1-2. Cosa maga topico el bien importante para na maga Testigo de Jehova?

TODO kita ta enfrenta con este bien importante issue ahora​—el soberania y vindicacion. Como maga Testigo de Jehova, bien interesao kita discuti con ese maga topico. Pero el soberania ba del Dios y el santificacion del de suyu nombre gendeh relatao na uno y otro? Relatao este.

² Todo kita sabe que debe santifica con el nombre del Dios. Ya aprende tambien kita que debe dale prueba que el soberania o el manera de rulanza de Jehova amo el de con todo bueno. Poreso, este dos issue bien importante.

3. Cosa el incluido na nombre de Jehova?

³ Incluido na nombre de Jehova el todo cosas acerca na diaton Dios, incluido ya el de suyu manera de rulanza. Poreso, si ta habla kita que bien importante que santifica con el nombre de Jehova, quierre decir se que debe tambien kita dale prueba que el de suyu manera de rulanza amo el de con todo bueno. El nombre de Jehova bien conectao na de suyu rulanza como el Soberano.​—Mira con el cajon “ Si Cosa Incluido na Bien Importante Issue.”

4. Cosa ta habla el Salmo 135:13 acerca na nombre del Dios y cosa maga pregunta kita considera na este articulo?

⁴ Bien especial el nombre de Jehova. (Le con el Salmo 135:13.) Pero, porque bien importante el nombre del Dios? Paquemodo con ese ya hace malo? Paquemodo el Dios santifica con ese? Y cosa kita hace para defende con el de suyu nombre? Contesta kita con ese maga pregunta.

5. Cosa posible pensa el otro si oi sila que debe santifica con el nombre del Dios?

⁵ “Santifica con el de uste nombre.” (Mat. 6:9, NWT) Amo se  el cosa ya habla si Jesus que debe prioridad na diaton rezo. Pero cosa le quierre decir? Si ta santifica con el un cosa, quierre decir se que hace con ese sagrao o limpio. Posible pensa el otro, ‘Gendeh ba sagrao y limpio ya el nombre de Jehova?’ Para contesta con ese, necesita kita pensa si cosa el envuelto na un nombre.

6. Cosa ta hace valoroso con el un nombre?

⁶ El nombre gendeh lang basta un palabra que puede habla o escribi na papel. Nota si cosa ta habla el Biblia: “Mas bueno pa iscuji con el un buen nombre contra na manada riqueza.” (Prov. 22:1; Ecl. 7:1) Porque bien valoroso el un nombre? Cay envuelto aqui el reputacion del un persona o si cosa ta pensa el otro acerca con ese persona quien tiene ese nombre. Poreso, gendeh bien importante si paquemodo habla o escribi con el un nombre. Sino el de con todo importante amo si cosa pensa el otro gente si mira o oi sila con ese nombre.

7. Paquemodo ya ataca el maga gente con el nombre del Dios?

⁷ Si ta habla imbusterias el maga gente acerca con Jehova, ta destroza sila con el de suyu reputacion y ta pricura sila hace malo con el de suyu nombre. El primer ataque na nombre y reputacion del Dios ya sucede na jardin de Eden. Considera si cosa kita aprende na ese ataque.

8. Cosa sabe kanda Adan y Eva y cosa kita puede pregunta?

⁸ Sabe si Adan y Eva el nombre de Jehova y el maga importante verdad acerca con ele. Sabe sila que ele el Creador y el quien ya dale kanila vida, el bonito lugar onde sila ta queda y un perfecto marido y mujer. (Gen. 1:26-28; 2:18) Pero, hay continua ba sila usa con el diila perfecto pensamiento para medita con el todo cosa ya hace si Jehova para kanila? Hay continua ba sila hace hondo con el diila amor y apresacion para con Jehova? Ya queda claro el contestacion cuando ya pruba kanila el enemigo del Dios.

9. Asegun na Genesis 2:16, 17 y 3:1-5, cosa ya habla si Jehova con el primer man maridable y paquemodo ya cambia si Satanas con el verdad?

⁹ Le con el Genesis 2:16, 17 y 3:1-5. Ya hace  sale si Satanas que el culebra el tan cuento cuando ya pregunta este con Eva: “Ya habla ba gayot el Dios que gendeh ustedes debe come con el fruta del todo pono na jardin?” Ese pregunta ta contene imbusterias que igual na veneno que gendeh ta puede nota. El Dios ya habla que puede sila come con el todo fruta, puera lang con el uno. Bien manada onde puede iscuji kanda Adan y Eva. (Gen. 2:9) Deverasan gayot bondadoso si Jehova. Pero, ya prohibi le con Adan y Eva que come con el fruta del un pono. Poreso, el pregunta de Satanas ya hace sale que gendeh bondadoso el Dios. Posible ya pensa si Eva, ‘Tiene gaha cosa ta esconde el Dios y no quierre dale conmigo?’

