1. Cosa ya habla el maga dicipulo de Jesus con el un grande grupo de maga gente que hace?

YAN junto-junto el un grande grupo de maga hombre y mujer que estaba na manada nacion y quien ta converza diferente lengguaje. Tiene cosa que bien especial el ya sucede na ese dia. El cuanto maga Judio derepente lang ya puede converza con el maga lengguaje de ese maga visita. Nuay gayot se expecta el maga visita! Pero, mas ya espanta sila na cosa ta habla este maga Judio kanila y si cosa ya habla si apostol Pedro con todo. Incluido aqui el mensaje que puede sila salva si demonstra sila fe con Jesucristo. Ya puede afecta este mensaje con aquel grupo de maga gente. Como resulta, ya pregunta sila: “Cosa man came necesita hace?” Si Pedro ya contesta kanila: “Necesita . . . bautiza cada uno de ustedes.”—Act. 2:37, 38.

2. Cosa kita hay examina na este articulo? (Mira con el letrato na cover.)

² Gendeh gayot maka-expecta el cosa sunod ya sucede. Tiene maga 3,000 gente el ya bautiza na ese dia y ya queda maga dicipulo del Cristo. Este el principio del grande trabajo de hacida de dicipulo que ya manda si Jesus con el de suyu maga siguidores. Ese trabajo ta continua hasta na diaton tiempo ahora. Siempre, gendeh kita puede man cuento con el un persona ahora por cuanto hora y despues preparao ya le para bautiza. Posible, necesita cuanto meses o un año, o gane baka mas pa para alcanza el estudiante con ese goal. Si ta conduci tu Bible study junto con el un persona, sabe tu que gendeh facil hace maga dicipulo. Na este articulo, hay examina kita si cosa tu puede hace para ayuda con el de tuyu estudiante queda un bautizao dicipulo.

3. Cosa ta habla el Mateo 28:19, 20 que debe hace el un Bible study para progresa le para na bautismo?

³ Antes de bautiza, el un Bible study debe aplica con el cosa ta enseña el Biblia. (Le con el Mateo 28:19, 20.) Si el un Bible study ta aplica con el cosa le ta aprende, hay queda le igual na “un gente tiene juicio” o sabio na ilustracion de Jesus quien ya abri hondo hoyo para planta con el de suyu casa na fundacion de piedra. (Mat. 7:24, 25; Luc. 6:47, 48) Paquemodo kita puede ayuda con el un Bible study para aplica con el cosa le ta aprende? Considera kita tres sugestion.

4. Paquemodo kita ayuda con el un Bible study que continua hace esfuerzo para cualifica na bautismo? (Mira tambien con el cajon “ Ayuda con el Bible Study Alcanza el De Suyu Goal.”)

⁴ Ayuda con el de tuyu Bible study que tene maga goal. Porque tu debe hace con ese? Considera con este ilustracion: Si man viaje tu largo distancia, posible decidi tu que descanza na maga bonito lugar. Na ese manera, gendeh tu sinti que bien lejos pa el de tuyu destinacion. Na igual manera, si el un estudiante ta hace maga goal que puede le alcanza na corto tiempo, posible hay realiza le que puede tambien le alcanza con el goal que bautiza. Usa con el seccion “Pruba Hace Este” na libro Queda Alegre Hasta Para Cuando! para ayuda con el de tuyu Bible study que progresa. Na fin del cada leccion, discuti si paquemodo el goal hay ayuda con ele para aplica con el cosa le nuevo lang ya aprende. Si tiene tu otro goal para na de tuyu Bible study, puede tu se escribi na “Otro pa que puede tu hace.” Regular man repaso con el de tuyu estudiante el maga goal que puede le alcanza na corto tiempo y aquel puede le alcanza na mas largo tiempo.

