Ya nace yo del Mayo 19, 1940, na Amioûn, Lebanon. Despues del cuanto año, ya cambia diamon familia na ciudad del Tripoli donde ya engranda yo na un amable, alegre familia quien conoce y ta ama con Dios Jehova. Iyo el de con todo menor na cinco anak, tres mujer y dos hombre. Para na de mio mayores, segundo lang el buscada lavida. Centro na diamon vida el estudiada del Biblia, atendida na maga miting y ayuda con otro que conoce con Dios.

Tiene maga cuanto iscujido Cristiano na diamon congregacion. El uno amo si Michel Aboud quien ya conduci con el diamon CBS de antes. Ya aprende le el verdad na New York y ya principia predica na Lebanon del 1921. Ta acorda yo si paquemodo de respetoso y bueno le con el dos joven hermana quien ya gradua na Gilead School—si Anne y Gwen Beavor. Ya queda sila buen amiga diamon. Despues del manada decada, alegre gayot yo ya mira con Anne na United States. Cuanto tiempo despues, ya mira tambien yo con Gwen quien ya casa con Wilfred Gooch y quien ta sirvi na Bethel na branch office na London, England.

Poco lang el maga Testigo de Jehova na Lebanon cuando joven yo. Pero, con gana gayot kame  enseña con otro el cosa kame sabe acerca na Biblia. Ta hace kame se maskin pa tan contra el cuanto maga religioso lider. Tiene cuanto maga suceso que gendeh gayot yo ta ulvida.

Un dia, iyo y el de mio hermana, si Sana, ta predica na un apartment. Tiene un padre ya anda alla mismo onde kame ta predica. Asigurao, tiene con ele quien ya llama. Ya principia insulta el padre con el de mio hermana. Ya queda le violente y ya rimpuja con Sana pa-abajo na escalera que ya causa para sinti duele el de mio hermana. Tiene quien ya llama con el maga polis quien ya llega y ya asigura que tiene quien ayuda con Sara. Ya lleva sila con el padre na estacion de polis donde ya puede sila discubri que tiene este ta carga pusil. El jefe del maga polis ya pregunta con ele: “Cosa ba tu? Lider de religion o lider de gang?”

Na otro ocasion, ta acorda yo que el diamon congregacion ya arquila un bus para puede predica na un lugar que lejos na ciudad. Alegre gayot kame pero cuando ya sabe el padre con el cosa kame ta hace, ya ajunta le manada maga gente para ataca kanamon. Ya maltrata sila kanamon, ya tira pa gane piedra y ya tupa con el de mio tata. Ya acorda yo que bien masangre gayot de suyu cara. Ya bira le na bus junto con el de mio nana y el los demas kanamon malingasa ta sigui kanila atras. Gendeh gayot yo ta ulvida mientras ta limpia de mio nana con el cara del de mio tata, ya habla le: “Jehova, pabor perdona kanila. No sabe sila con el cosa sila ta hace.”

Na otro pa ocasion, ya visita kame con el diamon maga pariente na diamon lugar. Alla, ya puede kame mira con el un prominente religioso lider, un obispo, na casa del de mio aguelo. El obispo sabe que el de mio mayores maga Testigo de Jehova. Maskin pa seis año lang yo aquel tiempo, ya pricura le conmigo hace huya y ya habla: “Porque man tu gendeh pa bautizao?” Ya contesta yo que bata pa yo y para puede bautiza necesita yo aprende mas acerca na Biblia y tene fuerte fe. Nuay le gusta con el cosa yo ya contesta. Poreso, ya habla le con el de mio aguelo que nuay daw yo respeto.

Pero, poco lang se maga negativo experiencia cay el maga Lebanese amable y hospitable. Poreso, ya puede kame man cuento con el manada gente acerca na Biblia y conduci manada Bible study.

Cuando ta entra pa yo escuela, el un joven hermano de Venezuela ya visita na Lebanon. Ya atende le na miting na diamon congregacion y ya enamora con el de mio hermana, si Wafa. Nuay tarda, ya casa sila y ya queda na Venezuela. Na de suyu carta, ya pricura convinci si Wafa con el de mio tata que cambia el entero familia diamon na Venezuela. Ya hace le se cay tan miss gayot le kanamon. Na uliji, ya conforma kame y ya decidi cambia alla.

