ARTICULO 25
No Hace Sinti Duele con “Este Maga Diutay”
“No gayot desprecia ni con uno de este maga diutay.”—MAT. 18:10.
CANCION 113 Our Possession of Peace
PREVIEW *
1. Cosa ya hace si Jehova para na cada uno kanaton?
SI Jehova ya iscuji con el cada uno kanaton para queda cerca con ele. (Juan 6:44) Pensa si cosa quierre decir de ese. Mientras ya examina si Jehova enbuenamente con el billones de maga gente na este mundo, ya mira le un precioso cosa contigo—un sincero corazon quien puede ama con ele. (1 Cron. 28:9) Si Jehova conoce, ta entende y ta ama contigo. Ta puede gayot se anima kanaton!
2. Paquemodo si Jesus ya ilustra con el interes de Jehova para na cada uno del De Suyu carnero?
2 Ta ama gayot si Jehova contigo y ta ama tambien le con el de tuyu maga Cristiano hermano y hermana. Para ilustra con ese punto, si Jesus ya compara con Jehova na un pastor. Si tiene 100 carnero y ya perde el 1, cosa hay hace el pastor? “Ay deja le con el noventa y nueve na monte y ay anda le busca con el uno perdido.” Si incuntra el pastor con ese carnero, gendeh le rabia con ese. Hay queda le alegre. Cosa el punto? El cada carnero importante con Jehova. Si Jesus ya habla: “El de ustedes Tata na cielo, no quiere que ay perde ni uno de este maga diutay.”—Mat. 18:12-14.
3. Cosa kita hay discuti na este articulo?
3 No quierre kita queda el causa para man luya el diaton maga hermano y hermana. Paquemodo kita evita hace luya con otro? Y cosa kita puede hace si tiene quien ya hace sinti duele kanaton? Contesta kita con ese maga pregunta na este articulo. Pero una, hay aprende kita mas acerca con “este maga diutay” que ya refiri na Mateo capitulo 18.
QUIEN “ESTE MAGA DIUTAY”?
4. Quien “este maga diutay”?
4 “Este maga diutay” amo el maga dicipulo de Jesus que tiene diferente edad. Todo sila igual “como un bata” cay conforme sila aprende con Jesus. (Mat. 18:3) Maskin pa posible estaba sila na diferente background y cultura, y tiene diferente mirada y custumbre, todo sila ta demonstra fe con el Cristo. Y ele ta ama gayot kanila.—Mat. 18:6; Juan 1:12.
5. Cosa ta sinti si Jehova si tiene quien ta hace sinti duele con el De Suyu maga siervo?
5 Todo “este maga diutay” precioso con Jehova. Para entende con el de suyu sentido, considera si cosa kita ta sinti acerca na maga bata. Precioso sila para kanaton. Quierre kita protege kanila cay falta sila fuerza, experiencia y sabeduria gendeh igual con el maga adulto. Deverasan, no quierre kita mira que tiene quien ta sinti duele pero mas ta rabia kita si tiene quien ta hace sinti duele con el un bata. Na igual manera, quierre si Jehova protege kanaton. Ta rabia le si tiene quien ta hace sinti duele con el De Suyu maga siervo!—Isa. 63:9; Mar. 9:42.
6. Asegun na 1 Corinto 1:26-29, paquemodo el mundo ta mira con el maga dicipulo de Jesus?
6 Na cosa otro manera el maga dicipulo de Jesus igual con el “maga diutay”? Bueno, para na mundo quien ba el importante? El maga rico, prominente y poderoso. Pero, el maga dicipulo de Jesus dol gendeh importante igual na “maga diutay.” (Le con el 1 Corinto 1:26-29.) Pero, gendeh ansina el mirada de Jehova kanila.
7. Cosa quierre si Jehova que sinti kita acerca con el diaton maga hermano y hermana?
7 Ta ama si Jehova con el todo de suyu maga siervo, manada año ya man sila ta sirvi con ele o nuevo na verdad. Todo diaton hermano y hermana importante con Jehova. Poreso, debe queda tambien sila importante para kanaton. Quierre kita “ama con todo el maga [hermano],” gendeh lang con el cuanto kanila. (1 Ped. 2:17, El Nuevo Testamento) Debe conforme kita hace con el maskin cosa para protege y cuida kanila. Si sabe kita que tiene kita con quien ya puede hace sinti duele, gendeh kita debe ignora con ese y pensa que sobra lang de sensitivo ese persona y necesita le ulvida ya lang con ese. Porque el cuanto posible sinti duele? Posible por causa na diila background, el cuanto maga hermano y hermana tiene bajo mirada na diila mismo cuerpo. El otro, nuevo lang pa na verdad. No sabe pa sila si paquemodo enfrenta con el imperfeccion del otro. Maskin cosa pa el situacion, debe kita hace el cosa kita puede hace para hace bira con el paz. Omento pa, el persona quien pirmi tan sentimiento con otro necesita acepta que un negativo custumbre se que necesita le quita. Necesita le hace con ese para tene le paz na pensamiento y para na bien del otro.