5. Asegun na Marcos 10:17-22, cosa ya habla si Jesus con el un rico hombre que debe le hace y porque?

⁵ Ayuda con el de tuyu Bible study que hace maga cambio na de suyu vida. (Le con el Marcos 10:17-22.) Sabe si Jesus que dificil para  con el un rico gente que vende con el todo de suyu propiedad. (Mar. 10:23) Pero, ya habla si Jesus con ese gente que hace este grande cambio na de suyu vida. Porque? Cay ta ama con ele si Jesus. Tiene vez, posible tan alang-alang kita anima con el diaton Bible study que aplica con el cosa le ta aprende cay ta sinti kita que gendeh pa le preparao hace maga cambio. Posible, necesita largo tiempo para con el maga gente que quita con el diila maga mal trabajo y bisti con el nuevo personalidad. (Col. 3:9, 10) Pero si mas temprano tu man cuento con el estudiante acerca con este, mas puede le dayun principia hace maga cambio. Si hace tu se, ta dale tu mira que ta ama tu con ele.—Sal. 141:5; Prov. 27:17.

6. Porque kita debe pregunta con el diaton Bible study si cosa el de suyu opinion?

⁶ Importante que pregunta kita con el diaton Bible study si cosa el de suyu opinion acerca na un topico. Puede este ayuda para sabe si cosa le ta entende y ta creé. Si pirmi tu se hace, facil ya lang para contigo que discuti maga cosas que posible man dificil le acepta. El libro Queda Alegre Hasta Para Cuando! ta contene maga pregunta que puede ayuda para sabe si cosa ta pensa el Bible study. Por ejemplo, el pregunta na leccion 04 amo: “Cosa gaha ta sinti si Jehova si ta usa tu con el de suyu nombre?” y na leccion 09: “Cosa el cuanto cosas que quierre tu inclui na de tuyu rezo?” Na primero, posible man dificil el de tuyu Bible study contesta con ese maga pregunta. Puede tu ayuda si man train tu con ele que pensa base na maga texto y maga letrato na libro.

7. Paquemodo kita puede usa con el maga deverasan experiencia na efectivo manera?

⁷ Si ya entende ya el Bible study si cosa le necesita hace, usa maga deverasan experiencia que puede con ele anima para hace con ese. Por ejemplo si tan dificil le atende na maga miting, puede tu dale mira con ele el video Ya Cuida Conmigo si Jehova que puede mira na seccion “Sabe Pa Mas” na leccion 14. Na maga leccion del libro Queda Alegre Hasta Para Cuando! puede tu incuntra con ese maga experiencia na seccion “Aprende Pa Mas” o na “Sabe Pa Mas.” * Tene cuidao que no compara con el de tuyu Bible study con otro y habla, “Si ya puede le se hace, puede tambien tu.” Deja con el estudiante que ele mismo puede pensa con ese. Sino, hace claro con el maga cosas que ya puede ayuda con el persona na video para aplica con el maga enseñanza na Biblia. Posible, puede tu menciona un importante texto o practical cosas que ya hace le. Si posible, hace claro si paquemodo si Jehova ya ayuda con ese persona.

8. Paquemodo kita puede ayuda con el diaton Bible study ama con Jehova?

⁸ Ayuda con el de tuyu Bible study que ama con Jehova. Paquemodo? Busca maga oportunidad que puede tu ayuda con el de tuyu Bible study para aprende pa mas acerca con el maga calidad de Jehova. Ayuda con ele que mira con Jehova como un alegre Dios quien ta suporta con aquellos quien ta ama con Ele. (1 Tim. 1:11, NWT; Heb. 11:6) Dale mira con el de tuyu Bible study que hay beneficia le si aplica le con el cosa le ta aprende y explica que ese maga beneficio ta dale mira que si Jehova ta ama con ele. (Isa. 48:17, 18) Si mas ta queda fuerte el amor del de tuyu Bible study para con Jehova, hay mas quierre le hace maga necesita cambio.—1 Juan 5:3.

9. Uyun na Marcos 10:29, 30, cosa puede ayuda con el un persona que hace maga sacrificio para queda un bautizao dicipulo?