Ya llega kame na Venezuela del 1953 y ya queda na Caracas, cerca na palacio del presidente.  Como un bata, alegre gayot mira si ta pasa tiene vez el de caro coche del presidente. Pero, gendeh facil na de mio mayores que man adjust na nuevo lugar, lengguaje, cultura, comida y clima. Gane, cuando ta principia pa lang sila man adjust na diila nuevo vida, tiene cosa malo ya sucede.

Ya enferma el de mio tata. Nuay kame este expecta cay mafuerza le y tiene buen salud. Nuay kame acorda que tiene tiempo ya enferma le. Despues, ya sabe kame que tiene le pancreatic cancer y ya opera con ele. Makatriste cay despues del un semana, ya muri le.

Bien dificil gayot este para kanamon. Trece año pa lang yo aquel tiempo. Gendeh gayot kame ta expecta que hay muri diamon tata y ya sinti kame que gendeh ya kame puede queda alegre otravez. Por cuanto tiempo, yan dificil el de mio nana para acepta que nuay mas ya el de suyu marido. Pero, ya realiza kame que necesita kame continua y na ayuda de Jehova, ya puede kame aguanta. Cuando 16 año yo, ya gradua yo na high school na Caracas. Quierre gayot yo ayuda suporta con el de mio familia.

Ya llega el tiempo, el de mio hermana, si Sana, ya casa con Rubén Araujo, quien ya gradua na Gilead School y ya bira na Venezuela. Ya iscuji sila cambia na New York. El de mio familia ya decidi que entra yo escuela na universidad. Poreso, ya anda yo na New York donde ya queda yo junto con el de mio hermana y cuñao mientras ta estudia. El de mio hermana y el de suyu marido bien grande gayot influencia para progresa yo na espiritual mientras ta queda yo junto kanila. Omento pa, manada maga mature hermano na diamon congregacion, na Brooklyn Spanish. Alegre gayot yo ya conoce con kanda Milton Henschel y Frederick Franz, quien ta sirvi na Brooklyn Bethel.

Cuando cerca ya acaba el de mio primer año na universidad na New York, ya principia yo pensa acerca si cosa yo ta hace na de mio vida. Ya le yo y ya pensa enbuenamente acerca na maga articulo na magasin El Torre de Guardia acerca na maga Cristiano quien tiene maga goal na servicio con Jehova. Ya puede yo mira si paquemodo de alegre el maga pioneer y maga Bethelite na diamon congregacion y quierre tambien yo queda igual kanila. Pero, gendeh pa yo bautizao Cristiano aquel tiempo. Poreso, ya realiza yo que importante dedica de mio vida con Jehova. Ya hace yo se y ya bautiza del Marzo 30, 1957.

Despues yo bautiza, ya principia yo pensa man pioneer. Bien quierre gayot yo queda pioneer pero ta mira yo que gendeh este facil hace. Paquemodo yo arregla de mio schedule para puede yo man pioneer mientras ta entra escuela? Iyo y el de mio familia tan escribijan carta acerca na de mio decision que descanza entra escuela na universidad, bira na Venezuela y queda pioneer.

Ya bira yo na Caracas del Junio 1957. Pero, ya mira yo que gendeh bueno el situacion del de mio familia. Ta necesita sila que tiene pa otro quien suporta na financial na familia. Paquemodo yo  puede ayuda? Ya ofrece conmigo que trabaja na banco pero quierre tambien gayot yo man pioneer. Gane, amo se el razon si porque yo ya bira. Determinao yo hace con ese junto. Por cuanto año, ta trabaja yo full-time na banco y ta sirvi como un pioneer. Ya queda yo bien ocupao y bien alegre!

Ya queda yo mas alegre cuando ya conoce y ya casa yo con Sylvia, un bonita German hermana quien ta ama gayot con Jehova. Ya cambia le na Venezuela junto con el de suyu mayores. Despues, ya tiene kame dos anak, el hombre, si Michel (Mike) y el mujer, si Samira. Ya principia tambien yo cuida con el de mio nana. Ta queda le junto kanamon. Maskin pa necesita yo descanza na de mio pioneering para hace el de mio maga obligacion na familia, ya esta siempre yo activo na predicacion. Tiene maga tiempo, tan auxiliary pioneer kame de Sylvia durante el vacacion.