10. Paquemodo si Satanas directa ya hace malo con el nombre del Dios y cosa el resulta?

¹⁰ Na ese tiempo, obediente pa siempre si Eva con Jehova. Ya habla le con Satanas si cosa el claro direccion del Dios. Ya habla pa gane le que gendeh sila debe maskin agarra con el pono. Sabe le si cosa el aviso del Dios​—muerte el resulta del desobediencia. Pero si Satanas ya contesta: “Gendeh gayot ustedes muri.” (Gen. 3:2-4) Gendeh lang basta ta hace sale si Satanas que imbustero el Dios. Sino, directa le ta hace malo con el nombre del Dios y ya habla con Eva que imbustero si Jehova. Na este manera, si Satanas ya queda diablo o falso acusador. Ya puede engaña con Eva cay ya creé le con Satanas. (1 Tim. 2:14) Mas ya confia le con Satanas contra con Jehova. Poreso, ya hace si Eva el de con todo mali decision. Ya decidi le desobedece con Jehova. Ya come le con el fruta que ya prohibi si Jehova. Despues, ya dale tambien le con Adan.​—Gen. 3:6.

11. Cosa era puede hace el diaton primer mayores, pero cosa sila nuay puede hace?

¹¹ Pensa unrato si cosa era debe habla si Eva con Satanas. Imagina que ya habla le igual ansina: “No conoce yo contigo, pero conoce yo con el de mio Tata, si Jehova. Ta ama y ta confia yo con ele. Ya dale le kanamon de Adan el todo cosa kame tiene. Quien ba tu para habla mal cosas acerca con ele? Sale qui!” Asigurao que bien alegre era si Jehova oi ansina clase de palabra estaba na de suyu amable anak! (Prov. 27:11) Pero si Eva nuay amor leal para con Jehova y nuay tambien de ese clase calidad si Adan. Cay nuay sila ansina clase de amor para con el diila Tata, si Adan y Eva nuay puede defende con el de suyu nombre contra na falso acusador.

12. Cosa ya hace si Satanas para man duda si Eva y cosa nuay puede hace si Adan y Eva?

¹² Como cosa kita puede nota, ya hace manera si Satanas para man duda si Eva. Ya puede le causa con Eva para cuestiona si cosa clase de Persona el quien ta lleva con el nombre Jehova. Despues, nuay defende si Adan y Eva con el nombre y reputacion de Jehova. Poreso, bien facil para kanila que oi con Satanas y man rebelde con el diila Tata. Amo tambien se el tactica de Satanas ahora. Ta hace le malo  con el nombre de Jehova. Facil lang para con el maga gente quien ta creé con el imbusterias de Satanas que desobedece con Jehova.

13. Paquemodo el Ezequiel 36:23 ta hace claro si cosa el de con todo importante mensaje del Biblia?

¹³ Ta acepta lang ba si Jehova con el mal acusacion y gendeh defende con el de suyu mismo cuerpo? Gendeh gayot! El entero Biblia ta habla si cosa ya hace si Jehova para dale prueba que gendeh deverasan el mal cosas que ya habla acerca con ele na Eden. (Gen. 3:15) Gane, puede kita habla que el de con todo importante mensaje del Biblia amo: Ta santifica si Jehova con el de suyu nombre y ta hace bira con el justicia y paz na tierra por medio na de suyu Reino, donde el de suyu Anak hay rula. El Biblia ta contene maga informacion que puede kanaton ayuda entende si paquemodo si Jehova puede santifica con el de suyu nombre.​—Le con el Ezequiel 36:23.

14. Paquemodo si Jehova ya puede santifica con el de suyu nombre despues del rebelion na Eden?

¹⁴ Si Satanas ya hace el todo para gendeh puede cumpli si Jehova con el De Suyu proposito. Pero nuay gayot puede tiene buen exito si Satanas. El Biblia ta dale mira si cosa ya hace si Jehova y ta dale este prueba que nuay maskin quien el igual con Dios Jehova. Deverasan, el rebelion de Satanas y del todo quien ya suporta con ele ya causa gayot dolor con Jehova. (Sal. 78:40) Pero ya enfrenta le con este ataque con sabeduria, paciencia y justicia. Ya dale tambien le mira con el de suyu poder na manada manera. Mas pa na todo, ya dale le mira amor na todo cosa le ya hace. (1 Juan 4:8) Si Jehova nuay descanza santifica con el de suyu nombre.

