Este maga versiculo ya lista nueve calidad: “El fruta del espiritu amo el amor, alegria, paz, paciencia, hacida de bueno con otro, pagka-bueno, fe, pagka-calmao y control na cuerpo.” Pero, gendeh lang este el maga calidad que puede kita cultiva na ayuda del espiritu del Dios.

Nota si cosa ya escribi si apostol Pablo antes de ese maga versiculo: “El maga trabajo de laman . . . amo el sexual imoralidad, cuchinadas, nuay verguenza conducta, idolatria, espiritismo, odio, peleajan, celos, sobra de rabia, purpiajan, division, secta, envidia, burracherias, nuay control de alegria y maga cosas que semejante con ese.” (Gal. 5:19-21, NWT) Poreso, puede era menciona si Pablo otro pa “maga trabajo de laman,” igual como cosa puede le na Colosa 3:5. Na igual manera, despues lista con el nueve buen calidad, ele ya habla: “Contra na ese maga cosas nuay ley.” Poreso, nuay menciona si Pablo con el todo buen calidad que puede kita cultiva na ayuda del sagrao espiritu.

Claro este si compara kita con este lista na cosa ya escribi si Pablo na congregacion de Efeso: “El maga fruta del luz amo todo maga cosa-cosa bueno [“pagka-bueno,” NWT], el santidad y el verdad.” (Ef. 5: 8, 9) El “pagka-bueno,” igual con el santidad y verdad, amo parte de “fruta del luz” pero parte tambien este del “fruta del espiritu.”

Na igual manera, ya anima si Pablo con Timoteo que “precura queda santo y religioso, paciencioso y amable, lleno de fe y amor.” (1 Tim. 6:11) Tres lang de ese maga calidad (paciencia, fe y amor) el ya menciona que aspeto del “fruta del espiritu.” Pero asigurao que necesita tambien si Timoteo con el ayuda del sagrao espiritu para puede cultiva con el otro calidad que ya menciona: para queda recto, religioso y amable.​—Compara na Colosa 3:12; 2 Pedro 1:5-7.

Entonces, el Galacia 5:22, 23 gendeh ta menciona con el todo calidad que debe cultiva el maga Cristiano. El espiritu del Dios puede ayuda kanaton para cultiva con el nueve aspeto que listao como “fruta del espiritu.” Pero tiene pa otro maga calidad que debe kita cultiva mientras ta progresa kita na espiritual y ta “visti el camisa del Nuevo Naturaleza creao na ichura del Dios, santo y noay culpa asegun con el Verdad.”​—Ef. 4:24.