CONSIDERA CON OTRO QUE MAS BUENO CONTIGO
8. Cosa custumbre el ya influencia con el maga dicipulo de Jesus?
8 Porque yan cuento si Jesus acerca con “este maga diutay”? Ya pregunta con ele el de suyu maga dicipulo: “Quien man, entonces, el mas importante na Reino del Cielo?” (Mat. 18:1) Na aquel tiempo, manada del maga Judio ta mira con el posicion y ranggo como bien importante. El un scholar ya habla: “El ricibida de honor y pagka-prominente amo el de con todo importante cosa na diila vida.”
9. Cosa necesita hace el maga dicipulo de Jesus?
9 Sabe si Jesus que necesita hace esfuerzo el de suyu maga dicipulo para quita na diila corazon con el espiritu de competicion que ya Luc. 22:26) Ta queda kita como el “menor de todo” si ‘pone kita pirmi na diaton maga pensamiento que el los demas mas bueno pa que kanaton.’ (Fil. 2:3) Si mas cultiva kita con ese custumbre, grande el posibilidad que gendeh kita puede hace sinti duele con otro.
influencia kanila el cultura del maga Judio. Ya habla le kanila: “El mas importante entre con ustedes necesita queda igual como menor de todo, y el lider necesita queda igual como un servidor.” (10. Cosa consejo de Pablo el debe kita acorda?
10 El todo diaton maga hermano y hermana mas bueno que kanaton na cuanto maga aspeto. Gendeh ese dificil mira si man focus kita con el diila maga buen calidad. Debe kita acorda con el consejo que ya dale si apostol Pablo na maga de Corinto: “Quien ba el ya hace con ustedes importante con el los demas? Tiene ba ustedes maskin cosa que noay ustedes recivi? Y si ya recivi ustedes todo ese, por que man ta man bugal pa ustedes dol noay ustedes recivi con ese?” (1 Cor. 4:7) Debe kita queda con cuidao que gendeh saca con el atencion del otro o pensa que mas bueno kita que con otro. Si el un hermano bueno dale talk o el un hermana ya puede principia manada Bible study, debe sila dale alabanza con Jehova na cosa sila ta puede hace.
PERDONA “CON TODO CORAZON”
11. Cosa el punto del ilustracion de Jesus acerca con el un rey y de suyu esclavo?
11 Despues habla si Jesus con el de suyu maga siguidores que no hace luya con otro, ya dale le un ilustracion acerca con el un rey y de suyu esclavo. El rey ya cancela con el grande debe del esclavo que no puede este paga. Despues, ese mismo esclavo nuay conforma cancela con el mas diutay debe del de suyu uban esclavo. Na uliji, ya pone el rey na preso con ese esclavo que nuay lastima. El leccion? Si Jesus ya habla: “Ansina tamen el dimio Tata na cielo ay hace con ustedes, si gendeh ustedes ay perdona con el de ustedes maga hermano con todo corazon.”—Mat. 18:21-35.
12. Si gendeh kita perdona, na cosa manera ta hace kita sinti duele con otro?
12 El cosa ya hace el esclavo nuay lang hace sinti duele con el de suyu mismo cuerpo sino con otro tambien. Una, ya hace le sinti duele con el de suyu uban esclavo cuando “ya pone con [este] na calabozo hasta ay acaba [este] paga el disuyo debe.” Ika-dos, ya hace le sinti duele con el otro maga esclavo cuando ya puede sila mira con el cosa le ya hace. “Cuando el disuyo maga uban [esclavo] ya mira el cosa ya pasa, ya queda sila bien triste.” Na igual manera, el diaton maga accion ta afecta con otro. Si tiene cosa malo ya hace kanaton el un persona y nuay kita perdona con ele, cosa posible sucede? Una, ta hace kita con ele sinti duele cay gendeh kita con ele ta perdona, ta ignora con ele y gendeh con ele ta dale mira amor. Ika-dos, gendeh queda comfortable el otro na congregacion si ta mira sila que nuay kita buen amistad con ese persona.
Hay esta ba tu rabiao o perdona tu con todo corazon? (Mira con el parapo 13-14) *
13. Cosa tu ya aprende na experiencia del un pioneer?
13 Si ta perdona kita con el diaton maga hermano y hermana, ta beneficia kita y el otro. Amo se el cosa ya experiencia el un pioneer con quien kita llama Crystal. Ya sinti le duele na cosa ya hace el un hermana na congregacion. Si Crystal ya habla: “Tiene vez, el de suyu maga palabra igual na cuchillo que ta hace iri conmigo. No quierre gane yo maskin man junto con ele na ministerio. Ya principia perde el de mio gana y el de mio alegria.” Ya sinti si Crystal que tiene le razon para man sentimiento. Pero, nuay le esta rabiao con el hermana o man focus na de suyu mismo cuerpo y na cosa le ta sinti. Con humildad le ya
aplica con el consejo que puede incuntra na articulo “Forgive From Your Heart” na The Watchtower de Octubre 15, 1999. Ya perdona le con el hermana. Si Crystal ya habla: “Ahora, ya realiza yo que todo kita ta pricura cultiva con el nuevo personalidad y si Jehova preparao perdona kanaton cada dia. Ya sinti gayot yo alivio y ya bira el de mio alegria.”14. Asegun na Mateo 18:21, 22, na cosa posible yan dificil si apostol Pedro y cosa tu ya aprende na cosa ya contesta si Jesus?