⁹ Para progresa para na bautismo, el un Bible study necesita hace maga sacrificio. Igual con el un rico gente que ya menciona enante, el  cuanto maga Bible study posible necesita sacrificia con el diila material cosas. Si el diila trabajo gendeh harmonia na maga principio na Biblia, posible necesita sila busca otro trabajo. Manada posible necesita deja con el diila maga amigo quien gendeh ta ama con Jehova. Posible, abandona con otro el diila familia quien no quierre na maga Testigo de Jehova. Si Jesus ya habla que posible man dificil el cuanto que hace ansina maga sacrificio. Pero, ya promete le que gendeh queda envano el maga sacrificio de aquellos quien sigui con ele cay si Jehova hay dale kanila un amable espiritual familia. (Le con el Marcos 10:29, 30.) Paquemodo tu puede ayuda con el de tuyu Bible study para beneficia na este bonito regalo?

10. Cosa tu ya aprende na experiencia de Manuel?

¹⁰ Queda amigo del de tuyu Bible study. Importante que dale tu mira con el de tuyu Bible study que ta ama tu con ele. Porque? Nota con el comento de Manuel, quien ta queda na Mexico. Ya acorda le cuando un Bible study pa le y ya habla: “Antes principia el diamon estudiada, el quien ta conduci conmigo ta pregunta si quetal iyo. Ya ayuda se conmigo para man relax y habla con ele acerca na maskin cosa. Y ya sinti yo que ta ama gayot le conmigo.”

11. Paquemodo posible puede beneficia el diaton maga Bible study si man junto sila kanaton?

¹¹ Dale tiempo para man junto con el de tuyu maga Bible study, igual na cosa ya hace si Jesus na de suyu maga siguidores. (Juan 3:22) Si posible, invita con el de tuyu progresivo Bible study na casa para toma cafe, come o mira con el diaton broadcasting de cada mes. Posible, mas aprecia el de tuyu Bible study si invita tu con ele na tiempo que posible ta sinti le triste cay el de suyu maga amigo y familia ta celebra un falso religioso celebracion. “Igual de manada el cosa yo ya aprende acerca con Jehova na tiempo cuando tan junto yo con el quien ta conduci conmigo y na tiempo que tan Bible study kame,” ya habla si Kazibwe, quien ta queda na Uganda. “Ya mira yo si paquemodo si Jehova ta cuida con el de suyu maga siervo y si paquemodo sila de alegre. Ese el cosa yo quierre experiencia.”

12. Porque debe kita lleva diferente publisher na Bible study?

 ¹² Lleva diferente publisher na de tuyu Bible study. Tiene vez, posible facil para kanaton si kita lang anda solo o lleva publisher aquel pirmi ya kanaton tan uban. Maskin pa dol mas facil se para kanaton, el diaton Bible study posible mas beneficia si lleva kita diferente publisher junto kanaton. “El cada publisher quien ta sigui con el quien tan Bible study conmigo ta puede explica maga cosas que nuay yo puede pensa,” ya habla si Dmitrii, quien ta queda na Moldova. “Ya ayuda se conmigo para mira otro manera que puede yo aplica con el cosa yo ta aprende. Ya ayuda tambien se conmigo para gendeh tanto tene huya cuando primer vez yo ya atende na miting cay ya conoce ya yo con el manada del maga hermano y hermana.”

13. Porque debe kita ayuda con el diaton maga Bible study para atende na maga miting?

¹³ Ayuda con el de tuyu Bible study que atende na maga miting. Porque? Cay si Jehova ya manda con el de suyu maga siervo que man junto-junto y parte se del diaton adoranza. (Heb. 10:24, 25) Omento pa, el diaton maga hermano y hermana amo el diaton espiritual familia. Si tan junto kita kanila na maga miting, igual se dol tan junto kita kanila come sabroso comida. Si ta ayuda tu con el de tuyu Bible study para atende na maga miting, ta ayuda tu con ele para hace con el un bien importante cosa para puede le bautiza. Pero, posible dificil se para con ele. Paquemodo el libro Queda Alegre Hasta Para Cuando! puede ayuda con el de tuyu estudiante enfrenta con el maskin cosa problema que ta sangga con ele para atende na maga miting?

