio. Si el un gente rabiao, posible le desaleja na maga siervo de Jehova. Considera con el experiencia de Pablo, un hermano na South America. Ya acusa con ele que tiene le cosa ya hace malo y como resulta, ya perde el de suyu privilegio na congregacion. Cosa le ya hace? “Ya rabia gayot yo,” ya habla si Pablo “y hinay-hinay yo ya sale na congregacion.”

7. Cosa puede sucede si el un persona ta sinti siempre culpable?

⁷ El un persona quien ya viola con el ley del Dios de antes posible sinti culpable y sinti que gendeh le conviene ricibi con el amor del Dios. Maskin pa ya arripinti le y ya dale con ele mira lastima, posible le sinti que gendeh mas le conviene queda siervo del Dios. Ansina ya sinti el un hermano que si Francisco. “Ya disciplina conmigo cay ya comete yo sexual imoralidad,” ele ya habla. “Maskin pa ya continua yo atende maga miting del una, ya queda yo depress y ya sinti que gendeh mas yo conviene man junto na maga siervo de Jehova. Yan conciencia siempre yo y ya sinti yo que nuay perdona conmigo si Jehova. Ya llega el tiempo, nuay mas yo man junto na congregacion.” Cosa tu ta sinti na maga hermano y hermana quien ta enfrenta ansina maga situacion? Tiene ba tu empatia kanila? Mas pa, cosa ta sinti si Jehova acerca kanila?

8. Ta ulvida ba si Jehova con aquellos quien ya sirvi con ele de antes? Explica.

⁸ Gendeh ta ulvida si Jehova con aquellos quien ya sirvi con ele de antes pero temporario ya descanza man junto na congregacion. Y gendeh tambien le ta ulvida con el trabajo que ya hace sila na de suyu servicio. (Heb. 6:10) Si profeta Isaias ya dale un bonito ilustracion que ta dale mira si paquemodo si Jehova ta cuida con el de suyu maga siervo. “Igual  como un pastor, hay cuida le con el de suyu maga carnero,” si Isaias ya escribi. “Por medio na de suyu brazo hay ajunta le con el maga diutay carnero y na de suyu pecho hay carga le con esos.” (Isa. 40:11) Cosa ta sinti si Jehova si tiene uno carnero que ya separta na otro maga carnero? Ya revela si Jesus si cosa ta sinti si Jehova cuando ya pregunta le con el de suyu maga dicipulo: “Cosa ustedes ta pensa? Si un gente tiene cien carnero y ya perde uno de esos, gendeh ba ay deja le con el noventa y nueve na monte y ay anda le busca con el uno perdido? Ta asegura yo con ustedes, cuando ay encontra le con ese, ay queda le el mas alegre por causa de ese un carnero, contra con el noventa y nueve que noay perde.”​—Mat. 18:12, 13.

9. Paquemodo el maga buen pastor na tiempo del Biblia ta trata con el diila maga carnero? (Mira con el letrato na cover.)

⁹ Porque justo que compara con Jehova na un pastor? Cay el un buen pastor na tiempo del Biblia ta cuida gayot con el de suyu maga carnero. Por ejemplo, si David ya protege con el de suyu maga carnero contra na un leon y un oso. (1 Sam. 17:34, 35) Asigurao que nota gayot el un buen pastor si tiene ya perde maskin un carnero. (Juan 10:3, 14) Ese clase de pastor hay deja con el de suyu 99 carnero na turil o encarga le na otro maga pastor y anda busca con el un carnero que ya perde. Si Jesus ya usa con ese ilustracion para enseña kanaton un importante verdad: “El de ustedes Tata na cielo, no quiere que ay perde ni uno de este maga diutay.”​—Mat. 18:14.

10. Asegun na Ezequiel 34:11-16, cosa ya promete hace si Jehova con el de suyu maga carnero que ya perde?

¹⁰ Si Jehova ta ama con el cada uno kanaton, incluido ya con el “maga diutay” quien ya separta na de suyu congregacion. Por medio con profeta Ezequiel, el Dios ya promete que hay busca le con el de suyu maga perdido carnero y hay ayuda le kanila queda otravez fuerte na espiritual. Y ele ya habla si cosa le hace para puede busca kanila. Semejante este na cosa ta hace el un Israelita pastor si perde el de suyu carnero. (Le con el Ezequiel 34:11-16.)  Una, hay busca el pastor con el de suyu carnero y necesita este grande tiempo y esfuerzo. Despues, si puede le incuntra con este, hay lleva le con este otravez na grupo del maga carnero. Omento pa, si el carnero tiene irida o con hambre, el pastor hay cuida con este, pone venda de este irida, carga con este y dale come. El maga anciano que amo el maga pastor del “maga hermano y hermana” necesita hace el semejante maga cosas para ayuda con aquellos quien ya desaleja na congregacion. (1 Ped. 5:2, 3) El maga anciano hay busca kanila, ayuda kanila bira na congregacion, dale kanila mira amor y dale espiritual ayuda que ta necesita sila. *

11. Cosa sabe el un buen pastor?

¹¹ El un buen pastor sabe que puede perde el de suyu carnero. Y si el un carnero hay desaleja na grupo del maga carnero, el pastor gendeh ta castiga con este. Considera si paquemodo el Dios ya ayuda con el cuanto del de suyu maga siervo quien temporario ya separta con ele.