Ta entra pa escuela diamon maga anak cuando ya experiencia yo con el cosa yo ya menciona na principio de este articulo. Ta admiti yo que bien comfortable el diamon vida y ta respeta conmigo el maga gente quien ta trabaja na banco. Pero, el cosa gayot yo quierre amo mira sila conmigo como un siervo de Jehova. Gendeh gayot ta perde na de mio pensamiento el cosa yo ya pensa na aquel dia. Poreso, iyo y el de mio mujer ya discuti junto acerca na diamon situacion na financial. Si descanza yo de mio trabajo na banco, hay ricibi yo grande cantidad de sen. Cay nuay kame debe, ya realiza kame que si hace kame simple diamon vida, tiene kame bastante sen que puede suporta kanamon por largo tiempo.

Gendeh quel facil decision pero el de mio mujer y el de mio nana ya suporta conmigo. Puede ya tambien yo man pioneer y alegre gayot yo! Preparao ya era yo man pioneer pero tiene kame cosa ya sabe que nuay gayot kame expecta.

Un dia, ya confirma el diamon doctor que priñada si Sylvia. Nuay gayot se kame expecta! Bien alegre gayot kame pero ya pensa tambien yo con el de mio decision que man pioneer. Puede ba siempre yo man pioneer? Yan adjust dayun kame con el diamon pensamiento y emocion, y excited mira con el nuevo miembro del diamon familia. Pero, quetal el de mio plano que man pioneer?

Despues kame discuti con el diamon maga goal, ya decidi kame que man pioneer siempre yo. El diamon anak hombre, si Gabriel, ya nace del Abril 1985. Pero maskin pa ansina, yan resign yo  na banco y ya principia man regular pioneer otravez del Junio 1985. Despues del cuanto tiempo, ya tiene yo privilegio que queda miembro del Branch Committee. Pero, el branch gendeh na Caracas poreso necesita yo viaja maga 80 kilometro dos o tres dia cada semana.

El branch office puede incuntra na La Victoria poreso ya decidi kame como un familia que cambia na La Victoria para queda mas cerca na Bethel. Grande cambio gayot quel para kanamon todo. Ta aprecia gayot yo con el de mio familia. Grande ayuda gayot conmigo el diila custumbre. El de mio hermana, si Baha, preparao cuida con el diamon nana. Si Mike casao ya pero si Samira y Gabriel junto siempre kanamon na casa. Poreso, necesita sila deja con el diila maga amigo y amiga na Caracas cuando ya cambia kame na La Victoria. El de mio amable mujer, si Sylvia, necesita tambien man adjust estaba na un ciudad que manada gente para na un diutay pueblo. Y todo kame necesita man anad na mas diutay casa. Si, manada kame cosa ya hace para cambia estaba na Caracas para na La Victoria.

Pero, ya cambia ya tambien el situacion. Si Gabriel ya casa y si Samira ya queda ya aparte kanamon. Despues, ya invita kanamon de Sylvia que queda parte del familia Bethel del 2007, un privilegio que tiene kame hasta ahora. Si Mike, el diamon mayor anak, ta sirvi como un anciano y tan pioneer junto con el de suyu mujer, si Monica. Si Gabriel un anciano tambien y ta sirvi na Italy junto con el de suyu mujer, si Ambra. Si Samira un pioneer y ta sirvi como un remote volunteer na Bethel.

Si, manada yo grande decision que ya hace na de mio vida pero nuay yo arripinti con ese. Nuay yo cosa hay cambia na de mio decision. Bien grande gayot el de mio apresacion na maga assignment y privilegio que tiene yo na servicio con Jehova. Adentro na manada año, ya puede yo mira que bien importante mentena un cerca relacion con Jehova. Diutay man o grande el diaton maga decision, puede le kanaton dale el paz que mas pa na todo entendimiento. (Fil. 4:6, 7) Alegre kame de Sylvia na diamon servicio na Bethel y ya sinti que ya bendici con el maga decision que ya hace kame na diamon vida cay pirmi kame ya hace una na diamon vida con Jehova.