14 Sabe kita que debe kita perdona y amo se el justo cosa que debe kita hace. Pero, posible tan dificil kita siempre hace con ese. Si apostol Pedro posible ya sinti tambien ansina tiene vez. (Le con el Mateo 18:21, 22.) Cosa puede ayuda kanaton? Una, medita si paquemodo contigo ya perdona si Jehova. (Mat. 18:32, 33) Gendeh era kanaton conviene perdona si Jehova pero ya hace le se siempre. (Sal. 103:8-10) “Kita tamen necesita ama con uno y otro.” Poreso, gendeh kita puede iscuji si perdona ba kita o gendeh. Debe gayot kita perdona con el diaton maga hermano y hermana. (1 Juan 4:11) Ika-dos, medita si cosa sucede si ta perdona kita. Posible kita puede ayuda con el persona quien ya puede man kamali kanaton, mentena con el unidad na congregacion, protege con el diaton amistad con Jehova y sinti alivio. (2 Cor. 2:7; Col. 3:14) Mas pa, reza con Jehova—el quien ya pidi kanaton que perdona. No permiti con Satanas que destorba con el paz que tiene tu na de tuyu maga hermano y hermana. (Ef. 4:26, 27) Necesita kita el ayuda de Jehova para puede kita evita con el trampa de Satanas.
NO PERMITI QUE MAN LUYA TU
15. Asegun na Colosa 3:13, cosa kita puede hace si ya queda kita destorbao na accion del diaton hermano o hermana?
15 Pero, paquemodo si tiene cosa ya hace el un hermano o hermana que ya destorba gayot contigo? Cosa tu debe hace? Hace esfuerzo Luc. 6:28) Si gendeh tu puede ulvida con el cosa ya hace el de tuyu hermano, pensa si paquemodo tu atraca con ele. Mas bueno si pensa tu que gendeh intencion del hermano que hace sinti duele contigo. (Mat. 5:23, 24; 1 Cor. 13:7) Si man cuento tu con ele, no pensa que tiene le mal intencion. Pero, cosa tu hace si no quierre le tene paz? Continua “aguanta” y tene paciencia con el de tuyu hermano. (Le con el Colosa 3:13.) El mas importante, no esta rabiao con ele cay puede se hace malo con el de tuyu amistad con Jehova. No permiti con el maskin cosa que hace luya contigo. Como resulta, ta dale tu prueba que mas ta ama tu con Jehova contra na otro cosas.—Sal. 119:165.
que mentena con el paz. Habla con Jehova si cosa tu ta sinti. Pidi con ele que bendici con el persona quien ya puede hace sinti duele contigo y ayuda contigo mira con el maga buen calidad de ese persona—el maga calidad que ya gusta si Jehova con ele. (16. Cosa responsibilidad tiene el cada uno kanaton?
16 Valoroso gayot kanaton el diaton privilegio que unido sirvi con Jehova como “un turil” bajo na “un pastor.” (Juan 10:16) El libro Organized to Do Jehovah’s Will, pagina 165, ya habla: “Cay ta beneficia tu na ese unidad, tiene tu el responsibilidad que ayuda mentena con ese.” Poreso, necesita kita hace “anad con el diaton mismo cuerpo que mira con el diaton maga hermano y hermana igual si paquemodo kanila ta mira si Jehova.” Para con Jehova, todo kita precioso. Ese ba tambien el de tuyu mira na de tuyu maga hermano y hermana? Si Jehova ta nota y ta aprecia con el todo cosa tu ta hace para ayuda y cuida kanila.—Mat. 10:42.
17. Cosa kita determinao hace?
17 Ta ama kita con el diaton maga hermano y hermana. Poreso, determinao kita que gendeh hace sinti duele kanila. Ta mira kita con el diaton maga hermano y hermana que mas bueno que kanaton y quierre kita perdona kanila con todo corazon. Ojala, gendeh kita permiti con el diaton mismo cuerpo que man luya por causa con otro. Sino, “busca kita con ansias el maga cosa-cosa que ta hace crici con el paz y ta dale animo con uno y otro.”—Roma 14:19.
CANCION 130 Be Forgiving
^ par. 5 Por causa na imperfeccion, posible kita hace o habla maga cosas que puede hace sinti duele con el diaton maga hermano. Cosa kita debe hace si sucede se? Ta pricura ba kita arregla con el diaton relacion kanila? Ta pidi ba dayun kita perdon? O ta pensa ba kita que si ya sinti sila duele, diila se problema, gendeh diaton? O pronto lang ba kita sinti duele na palabra y accion del otro? Tan razon ba kita que ansina ya gayot kita—este ya gayot el diaton personalidad? O ta acepta kita que necesita kita hace maga cambio?
^ par. 53 DETALLE DE LETRATO: El un hermana rabiao con el otro hermana na congregacion. Despues sila man cuento na privado, ya ulvida ya sila con este y junto ya sirvi con alegria.