12. Paquemodo ya trata si Jehova con Jonas?

¹² Si profeta Jonas ya escapa na de suyu assignment. Maskin pa ansina, nuay con ele dayun abandona si Jehova. Igual na un buen pastor, si Jehova ya busca con ele y ya ayuda con ele tiene el fuerza que necesita le para cumpli con el de suyu assignment. (Jon. 2:7; 3:1, 2) Na uliji, el Dios ya usa con el calabasa blanco para hace entende con Jonas que importante el vida del gente. (Jon. 4:10, 11) Cosa el leccion? El maga anciano gendeh dayun debe abandona con aquellos quien ya queda gendeh activo. Sino, el maga anciano ta pricura entende si cosa el razon si porque el un hermano ya desaleja na congregacion. Y si bira con Jehova ese hermano, el maga anciano ta continua dale mira amor con ele.

13. Cosa kita puede aprende na cosa ya hace si Jehova con el quien ya escribi con el Salmo 73?

¹³ Yan luya el quien ya escribi con el Salmo 73 cay ya puede le observa que ta continua progresa el vida del maga malo. Ya puede le pensa si tiene ba provecho si hace con el voluntad del Dios. (Sal. 73:12, 13, 16) Cosa ya hace si Jehova? Nuay le regaña con ese gente.  Gane, ya manda el Dios que escribi el maga palabra del salmista na Biblia. Na uliji, ya realiza el salmista que nuay maskin cosa que mas importante contra na buen relacion con Jehova. (Sal. 73:23, 24, 26, 28) Cosa el leccion? El maga anciano gendeh dayun debe juzga con aquellos quien tan duda si tiene ba beneficio si sirvi con Jehova. En vez de regaña kanila, el maga anciano debe pricura entende si porque sila ta converza y ta actua na ansina manera. Si hace se el maga anciano, mas puede sila busca texto na Biblia que puede ayuda con ese maga persona.

14. Porque necesita ayuda si Elias y paquemodo si Jehova ya dale con ese?

¹⁴ Ya escapa si profeta Elias con Reyna Jesabel. (1 Rey 19:1-3) Ya pensa le que nuay mas otro quien ta sirvi como profeta de Jehova y ya sinti le que nuay valor el de suyu trabajo. Ya queda bien depress si Elias y quierre le muri. (1 Rey 19:4, 10) En vez de regaña con Elias, si Jehova ya asigura con ele que gendeh le solo, que puede le confia na poder del Dios y manada pa le cosa puede hace. Con paciencia si Jehova ya oi na cosa tan lingasa si Elias y ya dale con ele maga nuevo assignment. (1 Rey 19:11-16, 18) Cosa el leccion? Todo kita, especialmente el maga anciano, debe trata na buen manera con el diaton maga hermano y hermana. Maskin pa rabiao el un persona o ta sinti que gendeh con ele conviene perdona si Jehova, el maga anciano hay oi con ele mientras ta habla le si cosa le deverasan ta sinti. Despues, hay pricura sila asigura con ese persona que si Jehova ta ama con ele.

15. Asegun na Juan 6:39, cosa ta sinti si Jesus na maga siervo del de suyu Tata?

¹⁵ Cosa quierre si Jehova que sinti kita acerca con aquellos quien ya desaleja na congregacion? Puede kita aprende na ejemplo de Jesus. Sabe si Jesus que precioso el todo siervo de Jehova, poreso ya hace le el todo para puede bira con Jehova “el maga carnero perdido del casa de Israel.” (Mat. 15:24; Luc. 19:9, 10) Como un buen pastor, ya hace tambien si Jesus el todo para evita perde el maskin uno na maga siervo de Jehova.​—Le con el Juan 6:39.

16-17. Cosa debe sinti el maga anciano si ta ayuda sila con aquellos quien ya desaleja na congregacion? (Mira con el cajon “ Si Cosa Ta Sinti el un Carnero que Ya Perde.”)

¹⁶ Si apostol Pablo ya anima con el maga anciano na congregacion na Efeso que imita con el ejemplo de Jesus. “Necesita kita ayuda con el maga pobre [“maluya,” NWT], asegun con el maga Palabra del Señor Jesus quien ya habla: ‘Mas grande el alegria de aquel quien ta dale contra con el quien ta recivi.’” (Act. 20:17, 35) Claro que el maga anciano tiene un importante responsibilidad que cuida con el maga siervo de Jehova. “Si ta pensa yo si paquemodo si Jehova ta cuida con aquellos quien ya descanza asocia na congregacion, ta manda este move conmigo para hace tambien el todo para ayuda kanila,” ya habla si Salvador, un anciano na Spain. “Como un espiritual pastor, convincido yo que quierre si Jehova que cuida yo kanila.”

¹⁷ Ya puede ayuda para bira otravez con Jehova todo aquellos quien ya menciona na este articulo. Na este mismo tiempo, manada de aquellos quien ya descanza asocia el quierre tambien bira con Jehova. Na siguiente articulo hay discuti kita mas detalle si paquemodo kita ayuda kanila bira con Jehova.