15. Paquemodo si Satanas ta hace malo ahora con el nombre del Dios y cosa el resulta de este?

¹⁵ Si Satanas ta continua siempre hace malo con el nombre del Dios ahora. Ta causa le con el maga gente para man duda si el Dios ba poderoso, ta hace el justo, sabio y amable. Por ejemplo, ta pricura convinci si Satanas con el  maga gente que gendeh si Jehova el Creador. Y si creé el maga gente que tiene Dios, manda kanila pensa si Satanas que sobra de istricto y gendeh justo el Dios y el de suyu maga principio. Ta enseña pa gane le con el maga gente que si Jehova un brutal Dios quien ta quema con el maga gente na infierno. Si creé sila con ese maga imbusterias, facil para kanila que desobedece con Jehova. Mientras nuay pa destroza con Satanas, hay continua le hace malo con Jehova y hace tambien le manera para desobedece tu con Dios. Pero, hay tiene ba le buen exito?

16. Cosa el un cosa que puede tu hace que nuay puede hace kanda Adan y Eva?

¹⁶ Ya permiti si Jehova con el maga imperfecto gente que ayuda para santifica con el de suyu nombre. Poreso, puede tu hace con el un cosa que nuay puede hace kanda Adan y Eva. Na mundo que lleno de maga gente quien ta mal habla y nuay respeto con el nombre de Jehova, puede tu defende con el nombre de Jehova y habla con el maga gente el verdad​—que si Jehova sagrao, recto, bueno y amable. (Isa. 29:23) Puede tu suporta con el de suyu rulanza. Puede tu ayuda con el maga gente entende que el rulanza lang de Jehova el deverasan recto y este lang puede lleva paz y alegria na todo creacion.​—Sal. 37:9, 37; 146:5, 6, 10.

17. Cosa ya hace si Jesus para manda conoce con el nombre del de suyu Tata?

¹⁷ Si ta defende kita con el nombre de Jehova, ta sigui kita con el ejemplo de Jesucristo. (Juan 17:26) Ya manda conoce si Jesus con el nombre del de suyu Tata, pero nuay lang le usa con este nombre sino ya defende tambien le con el reputacion de Jehova. Por ejemplo, otro le na maga Fariseo quien ta hace sale que si Jehova brutal, sobra el cosa ta pidi na maga gente, lejos y nuay lastima. Ya ayuda si Jesus con el maga gente para mira que el de suyu Tata razonable, paciencioso, amable y sabe perdona. Cay ya imita le con el calidad del de suyu Tata cada dia, ya puede le ayuda con el maga gente conoce con Jehova.​—Juan 14:9.

18. Cosa kita puede hace para dale mira que gendeh deverasan el imbusterias contra con Jehova?

¹⁸ Igual con Jesus, puede kita habla con otro si cosa kita sabe acerca con Jehova y enseña kanila que ele bueno y amable Dios. Si hace kita se, ta dale kita mira que gendeh deverasan  el imbusterias y acusacion contra con Jehova. Ta santifica tambien kita con el nombre de Jehova y ta hace con ese sagrao na pensamiento y corazon del maga gente. Puede tambien kita imita con Jehova, maskin pa imperfecto kita. (Ef. 5:1, 2) Si el diaton palabra y accion ta dale mira si cosa clase de Dios si Jehova, ta ayuda kita santifica con el de suyu nombre. Ta vindica kita con ese nombre si ta ayuda kita con el maga gente que sabe el verdad acerca con Dios. * Ta dale tambien kita prueba que el maga imperfecto gente puede mentena con el diila integridad.​—Job 27:5.

19. Paquemodo el Isaias 63:7 ayuda kanaton para mira si cosa debe el diaton goal si ta enseña kita?

¹⁹ Tiene pa otro cosas que puede kita hace para santifica con el nombre de Jehova. Si ta enseña kita con otro el verdad na Biblia, ta hace kita claro acerca con el soberania del Dios, que si Jehova el tiene derecho para rula con el universo. Pero maskin pa importante que enseña kita kanila acerca con el maga ley del Dios, el diaton goal amo que ayuda kanila ama con Jehova, el diaton Tata, y queda leal con ele. Necesita kita hace claro con el maga bonito calidad de Jehova y si cosa clase de Persona el quien ta lleva con ese nombre. (Le con el Isaias 63:7.) Si ta enseña kita na ansina manera, hay ayuda kita con otro que ama y obedece con Jehova cay quierre sila queda leal con ele.

20. Cosa kita hay considera na siguiente articulo?

²⁰ Pero paquemodo kita puede asigura que el diaton conducta y enseñada puede ayuda con otro que pensa buen cosas acerca con Jehova y queda cerca con ele? El siguiente articulo hay contesta con ese pregunta.