14. Paquemodo kita ayuda con el diaton Bible study para atende na maga miting?

¹⁴ Usa con el leccion 10 del libro Queda Alegre Hasta Para Cuando! para ayuda con el de tuyu Bible study atende na maga miting. Antes completa este libro, ya pidi con el cuanto publisher que usa con este leccion na diila Bible study. Ya habla sila que tiene gayot este buen efecto y ya ayuda se con el diila Bible study que atende na maga miting. Pero siempre, no espera que llega pa ustedes na leccion 10 antes tu invita con el de tuyu Bible study que atende na diaton maga miting. Si posible, invita dayun con ele y regular con ese hace. El maga Bible study ta enfrenta diferente maga problema. Poreso, pone atencion con el maga necesidad del de tuyu Bible study y mira si puede ba tu dale practical ayuda. No man luya si gendeh dayun le atende. Tene paciencia pero continua siempre con ele invita.

15. Cosa miedo posible tene el diaton Bible study?

¹⁵ Ta acorda ba tu con el tiempo que ya tiene tu miedo queda uno del maga Testigo de Jehova? Posible, ya sinti tu que gendeh gayot tu puede predica na publico. O baka ya tiene tu miedo cay el de tuyu familia o maga amigo posible man contra contigo. Si ansina, puede tu entende con el cosa ta sinti el de tuyu Bible study. Si Jesus ya habla que el cuanto gente posible tene ese miedo. Pero, ya anima le con el de suyu maga siguidores que no deja con el miedo que sangga kanila para sirvi con Jehova. (Mat. 10:16, 17, 27, 28) Paquemodo si Jesus ya ayuda con el de suyu maga siguidores que ganá con el diila miedo? Y paquemodo tu puede imita con el de suyu ejemplo?

16. Paquemodo kita ayuda con el diaton Bible study para habla con otro acerca con el cosa le ta creé?

¹⁶ Hinay-hinay man train con el de tuyu Bible study que habla con el cosa le ta creé. El maga dicipulo de Jesus posible ya nervia cuando ya imbia kanila para predica. Pero, ya ayuda kanila si Jesus y ya habla si onde sila predica y si cosa el diila mensaje. (Mat. 10:5-7) Paquemodo tu puede imita con Jesus? Ayuda con el de tuyu Bible study para sabe si onde le puede predica. Por ejemplo, pregunta con ele si tiene ba le conoce quien puede beneficia na un especifico verdad  na Biblia. Despues, ayuda con ele prepara si cosa le habla y dale mira un simple manera para habla con otro acerca con ese verdad. Si posible, puede ustedes man practice usando el seccion “El Cuanto Ta Habla” y “Posible Tiene Quien Pregunta” que puede incuntra na libro Queda Alegre Hasta Para Cuando! Si hace tu se, man focus si paquemodo tu ayuda con el de tuyu Bible study que usa con el Biblia para dale un simple contestacion y na enbuenamente manera.

17. Paquemodo kita puede usa con el Mateo 10:19, 20, 29-31 para ayuda con el diaton Bible study confia con Jehova?

¹⁷ Ayuda con el de tuyu Bible study que confia con Jehova. Ya dale asiguranza si Jesus con el de suyu maga dicipulo que ayuda kanila si Jehova cay ta ama Le kanila. (Le con el Mateo 10:19, 20, 29-31, NWT.) Hace acorda con el de tuyu Bible study que ayuda tambien con ele si Jehova. Puede tu ayuda con ele que confia con Jehova si reza tu junto con ele acerca na de suyu maga goal. “El quien tan Bible study conmigo pirmi ta menciona na de suyu rezo acerca na de mio maga goal,” ya habla si Franciszek, quien ta queda na Poland. “Cuando ya mira yo si paquemodo si Jehova ya contesta con el de suyu maga rezo, ya principia dayun yo reza. Ya sinti yo con el ayuda de Jehova cuando necesita yo man day off na de mio nuevo trabajo para atende na maga miting y na convencion.”

18. Cosa ta sinti si Jehova acerca na esfuerzo que ta hace el maga hermano y hermana?

¹⁸ Ta ama gayot si Jehova con el diaton maga Bible study. Ta aprecia le con el maga esfuerzo del maga hermano y hermana para ayuda con el maga gente queda cerca con ele y ta ama le kanila por causa con ese. (Isa. 52:7) Si nuay tu con quien ta conduci Bible study ahora, puede siempre tu ayuda con el maga estudiante que progresa para na bautismo si sigui tu na otro maga publisher na diila maga Bible study.